གློག་བརྙན་ཐེབས་རྩ་ཁང་དབུ་བརྙེས།

ཟླ་འདིའི་ཕྱི་ཚེས་ ༡༤ ཉིན་འཇར་མན་རྒྱལ་ས་བྷར་ལིན་གྱི་ལོ་རྒྱུས་རང་བཞིན་ལྡན་པའི་ཚོགས་ཁང་ཞིག་ཏུ། ཞི་བདེའི་གློག་བརྙན་ཐེབས་རྩ་ Cinema for Peace Foundation ཞེས་པ་དབུ་བརྙེས་ཏེ་ལོ་ངོ་ ༡༠ འཁོར་བའི་དུས་སྟོན་ཞིག་སྲུང་གཙི་ཞུས་ཡོད་ཅིང་། མཛད་སྒོ་དེའི་སྟེང་༧གོང་ས་མཆོག་གདན་ཞུ་གནང་ཡོད་ཀྱང་ཕེབས་ཐུབ་མེད་པར་བཀྲ་ཤིས་བདེ་ལེགས་ཀྱི་གསུང་འཕྲིན་ཞིག་བརྩལ་ཡོད་འདུག མཛད་སྒོའི་སྟེང་ཐེབས་རྩ་ཁང་དེའི་འགན་འཛིན་སྐུ་ཞབས་ཛ་ཀ་བྷི་ཛིལ་ཇི Zaka Bizilj ལགས་ཀྱིས། ༧གོང་ས་མཆོག་ལ་ཐུགས་རྗེ་ཆེ་ཞུས་ཡོད་པར་མ་ཟད། སྐབས་དེར་ཁོང་གིས་༧གོང་ས་མཆོག་མཛད་སྒོར་ཕེབས་ཐུབ་མེད་ཀྱང་གང་ཉིད་ཀྱིས་འཚམས་འཕྲིན་བསྩལ་བྱུང་ཞེས་གསུངས་འདུག

༧གོང་ས་མཆོག་གི་འཚམས་འཕྲིན་གྱི་ནང་དུ། ངོས་ཀྱིས༌ཞི་བདེའི་གློག་བརྙན་ཐེབས་རྩ་ཁང་འདིས་འདས་པའི་ལོ་བཅུའི་ནང་གློག་བརྙན་བརྒྱུད་ལམ་ཤུགས་ཆེར་བེད་སྤྱད་དེ། སྤྱི་ཚོགས་ཀྱི་དཀའ་ངལ་དག་མང་ཚོགས་ནང་དོ་སྣང་ཡོང་ཆེད་གསལ་སྟོན་གནང་བར་འཚམས་འདྲི་ཡོད། གློག་བརྙན་དང་སྒྱུ་རྩལ་གྱིས་འཛམ་གླིང་ལྟ་ཚུལ་སྟེང་ཤུགས་རྐྱེན་ཧ་ཅང་ཆེན་པོ་ཐེབས་ཀྱི་ཡོད་ལ།  གློག་བརྙན་དང་སྒྱུ་རྩལ་ཕྱོགས་ལ་འཛམ་གླིང་འདི་བཟང་ཕྱོགས་སུ་བསྐྲུན་རྒྱུར་འགན་དང་གོ་སྐབས་གཉིས་ཀ་ཡོད། གསར་འགྱུར་བརྒྱུད་ལམ་ཁག་གི་མི་སྣ་ཚོ་གླང་ཆེན་གྱི་སྣ་ཁུག་ལྟར་རིང་པོ་དགོས་པ་མ་ཟད། སྲིད་དོན་པ་དང་ཚོང་པ། གནད་ཡོད་མི་སྣ་བཅས་ལ་རྒྱབ་མདུན་གཉིས་ཀའི་དྲི་མ་སྣོམ་ཐུབ་པ་དགོས། གསར་འགོད་པ་ཚོས་གནས་ཚུལ་གང་སྤེལ་བ་རྣམས་དྲང་བདེན་གཞི་ལ་འཇོག་དགོས།  འདིར་ངོས་ཀྱིས་ཞི་བདེའི་གློག་བརྙན་ཐེབས་རྩ་ཁང་གིས་བོད་དོན་ལ་རྒྱབ་སྐྱོར་ཤུགས་ཆེར་གནང་བར་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། དེ་ནི་བོད་ཙམ་དུ་མ་ཟད་འཛམ་གླིང་ཡོངས་ཀྱི་དྲང་བདེན་ལ་རྒྱབ་སྐྱོར་བྱས་པ་ཞིག་ཀྱང་རེད་ཅེས་འཁོད་འདུག  

༢༠༠༨ ལོར་༧གོང་ས་མཆོག་བྷར་ལིན་གྲོང་ཁྱེར་དུ་ཆིབས་བསྒྱུར་གནང་སྐབས། ཡུལ་དེའི་བོད་དོན་རྒྱབ་སྐྱོར་བ་རྙིང་ཤོས་ཤིག་གིས་བོད་དོན་ཆེད་གོམ་བགྲོད་ཅིག་གོ་སྒྲིག་ཞུས་ཡོད་ཅིང་། སྐབས་དེར་ཞི་བདེའི་གློག་བརྙན་ཚོགས་པའི་ཚོགས་མི་གློག་བརྙན་འཁྲབ་སྟོན་པ་ལྕམ་སྐུ་ Katja Riemann ལགས་དང་གྲགས་ཅན་མི་སྣ། གསར་འགོད་རང་དབང་དང་བོད་ནང་འགྲོ་བ་མིའི་ཐོབ་ཐང་། བོད་རིགས་ལ་གདུང་སེམས་མཉམ་སྐྱེད་ཡོད་མཁན་ཁག་ཅིག་གིས་གོམ་བགྲོད་དེའི་ནང་མཉམ་ཞུགས་བྱས་ཡོད།

གསར་འགོད་པ། དཔལ་ལྡན།