ལས་ཀ་ནར་འགྱངས་བྱས་ཏེ་དོན་དག་འདི་བྱུང་བ་རེད།

ཉེ་ཆར་རྒྱལ་བ་ཀརྨ་པའི་བླ་བྲང་གི་དངུལ་གྱི་དོན་རྐྱེན་བྱུང་བ་དང་མཉམ་དུ་བླ་བྲང་གིས་ངྷ་སའི་ཉེ་འཁོར་དུ་ས་ཆ་ཉོས་པའི་གནད་དོན་ཞིག་ཀྱང་ལྷག་ཡོད་སྟབས། ཐེངས་འདིའི་དོན་རྐྱེན་དང་བསྟུན་ཏེ། ཀཱང་ར་རྫོང་ས་ཞིང་དོ་དམ་ཁྲལ་བསྡུ་ལས་ཁུངས་ཀྱིས་རྒྱུད་སྟོད་དགོན་པའི་ས་ཆའི་བདག་དབང་དང་། སའི་དཔྱ་ཁྲལ་ཕུལ་བའི་བརྒྱུད་རིམ་ལ་ཞིབ་བཤེར་བྱས་སྐབས། རྒྱུད་སྟོད་དགོན་པ་དེ་ངྷ་རམ་ས་ལའི་ཨ་རོན་རྡོ་རྗེ་ Arun Dorje ཞེས་པ་ཞིག་དང་། ཀུ་ལུ་མཱ་ནཱ་ལི་ཡི་པི་རིམ་སིན་ Prem Singh ཞེས་པའི་མི་གཉིས་ཀྱི་མིང་ཐོག་ཏུ་བརྒྱབ་ཡོད་པ་ཞིག་ཆགས་ཡོད་སྟབས། ཕྱི་ཚེས་ ༡༥ ཉིན་རྒྱུད་སྟོད་དགོན་པའི་ས་ཆའི་བདག་དབང་དེ་ཧི་མ་ཅལ་མངའ་སྡེ་གཞུང་གིས་རྩིས་ལེན་གྱིས་མིང་བསྒྱུར་བྱས་ཡོད་འདུག

ཕྱི་ཚེས་ ༡༨ ཉིན་འདི་གའི་གསར་འགོད་པས་རྒྱུད་སྟོད་དགོན་པའི་ཕྱག་མཛོད་འཇམ་དཔལ་རྒྱ་མཚོ་ལགས་སུ་རྙོག་དྲ་དེའི་སྐོར་ལ་བཀའ་འདྲི་ཞུས་པར་ཁོང་གིས། ད་ལྟའི་ཆར་རྒྱ་གར་གསར་ལམ་ཁག་གིས་རྒྱ་སྒྲོག་བོད་སྒྲོག་འདྲ་ཞིག་བྱེད་སྡད་པ་རེད་མ་གཏོགས། བོད་རིགས་ཁྲོད་ཁྲིམས་མཐུན་མིན་པའི་ས་ཆ་ཉོ་ཚོང་བྱེད་ཀྱི་འདུག་ཟེར་བ་འདི་ ༡༩༩༦ ཙམ་ནས་བྱུང་ཡོད་པ་ཞིག་རེད། སྐབས་དེར་ཧི་མ་ཅལ་མངའ་སྡེ་གྲོས་ཚོགས་ནང་གླེང་སློང་བྱུང་ཞིང་། མངའ་སྡེ་བློན་ཆེན་གྱིས་༧གོང་ས་མཆོག་ལ་མཇལ་འཕྲད་ཞུས་ཏེ། ས་ཆའི་དཀའ་ངལ་རིགས་སེལ་ཐབས་བྱ་རྒྱུ་ཡིན་ཚུལ་ལབ་པ་ལྟར། ༧གོང་མཆོག་གིས་བཀའ་ཤག་ལ་མར་བཀའ་གནང་ཞིང་། ནང་སྲིད་ལས་ཁུངས་ཀྱི་ངོས་ནས་དཀའ་ངལ་འདི་གང་མགྱོགས་སེལ་ཐབས་བྱ་རྒྱུ་ཡིན། མི་གཞན་གྱི་མིང་ཐོག་ན་ཡོད་པའི་ས་ཆའི་ཐོ་གཞུང་རྣམས་འཁྱེར་ཤིག་ཅེས་བརྡ་ཁྱབ་བཏང་བ་ལྟར་མང་པོ་ཞིག་གིས་ཐོ་གཞུང་ཕུལ་བ་རེད།

འོན་ཀྱང་། ང་ཚོའི་གཞུང་གིས་ལས་དོན་ནར་འགྱངས་སུ་བཞག་སྟབས། བཀའ་ཤག་འཕོ་འགྱུར་ཕྱིན་པ་དང་མངའ་སྡེ་གཞུང་འཛིན་ལའང་འཕོ་འགྱུར་ཕྱིན་པ་སོགས་ཀྱིས་མཇུག་མ་འཁྱོལ་པ་རེད། ཟམ་གདོང་རིན་པོ་ཆེ་བཀའ་ཁྲིར་ཕེབས་རྗེས། ཁོང་གིས་ས་ཞིང་དཀའ་རྙོད་ཡོད་རིགས་ཚོ་བསྡུ་སྐོང་བྱས་ཏེ། གནད་དོན་དེའི་སྐོར་ལ་ཞིབ་འཇུག་བྱས་ཡོད་ཀྱང་། ཁྲིམས་མཐུན་ཐོག་ནས་ཐབས་ལམ་གང་ཡང་མཐོང་གི་མི་འདུག ད་ནས་བཟུང་དོ་བདག་སོ་སོས་ཐབས་ཤེས་བྱ་རྒྱུ་ལས་གཞུང་ལ་བསྙེ་མ་སྡོད་ཅེས་བཀའ་གནང་འདུག རྗེས་སུ་ཟ་ཁང་དང་དགོན་པ། ཨ་ནེ་དགོན་པ་སོགས་ས་ཞིང་གི་དཀའ་རྙོག་ཡོད་མཁན་ཚོས་ནོར་བུ་གླིང་ཀ་རུ་ཚོགས་ཆུང་ཞིག་བཙུགས་ཏེ་ལོ་ ༡༠ མ་ཟིན་ཙམ་རིང་ལས་ཀ་བྱས་ཀྱང་གྲུབ་འབྲས་སོན་མེད། 

༢༠༠༦ ཡས་མས་ཤིག་ལ་མངའ་སྡེ་གཞུང་གིས་བོད་གཞུང་ནང་སྲིད་ལས་ཁུངས་བརྒྱུད་བོད་རིགས་ས་ཞིང་གི་དཀའ་རྙོག་ཡོད་པ་དག་ལ་བག་གཏོང་གི་ཚུལ་དུ་དཔྱ་ཁྲལ་བརྒྱ་ཆ་ ༡༠ ཙམ་སྤྲོད་དགོས་པའི་ལམ་ཁ་ཞིག་སྤྲད་པ་རེད། འོན་ཀྱང་སྔར་བཞིན་ནར་འགྱངས་བྱས་བསྡད་པའི་དབང་གིས་ཐེངས་འདིར་ཟིང་ཆ་འདྲ་ཞིག་བྱུང་བ་རེད། ཅེས་བརྗོད་བྱུང་།

ཕྱག་མཛོད་འཇམ་དཔལ་རྒྱ་མཚོ་ལགས་སུ། རྒྱུད་སྟོད་དགོན་པ་ཨ་རོན་རྡོ་རྗེ་ Arun Dorje ཞེས་པ་ཞིག་དང་པི་རིམ་སིན་ Prem Singh ཞེས་པ་གཉིས་ཀྱི་མིང་ཐོག་ན་ཡོད་སྐོར་བཤད་པ་དེ་གང་འདྲ་ཡིན་མིན་དྲིས་པར་ཁོང་གིས་ལན་བསྐྱོན་དོན། མི་དེ་གཉིས་རྒྱ་གར་ཁམས་པ་དང་ནང་པ་ཡིན་པ་མ་ཟད། གྲྭ་ཚང་གི་འབྲེལ་ཡོད་ཀྱང་ཆགས་ཡོད་པ་རེད། དགོན་པའི་ས་ཆ་འདི་ཐོག་མར་ ༡༩༩༠ ཙམ་ལ་ཁོང་གཉིས་ཀྱིས་ཉོས་པ་ཞིག་རེད། རྗེས་སུ་གྲྭ་ཚང་གིས་འབོད་སྐུལ་ཞུས་ཏེ་ཁོང་གཉིས་ལག་ནས་ཚུར་ཉོས་འདུག ད་ལྟ་ཁོང་གཉིས་མཱ་ན་ལེ་རུ་ཡོད་པ་རེད། ཐེངས་འདིར་ཀཱང་ར་རྫོང་ས་གནས་ལས་ཁུངས་ཀྱིས་ང་ཚོར་བརྡ་ལན་མ་སྤྲད་སྔོན་ལ་རྒྱ་གར་གསར་ལམ་ཁག་ཏུ་རྒྱུད་སྟོད་དགོན་པ་རྩིས་ལེན་བྱ་རྒྱུ་ཡིན་སྐོར་བརྗོད་པ་དེས་སྐད་གྲགས་འདྲ་ཞིག་ཆགས་པ་རེད། སྤྱིར་གནས་ཚུལ་འདི་དེ་སྔོན་ནས་འགྲོ་བསྡད་པ་ཞིག་རེད། ཅེས་བརྗོད་བྱུང་།

ཡང་ཁོང་ལ་ས་ཆའི་བདག་དབང་མངའ་སྡེ་གཞུང་ལ་མིང་བསྒྱུར་ཚེ་གྲྭ་ཚང་ལ་དཀའ་ངལ་འཕྲད་སྲིད་མིན་དྲིས་པར། དགོན་ས་འདི་མངའ་སྡེ་གཞུང་འོག་ལ་མིང་བསྒྱུར་བྱས་པ་དེ་བོད་གཞུང་ནང་སྲིད་ངལ་སེལ་སྡེ་ཚན་བརྒྱུད་ལོ་ལྔ་བཅུའི་རིང་བག་གཏོང་གི་ཚུལ་དུ་མངའ་སྡེ་གཞུང་ལ་ས་ཁྲལ་སྤྲོད་དགོས་པ་རེད་མ་གཏོགས། དགོན་པ་རྒྱུན་གནས་ཐུབ་མིན་དང་ཧི་མ་ཅལ་མངའ་སྡེ་གཞུང་གིས་གྲྭ་ཚང་ལ་སྟངས་འཛིན་བྱ་རྒྱུ་དེ་འདྲ་ཡོང་གི་མ་རེད། ཅེས་བརྗོད་བྱུང་།

ཡང་གསར་འགོད་པའི་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་ལ། ཉེ་ལམ་རྒྱ་གར་གསར་ལམ་ཁག་ཅིག་ཏུ་ཐེངས་འདིར་ཀརྨ་བླ་བྲང་གི་དོན་རྐྱེན་དང་འབྲེལ་ཏེ། རྒྱུད་སྟོད་དགོན་པ་གཙོས་པའི་ཧི་མ་ཅལ་མངའ་ཁུལ་གྱི་བོད་རིགས་ཚོས་ཁྲིམས་མཐུན་མིན་པའི་ས་ཞིང་བདག་བཟུང་བྱས་ཡོད་པ་མང་པོ་ཞིག་ཡོད་སྟབས། དེ་དག་ཞིབ་འཇིག་གཙང་སེལ་བྱ་རྒྱུ་ཡིན་སྐོར་བརྗོད་པའི་ཐད་བཅར་འདྲི་ཞུས་པར་ཁོང་མོས་ལན་བསྐྱོན་དོན། ཧི་མ་ཅལ་མངའ་སྡེའི་ནང་གི་བོད་མིའི་ས་ཞིང་བདག་བཟུང་ཐད་རིགས་ཁ་ཤས་འདུག གཅིག་ནི་ ༡༩༧༢ སྔོན་ལ་དེབ་སྐྱེལ་བྱས་ཡོད་པ་དེ་དག་ལ་ད་ལྟའི་བར་དཀའ་ངལ་གང་ཡང་འཕྲད་ཡོད་པ་མ་རེད། གཉིས་པ། བཙན་བྱོལ་སྒྲིག་འཛུགས་བརྒྱུད་བག་གཏོང་ལངས་ཡོད་པ་སྐོར་ཞིག་ཡོད་པ་རེད། གསུམ་པ། རྒྱ་གར་ཡུལ་མིའི་མིང་ཐོག་ནས་བོད་རིགས་སྒེར་བ་དང་ཚོགས་པ། དགོན་སྡེ་རིགས་ཀྱིས་ས་ཞིང་བདག་བཟུང་བྱས་ཡོད་པ་གང་འཚམ་ཞིག་ཡོད་པ་རེད།

རིགས་གསུམ་པ་ཡུལ་མིའི་མིང་ཐོག་ནས་ས་བེད་སྤྱོད་བྱེད་ཀྱི་ཡོད་པ་དེ་དག་གི་ཐོག་ཏུ་སྔོན་མ་མངའ་སྡེ་གྲོས་ཚོགས་ནང་གླེང་སློང་རིམ་པ་བྱུང་བ་རེད། ༢༠༠༥ ལོར་མངའ་སྡེ་གཞུང་གི་གྲོས་ཚོགས་ནང་། ༢༠༠༥ ལོའི་ཟླ་ ༡༢ པའི་ཚེས ༣༡ སྔོན་གྱི་དཀའ་རྙོག་ཅན་གྱི་ས་ཞིང་དེ་དག་མངའ་སྡེ་གཞུང་གི་མིང་ཐོག་ནས་བཙན་བྱོལ་སྒྲིག་འཛུགས་བརྒྱུད་དེ། འབྲེལ་ཡོད་ཚོར་ས་ཞིང་བག་གཏོང་བྱ་རྒྱུ་དང་། དེའི་རྗེས་སུ་ས་ཞིང་དགོས་མཁོར་ཐུག་ཚེ་ལུགས་མཐུན་ཐོག་མངའ་སྡེ་གཞུང་ལ་ཡར་ཞུ་བྱུང་རིགས་ལ་དེ་བསྟུན་གྱིས་ཐག་གཅོད་བྱ་རྒྱུ་བྱས་ཡོད་པ་རེད། ཅེས་བརྗོད་བྱུང་།

གསར་འགོད་པ། བནྡེ་སྐྱབས།