འཛམ་གླིང་གི་རྒྱལ་ཁབ་གསར་ཤོས།

ཟླ་འདིའི་ཕྱི་ཚེས་ ༣༠ ཉིན་སུའུ་ཌན་ལྷོ་མའི་མི་མང་གི་རང་ཐག་རང་གཅོད་ཀྱི་འོས་བསྡུའི་གྲུབ་འབྲས་ཕྱིར་བསྒྲགས་བྱས་པར། འོས་ཤོག་བརྒྱ་ཆ་ ༩༩ ཙམ་གྱིས་སུའུ་ཌན་ལྷོ་མར་རང་བཙན་འདོད་མཁན་ཆགས་ཡོད་འདུག

ཨ་ཧྥི་རི་ཀའི་སུའུ་ཌན་ལྷོ་བྱང་བར་ལོ་ངོ་བཅུ་ཕྲག་གཉིས་ལྷག་རིང་ནང་འཁྲུག་བྱས་མཐར། མི་ས་ཡ་གཉིས་ལྷག་གི་ཚེ་སྲོག་ཤོར་ཡོད་ཅིང་། ༢༠༠༥ ལོར་ལྷོ་བྱང་བར་ཞི་འགྲིག་གི་གྲོས་མཐུན་ཆིངས་ཡིག་བཞག་པ་ལྟར། འདི་ལོའི་ཕྱི་ཟླ་དང་པོའི་ནང་། སུའུ་ཌན་ལྷོ་བྱང་གཉིས་སོ་སོར་རང་བཙན་བྱ་རྒྱུ་ཡིན་ནམ། ཡང་ན་ལྷོ་བྱང་གཉིས་མཉམ་གནས་ཀྱིས་རྒྱལ་ཁབ་གཅིག་རྒྱུའི་གདམ་ཀ་དེ་གཉིས་ཐོག སུའུ་ཌན་ལྷོ་མའི་མང་ཚོགས་ལ་རང་ཐག་རང་གཅོད་ཀྱི་བསམ་ཤོག་བསྡུས་ཡོད།

རེས་གཟའ་ཉི་མའི་ཉིན་འོས་བསྡུའི་གྲུབ་འབྲས་གསལ་བསྒྲགས་བསྐྱངས་དོན་ལྟར་ན། སུའུ་ཌན་ལྷོ་མ་སུའུ་ཌན་བྱང་མ་ལས་ཁ་བྲལ་ཏེ་རྒྱལ་ཁབ་རང་བཙན་བྱ་འདོད་ཡོད་མཁན་གྱིས་བརྒྱ་ཆ་ ༩༩ ཙམ་ཟིན་ཡོད་འདུག ད་ལོའི་ཕྱི་ཟླ་ ༧ པའི་ཚེས་ ༩ ཉིན་སུའུ་ཌན་ལྷོ་བྱང་གཉིས་ཀྱི་གནད་དོན་དེའི་མཐའ་མའི་ཐག་གཅོད་ཁྱབ་བསྒྲགས་བྱ་རྒྱུ་ཡིན་འདུག་ལ། དུས་ཡུན་དེའི་རིང་ལྷོ་བྱང་གཉིས་ཀྱི་རྒྱལ་མཚམས་ཐག་གཅོད་དང་། ས་ཁུངས་དང་མི་སེར་བགོ་བཤའ། དེ་བཞིན་རྙོག་དྲ་རིགས་གྲོས་མོལ་བརྒྱུད་ཐག་གཅོད་བྱ་རྒྱུ་ཡིན་འདུག སྐབས་དེར་སུའུ་ཌན་ལྷོ་མ་ནི་འཛམ་གླིང་གི་རྒྱལ་ཁབ་གསར་ཤོས་དེ་ཆགས་རྒྱུ་ཡིན་འདུག

ཐེངས་འདིའི་འོས་བསྡུའི་མཇུག་འབྲས་ཁྱབ་བསྒྲགས་བྱས་རྗེས། སུའུ་ཌན་ལྷོ་མའི་ལས་འགུལ་སྣེ་ཁྲིད་པ་དང་། སུའུ་ཌན་ལྷོ་མའི་མ་འོངས་རྒྱལ་ཁབ་གསར་བའི་སྲིད་འཛིན་དུ་འབོད་པ་སྐུ་ཞབས་སཱལ་བཱ་ཀེར་ Salva Kiir ལགས་ཀྱིས་སུའུ་ཌན་ལྷོ་མའི་མང་ཚོགས་འདུ་འཛོམས་ཐོག དེ་སྔའི་ཁ་གཏད་སུའུ་ཌན་སྲིད་འཛིན་ཨོ་མར་ཧཱ་སན་ Omar Hassan al-Bashir  ལ་བསྔགས་བརྗོད་དང་འབྲེལ། ད་ནི་སོ་སོའི་རྒྱལ་ཁབ་ནང་མི་མང་ལ་རང་དབང་ཐོབ་པ་འདི་ནི། མི་མང་ཚོས་རང་དབང་རང་བཙན་གྱི་མངོན་འདོད་ཐོག་འོས་ཤོག་བླུགས་པའི་གྲུབ་འབྲས་རེད། ངས་ཁྱེད་ཚོར་བསྔགས་བརྗོད་ཐེངས་ས་ཡ་གཅིག་ཞུ་ཆོག ཅེས་དང་།

ཁོང་གིས་མུ་མཐུད། ད་ལྟའི་སྲིད་འཛིན་ཨོ་མར་ཧཱ་སན་ལགས་ཀྱིས་ ༢༠༠༥ ལོའི་གྲོས་ཆོད་ཁ་དན་ལ་གནས་སྟེ། ཕྱོགས་གཉིས་བར་འཆམ་མཐུན་དང་། མི་དམངས་མང་ཚོགས་ལ་ཞི་བདེ་ཆེད་ཡོང་ཆེད་བློ་སྟོབས་ཆེན་པོས་གནད་དོན་ཞི་འགྲིག་གནང་བ་རེད། ཁོང་ནི་སྐྱེས་བུ་རླབས་ཆེན་ཞིག་རེད་ལ། ང་ཚོས་ཀྱང་ཁོང་ལ་རྒྱབ་སྐྱོར་བྱ་དགོས། ལས་དོན་ད་དུང་མཇུག་རྫོགས་མེད་སྟབས། དེ་རིང་སུའུ་ཌན་ལྷོ་མའི་རང་བཙན་ཁྱབ་བསྒྲགས་བྱ་ཐུབ་ཀྱི་མེད། ང་ཚོས་གྲོས་ཆོད་ལ་གཙི་སྲུང་བྱས་ཏེ། ཞི་ལྷོད་ངང་ལས་དོན་བསྒྲུབ་ན་ང་ཚོ་བསླེབ་དགོས་ས་དེར་རིམ་གྱིས་བསླེབ་ངེས་རེད། ཅེས་བརྗོད་འདུག

རྒྱལ་ཚོགས་ཀྱི་དྲུང་ཆེ་བྷན་ཀེ་མོན་གྱིས་ཉིན་དེར་ཨ་ཧྥི་རི་ཀ་མཉམ་འབྲེལ་གྱི་ཚོགས་ཆེན་སྟེང་། ཐེངས་འདིའི་སུའུ་ཌན་མི་མང་གི་འོས་བསྡུ་དེ་དྲང་བདེན་དང་ཚགས་ཚུད་བྱུང་འདུག འོན་ཀྱང་། ད་དུང་བསྒྲུབ་དགོས་པའི་བྱ་བ་མང་པོ་ཡོད་པ་རེད། ང་ཚོས་སེམས་ཁུར་བྱ་ཡུལ་གཙོ་བོ་ཞིག་ནི་རྒྱལ་མཚམས་བདེ་འཇགས་དང་། རྒྱལ་ཁོངས་མི་སེར་གྱི་བདག་དབང་། རྒྱུ་དངོས་བགོ་བཤའ་བྱ་ཕྱོགས། རྒྱལ་ཁོངས་ས་ཐིག་གཏན་འབེབས། ལྷག་པར་དུ་ས་ཁུལ་ཁག་ཅིག་རྒྱལ་ཁོངས་གང་གི་ཕྱོགས་སུ་འགྲོ་དགོས་མིན་ཐད་བཀའ་བསྡུར་བྱེད་ཕྱོགས་བཅས་རེད། ཅེས་བརྗོད་འདུག ཐེངས་འདིའི་བསམ་ཤོག་གི་མཇུག་འབྲས་ཕྱིར་བསྒྲགས་བྱས་མ་ཐག སུའུ་ཌན་ལྷོ་མའི་ས་ཕྱོགས་གང་སར་མི་མང་གིས་དགའ་འབོད་དང་སྤྲོད་སྐྱིད་གཏོང་བ་སོགས་ཀྱི་དུས་སྟོན་གཞི་རྒྱ་ཆེན་པོ་ཞིག་སྲུང་གཙི་བྱས་ཡོད་འདུག  

སྐབས་དེར་སན་ཊེ་ནོ་ Santino Anei ཟེར་བའི་སློབ་མ་རང་ལོ་ ༡༩ ཡིན་པ་ཞིག་གིས། ད་ནི་ང་རང་གི་སེམས་པ་ཧ་ཅང་སྐྱིད་པོ་འདུག སློབ་གྲྭར་འགྲོ་རྒྱུར་ཡང་ཞེད་སྣང་དང་འཁྲུག་རྩོད་མེད་པར་གྱུར་བ་རེད། བསམ་བློ་ཞིག་བཏང་ན། སོ་སོར་རྒྱལ་ཁབ་ཡོད་མཁན་གྱི་མི་དེ་ཚོར་རྣམ་འགྱུར་དང་སེམས་ཁམས་མ་འདྲ་བ་ཞིག་ཡོད་པ་ལྟར། ད་ནི་ང་ལ་ཡང་སྤོབས་པ་ཞིག་སྐྱེ་ཡོང་གི་འདུག ས་ཆ་འདི་ང་ཚོ་རང་གི་ས་ཆ་ཡིན་སྙམ་པའི་ཚོར་སྣང་ཞིག་ཡོང་གི་འདུག ཅེས་བརྗོད་འདུག

གསར་འགོད་པ། བནྡེ་སྐྱབས།