ཚེས་ ༣༡ ཉིན་གྱི་ཞོགས་པའི་ཆུ་ཚོད་ ༡༠ ནས་ཉིན་རྒྱབ་ཆུ་ཚོད་ ༢ བར་ངྷ་ས་དབུས་བུད་མེད་ལྷན་ཚོགས་ཀྱི་གོ་སྒྲིག་འོག ནོར་གླིང་ཉེ་འགྲམ་གྱི་བཙུན་དགོན་སྒྲོལ་མ་གླིང་དུ་བཀའ་བློན་ཁྲི་པའི་འོས་མི་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་དང་། བཀའ་ཟུར་བཀྲ་ཤིས་དབང་འདུས་ལགས། ཁྲིམས་ལུགས་མཁས་པ་བློ་བཟང་སེང་གེ་ལགས་བཅས་ཀྱིས་བཀའ་བློན་ཁྲི་པའི་ལས་དོན་དང་འབྲེལ་བའི་སྐོར་ལ་མང་ཚོགས་ཀྱི་དྲི་བར་ལན་འདེབས་གནང་ཡོད་ལ། བགྲོ་གླེང་སྐབས་ཀྱི་གལ་ཆེའི་དྲི་བ་གསུམ་གྱི་ཐད་དུ་བཀའ་ཁྲིའི་འོས་མི་རེ་རེ་བཞིན་ལན་འདེབས་གནང་བ་གཤམ་གསལ་ལྟར་ཡིན།
འདི་ག་བོད་ཀྱི་དུས་བབ་གསར་འགོད་པ་ཨ་རིག་འགྱུར་མེད་ཀྱི་དྲི་བ། འདས་པའི་ལོ་ལྔ་བཅུའི་རིང་བཙན་བྱོལ་ནང་ཡིག་རྨོངས་སེལ་བའི་གྲངས་འབོར་བརྒྱ་ཆ་བརྒྱད་བཅུ་ལས་བརྒལ་ཡོད་ཀྱང་། བཙན་བྱོལ་དུ་འཚར་ལོངས་བྱུང་བའི་གཞོན་སྐྱེས་རྣམས་ལ་བོད་མི་རིགས་རང་གི་སྐད་དང་ཡི་གེ ཡུལ་སྲོལ་གོམས་གཤིས་དང་མི་རིགས་རང་གི་ཐུན་མོང་མ་ཡིན་པའི་ཆོས་དང་རིག་གཞུང་སོགས་ཀྱི་ཤེས་ཡོན་དེ་ཙམ་མེད་སྟབས། མ་འོངས་པར་འདས་པའི་ལོ་ལྔ་བཅུའི་རིང་གི་ཤེས་ཡོན་སྲིད་ཇུས་ཀྱི་ལངས་ཕྱོགས་གཞིར་བཟུང་སྟེ། གཞོན་སྐྱེས་རྣམས་ལ་བོད་ཀྱི་སྐད་དང་ཡི་གེ ཡུལ་སྲོལ་གོམས་གཤིས་སོགས་ལེགས་པོ་ཞིག་སློབ་ཆེད་ཤེས་ཡོན་སྲིད་ཇུས་གསར་པ་གང་འདྲ་ཞིག་དགོས་སམ།
བསྟན་འཛིན་རྣམ་རྒྱལ་ལགས་ཀྱི་ལན། སྐད་ཡིག་གི་གནད་དོན་ནི་དངོས་གནས་བོད་མི་རིགས་དང་འབྲེལ་བའི་གནད་དོན་ཞིག་རེད་ལ། ཧ་ཅང་གི་གལ་ཆེན་པོ་རེད། ད་ལྟ་བཙན་བྱོལ་བོད་གཞུང་འདས་པའི་ཉམས་མྱོང་ལ་བལྟས་ཏེ་ཤེས་ཡོན་སྲིད་ཇུས་གསར་བ་ཞིག་གི་སྟེང་དུ་འགྲོ་བཞིན་ཡོད་ཀྱང་། དེ་འགྲིག་གི་ཡོད་མེད་ལ་བལྟས་ཏེ་བསྒུག་དགོས་བྱུང་ན་འབྱུང་འགྱུར་གྱི་ལོ་ལྔ་དང་བཅུ་ལ་བསྒུག་ཀྱང་ར་གསལ་བོར་འཕྲོད་ཀྱི་མེད། དེར་བརྟེན་ལམ་སེང་ཐབས་ཤེས་གསར་བ་གནང་དགོས་པ་རེད། དཔེར་ན། སློབ་གྲྭ་ཁག་ཏུ་ཉིན་ལྟར་ཆུ་ཚོད་ཕྱེད་ཀ་ལྟ་བུར་བོད་སྐད་གཅིག་པུ་སྦྱོང་རྒྱུའི་འཛིན་གྲྭ་འཚོགས་པའམ། དེ་ལྟར་མ་བྱུང་ན་བདུན་རེར་ཐེངས་རེར་འཚོགས་རྒྱུ། དེ་བཞིན་སྐད་ཆ་ནི་ཡིག་ཐོག་གི་སྐད་ཆ་ཙམ་མིན་པར་རྒན་པ་དང་གཞོན་པའི་བར་དུ་སྐད་ཆ་བཤད་པར་གོ་སྟབས། སྤྱི་ཚོགས་ནང་དུ་རྒན་པ་མང་པོ་ཡོད་ལ་ཁོང་ཚོས་སློབ་ཕྲུག་མཉམ་དུ་སྐད་ཆ་བཤད་རྒྱུ། གཞན་ཡང་སློབ་ཕྲུག་མང་བོ་ཞིག་སློབ་གྲྭར་བཞག་སྟེ་ཕ་མས་ལྟ་སྐྱོང་རག་གི་མེད་པས་སྐད་འཕྲོ་བརླག་ཏུ་འགྲོ་བཞིན་ཡོད། དེ་བཞིན་སྐད་དེ་ང་ཚོའི་རིག་གཞུང་ཡིན་ཞེས་མཛད་སྒོ་ཁག་དང་འཛིན་གྲྭའི་ནང་གཅིག་པུར་བེད་སྤྱོད་གཏོང་རྒྱུ་མིན་པར། རྩོམ་འབྲིའི་རིགས་དང་གློག་བརྙན་གྱི་རིགས། གཞས་གསར་བ་བཅས་ཀྱི་རིགས་ལ་ང་ཚོས་རྒྱབ་སྐྱོར་དང་དོ་སྣང་བྱས་ཏེ། སློབ་ཕྲུག་ནས་བཟུང་བོད་སྐད་བེད་སྤྱོད་གཏོང་རྒྱུ་དང་དེ་ལ་དགའ་སྣང་བསླེབ་པ་བྱ་དགོས།
བློ་བཟང་སེངྒེ་ལགས་ཀྱི་ལན། སློབ་གྲྭ་ཁག་གི་དགེ་རྒན་སྤུས་ཀ་ལྡན་པ་ཞིག་མེད་ན། ཤོག་ཐོག་གི་སྲིད་ཇུས་གཏན་འབེབས་གནང་མཁན་བོད་གཞུང་ཡིན་ན་ཡང་། ལག་ལེན་བསྟར་མཁན་དགེ་རྒན་ཡིན་སྟབས་གཙོ་བོ་དགེ་རྒན་སྤུས་ཀ་ལྡན་པ་ཞིག་ཏུ་ཤུགས་རྒྱག་དགོས། དེ་བཞིན་སློབ་གྲྭ་ཁག་ཏུ་ཆབ་སྲིད་དང་ལོ་རྒྱུས། རིག་གཞུང་བཅས་ཀྱི་སྐོར་ནས་སློབ་སྦྱོང་སྤྲོད་རྒྱུ་ཧ་ཅང་གི་གལ་ཆེན་པོ་རེད། བོད་གཞུང་གིས་ཤེས་ཡོན་ཐོག་ལོ་རེར་དངུལ་གྱི་འགྲོ་གྲོན་བརྒྱ་ཆ་ ༡༧ ཙམ་གཏོང་གི་ཡོད་ལ། དེ་ནི་ཤེས་ཡོན་སྟེང་གཏོང་བཞིན་པའི་དངུལ་འབོར་ཕོན་ཆེན་ཡིན་ཡང་། རྒྱ་ནག་གིས་དེ་ལས་ལྷག་པའི་འཆར་གཞི་ནི། བོད་རྒྱལ་ཁབ་ཟེར་བ་འཛམ་གླིང་གི་ས་ཁྲའི་ནང་མེད་པར་བཟོ་རྒྱུ་དང་བོད་མི་རིགས་ཟེར་བ་རྩ་མེད་གཏོང་རྒྱུའི་འབད་བརྩོན་བྱེད་ཀྱི་ཡོད་སྟབས། ང་ཚོས་དེ་ལ་གདོང་ལེན་བྱ་ཆེད་བོད་སྐད་དང་བོད་ཀྱི་ངོ་བོ། བོད་ཀྱི་རིག་གཞུང་བཅས་མི་བརླག་ཆེད་ད་ལྟ་ཤེས་ཡོན་ཐོག་དངུལ་གྱི་འགྲོ་གྲོན་དེ་སྔ་ལས་ལྷག་ཅིག་དགོས་པ་རེད།
བཀྲ་ཤིས་དབང་འདུས་ལགས་ཀྱི་ལན། གཙོ་བོ་སློབ་གྲྭ་ཁག་ཏུ་དགེ་རྒན་ཡག་པོ་དགོས་པ་དང་དགེ་རྒན་ཚད་ལྡན་གསོ་སྐྱོང་གནང་རྒྱུ་ནི་ཧ་ཅང་གི་གལ་ཆེན་པོ་རེད། གཉིས་ནས་བོད་མི་རིགས་རང་གི་རིག་གཞུང་དང་སྤྱི་ཚོགས་ཚན་རིག རྒྱལ་རབས་བཅས་ཀྱི་སློབ་དེབ་གལ་ཆེན་པོ་རེད། གསུམ་པ་མང་ཚོགས་རང་གིས་དེའི་སྐོར་ལ་བགྲོ་གླེང་ཤུགས་ཆེན་གནང་རྒྱུ་དང་། ཕྲུ་གའི་ཕ་མས་གནས་ཚུལ་དེ་དག་ཤེས་པའི་ཐོག་ནས་ཕ་མར་འགན་ག་རེ་འདུག སྤྱི་ཚོགས་ནང་འགན་ག་རེ་འཁྱེར་དགོས་ཀྱི་འདུག དེ་ཚོའི་ཐོག་ཏུ་ཤུགས་ཆེ་ཙམ་རྒྱག་རྒྱུ་གལ་ཆེན་པོ་རེད།
བོད་ཀྱི་བང་ཆེན་གསར་འགོད་པ་ཆོས་ཉིད་འོད་ཟེར་གྱི་དྲི་བ། བོད་རྒྱ་འབྲེལ་མོལ་སྐབས་ཀྱི་གྲོས་གཞི་གཙོ་བོ་རྒྱ་ནག་གི་རྩ་ཁྲིམས་འོག་ནས་རྩོད་ཀྱི་ཡོད་ཐོག བོད་མིའི་སྤྱི་ཚོགས་ཀྱི་མཐོ་དམན་གཉིས་ནང་བོད་རྒྱ་འབྲེལ་མོལ་གྱི་གནས་བབ་དེ་ལ་སྐྱོན་བརྗོད་བྱེད་མཁན་དང་རྒྱབ་སྐྱོར་བྱེད་མཁན་གཉིས་ཀ་ཡོད་པས། མ་འོངས་པར་མུ་མཐུད་དེ་དེའི་སྟེང་དུ་འགྲོ་རྒྱུ་རེད་དམ། ཡང་ན་དེ་ལ་འགྱུར་བ་གཏོང་གི་རེད།
བཀྲ་ཤིས་དབང་འདུས་ལགས་ཀྱི་ལན། ད་ལྟ་དབུ་མའི་ལམ་གྱི་སྲིད་ཇུས་ཐོག་གནང་བཞིན་པའི་བོད་རྒྱ་འབྲེལ་མོལ་ནང་། རྒྱ་ནག་གཞུང་ལ་ཕུལ་བའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དེ་བོད་གཞུང་གི་སྲིད་ཇུས་རེད། ངས་དེ་མཇུག་སྐྱོང་བྱས་ན་བཀའ་མོལ་གནང་སའི་གཞི་རྩ་ཆགས་ཀྱི་རེད་སྙམ། རྒྱ་ནག་གཞུང་གིས་ཡིག་ཆ་དེ་ནི་ཕྱེད་རང་བཙན་ཞེས་སྐྱོན་འཛུགས་ཀྱིས་ངོས་ལེན་བྱས་མེད་ལ། ཡིག་ཆའི་རྩ་དོན་ལ་བལྟས་ནས་ལན་འདེབས་བྱེད་ཐུབ་མེད་མོད། རྒྱལ་སྤྱིའི་ཐོག་ང་ཚོས་སྤྲད་པའི་མིང་དོན་མཚུངས་པའི་རང་སྐྱོང་གི་ཡིག་ཆ་དེ་གཞུང་དང་གྲོས་ཚོགས་ཚང་མས་ཡིག་ཆ་འོས་ཤིང་འཚམ་པ་རེད། བོད་རྒྱ་ཞི་མོལ་གནང་རྒྱུའི་གཞི་རྟེན་ཆགས་ཀྱི་འདུག་ཅེས་རྒྱབ་སྐྱོར་ཤུགས་ཆེན་གནང་གི་ཡོད་སྟབས། མུ་མཐུད་མཇུག་སྐྱོང་གནང་རྒྱུ་གལ་ཆེན་པོ་རེད།
བློ་བཟང་སེངྒེ་ལགས་ཀྱི་ལན། རྒྱ་ཆེ་སར་གཟིགས་ཏེ་རྒྱ་ནག་གཞུང་དང་མཉམ་དུ་བཀའ་མོལ་གནང་དགོས་ན། རྒྱལ་སྤྱིའི་ནང་ཞི་བའི་རྩ་དོན་རྩོད་མཁན་ག་འདྲ་ཞིག་ཡིན་ཡང་། གཞི་འཇོག་ས་ཁྲིམས་བྱས་ཏེ་བཀའ་མོལ་གནང་ཡོད་ལ། དེ་ལ་རྒྱུ་མཚན་ཁ་ཤས་ཡོད། བོད་དོན་དེ་ལོ་རྒྱུས་གཞི་ལ་བཞག་ནས་རྩོད་རྒྱུ་ཡོད་མོད། ལོ་རྒྱུས་དེ་མགོ་ཉོག་པོ་ཡིན་པས་ཕར་ས་ཁྲ་ཞིག་བསྟན་ན། ཚུར་ས་ཁྲ་ཞིག་སྟོན་པ་དང་ཕར་ཚེས་གྲངས་ཤིག་བཤད་ན་ཚུར་ཚེས་གྲངས་ཤིག་བཤད་ངེས། གལ་སྲིད་བདེན་པ་གཞི་ལ་བཞག་ན་ཕར་བདེན་པ་ཞིག་བཤད་ན་ཚུར་བདེན་པ་ཞིག་བཤད་སྲིད་པས་འཇུ་ས་མེད་པ་ཞིག་ཆགས་སྲིད། དེས་ན་ཁྲིམས་གཞིར་བཞག་ཐོག ཁྱེད་རང་གི་རྩ་ཁྲིམས་ནང་ཐོབ་ཐང་ཡོད་ཅེས་བཀོད་འདུག དེ་ལག་ལེན་བསྟར་དགོས་ཀྱི་ཡོད་ཅེས་བརྩད་ན། ཁྲིམས་ལག་བསྟར་བྱས་ན་སོ་སོར་ཐོབ་ཐང་རག་གི་ཡོད། ལག་ལེན་དུ་མ་བསྟར་ན་ཕར་ཕྱོགས་ཁྲིམས་མཐུན་གྱི་གཞུང་ཡིན་ཞེས་པ་དེ་ཁུངས་མེད་ཆགས་འགྲོ། དེར་བརྟེན། བོད་གཞུང་གིས་རྒྱ་ནག་གི་རྩ་ཁྲིམས་གཞིར་བཟུང་ནས་བཀའ་མོལ་གནང་བ་དེ་ཐབས་ཤེས་རེད། རྒྱ་ནག་གི་རྩ་ཁྲིམས་དོན་ཚན་བཞི་པ་དང་ ༡༩༨༠ ལོའི་གནང་གཏན་འབེབས་བྱས་པའི་གྲངས་ཉུང་མི་རིགས་ཀྱི་བཅའ་ཁྲིམས་དོན་ཚན་ ༡༢ དང་། དོན་ ༣༡ བཅས་ཀྱི་ནང་དོན་ལག་ལེན་དུ་བསྟར་རོགས་ཟེར་དུས། ལག་ལེན་དུ་མ་བསྟར་ན་རྒྱ་ནག་གཞུང་ཁྲིམས་མཐུན་གྱི་རྒྱལ་ཁབ་མ་རེད་ཅེས་ཁུངས་སྐྱེལ་ཐུབ་ཀྱི་ཡོད། དབུ་མའི་ལམ་དེ་བོད་གཞུང་གི་སྲིད་ཇུས་ཡིན་པས། བཀའ་བློན་ཁྲི་པར་སུ་ཕེབས་ནའང་དེ་ལག་ལེན་དུ་བསྟར་དགོས་པ་རེད།
བསྟན་འཛིན་རྣམ་རྒྱལ་ལགས་ཀྱི་ལན། སྤྱིར་དབུ་མའི་ལམ་ལ་འགྲེལ་སྟངས་སྣ་ཚོགས་ཤིག་ཡོང་གི་ཡོད་ཀྱང་། སྙིང་དོན་ཆོལ་ཁ་གསུམ་གཅིག་ཏུ་བསྒྲིལ་བའི་ཚད་ལྡན་གྱི་རང་སྐྱོང་དགོས་པ་དེ་རེད། ཡིན་ནའང་། ༧གོང་ས་མཆོག་གིས་དུས་རྒྱུན་མཐའ་མའི་ཐག་གཅོད་དེ་མི་མང་གིས་གནང་དགོས་གསུང་གི་ཡོད་པ་དེ་ང་རང་གིས་སེམས་ལ་འཇོག་གི་ཡོད། སྤྱི་འཐུས་ལྷན་ཚོགས་ཀྱིས་༧གོང་ས་མཆོག་གིས་ཡེ་ཤེས་དབྱིངས་དཔྱད་ཀྱིས་གཟིགས་པའི་དབུ་མའི་ལམ་ལ་རྒྱབ་སྐྱོར་ཡོད་ཅེས་གཏན་འབེབས་བྱས་པ་ཡིན་སྟབས། བཀའ་ཁྲི་གསར་པས་སྲིད་ཇུས་དེ་ལག་ལེན་བསྟར་དགོས་པ་ཞིག་ཆགས་ཡོད་ཀྱང་། དངོས་ཡོད་གནས་ཚུལ་ཐོག་སྐུ་ཚབ་ཐེངས་དགུ་ལ་ཕེབས་ནས་མཐའ་མ་དེར་རྒྱ་ནག་གཞུང་གིས་ཁྱེད་རང་ཚོས་འཆར་གཞི་ཕུལ་བ་ཚང་མར་ངོས་ལེན་མེད་ཅེས་ལན་གསལ་པོ་བྱས་ཡོད། དེ་ང་ཚོས་མ་གོ་མདོག་མདོག་གིས་བསྡད་ན་སོ་སོར་མགོ་སྐོར་གཏོང་གི་ཡོད། འདི་ལ་བཀའ་བློན་ཁྲི་པ་ཙམ་མིན་པར་བོད་མི་མང་སྤྱི་འཐུས་གཙོས་མི་ཚང་མར་བསམ་བློ་གཏོང་རྒྱུའི་འགན་ཡོད། སྐབས་དང་དུས་སུ་སྲིད་ཇུས་དེ་རང་འཇགས་བཞག་ན་ནུས་པ་ག་རེ་ཆེ་རུ་གཏོང་དགོས་པ་དང་། གལ་སྲིད་ནུས་པ་ཐོན་གྱི་མེད་ན་འགྱུར་བ་ཇི་ལྟར་གཏོང་དགོས་ཀྱི་འདུག ཐབས་ལམ་ག་རེ་དགོས་ཀྱི་འདུག་སོགས་ལ་ལྟ་དགོས། གཞན་སྔོན་མའི་སྲིད་ཇུས་ཚང་མ་རང་འཇགས་འཇོག་རྒྱུ་ཡིན་ཞེས་ལབ་ན། ཉིན་རེ་བཞིན་གནས་ཚུལ་གསར་པ་དང་འགྱུར་བ་ཡོང་གི་རེད་ལ། འགྲིག་དང་མ་འགྲིག་ཡོང་གི་ཡོད་པས་དེ་ཚོ་ཚང་མར་ལེགས་བཅོས་བྱ་རྒྱུའི་ལས་འགན་དེ་བཀའ་བློན་ཁྲི་པར་ཡོད། སྐབས་བབ་ཀྱི་སྲིད་ཇུས་ལག་ལེན་བསྟར་དགོས་ལ། སྲིད་ཇུས་ལག་ལེན་དུ་བསྟར་སྐབས་འགྲུབ་དང་མ་འགྲུབ་བྱུང་ན་༧གོང་ས་མཆོག་དང་གྲོས་ཚོགས་ལ་སྙན་སེང་ཞུ་དགོས།
ཨེ་ཤ་ཡ་རང་དབང་རླུང་འཕྲིན་ཁང་ཁམས་སྐད་སྡེ་ཚན་གྱི་གསར་འགོད་པ་བསྟན་འཛིན་དབང་རྒྱལ་ལགས་ཀྱི་དྲི་བ། ༧གོང་ས་མཆོག་དང་བཙན་བྱོལ་བོད་གཞུང་གིས་བོད་ཀྱི་དོན་གྱི་བདག་པོ་དེ་བོད་ནང་གི་རྒྱ་ཆེའི་མང་ཚོགས་ཡིན་གསུང་གི་ཡོད་ལ། བོད་ནང་གི་གཞིས་ལུས་བོད་མིའི་མངོན་འདོད་བསྒྲུབ་རྒྱུ་ནི་ང་ཚོའི་ཆབ་སྲིད་འཐབ་རྩོད་ཀྱི་ལས་འགན་གཙོ་བོ་ཆགས་ཡོད། དེས་ན་འདས་པའི་ཉམས་མྱོང་གཞི་ལ་བཞག་སྟེ་བོད་ནང་གི་གཞིས་ལུས་བོད་མིའི་ཆབ་སྲིད་ཀྱི་མངོན་འདོད་གཙོ་བོ་གང་ཞིག་ཡིན་པར་ངོས་འཛིན་གནང་གི་ཡོད་དམ།
བློ་བཟང་སེང་གེ་ལགས་ཀྱི་ལན། བོད་མིའི་མངོན་འདོད་ཐད་ནས་བོད་ཕྱི་ནང་གཉིས་ཀའི་མངོན་འདོད་གཅིག་པ་རེད། ༢༠༠༨ ལོར་བོད་ཆོལ་ཁ་གསུམ་དུ་ཞི་རྒོལ་ཆེན་མོ་བྱུང་བ་དེས། བོད་ནང་གི་མི་སེར་སྤེལ་བའི་ལམ་ལུགས་ལ་འདོད་པ་མེད་པ་གསལ་བོར་བསྟན་པ་རེད། གཞིས་བྱེས་གང་ཡིན་རུང་རང་བཙན་མི་འདོད་མཁན་མེད་མོད། ༢༠༠༨ ལོའི་འབོད་ཚིག་ཁྲོད་༧གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག་ཅེས་པ་ཆོལ་ཁ་གསུམ་ལ་ཡོངས་གྲགས་ཡིན་སྟབས། ༧གོང་ས་མཆོག་བོད་མིའི་ཆོས་སྲིད་གཉིས་ཀྱི་དབུ་ཁྲིད་ལ་ངོས་འཛིན་བྱེད་ཀྱི་ཡོད་པ་ཧ་ཅང་གི་གསལ་བོ་རེད། དེར་བརྟེན་བོད་ནང་གི་གཞིས་ལུས་མི་མང་རྣམས་ནི་༧གོང་ས་མཆོག་གི་བཀའ་དགོངས་གཞིར་བཟུང་ཐོག་ཕེབས་ཀྱི་རེད་ཅེས་ཞུ་ཐུབ་ཀྱི་འདུག་ཅེས་གསུངས།
བཀྲ་ཤིས་དབང་འདུས་ལགས་ཀྱི་ལན། ༧གོང་ས་མཆོག་གི་དགོངས་གཞི་མིང་དོན་མཚུངས་པའི་བོད་རིགས་ཡོངས་ཀྱི་རང་སྐྱོང་ཞེས་པར་མང་ཚོགས་ལ་བསམ་ཤོག་བསྡུས་པ་དང། བརྟག་དཔྱད་གནང་སྐབས་བོད་ནང་གི་ཆབ་སྲིད་ལ་དོ་སྣང་ཡོད་མཁན་དང་། ལས་ཀའི་འགན་ཡོད་མཁན་རྣམས་ཀྱི་བསམ་ཚུལ་གང་ཐུབ་བསྡུས་ཡོད་ལ། དེ་ཕྱོགས་བསྡོམས་བྱེད་སྐབས་དབུ་མའི་ལམ་ལ་རྒྱབ་སྐྱོར་ཚད་མཐོན་པོ་རེད། ༧པཎ་ཆེན་སྐུ་གོང་མས་ཀྱང་རྒྱབ་སྐྱོར་གཙང་མ་གནང་ཡོད། དེ་བཞིན་བོད་ནང་དུ་བཞུགས་པའི་གལ་ཆེའི་མི་སྣ་འབའ་པ་ཕུན་ཚོགས་དབང་རྒྱལ་དང་། རྩོམ་པ་པོ་ཚེ་རིང་འོད་ཟེར་ལགས་ཀྱང་དབུ་མའི་ལམ་ལ་རྒྱབ་སྐྱོར་ཡོད་པའི་རྣམ་པ་བསྟན་ཡོད། སྤྱིར་བཏང་ཕྱི་རྒྱལ་ཁག་ཏུ་བསམ་ཚུལ་འདྲ་མིན་བཤད་མཁན་ཡོད་ནའང་མང་ཆེ་བས་དབུ་མའི་ལམ་ལ་རྒྱབ་སྐྱོར་བྱེད་ཀྱི་འདུག
བསྟན་འཛིན་རྣམ་རྒྱལ་ལགས་ཀྱི་ལན། བོད་ཕྱི་ནང་གཉིས་ཀྱི་མི་མང་གི་མངོན་འདོད་ནི་བོད་དེ་རང་དབང་ལྡན་པའི་ལུང་པ་ཞིག་དང། བོད་པའི་སྤྱི་ཚོགས་དེ་དེང་དུས་ཀྱི་འཛམ་གླིང་སྤྱི་དང་འདྲ་མཉམ་དུ་འགྲོ་ཐུབ་པའི་སྤྱི་ཚོགས་ཤིག་ཆགས་རྒྱུ་དེ་རེད། དེའི་ཐོག་ལ་བོད་ཀྱི་ཆོས་དང་རིག་གཞུང་དེ་དམིགས་བསལ་རྩ་ཆེན་པོར་བརྩི་བཞིན་ཡོད་པའི་རེ་འདུན་ཡོད་སྙམ། དེར་བརྟེན་ང་ཚོས་རྩ་དོན་བདེན་མཐའ་གསལ་བའི་ཆེད་ལས་འགུལ་ག་འདྲ་སྤེལ་ནའང་། བོད་ལ་རང་དབང་ཆེན་པོ་དང་ཡར་རྒྱས་གོང་འཕེལ་ཡོང་བའི་སྤྱི་ཚོགས་ཤིག་དགོས་ཀྱི་ཡོད། ཡང་ང་ཚོའི་སྤྱི་ཚོགས་ནང་དུ་རང་བཙན་དགོས་ཀྱི་ཡོད་མེད་ཐད་བགྲོ་གླེང་དང་བསམ་ཚུལ་ཤུགས་ཆེན་ཡོང་གི་ཡོད་ཀྱང་། སྤྱིར་རང་བཙན་དང་རང་སྐྱོང་ཟེར་བའི་ཚིག་དེ་ཚོ་ནུབ་ཕྱོགས་པའི་ཆབ་སྲིད་ཀྱི་ལྟ་བའི་ཐོག་ནས་བསྒྱུར་བའི་སྐད་ཆ་ཞིག་རེད་ལ། ང་ཚོས་ཚིག་དེ་ཚོའི་ཐོག་རྩོད་པ་རིང་པོ་བརྒྱབ་ཀྱང་ཕན་ཐོགས་མེད་པས་མདོ་དོན་བོད་ལུང་པ་ཡག་པོ་ཡོང་བ་དང་། བོད་མི་ཚོར་འཛམ་བུ་གླིང་སྤྱི་ལ་ཡོད་པའི་ཐོབ་ཐང་དང་རང་དབང་གི་ཆེད་དུ་ལས་ཀ་བྱས་ཚེ། གཞིས་ལུས་བོད་མིའི་རེ་བ་དེ་རེད་སྙམ།
ཉིན་དེར་བཀའ་ཟུར་བཀྲ་ཤིས་དབང་འདུས་ལགས་ཀྱིས་ཁོང་བཀའ་ཁྲིའི་འོས་མིར་བཞེངས་པའི་ཐད། དེང་སྐབས་མང་ཚོགས་ཁྲོད་ངའི་རྒྱབ་ཏུ་བཀའ་ཟུར་འཇུ་ཆེན་ཐུབ་བསྟན་འདུག་ཟེར་མཁཉ་དང་། བློ་བཟང་སེངྒེ་ལགས་ཀྱི་ཆུང་མ་ངའི་ཉེ་འབྲེལ་ཞིག་ཡིན་སྟབས། ངས་བཀྲས་མཐོང་གི་འོས་འཕྲོག་གི་ཡོད་པ་རེད་ཟེར་བ་སོགས་ཀྱི་དཀྲོག་གཏམ་སྣ་ཚོགས་ཤིག་ཡོང་གི་འདུག དེ་དག་གཅིག་ཀྱང་བདེན་པ་མ་རེད། གལ་སྲིད་ང་ལ་བཀའ་ཟུར་འཇུ་ཆེན་ཐུབ་བསྟན་ལགས་ཀྱིས་དངུལ་སྤྲད་པ་དང་ངའི་རྒྱབ་རྩར་ལངས་ཡོད་པའི་བདེན་དཔང་ཡོད་ཚེ། བཀའ་སྤྱིའི་དངོས་གཞིའི་འོས་བསྡུ་མ་བྱས་གོང་བོད་གཞུང་དབུས་འོས་བསྡུ་ལྷན་ཁང་དུ་ཕུལ་ཏེ་བརྟག་དཔྱད་མཐིལ་ཕྱིན་གནང་དགོས་ལ། དེ་ལྟ་བུའི་གནད་དོན་རིགས་ཡོད་ཚེ། དབུས་འོས་བསྡུ་ལྷན་ཁང་གིས་ང་ལ་ཉེས་པ་ག་རེ་བཏང་ཡང་འཁུར་རྒྱུ་ཡིན་པ་མ་ཟད། ངས་བཀའ་ཁྲིའི་འོས་མིའི་ཁྲོད་ནས་དགོངས་པ་ཞུ་རྒྱུ་ཡིན་ཞེས་གསུངས་ཡོད། འདིའི་ཐད་བློ་བཟང་སེངྒེ་ལགས་ཀྱིས། མང་ཚོགས་ཁྲོད་གླེང་སློང་སྣ་ཚོགས་ཡོང་གི་ཡོད་པ་བདེན་པ་རེད། ལྷག་པར་དུ་ང་ཚོ་གསུམ་ནི་དངོས་ཡོད་གནས་ཚུལ་ཤེས་མཁན་ཡིན་ཐོག ང་ཚོ་ཚང་མས་རང་ཐག་རང་གིས་བཅད་དེ་བཀའ་ཁྲིའི་འོས་མིར་ལངས་པ་ལས། ང་ཚོ་ལ་སུ་གཅིག་གིས་ཀྱང་སྐུལ་སློང་བྱས་པ་མེད་ལ། ང་ཚོའི་རྒྱབ་རྩར་སུ་གང་ཡང་མེད་ཟེར།
གཞན་ཡང་བཀའ་ཟུར་བཀྲས་མཐོང་ལགས་ཀྱིས་འདས་པའི་ལོ་ལྔ་བཅུའི་རིང་གི་བཙན་བྱོལ་གྱི་འཐུས་ཤོར་ཆེ་ཤོས་ནི། མང་ཚོགས་ཀྱི་སྣེ་འཁྲིད་མཁན་དང་གཞུང་འཛིན་མི་སྣ་སོགས་ཀྱི་བར་དུ་ཆོལ་ཁའི་འཐེན་ཁྱེར་བྱས་ཏེ། བོད་མིའི་བསམ་བློའི་ནུས་པ་དང་རྩ་དོན་གྱི་ནུས་པ་གཅིག་ཏུ་བསྒྲིལ་མ་ཐུབ་པར་ནུས་པ་ཆུང་ཆུང་ཞིག་ཡོད་པ་དེ་འཐོར་ཤིག་ཏུ་སོང་བ་དེ་ཡིན་ལ། མ་འོངས་པར་བོད་ཆོལ་ཁ་གསུམ་གྱི་རྡོག་རྩ་གཅིག་སྒྲིལ་གྱིས་བསམ་བློའི་ནུས་པ་གཅིག་ཏུ་སྤུངས་དགོས ཞེས་སོགས་གསུངས་སོང་།
གསར་འགོད་པ། ཨ་རིག་འགྱུར་མེད།
ད་བར་ཆོལ་ཀ་དང་ཆོས་ལུགས་ཀྱི་འཐེན་འཁྱེར་བྱས་ཏེ་གསུངས་པ་དེ་དངོས་གནས་བདེན་པ་རེད་བསམས།འོན་ཀྱང་དེ་བཞིན་བྱེད་མཁན་གཙོ་བོ་དག་འདས་ཟིན་པའི་བཀའ་བློན་བཀའ་ཁྲི་སྐོར་ཅིག་གི་མཛད་རྗེས་དང་འབྲེལ་བ་ལས་བྱུང་བ་མ་གཏོགས་མི་དཀྱུས་མ་ཞིག་ནས་བྱས་པ་མིན།མ་འོངས་བར་མི་འདི་དག་མ་རྫོགས་ཀྱི་བར་དུ་བཀའ་བློན་ཁྲི་བ་ག་ཚོད་དྲང་མོ་ཞིག་བྱུང་ནའང་གང་ཡང་བྱེད་མི་ཐུབ།
་གདོད་མ་ནས་བོད་མི་རྣམས་ཀྱིས་རང་སྐྱོན་རང་གིས་མཐོང་བཞིན་པ་དེ་དག་མི་མཐོང་ཚུལ་དུ་སྦེད་པ་དང་ཡོངས་བསང་བྱས་སྲོལ་མེད་པ་བརྟེན་གནས་དོན་མ་མང་པོ་ཞིག་ལ་གྱོང་གུ་ཆེན་པོ་ཕོག་ཡོད་པ་ནི་མཁྱེན་ལྡན་མི་སྣ་ཀུན་གྱིས་
མཁྱེན་གསལ་རེད།
བོད་ཕྱིམ་སློས་གྲྭ་དེ་དག་གི་ནང་ལ་བོད་རྒན་ཚད་ལྡན་མེད་པ་ལ་བརྟེན་ནས་
བོད་ཕྲུག་མང་པོ་ཞིག་གིས་བོད་ཡིག་ལ་དོ་སྣང་མེད་པ་ཆགས་བཞིན་པ་ནི་
གནས་ཚུལ་དངོས་མ་ཞིག་ལས་སྒྲོ་བཏགས་པ་སོགས་གཏན་ནས་མིན།བསུ་སྐྱ་སློབ་གྲྭ་ནས་བལ་ཡུལ་ལ་གོང་སེང་ལ་སླེབས་མཁན་མང་པོ་ཞིག་གིས་སློབ་གྲྭ་ལ་བོད་རྒན་ཡག་པོ་མེད་པས་སློབ་ཕྲུག་རྣམས་ཀྱིས་བོད་ཡིག་ཡག་པོ་སྦྱང་གི་མེད་པའི་སྐོར་བཤད་མཁན་ངོས་ལ་དངོས་སུ་ཐུག་སོང་། མ་ཟད་སློབ་ཕྲུག་དེ་དག་གིས་བོད་ནང་གིས་བོད་རྒན་རྣམས་དང་བཙན་འབྱོལ་ནང་གི་བོད་རྒན་པར་སྤུས་ཚད་ཁྱད་པར་ཆེན་པོ་ཡོད་པ་བཤད་ཀྱི་འདུག། སློབ་ཕྲུག་དེ་དག་གིས་བསུ་སྐྱ་སློབ་གྲྭ་ནང་བོད་རྒན་མང་པོ་ཞིག་གིས་བོད་ཡིག་སློབ་ཁྲིད་བྱེད་སྐབས་སློབ་ཕྲུག་མང་པོ་ཞིག་གི་སུན་སྣང་བྱས་ཀྱི་འདུག་མ་ཟད་བོད་ནས་བོད་ཡིག་གི་ཤེས་ཚད་གང་འཚམས་ཡོད་པ་རྣམས་ལ་བོད་རྒན་་མང་པོ་ཞིག་གིས་སློབ་ཁྲིད་བྱེད་མི་ཐུབ་པའི་དཀའ་ངལ་འཕྲད་བཞིན་འདུག་ཟེར། དཀའ་ངལ་དེ་དག་དང་གནས་ཚུལ་དེ་དག་ནི་བོད་གཞུང་སློབ་གྲྭ་ཚང་མར་
འཕྲད་བཞིན་པ་ནི་མངོན་བདེན་ཞིག་དང་།སྦེད་ཐབས་མེད་པ་དང་གང་མགྱོགས་ལེགས་བཅོས་དང་དགེ་རྒན་གྱི་སྤུས་ཚད་ཡག་ཏུ་གཏོང་དགོས་པ་ནི་མ་འོང་
བཀའ་ཁྲིར་སུ་ཕེབས་ཀྱང་འགན་བཞེས་དགོས་པ་ནི་འོས་མི་བློ་བཟང་སེང་གེ་དང་ བཀྲ་ཤིས་དབང་འདུལ་རྣམ་གཉིས་ནས་གསུངས་པ་བཞིན་རེད།
ཡིན་ན་ཡང་དྲི་བ་ཞིགཡོད་པ་ནི་འོས་མི་བཞེས་མཁན་བཀའ་ཟུར་རྣམ་གཉིས་ནས་སྔོན་མ་བཀའ་བློན་ལས་ཐོག་སྐབས་དེ་ལྟ་བུའི་ཕྱག་ལས་མ་གནང་པ་གང་ཡིན།བོད་ཡིག་ཐོག་འཕྲད་བཞིན་པ་དཀའ་ངལ་དེ་དག་མ་མཁྱེན་པ་ག་ལ་ཡིན་སྲིད། གནས་ཚུལ་དེ་དག་གསར་པ་ག་ལ་ཡིན། ཧཧཧཧཧཧཧ
གསར་འགོད་པ་ལགས།
དྲི་བ་དྲི་ལེན་གཞན་དག་ཀྱང་མུ་མཐུད་དེ་འགོད་རོགས་གནང་།
ཧ་ཅང་མཐོང་འདོད་ཀིན་་་་་ཐུགས་རྗེ་གཟིགས།།
འོས་མི་འགའ་རེའི་རང་ཉིད་ཁྱི་མིན་ལ་སྟག་དང་གངས་སེང་ཡིན་རབ་ཀྱི་རང་ཉིད་ཀྱི་རྒྱབ་ཏུ་སུ་གང་མེད་རབས་ཤོད་བཞིན་ཡོད་པ་རྟག་ཏུ་མཐོང་། དེ་ནི་མི་རྣམས་ཀྱིས་དོ་གནང་ཆེ་ཙམ་བྱེད་དགོས་ཡས་ཞིག་ཡིན། ད་དུང་བཙན་བྱོན་ནང་གི་སློབ་ཕྲུག་ཚོར་བོད་ཡིག་ཀྱི་གནས་ཚད་དམའ་བའི་རྒྱུ་རྐྱེན་དགེ་རྒན་ལ་ཡོད་རབས་གསུངས་པ་ཡིན་ན་དེ་ནི་སྤྱི་ཚོགས་སྡབས་སིག་སློང་ཡས་ཀྱི་སྐད་ཆ་ཞིག་ཡིན་ད་ཡོད་དགེ་རྒན་རྣམས་ཀྱི་ལྷག་བསམ་དང་སྙིང་སྟོབས་ལས་བོད་ཀྱི་སྐད་ཡིག་འདི་ཉིད་མ་ཤི་ཙམ་གནས་ཡོད་པ་ནི་དགེ་རྒན་རྣམས་ཀྱི་བཀྲིན་ཁོ་ན་ཡིན་ཀྱང་། བཀའ་ཁྲིའི་འོས་དམིགས་བཀའ་མོལ་དེ་འདྲ་གསུངས་པ་ཡིན་ན་ད་ཡོད་དགེ་རྒན་ཚང་མ་སེམས་ཤུགས་མེད་པར་གྱུར་ན་དེ་ནི་བོད་མི་རིགས་དང་སྐད་ཡིག་གི་གྱོང་གུན་སུབ་ཐབས་མེད་པ་ཞིག་ཏུ་མི་གྱུར་རམ།།
བཀའ་ཁྲིའི་འོས་མི་གསུམ་ཀས་བོད་མི་རིགས་ཀྱི་སྐད་ཡིག་འདིར་བོད་ཕྲུག་གཞོན་སྐྱེས་ཚོས་ཡག་པོ་ཤེས་ཐུབ་ཀྱི་མེད་པའི་གནད་དོན་རྩ་བ་ངོ་མ་ངོས་ཟིན་མེད་པར་འདྲ་གཅིག་མཐོང་གི་འདུག
བོད་མི་གཞོན་སྐྱེས་སུ་ཞིག་གིས་སློབ་གྲྭའི་ནང་དུ་སློབ་སྦྱོང་བྱེད་སྐབས་སུ་གཙོ་བོ་རང་ཉིད་ཀྱི་མི་ཚེ་ཆེད་དང་ཚེ་འདིའི་འཚོ་བ་སྒྲུབ་ཐུབ་ཆེད་དུ་རེད། བོད་ཀྱི་སྐད་ཡིག་ནང་དུ་རྒྱལ་སྤྱིའི་ཆེད་ལས་རིག་གནས་སྣ་གཅིག་ཀྱང་མེད་དུས་བོད་མི་རང་གཞན་སུ་ཡིན་ནའང་སྐད་ཡིག་འདིའི་ཐོག་ནས་འཚོ་བ་ཚོད་ལྡན་ཞིག་སྐྱེལ་ཐུབ་ཀྱི་མེད་པར་ཤེས་བཞིན་དུ་ཞེན་ཁོག་གཅིག་པོའི་ཐོག་ནས་སློབ་སྦྱོང་ཡག་པོ་བྱས་མ་ཐུབ་པ་རེད། འདི་གནད་འགག་རེད། རྩ་བ་ཐུག་ས་འདིར་རེད།
བཀའ་བསྟན་འགྱུར་ཨིན་ཡིག་དང་རྒྱ་ཡིག་ནང་དུ་ཕར་བསྒྱུར་བ་ལྟར་འཛམ་གླིང་རྒྱལ་ཁབ་ཚོད་ལྡན་ཁག་གི་ཆེད་ལས་རིག་གནས་བོད་ཀྱི་སྐད་ཡིག་ནང་དུ་ཚུར་བསྒྱུར་པ་ཡིན་ན་བོད་ཡིག་ཁོ་ནའི་ཐོག་ནས་རང་གི་མི་ཚེའི་འཚོ་རྟེན་ཡག་པོ་འགྲུབ་ཐུབ་པ་ཡོང་གི་རེད། དེར་འདྲ་བྱུང་ན་བོད་ཡིག་ལ་རང་གཞིན་གྱི་སྦྱོང་བརྩོན་བྱེད་མཁན་མང་རེ་འགྲོ་བ་ནི་ཞུ་མ་དགོས་པ་ཞིག་རེད།
གལ་སྲིད་སྔོན་མ་ནང་བཞིན་བོད་ཀྱི་སྐད་ཡིག་འདི་ནང་ཆོས་ཁོ་ན་སློབ་སྦྱོང་བྱེད་རྐྱེན་གྱི་ཆེད་དུ་བེད་སྤྱོད་གཏོང་སྡོད་ཀྱི་ཡིན་ན་སྔར་ཕྱི་མ་གཏོགས་བོད་ཡིག་འདི་འགྲོ་བ་མིའི་ཀླད་པའི་ནང་དུ་བསྡད་ཀྱི་མ་རེད།
གཉིས་ནས་བོད་ཀྱི་སྐད་ཡིག་འདི་རྒྱལ་ཁབ་སུམ་ཅུ་སུམ་བདུན་ནང་དུ་གནས་པའི་བོད་མི་རྣམས་ཀྱི་མཉམ་འབྲེལ་གྱི་གོ་བརྡ་འཕྲད་རྐྱེན་དང་མཉམ་འབྲེལ་གྱི་སྲིད་གཞུང་འཛུགས་རྐྱེན་གྱི་སྐད་ཡིག་འདི་ཡིན། བོད་ཀྱི་སྐད་ཡིག་འདི་མེད་ན་རྒྱལ་ཁབ་སུམ་ཅུ་སུམ་བདུན་ནང་དུ་གནས་པའི་བོད་མི་རྣམས་ཀྱི་བར་དུ་བརྩེ་བ་དང་མཉམ་འབྲེལ་ཟེར་བ་འདིར་ཡང་ཐག་ཇི་རིང་དུ་འགྲོ་ངེས་རེད།
བཀའ་ཁྲིའི་འོས་མི་གཤམ་མ་གཉིས་ཀྱིས་དགེ་རྒན་ཡག་པོ་དགོས་རབས་གླེང་འདུག་ཀྱང་དེ་ནི་སྤྱི་སྟངས་ཀྱི་སྐད་ཆ་ཙམ་ལས་གནས་དོན་ངོ་མ་ངོས་མ་ཟིན་པའི་སྐྱོན་ཆ་རེད་སྙམ། བོད་ཕྱི་ནང་གཉིས་ཀའི་བོད་ཡིག་གི་ཤེས་ཚོད་ཀྱི་གནས་སྟངས་འདི་འདྲ་ཞིག་བསླེབས་པའི་དུས་སྐབས་སུ་བོད་ཡིག་དགེ་རྒན་ཡག་པོ་མེད་པས་སྐྱོན་ཡིན་པར་ངོས་ལེན་བྱེད་ན་འགྲིག་གི་མ་རེད་འདོད།
དགེ་རྒན་ཡག་པོ་དགོས་ཟེར་དུས་སུ་དེང་སང་གི་དགེ་རྒན་ཚོ་ཡག་པོ་མེད་པར་ཤུགས་ཀྱི་བསྟན་གྱི་འདུག སྐད་ཆ་འདི་འདྲ་བཤད་ན་དོན་ཕན་ཡོད་པ་ཞིག་མ་མཐོང། འགའ་རེས་དགེ་རྒན་ཡག་པོ་མི་འདུག་ཟེར་བ་དང་། འགའ་རེས་སློབ་མ་ཡག་པོ་མི་འདུག་ཟེར་གྱི་ཡོད། ཡང་འགའ་རེས་ཕ་མ་ཡག་པོ་མི་འདུག་ཟེར་བ་སོགས་བྱེད་པ་པོ་ཚོའི་མ་འཇོན་རབས་གླེང་ན་རྒྱུ་མཚན་མི་འདུག་སྙམ།
ལྟོས་དང་་་་་་་་་སོ་སོར་རང་ཉིད་ཡིན་ནའང་བོད་ཡིག་ཡག་པོ་སློབ་སྦྱོང་མ་བྱས་པར་ཨིན་ཡིག་ཡག་པོ་སྦྱངས་པ་དང་ཡག་པོ་ཤེས་པ་འདི་ཚོ་རང་ཉིད་སོ་སོའི་མི་ཚེའི་ཆེད་དང་འཛམ་གླིང་ཐོག་ཏུ་རིག་གནས་ག་འདྲ་ཞིག་སྦྱོང་དགོས་ན་ཡང་སྦྱངས་ཐུབ་པའི་ཆེད་དུ་རེད། མ་གཏོགས་བོད་མི་རིགས་དང་རྒྱལ་ཁབ་བསམ་ནས་བོད་ཡིག་རྒྱབ་ཏུ་སྐྱུར་ནས་ཨིན་ཡིག་བང་དུ་ལེན་པ་མ་རེད།
བསམ་ཚུལ་ཙམ་ཤོར་ཐལ་སོང་བས་དགོངས་འགལ་མེད་པ་ཞུ།
གསར་འགོད་པ་ལགས། དྲི་བ་དྲིས་ལན་གཞན་དག་ཀྱང་འདི་ལྟར་འགོད་ཐུབ་ན་ཅི་མ་རུང་། ལྷག་པར་དུ་ད་ལྟའི་དུས་ཚོད་འདིའི་ནང་ལ་བཀའ་བློན་ཁྲི་པའི་འོས་མི་ཚོ་དང་མང་ཚོགས་ཀྱིས་བགྲོ་གླེང་བྱས་སོང་ཟེར་བ་དེ་ནི་གལ་གནད་མ་རེད། མང་ཚོས་ཀྱིས་གནད་དུ་འབབ་པའི་དྲི་བ་ག་རེ་བཏོན་སོང་བ་དང་། དེ་ལ་འོས་མི་རེ་རེའི་ངོས་ན་ལན་འདེབས་གང་འདྲ་བྱས་ཡོད་མེད་ཀྱི་འགག་རྩ་དེ་རེད།
བོད་ཀྱི་བང་ཆེན་གྱི་གསར་འགོད་པ་དང་ཨེ་ཤ་ཡ་རླུང་འཕྲིན་གྱི་གསར་འགོད་པ་གཉིས་ཀྱི་དྲི་བའི་མདོ་དོན་གཅིག་པ་རེད་ལ། ཆོས་ཉིད་འོད་ཟེར་གྱིས་སྐུ་ཚབ་ཚོས་གླེང་བཞིན་པའི་རང་སྲིད་རང་སྐྱོང་ལ་བོད་ནང་འདོད་པ་ཡོད་མེད་གཉིས་ཀ་ཡོད་སྟབས། མ་འོངས་པར་མུ་མཐུད་ནས་རང་སྲིད་རང་སྐྱོང་ཐོག་འགྲོ་གི་རེད་དམ། ཡང་ན་རང་བཙན་འདེམས་རྒྱུ་རེད་ཟེར་བ་དེ་རེད་ལ། བསྟན་འཛིན་དབང་རྒྱལ་གྱིས་ཀྱང་། བཙན་བྱོལ་ནང་བོད་ནང་གི་མངོན་འདོད་སྒྲུབ་གི་ཡོད་ན། བོད་ནང་གི་མངོན་འདོད་ངོ་མ་དེ་རང་བཙན་རེད་དམ་དབུ་མ་རེད་ཟེར་བ་དེ་རེད། དྲི་བ་འདི་གཉིས་གནད་འགག་ཆེན་པོ་ཞིག་ཡིན་ཡང་། རང་བཙན་ལ་དགའ་དྲགས་པའི་ཕྱོགས་ལྷུང་གི་ཤུགས་ཅུང་ཙམ་ཡོད་པའི་བཟོ་འདྲོ་བོ་ཞིག་མཐོང་སོང་།
ཨ་རིག་འགྱུར་མེད་ཀྱི་དྲི་བ་དེ་ནི་ཆབ་སྲིད་ཀྱི་གོ་རྟོགས་ཞན་པའི་སྤྱིར་བཏང་གི་དྲི་བ་ཞིག་རེད་ལ། དྲི་བ་འདི་ལ་ཡང་དྲི་བ་མང་པོ་ཞིག་དང་དོགས་པ་མང་པོ་ཞིག་ཡོང་སྲིད་པའི་དྲི་བ་ཞིག་རེད། དཔེར་ན། བཙན་བྱོལ་བོད་མིའི་ཡིག་རྨོངས་སེལ་བའི་མི་འབོར་གྱིས་བརྒྱ་ཆ་བརྒྱད་ཅུ་ལས་བརྒལ་ཡོད་པ་དང་། བཙན་བྱོལ་ནང་གི་གཞོན་སྐྱེས་ཚོར་བོད་པའི་སྐད་ཡིག་རིག་གཞུང་གི་གནས་ཚད་སྐྱོ་བ་གཉིས་ལ་འབྲེལ་བ་མེད་ལ། གྲོས་ཚོགས་ཀྱིས་གཏན་ལ་ཕབ་ཅིང་། ད་ལྟ་ལག་ཏུ་བསྟར་བཞིན་པའི་ཤེས་ཡོན་སྲིད་བྱུས་གསར་པ་དེ་ཆེད་དུ་བོད་པའི་སྐད་ཡིག་རིག་གཞུང་ལ་དམིགས་པ་ཞིག་ཡིན་སྟབས། དེའི་སྒང་ལ་ཤེས་ཡོན་སྲིད་བྱུས་གསར་པ་ཞིག་བཟོ་དགོས་དོན་དེ་བས་ཀྱང་མེད།
རྒྱ་ཆེའི་མང་ཚོགས་ཚོས་རང་རང་གི་ཐུགས་ཀྱི་དབུས་སུ་ཡོད་པའི་འོས་མི་སུ་ཞིག་ལ་འོས་འཕངས་འདོད་ཡོད་ཀྱང་རང་དབང་ཡིན་སྟབས་གཞན་གྱི་བརྒྱུད་སྐུལ་དང་། རང་མགོ་གཞན་འོག་ཏུ་མ་ཚུད་པ། ཕྱོགས་རིས་འཐེན་འཁྱེར་གྱི་རླུང་བུས་མ་འཁུར་བའི་ཐོག་ནས་འོས་ཤོག་གཅིག་པུ་དེ་གདེང་སྤོབས་ལྡན་པའི་ཐོག་ནས་འཕེན་རོགས། །