མའོ་ཡི་དུར་ཁང་གནས་སྤོར།

ཕྱི་ཚེས་ ༢༢ ཉིན་པའོ་ཞོན་དྲ་བའི་སྟེང་གནས་ཚུལ་སྤེལ་བ་ལྟར་ན། རྒྱ་ནག་དབུས་ཆབ་སྲིད་སྡེ་ཚན་གྱི་དྲུང་ཆེ་ཞིག་གིས་ཉེ་སྔོན་ཆབ་སྲིད་སྡེ་ཚན་གྱི་རྒྱུན་ལས་ཝང་ཐོ་ཀོ་དང་། རྒྱ་ནག་གི་སྲིད་བློན་གཞོན་པ་ཝང་ཀྲི་ཧྲན་གཉིས་གྱིས་རྒྱུན་ལས་ཚོགས་འདུ་ཞིག་གི་ཐོག མའོ་ཙེ་ཏུང་གི་དྲན་རྟེན་དུར་ཁང་དེ་མི་དམངས་དཔའ་བོའི་རྗེས་དྲན་ཁང་དུ་མིང་བསྒྱུར་དང་གནས་སྤོར་བྱ་དགོས་པའི་བསམ་ཚུལ་བཏོན་ཡོད་འདུག 

སྐབས་བཅོ་བརྒྱད་པའི་ཚོགས་ཆེན་རྗེས་གྲོང་ཁྱེར་སྤྱི་ཁྱབ་པར་ལས་འཕར་བྱ་རྒྱུར་རེ་བ་ཡོད་པའི་དྲུང་ཆེ་དེས་བརྗོད་པ་ལྟར་ན། མ་གཞི་ཝང་ཐོ་ཀོ་དང་ཝང་ཀྲི་ཧྲན་གཉིས་ཀྱི་བསམ་ཚུལ་དེར། རྒྱ་ནག་དབུས་ཆབ་སྲིད་འཐུས་མི་མང་ཆེ་བས་རྒྱབ་སྐྱོར་ཐོབ་མེད་ཀྱང་། ཞི་ཅིན་ཕེན་དང་ལི་ཁི་ཆང་སོགས་འབྱུང་འགྱུར་གྱི་མི་རབས་བཞི་བའི་རྐང་འཛིན་དཔོན་རིགས་ཚོས་མོས་མཐུན་བྱས་འདུག རྒྱུན་ལས་མང་ཆེ་བས་མོས་མཐུན་མ་ཐོབ་པ་དེ་ནི། ཧུའུ་ཅིན་ཐའོ་ནི་མའོ་རིང་ལུགས་པ་ཞིག་ཡིན་སྟབས། མའོ་རིང་ལུགས་པ་དག་གིས་རང་ཉིད་ལ་ཁ་རྡུང་དང་གནོན་ཤུགས་སྤྲོད་རྒྱུར་དོགས་པ་རེད། ཉིན་དེར་ཧུའུ་ཡིས་བསམ་ཚུལ་གང་ཡང་བཤད་མི་འདུག་ལ། ཧུའུ་ཡི་ལས་ཁུར་གྱི་དུས་ཡུན་རིང་མའོ་ཡི་དུར་ཁང་ལ་འགྱུར་མ་མི་གཏོང་བ་ཚང་མས་ཤེས་ཀྱི་ཡོད། ཅེས་བརྗོད་ཡོད་འདུག 

དྲུང་ཆེ་དེས་ཞི་ཅིན་ཕེན་དཔོན་སར་བསླེབས་རྗེས་གནད་དོན་དེའི་ཐད་ངེས་པར་དུ་འགྱུར་ལྡོག་འབྱུང་སྲིད་པའི་ངོས་འཛིན་གནང་གི་ཡོད་པ་དང་།  དེ་ནི་ཞི་ཅིན་ཕེན་རྒྱལ་སྲས་ཚོགས་པའི་ཤོག་ཁག་གི་མི་ཡིན་པས་རྒྱུ་མཚན་གྱིས་མའོ་ལ་མ་དགའ་བ་ཞིག་མ་ཡིན་པར། མའོ་ཡི་དུར་ཁང་གནས་སྤོར་དང་མིང་བསྒྱུར་བྱ་དགོས་དོན་ནི། དམངས་སེམས་གཅིག་བསྡུད་བྱ་ཐུབ་མིན་གྱི་གནད་དོན་ཞིག་ཆགས་ཡོད་པར་མ་ཟད། ལོ་རྒྱུས་ཁྲོད་རང་ཉིད་ལ་སྙན་གྲགས་རྒྱས་བྱེད་ཅིག་ཏུ་འགྱུར་གྱི་ཡོད་སྟབས། ཞིས་ཅིན་ཕེན་གྱིས་གོ་སྐབས་དེ་འཆོར་དུ་འཇུག་གི་མ་རེད་ཟེར།

གསར་འགོད་པ། ཚེ་རིང་རྒྱལ།