ཕྱི་ཚེས་ ༩ ཉིན་བོད་གཞུང་དྲ་རྒྱས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༦ ཉིན་ནེའུ་ཛི་ལན་ཌི་ཁུལ་དུ་རྟེན་གཞི་བྱས་པའི་རྒྱ་རིགས་དང་བོད་རིགས་ཤེས་ཡོན་ཅན་སྐོར་ཞིག་གིས་མཉམ་འབྲེལ་འོག ས་ཁུལ་དེའི་གྲོང་ཁྱེར་ལན་ཌིར་རྒྱ་བོད་མཛའ་འབྲེལ་མཐུན་ཚོགས་ཤིག་གསར་འཛུགས་གནང་ཡོད་འདུག
མཛད་སྒོའི་སྟེང་ས་གནས་བོད་མི་དང་རྒྱ་རིགས། བོད་དོན་རྒྱབ་སྐྱོར་བ། ཨོག་ལན་ཌི་རྒྱ་ཡིག་གསར་ཤོག་ཤིན་པའོ་ཞེས་པའི་རྩོམ་སྒྲིག་ཁང་གི་གསར་འགོད་པ་སོགས་ཁྱོན་མི་ ༣༠ ལྷག་མཉམ་ཞུགས་བྱས་ཡོད་པ་དང་། ཨོ་སི་ཊོ་ལི་ཡའི་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པ་ཟླ་སྒྲོན་ལགས་ཀྱིས་ཉིན་དེར། གསར་དུ་འཛུགས་པའི་རྒྱ་བོད་མཛའ་འབྲེལ་མཐུན་ཚོགས་ནི་༸གོང་ས་མཆོག་གི་བོད་རྒྱ་གཉིས་ཕན་དབུ་མའི་ལམ་གྱི་དགོངས་དོན་དང་། བོད་རྒྱ་མི་རིགས་བར་དོགས་པ་རྣམ་རྟོག་དང་གོ་ནོར། ཐེ་ཚོམ། ལོག་ལྟ་སོགས་སེལ་ཐབས་བྱ་རྒྱུར་ནུས་པ་ཐོན་རྒྱུ་ཡིན་པར་མ་ཟད། རྒྱ་མི་རིགས་རྣམས་ཀྱིས་ཀྱང་བོད་ཀྱི་དངོས་ཡོད་གནས་སྟངས་དང་༸གོང་ས་མཆོག་གི་དགོངས་གཞི་བཅས་ལ་གོ་རྟོགས་ཡོང་ཐུབ་རྒྱུ་བཅས་ཀྱི་གལ་ཆེའི་ལས་དོན་ཞིག་ལའང་ངོས་འཛིན་བྱེད་ཆོག་ཅེས་བརྗོད་འདུག
དེ་བཞིན་ཚོགས་པ་དེའི་ཚོགས་གཙོ་རིན་ཆེན་དོན་གྲུབ་ལགས་ཀྱིས། ཚོགས་པ་དེའི་དམིགས་ཡུལ་དང་མ་འོངས་པའི་ལས་འཆར་སྐོར་འགྲེལ་བརྗོད་གནང་དོན། རྒྱ་ནག་གཞུང་གིས་ངན་བྱུས་དང་འཁྱོག་བཤད་ཀྱི་གཡོ་ཐབས་སྣ་ཚོགས་སྤྱད་དེ། རྒྱ་བོད་མི་རིགས་བར་ཁ་བྲལ་དང་འགལ་རྐྱེན་སྣ་ཚོགས་བཟོས་ཏེ། མི་མང་གི་སེམས་ཁམས་ལ་བཟོད་པར་དཀའ་བའི་རྨ་ཁ་ཞིག་བཟོས་ཡོད་སྟབས། ང་ཚོས་༸གོང་ས་མཆོག་གི་དགོངས་གཞི་དང་རྒྱ་ཆེའི་བོད་མི་མང་གི་ཐག་གཅོད་གནང་བའི་གཉིས་སྨན་དབུ་མའི་ལམ་གྱི་རྩ་དོན་གཞིར་བཟུང་། རྒྱ་བོད་མི་རིགས་གཉིས་བར་ཕན་ཚུན་དོགས་པ་རྣམ་རྟོག་དང་། ཐེ་ཚོམ། ལོག་ལྟ་སོགས་སེལ་ཐབས་བྱ་རྒྱུ་དང་། ༸གོང་ས་མཆོག་གི་སྐུའི་འཁྲུངས་སྐར་དང་། གསུམ་བཅུའི་དུས་དྲན། དྲུག་བཞིའི་དུས་དྲན་བཅས་ཀྱི་མཚོན་དུས་ཆེན་དང་མཛད་སྒོ་ཁག་ལ་རྒྱ་བོད་མི་རིགས་གཉིས་མཉམ་ཞུགས་གནང་རྒྱུ་དང་། ལོ་གསར་གྱི་དུས་སྟོན་སྐབས་བོད་རྒྱ་མི་རིགས་གཉིས་བར་གཞས་སྣ་འཁྲབ་སྟོན་སོགས་ཕན་ཚུན་ངོ་སྤྲོད་དང་རྒྱུས་ལོན། དེ་བཞིན་ཡིད་ཆེས་ཡོང་ཐབས་བྱུ་རྒྱུ་ཡིན་ཞེས་བརྗོད་འདུག
ཡང་རྒྱ་བོད་མཛའ་འབྲེལ་མཐུན་ཚོགས་ཀྱི་ཚོགས་གཙོ་གཞོན་པ། ལོ་མང་བོད་དོན་ལ་རྒྱབ་སྐྱོར་གནང་མཁན་རྒྱ་རིགས་རྩོམ་པ་པོ་སྐུ་ཞབས་ཁྲན་ཝེ་ཅེན་ Chen WeiJian གྱིས་བོད་ཀྱི་༸གོང་ས་མཆོག་གིས་རྒྱུན་དུ་བོད་རྒྱ་མི་རིགས་གཉིས་བར་འཆམ་མཐུན་དང་ཡིད་ཆེས་ཇེ་ཆེར་སླེབས་ཆེད། བོད་རྒྱ་མཛའ་འབྲེལ་ཚོགས་པ་ཞིག་དགོས་གལ་ཆེ་བའི་བཀའ་སློབ་དང་ལམ་སྟོན་རིམ་པ་ཕེབས་དོན་ལྟར། ད་ཆ་ནིའུ་ཛི་ལན་ཌིར་རྒྱ་བོད་མཛའ་འབྲེལ་མཐུན་ཚོགས་དངོས་སུ་གསར་འཛུགས་གནང་ཐུབ་པ་བྱུང་ཡོད། མ་འོངས་པ་མཐུན་ཚོགས་ངོས་ནས་རྒྱ་མི་རིགས་རྣམ་པས་བོད་ཀྱི་དངོས་ཡོད་གནས་ཚུལ་དང་༸གོང་ས་ཏཱ་ལའི་བླ་མ་མཆོག་གི་དགོངས་གཞི་གསལ་པོར་མཁྱེན་རྟོགས་ཡོང་སླད་འབད་བརྩོན་ཞུ་རྒྱུ་ཡིན་ཞེས་བརྗོད་འདུག
གསར་འགོད་པ། ཨ་རིག་འགྱུར་མེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ད་ངོ་མ་ང་ཚོས་གཞིས་ལུས་བོད་མིའི་བསམ་འདུན་དང་གཅིག་གྱུར་གྱི་འགན་འཁུར་གྱི་ཡོད་མེད་བརྗོད་དཀའ་བའི་གནས་སུ་གྱར་འདུག་་གང་ལགས་ཞེ་ན།་བོད་ནང་ནས་མི་ལོ་་༦༠་ཙམ་རིང་སོ་སོའི་བདག་དབང་ལ་ཡིད་ཆེས་དང་སྲུང་སྐྱོབ་ཀྱིས་བོད་རང་བཙན་ཡིན།་རྒྱ་མི་བོད་ནས་ཕྱིར་རྒྱུགས་ཞེས་འབོད་སྒྲ་སྒྲོག་བཞིན་ཡོད་ཀྱང།་ང་ཚོས་འདི་ནས་རྒྱ་འོག་ཏུ་བསྡད་རྒྱུ་དང།་རྒྱ་བོད་མཛའ་ཚོགས་འཛུགས་པ།་རྒྱ་མིའི་རྒྱལ་དར་མེ་སྲེག་མི་རུང་ཟེར་གྱི་ཡོད།་ངོ་མ་རྒྱལ་གཅེས་དཔའ་བོ་དཔའ་མོའི་ཚེ་སྲོག་དང་འབོད་སྒྲ་ལ་བདག་པོ་ཡོད་དམ།