ཨི་ཇིབ་ཡར་ལངས་ཀྱི་རེ་བ།

འདི་ལོའི་ཕྱི་ཟླ་ ༡ ཚེས ༢༧ ཉིན་ཨི་ཇིབ་མི་མང་གིས་ལོ་ ༣༠ ལྷག་རིང་སྲིད་དབང་སྒེར་གཅོད་བྱེད་མཁན་སྲིད་འཛིན་མུ་བྷ་རཀ་ Mubarak གོ་གནས་ལས་འབབ་དགོས་པའི་དགོས་འདུན་འོག ཨི་ཇིབ་ཀྱི་ས་གནས་དང་གྲོང་ཁྱེར་མང་པོ་ཞིག་ཏུ་ཡར་ལངས་རྒྱུན་ཆད་མེད་པར་རྒྱག་གི་ཡོད་པ་ལྟར། ཕྱི་ཚེས་ ༦ ཉིན་ཨི་ཇིབ་སྲིད་འཛིན་གཞོན་པ་ཨོ་མར་སུ་ལི་མན་ལགས་ཁ་གཏད་ཤོག་ཁག་གི་མགོ་འཁྲིད་པར་ཐུག་འཕྲད་བྱས་ཡོད་འདུག སྐབས་དེར་ཕྱོགས་ཕན་ཚུན་བར་རང་དབང་གི་ཐོག་ནས་གསར་འགོད་པ་གཏོང་དགོས་པ་དང་། གཞུང་གིས་འཛིན་བཟུང་བཀག་ཉར་བྱས་ཡོད་པའི་ཞི་རྒོལ་བ་རྣམས་ཀློད་གྲོལ་གཏོང་དགོས་པ་བཅས་ཀྱི་ཐད་གྲོས་མོལ་བྱས་འདུག

སྲིད་འཛིན་གཞོན་པས་གཞུང་གི་རྩ་ཁྲིམས་དང་ཆབ་སྲིད་ཀྱི་གནད་དོན། དེ་བཞིན་སྒྲིག་སྲོལ་དང་གྲོས་གཞི་སོགས་ལ་བཟོ་བཅོས་བྱ་རྒྱུར་འདུན་པ་ཡོད་སྐོར་དང་། རྒྱལ་ཁབ་ཀྱི་སྲིད་འཛིན་དུས་ཡུན་ངེས་བརྟན་བཟོ་དགོས་པའི་སྐོར་ཡང་ངོས་ལེན་བྱས་ཡོད་འདུག

ཉེ་ཆར་ཨི་ཇིབ་གཞུང་གིས་མང་ཚོགས་ལ་ཁས་ལེན་གསལ་བསྒྲགས་ཤིག་སྤེལ་བའི་ནང་། སྲིད་འཛིན་གྱི་གནས་རིམ་དེ་ཞི་འཇམ་ཐོག་འཕོ་འགྱུར་གཏོང་འཆར་ཡོད་སྐོར་དང་། ཕྱི་ཟླ་ ༩ བའི་ནང་སྲིད་འཛིན་གསར་བ་འོས་འདེམས་བྱ་རྒྱུ། དུས་ཡུན་འདིའི་བར་ད་ལྟའི་སྲིད་འཛིན་མུ་བྷ་རཀ་ལགས་ཀྱིས་འགན་མུ་མཐུད་འཁུར་རྒྱུ་ཡིན་ཚུལ་བཀོད་ཡོད་ཀྱང་། མང་ཚོགས་ཀྱིས་དེ་ནི་སྲིད་འཛིན་གྱི་གཡོ་ཇུས་ཤིག་ཡིན་ལུགས་ཀྱིས་ཁས་ལེན་མ་བྱས་པར། སྲིད་འཛིན་ད་ལྟ་རང་གོ་གནས་ནས་འཕུད་གཏོང་དགོས་པའི་ངོ་རྒོལ་ཡར་ལངས་མུ་མཐུད་བྱེད་ཀྱི་ཡོད་འདུག

རྒྱལ་སྤྱིའི་འགྲོ་བ་མིའི་རང་དབང་ལྟ་རྟོག་ཚོགས་པས་གནས་ཚུལ་སྤེལ་བ་ལྟར་ན། ཨི་ཇིབ་མི་མང་ཡར་ལངས་ཁྲོད་ད་ལྟའི་བར་མི་ ༢༩༧ ཙམ་གྱི་ཚེ་སྲོག་ཤོར་ཡོད་འདུག་ལ། དེ་ལས་མང་བ་ཞིག་གི་གནས་ཚུལ་ཤེས་རྟོག་མེད་པར་ལྷག་ཡོད་འདུག

གསར་འགོད་པ། བནྡེ་སྐྱབས།