ལོ་འགའི་སྔོན་ནས་བཟུང་མདོ་སྨད་ཀྱི་ལོ་སར་སྟངས་དེ་རྒྱའི་ལོ་སར་དང་སྟབས་བསྟུན་བྱེད་ཀྱིན་ཡོད་སྟབས། འདི་ལ་བསྒྱུར་བཅོས་གཏོང་དགོས་པའི་བསམ་ཚུལ་ཤུགས་ཆེར་ཡོང་གི་ཡོད་པ་ལྟར། ད་ལོ་ནས་བཟུང་མདོ་སྨད་གཅན་ཚ་ཁུལ་དུ་ཧོར་ཟླ་དང་པོའི་ཚེས་གཅིག་ཉིན་ལོ་སར་བཏང་མི་འདུག
ཕ་ཡུལ་གཅན་ཚ་ནས་ཡིན་ཞིང་ད་ཆར་ཨ་རིར་སློབ་སྦྱོང་བྱེད་ཀྱིན་པའི་འབྲོང་བུ་ཟླ་བ་ལགས་ཀྱིས་འདི་གའི་གསར་འགོད་པར་བཏང་བའི་གནས་ཚུལ་ལྟར་ན། ༢༠༠༨ ལོའི་བོད་ནང་གི་ཞི་རྒོལ་ཆེན་མོའི་རྗེས་ནས་བཟུང་མདོ་སྨད་གཙན་ཚ་རྫོང་གི་རྒན་ཡོལ་ལས་བྱེད་དང་ཤེས་ལྡན་མི་སྣ། གྲྭ་པ་བཅས་ཀྱིས་མགོ་ཁྲིད་དེ་མང་ཚོགས་ནང་དུ་མདོ་སྨད་ཁུལ་གྱི་ལོ་སར་རོལ་སྟངས་སྐོར་ལ་བགྲོ་གླེང་ཤུགས་ཆེར་བྱས་ཤིང་། མདོ་སྨད་ཡུལ་དུ་ཧོར་ཟླ་དང་པོའི་ཚེས་ ༡ ཉིན་ཏེ། རྒྱ་ནག་གིས་དཔྱིད་གསར་དུས་ཚིགས་སུ་འབོད་པའི་ལོ་སར་ལ་རོལ་སྟངས་འདི་ནི། བོད་ཀྱི་ངོ་བོ་མཚོན་པའི་དུས་ཆེན་ཞིག་མིན་པར་མ་ཟད། འདི་ནི་བོད་མི་རིགས་རང་གི་རིག་གཞུང་ནང་དུ་མདོ་སྨད་ཡུལ་ནས་ནོར་འཁྲུལ་ཆེན་པོ་ཞིག་ཤོར་བར་ངོས་འཛིན་བྱེད་ཀྱི་ཡོད་ཅིང་། ཐོག་མར་གཅན་ཚ་ངང་རོང་དགོན་དང་ཀོའུ་བ་དགོན། གསང་སྒྲོག་དགོན། མགུར་དགོན། ལ་མོ་བདེ་ཆེན་དགོན་སོགས་ཀྱིས་དགུ་གཏོར་དང་སྨོན་ལམ་ཆེན་མོ་སོགས་བོད་རང་གི་རྩིས་གཞུང་ལ་གཏུགས་ཡོད་པ་མ་ཟད། མདོ་སྨད་ཡུལ་ན་ཀུན་གྱིས་གལ་ཆེན་དུ་བརྩི་བཞིན་པའི་རྒྱའི་ལོ་གསར་ལ་མི་རོལ་རྒྱུའི་དམ་བཅའ་བཞག་སྟེ། དགོན་པ་སོ་སོའི་འོག་ཏུ་ཡོད་པའི་ལྷ་སྡེ་སོ་སོས་ལོ་གསར་ལེགས་སྐྱེས་འཁྱེར་མི་ཡོང་རྒྱུ་དང་། གལ་སྲིད་འཁྱེར་ཡོང་ཡང་དགོན་པའི་བླ་སྤྲུལ་དགེ་བཤེས་ཚོར་མཇལ་ཁ་རག་དཀའ་ཞིང་། གྲྭ་བ་ཚོས་ནམ་རྒྱུན་ལྟར་ཚོགས་ཆོས་གྲྭར་འགྲོ་དགོས་སྟབས་སྐྱིད་པོ་བྱས་ནས་འདུག་ཁོམ་མེད། ལོ་གསར་གྱི་ལེགས་སྐྱེས་སོགས་རྩ་ཆེན་དུ་བརྩིས་ཏེ་དགོན་པར་བསྐྱལ་མི་ཡོང་རྒྱུའི་རེ་སྐུལ་བྱས་སྟབས། རིམ་གྱིས་སྡེ་བ་རེ་རེ་ནས་འདིའི་སྐོར་ལ་གླེང་ཕྱོགས་ཤུགས་ཆེ་རུ་སོང་ཞིང་། ད་ལོའི་ཧོར་ཟླ་ ༡༢ ཚེས་ ༢༩ ཉིན་སྡེ་བ་སོ་སོའི་སྡེ་མི་ཡོངས་མ་གྲོས་བསམ་པ་གཅིག་མཐུན་ཐོག་རྒྱའི་ལོ་གསར་ལ་མི་རོལ་རྒྱུའི་ཐག་གཅོད་བྱས་འདུག་ཟེར།
ཡང་ཁོང་གིས། ད་ལྟ་དགུན་ཁའི་གུང་སེང་གི་སྐབས་དང་བསྟུན་ཏེ་ནང་མི་ཡོངས་ལྷན་འཛོམས་བྱུང་ཡོད་ཀྱང་། ད་ལོའི་ལོ་སར་ཚེས་གཅིག་གི་ཞོགས་པར་གཅན་ཚ་ཁུལ་གྱི་བོད་མི་རྣམས་ལྷོད་ལྷོད་བྱས་ཡར་ལངས་ཏེ་རྒྱུན་ལྡན་གྱི་ཟས་ལ་རོལ་བ་ལས་འཆོར་གོས་གྱོན་པ་དང་ཤོག་སྦག་སྒྲོན་པ། རི་མགོར་ལབ་རྩེ་བསྟོད་དུ་འགྲོ་བ་སོགས་ལོ་སར་སྐབས་ཀྱི་བྱེད་སྒོ་གཅིག་ཀྱང་སྤེལ་མི་འདུག ལྷག་པར་དུ་ད་ལོར་ཆེས་སེམས་སྤྲོ་བ་ཞིག་ནི་ས་ཐག་ཉེ་རིང་ན་ཡོད་པའི་ཤ་ཉེ་སྤུན་མཆེད་རྣམས་ཀྱིས་ཁ་པར་བཏང་སྟེ་ལོ་སར་ལ་མཚམས་འདྲི་བྱེད་སྐབས། ང་ཚོ་བོད་ཀྱི་ལོ་སར་ད་དུང་བསླེབ་མེད། རྒྱའི་ལོ་སར་ལ་རོལ་གྱིན་མེད་ཅེས་ལན་འདེབས་བྱེད་ཅིང་། ང་ཚོ་བོད་མི་ཡིན་པའི་ཆ་ནས་སེམས་བསམ་པའི་སྟེང་ནས་མཐུན་སྒྲིལ་དགོས་ལ། མཐུན་སྒྲིལ་འདི་མིག་གིས་མཐོང་ཡུལ་དུ་འགྱུར་ཐུབ་པའི་ལས་འགུལ་གྱི་སྒོ་ནས་ར་སྤྲོད་དགོས་པས། བོད་རིགས་ཡོངས་ཀྱིས་ལོ་གསར་དུས་ཚེ་གཅིག་ལ་གཏན་འབེབས་བཟོ་དགོས་ཀྱི་འདུག ང་ཚོ་བོད་པ་ས་ཡ་དྲུག་ནི་སྐད་ཡིག་གཅིག་དང་། རིག་གཞུང་གཅིག ཆོས་ལུགས་གཅིག་གིས་དམ་དུ་སྦྲེལ་ཡོད་པའི་མི་རིགས་གཅིག་ཡིན་སྟབས། ནམ་རྒྱུན་གོམས་ལོབས་སུ་གྱུར་བའི་རྒྱའི་ལོ་གསར་སྤངས་ཏེ་བོད་ཀྱི་ལོ་གསར་གཏོང་དགོས། ཞེས་གསུང་གི་འདུག་ཟེར།
ཡང་ངྷ་སར་གནས་བཞུགས་གཅན་བཟོད་རྒྱམ་ལགས་ཀྱིས་ཀྱང་ལོ་སྔོན་མ་ནས་བཟུང་ཁོང་གི་ཕ་ཡུལ་དུ་ཧོར་ཟླ་དང་པོའི་ཚེས་ ༡ ཉིན་ལོ་སར་ལ་རོལ་གྱི་མིན་པའི་སྐད་ཆ་ཞིག་གླེང་གིན་འདུག་ལ། ད་ལོ་ནས་བཟུང་ཚང་མས་བོད་ལུགས་ཀྱི་ལོ་སར་དང་གཅིག་མཚུངས་བྱ་ཆེད་རྒྱ་ལོའི་ལོ་སར་ལ་རོལ་མི་འདུག དཔེར་ན་གླུ་ལེན་གར་རྩེད་ལ་རོལ་བ་དང་དགའ་སྤྲོའི་རྣམ་པ་སོགས་གང་ཡང་སྟོན་གྱི་མི་འདུག དེ་ནི་གཙོ་བོ་བོད་ཡུལ་ཆོལ་ཁ་གསུམ་ལ་གཅིག་གྱུར་གྱི་ལོ་སར་ཞིག་ཡོང་རྒྱུར་དམིགས་པས་རེད་ཟེར།
གནས་ཚུལ་འདིའི་སྐོར་རྒྱ་གར་རྡོ་རྗེ་གླིང་དུ་གནས་བཞུགས་སངས་རྒྱས་རྒྱ་མཚོ་ལགས་ཀྱིས་འདི་གའི་གསར་ཁང་ལ་མཁོ་སྤྲོད་བྱས་དོན། མདོ་སྨད་གཅན་ཚ་རྫོང་གི་རྨ་མགུར་དགོན་དང་བདེ་ཆེན་དགོན། ངང་རོང་དགོན། ཀོའུ་བ་དགོན། གསང་སྒྲོག་དགོན་བཅས་གཙོས་སྣང་རའི་གྲོང་སྡེ་བརྒྱད་དང་ཧོར་མོ་ཁག་གསུམ། སྐ་ཕུག་ཚོ་གསུམ་གྱི་རྒན་རབས་པ་ཚང་མས་སྣེ་ཁྲིད་དེ་ད་ལོ་ནས་བཟུང་རྫོང་དེའི་དགོན་པ་ཁག་དང་། ཡུལ་ཚོ་ཁག་གི་སྡེ་བ་ཡོངས་ཀྱིས་ལོ་ངོ་བརྒྱད་ཅུ་ལྷག་གི་རིང་དུ་རྒྱ་མི་དང་མཉམ་དུ་ལོ་སར་གཏོང་བའི་ཨ་མདོའི་ལུགས་སྲོལ་ལ་འགྱུར་བ་གཏོང་དགོས་པར་སྐུལ་སློང་ཞུས་ཏེ། རྒྱ་ལོའི་ལོ་སར་མི་གཏོང་རྒྱུ་དང་། ༧གོང་ས་མཆོག་གཙོ་བོར་གྱུར་པའི་བོད་ཕྱི་ནང་གི་བོད་རིགས་ཡོངས་དང་། མདོ་དབུས་ཁམས་གསུམ་གྱི་ལོ་སར་གྱི་དུས་ཚིགས་གཅིག་གྱུར་གཏོང་རྒྱུའི་ཐག་གཅོད་བྱས་འདུག དེ་ནི་གཙོ་བོ་༧གོང་ས་མཆོག་དང་བོད་ཕྱི་ནང་གི་བོད་རིགས་ཚང་མ་སྐྱིད་སྡུག་མཉམ་མྱོང་དང་། དུས་ཆེན་མཉམ་སྤྱོད་ཀྱི་དམིགས་ཡུལ་བཟུང་བ་རེད། ཅེས་དང་། འོན་ཀྱང་ད་ལྟ་གཅན་ཚ་རྫོང་གི་དཔོན་རིགས་དང་མགོ་ཁྲིད་ཚོས་ས་གནས་དེ་གའི་དགོན་པ་དང་། སྡེ་བ་ཁག་གི་སྣེ་ཁྲིད་རྒན་རབས་པ་རྣམས་ལ་མི་དགའ་བའི་རྣམ་འགྱུར་བསྟན་ཏེ། སྤྱི་བདེ་མི་སྣས་གནས་ཚུལ་ཁག་ལ་རྩད་གཅོད་བྱེད་བཞིན་འདུག ཅེས་ངོ་སྤྲོད་གནང་བྱུང་།
ཨ་མདོའི་ས་ཁུལ་གྱི་ལོ་གསར་གཏོང་ཕྱོགས་སྐོར་ལ་མདོ་སྨད་དབུས་རྒྱུན་དྲུང་ཆེ་རྒྱ་རིགས་ཐར་ལགས་སུ་གླེང་མོལ་བྱེད་སྐབས་ཁོང་གིས། མདོ་སྨད་ཀྱི་ལོ་སར་སྟངས་དེར་རྒྱའི་ལོ་སར་དང་བོད་ཀྱི་ལོ་སར་ཞེས་བཤད་མཁན་ཡོད་ཀྱང་། རྒྱའི་ལོ་སར་ཙམ་མིན་པར་སྐར་རྩིས་དང་ནག་རྩིས་ཀྱི་འགྲོ་སྟངས་ལྟར་ཧོར་ཟླ་དང་བསྟུན་ཏེ་ལོ་སར་གྱིན་ཡོད་ལ། རྩིས་དེ་ནི་ཞིང་འབྲོག་གཉིས་ཀྱིས་ལོ་གཅིག་རིང་གི་དབྱར་དགུན་སྟོན་དཔྱིད་ཀྱི་དུས་ཚིགས་བཞི་བོར། ལས་ཀ་བྱེད་སྟངས་དང་འཚོ་བ་རོལ་སྟངས་སོགས་ལ་བསྟུན་ཡོད་སྟབས། དེ་ལ་དགོས་མཁོ་ཆེན་པོ་ཡོད་པ་ཞིག་ཆགས་ཡོད། དེར་བརྟེན་མདོ་སྨད་ཀྱི་ས་ཁུལ་མང་ཆེ་བ་ནག་རྩིས་ལྟར་འགྲོ་བཞིན་ཡོད་ལ། ལོ་སར་ཡང་ཧོར་ཟླ་དང་པོ་མགོ་བཟུང་མ་ཐག་གཏོང་གི་ཡོད། དེ་གཅིག་རེད། གཞན་བོད་མདོ་དབུས་ཁམས་གསུམ་དུ་སངས་རྒྱས་ཆོས་ལུགས་ཀྱི་ཆོ་ག་ཕྱག་ལེན་མང་བོ་ཞིག་སྐར་རྩིས་ལྟར་སྲུང་གཙི་བྱེད་ཀྱིན་ཡོད་ལ། ལོ་སར་སྟངས་དེ་སྔོན་ཆད་མདོ་སྨད་ཕྱོགས་སུ་མི་འདུག་ཅེས་བཤད་ཐུབ་ཀྱི་མེད་མོད། རྒྱ་ནག་ཀྲུང་ཁྲན་ཏང་བོད་དུ་ཡོང་སྟེ་བོད་ཀྱི་སྲོལ་རྒྱུན་རང་བཞིན་གྱི་ཡུལ་སྲོལ་གོམས་གཤིས་མང་བོ་ཞིག་ལ་ཕོག་ཐུག་བཏང་བར། ལོ་རབས་བརྒྱད་བཅུ་ཡས་མས་ནས་བཟུང་བསྐྱར་གསོ་བྱེད་མགོ་བརྩམས་པ་དང་། སྐབས་དེ་དག་ཏུ་བོད་ལུགས་ཀྱིས་བརྩི་སྟངས་ལྟར། ལ་སར་སྟངས་ཡང་བསྐྱར་གསོ་བྱ་རྒྱུའི་བསམ་ཚུལ་ཡོང་ཡོད། གང་ལྟར་ལོ་རབས་བརྒྱུད་བཅུ་ནས་བཟུང་བོད་ཀྱི་ལོ་རྒྱུས་རང་བཞིན་གྱི་ཡུལ་སྲོལ་གོམས་གཤིས་མང་བོ་རིམ་གྱིས་སླར་གསོ་བྱས་པ་དང་བསྟུན་ཏེ། བོད་ཀྱི་སྐར་རྩིས་ཀྱི་ལོ་སར་སྟངས་ཀྱི་རིམ་པ་འདི་ཡང་སླར་གསོ་བྱེད་ཀྱིན་པའི་རྣམ་པ་ཞིག་རེད། འདི་ཆབ་སྲིད་དང་འབྲེལ་བ་ཡོད་པ་དེ་འདྲ་གང་ཡང་མ་རེད། ཅས་ངོ་སྤྲོད་གནང་བྱུང་།
ད་ལྟ་བོད་ཀྱི་ལོ་སར་སྟངས་ཀྱི་རིམ་པར་བལྟས་ན་མདོ་སྨད་ཕྱོགས་ཀྱི་ས་ཁུལ་མང་ཆེ་བས་ལོ་གཉིས་སར་གྱིན་འདུག དེ་ནི་ཧོར་ཟླ་བརྩི་ཚུལ་གྱི་ལོ་སར་སྟངས་དེ་ཉིན་རེའི་འཚོ་བའི་དགོས་མཁོའམ། རང་རང་གི་ཁྱིམ་ཚང་དང་ནང་མི་རྣམས་ཀྱིས་ལོ་སར་གྱི་རྣམ་པ་ལྟར་ལོ་སར་གྱིན་ཡོད་ལ། གཞན་སྐར་རྩིས་ཀྱི་འགྲོ་སྟངས་དེར་བོད་ཀྱི་ལོ་སར་ཞེས་ཕལ་ཆེ་བས་ཐུན་མོང་ཐོག་ལོ་སར་གྱིན་ཡོད། གང་ལྟར་ཧོར་ཟླ་དང་པོའི་ཚེས་གཅིག་ནི་མདོ་སྨད་ཀྱི་ས་ཁུལ་ཡོངས་དང་ཁམས་ཀྱི་ས་ཁུལ་ཕྱེད། དབུས་གཙང་གི་ས་གནས་རེ་ཟུང་བཅས་ཀྱི་གནམ་ལོ་གསར་པའི་ལོ་སར་ཚེ་གཅིག་ཉིན་མོར་སྲུང་གཙི་བྱེད་ཀྱིན་ཡོད་ལ། ཉིན་དེ་ནི་རྒྱ་ནག་རྒྱལ་ཡོངས་ཀྱི་ལོ་སར་ཚེས་གཅིག་ཀྱང་ཆགས་ཡོད།
གསར་འགོད་པ། ཨ་རིག་འགྱུར་མེད།
གཅན་ཚའི་མི་མང་ལ་ཐུགས་རྗེ་ཞུ་རྒྱུ་ཡོད། ཁྱོད་ཚོའི་མི་རིགས་ལ་བཅིང་བའི་སྙིང་མར་འཕར་ལྡིང་རེ་རེ་ང་ཚོ་འདི་ནས་གོ་ཐུབ་ཀི མི་རིགས་ཀྱི་ཆེད་དུ་བཞུར་བའི་མུ་ཏིག་ལྟ་བའི་མིག་ཆུ་དེ་དག་ཀྱང་ང་ཚོ་འདི་ནས་མཐོང་ཐུབ་ཀི་ཡོད་ཡ།
ཕ་ཡུལ་གཅན་ཚ་ནས་འདི་ལྟ་བུའི་རླབས་ཆེ་བའི་ལས་འགུལ་ཞིག་སྤེལ་བར་སྙིང་ཐག་པ་ནས་བཀའ་དྲིན་ཆེ་དང་བསྔགས་བརྗོད་བྱས་དང་བྱེད་བཞིན་ཡོད། དངོས་གནས་རང་གི་རང་ངོ་ཟིན་པའི་རྟགས་ཤིག་རེད།
འདྲེ་རིག་ལྡན་ཡིན་ན་འདིས་ཅི་ཟེར། རྒྱབ་སྐྱོར་ཙོ་མ་བྱས་ནའང་ཆོག་ནི་རེད་དྲ། ཚིག་གཅིག་བསྐྱར་བྲིས་ཡང་བྲིས་བྱས་འདུག་ནོ་ཆི་ཟིག་རེད་ཀོ ལས་འགུལ་འདི་སྒོ་དམར་ནས་འགོ་བཙུགས་ཏེ་རེབ་གོང་གིས་གཞི་རྒྱ་ཆེ་ཙམ་བསྱ་ཡོད་ཀྱི་ན་ཁྱོད་ཀྱི་ཁ་ནང་ལ་མ་ཤོང་བར་སྣ་ནང་ནས་ཀྱང་བཤད་ཀྱིན་འགྲོ་བཞིན་འདུག་བཞིན་རྒྱུགས་ཀྱིན་ཡོད་པ་ངས་ཐག་གཅོད་ཐུབ། ཐག་གཅོད་ཐག་བཅད་ཟིན་ཏོ། །
ཧ་ཧ་ཧ
དེ་དངོས་གནས་ཡག་པོ་རེད་
མདོ་སྨད་གཅན་ཚའི་ཡུལ་ནས་ལོ་ངོ་བརྒྱ་ཕྲག་ཁ་ཤས་རིང་རོལ་མྱོང་བའི་རྒྱ་ལོའི་ལོ་གསར་འདི་སྤངས་ཏེ། ༧གོང་ས་སྐྱབས་མགོན་ཆེན་པོ་མཆོག་དང་། ༧གོང་ས་མཆོག་གིས་དབུ་ཁྲིད་པའི་བོད་གཞུང་དམངས་ཡོངས་ཀྱིས་རོལ་བཞིན་པའི་བོད་ལུགས་ལོ་གསར་འདི་རོལ་རྒྱུའི་དམ་བཅའ་བྱས་པ་འདི་ལ་རྗེས་སུ་ཡི་རང་དང་། བསྟོད་བསྔགས་བྱེད་ཡུལ་ཞིག་རེད་བསམ། །
༡ ང་ཚོ་བོད་རིགས་ཤིག་ཡིན་པའི་ཆ་ནས་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ནམ་ཞིག་ན་ལོ་གསར་རོལ་བཞིན་ཡོད་ན་དེ་དུས་ང་ཚོས་ལོ་གསར་གཏོང་རྒྱུ་ཡིན་ཞེས་བསམ་པ་རྣམ་དག་མཚོན་པ་དང་།
༢ རྒྱ་མི་རིགས་མཉམ་དུ་སྡོད་འདོད་མེད་ལ། རྒྱ་མི་རིགས་ཀྱིས་རོལ་བཞིན་པའི་ལོ་གསར་དགའ་སྟོན་འདི་ཡང་རྒྱ་མི་རིགས་མཉམ་དུ་གཏོང་འདོད་མེད་པའི་རྣམ་འགྱུར་བསྟན་པ།
༣ ང་ཚོ་བོད་ཆོལ་ཁ་གསུམ་གྱི་མི་མང་རྣམས་རྡོག་རྩ་གཅིག་སྒྲིལ་གྱིས་ཁ་བ་གངས་ཅན་ལྗོངས་སུ་རང་དབང་གི་ཉི་མ་ཤར་བའི་དུས། ལོ་གསར་གྱི་དུས་སྟོན་མཉམ་དུ་རོལ་བ་ལ་སོགས་པའི་དུས་སྟོན་ཁག་མཉམ་དུ་རོལ་ཐུབ་རྒྱུའི་རྟེནའབྲེལ་བཟང་པོ་ཤིག་ཀྱང་ཡིན་པས་དགའ་འོས་པའི་གཏམ་བཟང་ཤིག་རེད།།
ལོ་སར་དུས་དང་སར་སྟངས་གཉིས་ལས་ལོ་སར་སྟངས་དེ་གལ་ཆེ་གི་རེད། གཅན་ཚར་རྒྱབ་སྐྱོར་མེད། རྒྱབ་སྐྱོར་མེད། ངས་བྲིས་པ་ནོར་མེད། རྒྱབ་སྐྱོར་མེད་ཟེར་བ་ཡིན། འདི་དོན་མེད་ཀྱི་རྙཽག་གླེང་ཞིག་རེད། རྒྱ་རིགས་ཐར་གྱིས་གསལ་བོར་བཤད་འདུག
རང་དབང་ལུང་པར་ཡོད་པའི་བོད་པ་མང་པོ་ཞིག་གིས་བོད་ནང་ནས་གནས་ཚུལ་གསར་པ་ཞིག་བྱུང་མ་ཐག་གསར་འགྱུར་བརྒྱུད་ལམ་ཁག་ལ་ཁྱབ་བསྒྲགས་བྱེད་ཀྱི་འདུག བྱས་ཚད་ཁྱབ་བསྒྲགས་མ་བྱས་གོང་ལ་ཁྱབ་བསྒྲགས་བྱས་ན་འགྲིག་མིན་གྱི་དབྱེ་ཞིབ་བྱེད་གལ་ཆེ། ཕྱོགས་གཅིག་ནས་མདོ་སྨད་ཀྱི་ལོ་གསར་ལ་ཡང་རྩིས་གཞུང་དང་ལོ་རྒྱུས་ཀྱི་རྒྱབ་ལྗོངས་ཡོད་ཕྱིར་རྒྱའི་ལོ་གསར་ཞེས་མིག་ནང་གི་ཚེར་མ་ལྟ་བུར་རྩི་དོན་ཅི། རིག་གཞུང་ཞིག་ཉམས་ཆག་གཏོང་རྒྱུ་སླ་ཡང་སླར་གསོ་བྱེད་རྒྱུར་མི་རབས་མང་པོ་འགོར་བའི་ཐད་ལ་ཡང་བསམ་གཞིགས་མི་བྱེད་དོན་ཅི། ལོ་གསར་འདི་སྲུང་རྩི་བྱེད་མཁན་ཨ་མདོ་གཅིག་པུ་མིན་པར། ཁམས་ཁུལ་དང་དབུས་ཁུལ་ན་ཡང་ཧ་ཅང་མང་བར་མ་ཟད། འབྲུག་ཡུལ་ན་ཡང་འདི་ལྟར་སྲུང་རྩི་བྱེད་ཚུལ་ལ་བལྟས་ན། ལོ་གསར་གང་ཞིག་དཀར་པོ་དང་གང་ཞིག་ནག་པོ་ཡིན་པ་ཐག་གཅོད་མ་བྱས་གོང་ལ་ཞིབ་འཇུག་མཐིལ་ཕྱིན་བྱེད་གལ་ཆེ་ཞིང་། ལོ་གསར་ལ་ཡང་རྣམ་གྲངས་མང་ཚུལ་ཤེས་དགོས། ཨ་མདོའི་བྱེད་སྒོ་རྣམས་ནག་པོ་དང་དབུས་པའི་བྱེད་སྒོ་རྣམས་དཀར་པོ་ཡིན་པའི་ངེས་པ་ཅི་ལ་ཡོད། དེ་མིན་སྐད་གཅིག་གྱུར་བྱེད་རྒྱུར་ཧེབ་ལངས་ནས། བརྡ་དག་དང་མིང་ཚིག་གསར་རྙིང་གིས་ཕྱུག་པའི་མདོ་སྟོད་སྨད་ཀྱི་སྐད་ལ་སྣང་ཆུང་བྱེད་པ་ལྟ་བུར་འགྱུར་ཉེན་ཆེ་བས། བོད་ནང་གི་བྱས་ཚད་ཕྱོགས་ཆ་ཚང་མཐོང་ཡོད་པའི་གནས་ཚུལ་ཞིག་ཏུ་མ་ངེས་ཕྱིར། ལས་འགུལ་འདི་ལྟ་བུར་མཚོན་ན་རླབས་ཆེན་ཞིག་དང་ཐུགས་རྗེ་ཆེ་ཞུ་ཡུལ་ཞིག་ཏུ་ཁོ་བོས་མ་མཐོང་བས། རང་རང་སོ་སོའི་ལུགས་སུ་བསྐྱང་ན་མི་ལེགས་སམ།
རྒྱ་དང་ལོ་མཉམ་དུ་སར་ན་རྒྱ་མི་འགྱུར་གྱི་ནང་གི་བསམ་བློ་འགྱུར་ན་ངོ་མ་རྒྱ་རང་འགྱུར་བ་རེད་ཡིན་ན་ཡང་བོད་མི་མགོ་ནག་ཡོངས་རྫོགས་མཐུན་བསྒྲིལ་གྱི་ཆེད་དུ་དེ་ལྟར་ལས་འགུལ་སྤེལ་བ་ཡི་རང་ཡོད། བོད་གཞིས་བྱེས་གཉིས་ཆར་མཐུན་སྒྲིལ་རྡོག་རྩ་གཅིག་སྒྲིལ་ལ་ནམ་ཡང་མ་འཆུག རྡོག་རྩ་གཅིག་སྒྲིལརྡོག་རྩ་སྒྲིལ།།།།།།།།།།
དྲྭ་གྲོགས་ཚོར་ཞུ་རྒྱུར་དྲི་བ་གཉིས་འདུག་དེ་ལ་གསལ་བཤད་ཅིག་གནང་རོགས།
༡༽བོད་ཀྱི་ལོ་སར་དེ་ཧོར་ཟླ་དང་པོའི་ཚེས་གཅིག་ལ་མི་སར་ན་ནམ་ཞིག་ལ་སར་དགོས་པ་རེད། ང་ཚོ་བཙན་བྱོལ་བས་ལོ་གསར་ག་དུས་གཏོང་སྲོལ་ཡོད།
༢༽དེ་རིང་གཞི་ནས་ཧོར་ཟླ་བཅུ་གཉིས་པའི་ཚེས་བཞི་རེད། དེས་ན་གཙན་ཚ་ཁུལ་གྱིས་ཧོར་ཟླ་དང་པོའི་ཚེས་གཅིག་ལ་ལོ་སར་མི་འདུག་ཟེར་ན་ཇི་ལྟར་རྗོད་ཀྱི་ཡོད་པ་རེད། ངས་དངོས་གནས་གོ་མ་སོང་།
༢༠༠༨་ལོའི་བོད་ཀྱི་ཞི་བའི་གསར་བརྗེ་བྱུང་བའི་དཀའ་སྡུག་གི་ཁྲོད་དུ་མདོ་དབུས་ཁམས་གསུམ་གྱི་མི་དམངས་རྣམས་རྡོག་རྩ་གཅིག་སྒྲིལ་བྱེད་པའི་སྙིང་སྟོབས་ཐོབ་སྟེ་མི་རིགས་གཅིག་གྱུར་གྱི་འདུ་ཤེས་རྙེད་པ་དང་རང་ཉིད་ཀྱི་ལོ་ངོ་བརྒྱ་ཕྲག་དུ་མའི་གོམས་སྲོལ་ལ་བདག་པོ་བརྒྱག་རྒྱུའི་གོ་རྟོགས་སད་དེ་སྟ་གོན་གྱི་གྲ་སྒྲིག་རིམ་པར་བྱུང་དང་འབྱུང་བཞིན་པ་ལ་བསྔགས་བརྗོད་ཀྱི་མེ་ཏོག་གཏོར་བའི་འོས་སུ་གྱུར་ཏོ། །
ཁྱོད་ཚོ་ཁ་བྲོ། དངོས་གནས་རླབས་ཆེན་རེད།
སེམས་ཤུགས་ཆེ་མིན་ཁྱད་པར་གཅིག གནས་ལུགས་རྟོགས་མིན་ཁྱད་པར་གཉིས།
དགོས་ཕན་ཆེ་མིན་ཀྱིད་པར་གཙོ། དེ་བས་འདི་ལ་རྗེས་ཡི་རང།
ལོ་སར་བ་དང་མ་སར་གང་ཡིན་ནའང་གཙོ་བོ་ཞིག་མ་རེད་ཨ་མདོ་བ་དང་གཞན་ནས་གཞན་ཟེར་བ་དེ་ཚོའི་མིང་འདོག་སྟེང་ཐད་གཟབ་རོགས་ལོ་སར་བཏང་ན་མ་བཏང་ན་ཧང་སེང་དགོས་པ་ཞིག་མ་རེད།མི་རིགས་ནང་ཁུལ་མ་འཆམ་ན་ཕན་པ་གང་ཡང་མེད་གཙོ་བོ་ནི་གཅིག་བསྒྲིལ་ཡིན་དེ་ཡོད་ན་གང་ཡིན་བྱས་ཆོག
བོད་ནང་གི་སྤུན་ཟླ་རྣམས་པ་དངོས་གནས་སེམས་ཤུག་ཧ་ཅང་ཆེ་གི་ཡ།། ད་དུང་ཁྱེད་རྣམས་པ་ཚོའི་སེམས་ཀྱི་རེ་བ་་་་་་་་་་་།།་
དཔའ་བོ་་་་་དཔའ་མོ་་་་་་་དངོས་གནས་འགྱུར་མེད་རྡོ་རྗེ་བྲག་ལྟར་གནས་པའི་གཞིས་ལུས་དཔའ་བོ་དཔའ་མོ་ཁྱེད་རྣམས་པའི་སྙིང་སྟོབས་ངས་རྗེས་སུ་ཡི་རངས་ཡོད།།།།།།།།།།།།།།
གསར་འགྱུར་དེ་སེམས་ཤུགས་ཆེ་བའི་གསར་འགོད་པ་རེ་ཟུང་ནས་ཨེ་ཤ་ཡ་རང་དབང་རླུང་འཕྲིན་ཁང་སོགས་སུ་བསྒྲགས་པ་སྔ་མོ་ནས་གོ་སོང་། ད་དུང་ཨ་མདོའི་ས་ཆ་ཁ་ཤས་སུ་རྒྱ་མིའི་ལོ་སར་བཏང་འདུག་ཟེར། འོན་ཀྱང་དོན་དངོས་སུ་ཐེངས་འདིར་རྒྱའི་ལོ་སར་དང་ཨ་མདོའི་ལོ་སར་གཉིས་སྟབས་འགྲིག་བྱུང་བ་ཞིག་ལས། རྒྱ་མིས་ཨ་མདོའི་ལོ་སར་བཏང་བ་དང་ཨ་མདོ་པས་རྒྱ་མིའི་ལོ་སར་བཏང་བ་མ་རེད། དེ་ཚོ་དཀར་རྩིས་ཀྱི་འགྲོ་སྟངས་ཤིག་ཡིན་དུས་གསར་འགོད་པའི་ཧ་མ་གོས་པའང་ཁག་མི་འདུག