རྒྱ་གར་ནི་ཆོས་ལུཊ་མཐུན་སྒྲིལ་གྱི་མིག་དཔེ་ལྟ་ས་ཡིན།

ངོས་ལ་མཚོན་ན། ཀླད་པའི་རྡུལ་རྫས་ཕྲ་མོ་རྣམས་རྒྱ་གར་ནཱ་ལཎྜའི་ཤེས་ཡོན་གྱིས་ཁེངས་བསྡད་ཡོད་ལ། ལུས་པོར་ཆ་མཚོན་ནའང་རྒྱ་གར་གྱི་འབྲས་དང་དྷ་ལིར་བརྟེན་ནས་འཚོ་བསྡད་ཡོད། དེར་བརྟེན་ངོས་རང་རྒྱ་གར་གྱི་བུ་ཡིན་ལབ་ཀྱི་ཡོད།

ཉིན་འདི་འགར་༧གོང་ས་མཆོག་གིས་རྒྱ་གར་ལྷོ་ཕྱོགས་སུ་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་ཡོད་པ་ལྟར། ཟླ་སྔོན་མའི་ཕྱི་ཚེས་ ༣༠ ཉིན་༧གོང་ས་མཆོག་གིས་བྷིང་ལོར་སེན་ཇོ་སེབ་ཡེ་ཤུའི་སློབ་གྲྭའི་དགེ་ལས་སློབ་ཕྲུག་ ༣༠༠༠ ཙམ་ལ། དུས་རབས་ ༢༡ པ་ནི་གྲོས་མོལ་གྱི་དུས་རབས་ཤིག་ཆགས་དགོས་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད། སྐབས་དེར་༧གོང་ས་མཆོག་གིས། ང་ཚོའི་དམིགས་ཡུལ་ནི་དམག་དཔུང་མེད་པའི་འཛམ་གླིང་ཞིག་བསྐྲུན་རྒྱུ་དེ་ཡིན་ལ།  དེ་ལྟར་ཡོང་བར་མི་རེ་ངོ་རེ་ནས་འབད་བརྩོན་བྱ་དགོས།  དུས་རབས་ ༢༡ པ་དེ་བྱམས་བརྩེ་དང་ཞི་བདེ་ལྡན་པ་ཞིག་ཡོང་མིན་གཙོ་བོ་གཞོན་སྐྱེས་ཚོར་རག་ལས་ཡོད། ངོས་ལ་མཚོན་ན། ཀླད་པའི་རྡུལ་རྫས་ཕྲ་མོ་རྣམས་རྒྱ་གར་ནཱ་ལཎྜའི་ཤེས་ཡོན་གྱིས་ཁེངས་བསྡད་ཡོད་ལ། ལུས་པོར་ཆ་མཚོན་ནའང་རྒྱ་གར་གྱི་འབྲས་དང་དྷ་ལིར་བརྟེན་ནས་འཚོ་བསྡད་ཡོད། དེར་བརྟེན་ངོས་རང་རྒྱ་གར་གྱི་བུ་ཡིན་ལབ་ཀྱི་ཡོད། ཅེས་གསུངས་ཡོད།

 ཉིན་དེའི་ཕྱི་དྲོར་ཆོས་འཁོར་གསུམ་གླིང་ཆོས་ཚོགས་དང་ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་གཉིས་ཀྱི་གདན་ཞུ་ལྟར། ༧གོང་ས་མཆོག་གིས་ས་གནས་མང་ཚོགས་ ༧༠༠༠ ཙམ་ལ་༼ བཀའ་རྙོག་གི་དུས་སྐབས་སུ་བདེ་སྐྱིད་འཚོལ་བ། ༽ཞེས་པའི་བརྗོད་གཞིའི་ཐོག་གསུང་བཤད་གནང་སྟེ། རྒྱ་གར་ལ་ལོ་ངོ་སྟོང་ཕྲག་རིང་ཆོས་ལུགས་འཆམ་མཐུན་བྱུང་ཡོད་པ་དེ་ནི། འཛམ་གླིང་སྟེང་ཆོས་ལུགས་མཐུན་སྒྲིལ་གྱི་མིག་དཔེ་ལྟ་ས་ཞིག་ཆགས་ཡོད། རྒྱ་གར་མི་དམངས་ཚོས་སྲོལ་རྒྱུན་ནས་དར་བའི་འཚེ་མེད་ཞི་བ་དང་ཆོས་ལུགས་མཐུན་སྒྲིལ་གྱི་གཅེས་ནོར་དེ་འཛམ་གླིང་ནང་གོང་མཐོར་གཏོང་བར་འབད་བརྩོན་གནང་དགོས། ཞེས་གསུངས་འདུག

ཕྱི་ཚེས་ ༣༡ ཉིན་ Hubli གནམ་ཐང་དུ་ཕེབས་འབྱོར་སྐབས། རྒྱ་གར་གསར་འགོད་པའི་དྲི་བའི་ལན་དུ། ང་སླར་ཡང་ས་འདིར་འབྱོར་བར་དགའ་ཚོར་ཆེན་པོ་བྱུང་། མོན་གྷོ་ནི་བོད་མིའི་གཞིས་སྒར་ཙམ་དུ་མ་ཟད། ལོ་རྒྱུས་རང་བཞིན་ཅན་གྱི་གདན་སའི་སློབ་གཉེར་ཁང་གཉིས་ཀྱང་འདིར་ཡོད་ལ། སློབ་གཉེར་ཁང་དེ་ཚོའི་ནང་། སོག་རིགས་དང་ཧི་མཱ་ལ་ཡའི་རི་རྒྱུད་ཁུལ་གྱི་སློབ་གཉེར་བ་སྟོང་ཕྲག་ཁ་ཤས་ཀྱིས་སློབ་སྦྱོང་བྱེད་བཞིན་ཡོད། ལྷག་པར་དུ་ཀར་ན་ཊ་ཀ་མངའ་སྡེ་གཞུང་གིས་ས་གནས་བོད་མི་བཞི་ཁྲི་ ༤ ལྷག་ལ་གཞིས་ཆགས་ཀྱིི་མཐུན་རྐྱེན་གནང་ཡོད་པ་རེད། ཐེངས་འདིར་ངོས་རང་སླར་ཡང་ས་གནས་འདིར་འབྱོར་ཐུབ་པར་ཤིན་ཏུ་དགའ་བོ་བྱུང་ཞེས་གསུངས།

ཁ་སང་སྔ་དྲོར་༧གོང་ས་མཆོག་གིས་འབྲས་སྤུངས་འདུ་ཁང་གསར་པ་དབུ་འབྱེད་དང་རབ་གནས་དང་སྦྲགས། ངོས་རང་ཁ་སྔོན་སེ་ར་ཆོས་སྒར་དུ་ཕྱིན་ཏེ་རྩོད་རྒྱུགས་བྱས་པ་ཡིན། དེ་རིང་འདིར་འབྲས་སྤུངས་དང་དགའ་ལྡན་ལ་རྩོད་རྒྱུགས་ཤིག་བྱ་ཐུབ་ན་བསམ་བྱུང་། གང་ལྟར་ང་ཚོའི་གདན་ས་ཆེ་ཁག་གིས་གཞུང་ཆེན་སློབ་གཉེར་བྱ་རྒྱུ་དེ་དཔལ་ནཱ་ལནྡྲའི་ཆོས་བརྒྱུད་འཛིན་སྟངས་ཡང་དག་པ་ཞིག་ཆགས་ཡོད། ནཱ་ལནྡྲའི་མཁས་པ་ཚོས་བརྩམས་པའི་གཞུང་ལ་སློབ་སྦྱོང་བྱས་ཏེ་རྒྱུས་ཡོད་མཁན་ཞིག་མིན་ན་དཔལ་ནཱ་ལནྡྲའི་རྒྱུད་འཛིན་ཡིན་ཞེས་བརྗོད་ན་དགོས་པ་མེད། ཅེས་དང་།

ཤར་རྩེ་གྲྭ་ཚང་ལ་དེ་སྔོན་ཡིན་ན་ཆོས་འབྲེལ་བྱ་རྒྱུར་སྟབས་བདེ་བོ་ཞིག་བྱུང་ཡོད་པ་མ་རེད། ད་ཆར་གཙང་མ་ཆགས་ཡོད་སྟབས་ཆོས་འབྲེལ་བྱེད་བདེ་བོ་ཆགས་འདུག རྭ་སྟོད་གྲྭ་ཚང་གི་འདུ་ཁང་གསར་པ་བརྒྱབ་སྟེ་དབུ་འབྱེད་དུ་ཡོང་རོགས་ལབ་པ་ལྟར་བཅར་བ་ཡིན། ས་གནས་འདིར་འབྱོར་སྐབས་སེར་སྐྱ་མང་ཚོགས་ཀྱིས་དད་པ་དམ་ཚིག་ལ་གཡོ་བ་མེད་པར་དགའ་བསུ་ཞུས་པར་ཐུགས་རྗེ་ཆེ་ཞུ་རྒྱུ་ཡིན་ལ། རྒྱ་གར་ས་གནས་ཡུལ་པ་ཚོས་ཀྱང་དགའ་བསུའི་རྣམ་འགྱུར་ཡག་པོ་ཞིག་སྟོན་གྱི་ཡོད་པས་ཁོང་ཚོར་ཡང་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག  

ང་ཚོ་བྱེས་ལ་འཁོད་པའི་གདན་ས་ཁག་དེ་དག་དགེ་རྒན་ཁག་སློབ་སྦྱོང་བྱེད་ས་ལྟ་བུ་ཆགས་འདུག ངོས་ཀྱིས་སྔོན་མ་ནས་བཤད་ཀྱི་ཡོད། ད་ལྟའི་གནས་སྟངས་འདིའི་འོག་རྒྱ་གར་དུ་སློབ་གཉེར་བྱས་ཏེ། རང་ཡུལ་ལ་ལོག་རྗེས་སོ་སོའི་ཡུལ་དགོན་ཚོར་ཞབས་འདེགས་བསྒྲུབ་དགོས་པ་རེད། དཔེར་ན། ལ་དྭགས་དང་མོན་ཁུལ་ནས་ཡོང་བ་དེ་ཚོས་སློབ་གཉེར་བྱས་རྗེས། རང་ཡུལ་དུ་སོང་སྟེ་བསྟན་པ་དང་འགྲོ་བའི་དོན་ལ་ལས་དོན་སྒྲུབ་བཞིན་ཡོད་པ་རེད་ལ། བོད་གངས་ཅན་གྱི་ལྗོངས་སུ་ཡིན་ནའང་རྒྱ་གར་ནས་སློབ་གཉེར་བྱས་ཏེ། དགེ་བཤེས་ཆ་ཚང་ཐོན་ཡོད་མེད་ལ་མ་ལྟོས་པར་སོ་སོའི་དགོན་པར་ཕྱིན་ཏེ་དཔེ་ཁྲིད་གྱི་ཐོག་ལ་ཞབས་འདེགས་བསྒྲུབ་རྒྱུ་ཡག་པོ་བྱུང་ཡོད། ཅེས་གསུངས།  

མཐའ་མར་༧གོང་ས་མཆོག་གིས་གསུངས་དོན། ལུང་རྟོགས་ཀྱི་ཡོན་ཏན་ཞེས་པ་ནི། ལོ་ནས་ལོ་བསྟུད་དེ་སློབ་གཉེར་དང་ཉམས་ལེན་བྱས་ཏེ། སེམས་ལ་གོམས་འདྲིས་ཡོང་དགོས་པ་ཞིག་ཡིན་སྟབས། མ་འོངས་པར་ལུང་རྟོགས་ཀྱི་བསྟན་པའི་བྱ་བ་རྒྱ་ཆེན་པོ་ཞིག་ཡོང་བར། ཁྱེད་ཚོ་བཙུན་པ་ཚོས་གཞོན་དུས་ནས་ལུང་རྟོགས་ཀྱི་བསྟན་པ་ངོ་ཤེས་པའི་ཐོག་བསླབ་རྒྱུ་གལ་ཆེན་པོ་ཡིན་ལ།  དེ་བཞིན་སྦྱིན་བདག་ཚོ་ཡང་བསྟན་པའི་མེ་རོ་གསོ་རྒྱུར་ཞབས་འདེགས་སྒྲུབ་མཁན་ཞིག་ཆགས་ཡོད་དུས། ཁྱེད་རང་ཚོའི་མཐུན་རྐྱེན་སྦྱར་བ་དེ་དག་བསྟན་པའི་ཞབས་འདེགས་སྒྲུབ་ཀྱི་ཡོད་སྟབས། སོ་སོའི་ཀུན་སློང་ཡག་པོ་ཞིག་འཁྱེར་ཐུབ་ན་ཚོགས་ཆེན་པོ་གསོག་ཐུབ་ཀྱི་ཡོད། ཅེས་གསུངས་ཡོད་ལ།  

སང་ཉིན་ནས་༧གོང་ས་མཆོག་གིས་འབྲས་སྤུངས་བློ་གསལ་གླིང་དང་དགའ་ལྡན་ཤར་རྩེ་གྲྭ་ཚང་བཅས་སུ་མུ་མཐུད་མང་ཚོགས་ལ་ཆོས་འབྲེལ་འཇོག་རྒྱུ་ཡིན་པར་མ་ཟད།  སྐབས་དེར་ཆོས་ཞུ་བར་དཔལ་རྡོ་རྗེ་འཇིགས་བྱེད་ཀྱི་བཀའ་དབང་གནང་རྒྱུ་དང་གསུང་ཆོས་ཀྱི་མཇུག་ཏུ་དགེ་འདུན་འདུས་མང་ཡོངས་ནས་༧གོང་ས་མཆོག་ལ་བརྟན་བཞུགས་ཤིག་ཀྱང་འབུལ་རྒྱུ་ཡིན་འདུག

གསར་འགོད་པ། དཔལ་ལྡན།