བོད་གཞུང་གིས་གནས་ཚུལ་ཕྱེད་ཀ་མ་གཏོཊ་ཤེས་མི་འདུག

བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཀརྨ་བླ་བྲང་གི་དངུལ་གྱི་དོན་རྐྱེན་དེ་ཆབ་སྲིད་དང་འབྲེལ་བ་མེད་པ་དང་། ཀརྨ་པ་སྐུ་སྒེར་དང་འབྲེལ་བ་གང་ཡང་མེད་སྐོར་གསལ་བཤད་གནང་འདུག་ལ། དེ་དང་མཉམ་དུ་བླ་བྲང་གི་དངུལ་གཉེར་གཙོས་པའི་དངུལ་དང་འབྲེལ་ཡོད་ཚོར་རྒྱ་གར་གཞུང་གིས་ཉེས་ཆད་ལྕི་མོ་གཅོད་སྲིད་སྐོར་ཡང་གསུངས་འདུག

བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ཉིན་འདི་གར་འཇར་མན་དང་སུད་སུ་སོགས་སུ་ཕྱོགས་སྐྱོད་གནང་གི་ཡོད་པ་ལྟར། ཕྱི་ཚེས་ ༡༧ ཉིན་འཇར་མན་གྱི་རྒྱལ་ས་བྷར་ལན་དུ་བོད་རིགས་མི་མང་དང་བོད་དོན་རྒྱབ་སྐྱོར་བ་སོགས་ལ། ཉེ་ལམ་རྒྱུད་སྟོད་ཀརྨ་བླ་བྲང་གི་དངུལ་གྱི་དོན་རྐྱེན་སྐོར་ལ་གསལ་བཤད་གནང་འདུག སྐབས་དེར་བཀའ་ཁྲི་མཆོག་གིས་གསུང་རྒྱུར། ཀརྨ་པ་རིན་པོ་ཆེ་མཆོག་གི་གནས་ཚུལ་སྐོར་དེ་བོད་མི་ཡོངས་རྫོགས་ལ་དོ་ཕོག་འགྲོ་བའི་གནས་ཚུལ་སྐྱོ་བོ་ཞིག་བྱུང་བ་རེད། དེར་ང་ཚོས་འགེབ་ཐབས་ཡོད་པ་མ་རེད། འོན་ཀྱང་གནས་ཚུལ་ངོ་མ་གང་འདྲ་ཞིག་རེད་ཟེར་ན། ཚུར་ཕུ་བླ་བྲང་གི་ཞབས་ཞུ་བ་དེ་ཚོས་ཀརྨ་པ་མཆོག་གི་ཞལ་སློབ་རྗེས་འཇུག་ཚོས་སྐྱབས་རྟེན་བསྔོ་རྟེན་ལ་ཕུལ་བའི་དངུལ་དེ་དག་དོ་དམ་བྱེད་སྟངས་ཚུལ་མཐུན་མ་བྱུང་བའི་དབང་གིས་དཔལ་འབྱོར་འདུ་འགོད་དང་། འབབ་ཁྲལ་གྱི་ཁྲིམས་དང་འགལ་བའི་ལས་ཀ་ཞིག་ཆགས་པ་རེད།

འོན་ཀྱང་། འདི་ལ་ཆབ་སྲིད་ཀྱི་འབྲེལ་བ་གང་ཡང་ཡོད་པ་མ་རེད། གནད་དོན་འདི་ཆབ་སྲིད་དང་འབྲེལ་བ་མེད་པ་ཞིག་དང་། རྒྱལ་བ་ཀརྨ་པ་རང་ལ་འབྲེལ་བ་མེད་པ་ཚང་མས་མཁྱེན་དགོས་པ་རེད། རྒྱ་གར་གཞུང་དང་ཧི་མ་ཅལ་གཞུང་གིས་ཀྱང་། ཀརྨ་པ་མཆོག་དོན་དག་འདི་དང་འབྲེལ་བ་མེད་པ་དང་། ཆབ་སྲིད་ཀྱི་གནས་ཚུལ་ཞིག་མིན་པ་གསལ་བོར་ཤེས་ཡོད་པ་རེད། འོན་ཀྱང་གསར་འགྱུར་བརྒྱུད་ལམ་ཁག་གིས་འཁྱོགས་བཤད་དང་ལོག་བཤད་མང་པོ་ཞེ་དྲག་བྱས་པ་རེད། གསར་འགྱུར་བརྒྱུད་ལམ་ཟེར་བ་དེ་མཚམས་རེར་ཕན་ཐོགས་པོ་དང་། མཚམས་རེར་གནོད་ཚབས་ཆེན་པོ་ཡོང་གི་རེད། རལ་གྲི་སོ་གཉིས་མ་ལྟར་མཚམས་རེར་ཕ་རོལ་ལ་རྨ་བཟོ་ཐུབ་ཅིང་། མཚམས་རེར་ཚུར་ཕྱོགས་ལ་ཡང་རྨ་བཟོ་གྲབས་བྱེད་ཀྱི་ཡོད། ཆུང་ཆུང་ཆེན་པོ་བཟོ་བ་དང་ཆེན་པོ་ཀྱོག་ཀྱོག་བཟོ་བའི་གནས་སྟངས་ཤིག་ཡོད་སྟབས། ཀརྨ་པ་མཆོག་རྒྱ་ནག་དང་འབྲེལ་བ་ཡོད་པའི་དོགས་པ་བསླངས་པ་སོགས་བྱུང་ཡོད། དེ་དག་བདེན་པ་མིན་པའི་གནས་ཚུལ་ཡིན་སྟབས། ཉི་མ་ཁ་ཤས་རྗེས་རང་བཞིན་གྱིས་ཡལ་འགྲོ་བ་ཞིག་རེད། ཅེས་གསུངས་འདུག

ཡང་ཁོང་གིས་དངུལ་ཉར་སྟངས་སྐོར་ངོ་སྤྲོད་གནང་དོན། རྒྱ་གར་ནང་ལ་དངུལ་བདག་ཉར་བྱེད་སྟངས་ཀྱི་ཁྲིམས་དང་། ལོ་རེ་རེའི་འབབ་ཡོང་གི་ཐོག་ལ་འབབ་ཁྲལ་སྤྲོད་དགོས་པའི་ཁྲིམས། ལོ་རེར་དངུལ་འབོར་ཆེན་པོ་ཡོད་ན། དེ་གང་ནས་བྱུང་བ་དང་གང་དུ་གཏོང་བ་སོགས་བྱུང་སོང་བསྡད་གསུམ་གྱི་རྩིས་ཁྲ་འབབ་ཁྲལ་ལས་ཁུངས་ལ་གསལ་བོ་བཟོ་དགོས་ལ། ཕྱི་རྒྱལ་གྱི་དངུལ་ཡོང་གི་ཡོད་ན། ཕྱི་དངུལ་ནང་འདྲེན་བྱེད་པའི་ལག་འཁྱེར་དགོས་པ་དང་། ལག་འཁྱེར་སྤྲོད་མཁན་གྱི་ལས་ཁུངས་ལ་ལོ་རེ་རེའི་རྩིས་ཁྲ་སྤྲོད་དགོས་པ་སོགས་ཀྱི་འགྲོ་ལུགས་མང་པོ་ཡོད། དེ་དག་ཀརྨ་བླ་བྲང་གིས་ཏག་ཏག་བསྒྲུབ་ཐུབ་ཡོད་པ་མ་རེད། ཅེས་དང་།

༢༠༠༠ ལོར་ཀརྨ་པ་རྒྱ་གར་ལ་ཞབས་སོར་བཀོད་རྗེས་ལོ་གཅིག་ཡས་མས་ཤིག་ལ་བླ་བྲང་གི་ལས་དོན་ཚང་མ་ཆོས་དོན་ལས་ཁུངས་ཀྱིས་ཕྱག་རོགས་ཞུས་པ་རེད། སྐབས་དེར་ཕྱི་རྒྱལ་ནས་དངུལ་ཕུལ་བ་རྣམས་ཆོས་དོན་ལས་ཁུངས་ཀྱི་ཕྱི་དངུལ་ནང་འདྲེན་གྱི་ལས་འཁྱེར་འོག་ནས་བླ་བྲང་ལ་འབུལ་བཞིན་ཡོད་པ་རེད། དེའི་རྗེས་སུ་བླ་བྲང་རང་གིས་ཕྱི་དངུལ་ནང་འདྲེན་བྱེད་པའི་ལག་འཁྱེར་བཟོ་རྒྱུའི་སྙན་ཐོ་རྒྱ་གར་གཞུང་ལ་སྤྲད་པ་དང་། བླ་བྲང་གི་མཚན་ཐོག་ནས་དེབ་སྐྱེལ་བྱས་པའི་ཡིད་ཆེས་དགེ་རྩ་དེ་འདྲ་བཙུགས་རྗེས། དངུལ་གྱི་ལས་དོན་ཡོངས་རྫོགས་བླ་བྲང་རང་ནས་གནང་རྒྱུ་བྱས་ཏེ་ཕུལ་བ་རེད། འོན་ཀྱང་རྒྱ་གར་གཞུང་ནས་བཀའ་འཁྲོལ་ཞུ་རྒྱུའི་རིགས་དུས་ཐོག་ལ་ཞུ་མ་ཐུབ་པ་དང་མ་རག་པ། དེ་བཞིན་དུས་ནས་དུས་སུ་དངུལ་ཁང་ལ་མ་བཅོལ་བར་ནང་ནས་ཉར་བ་སོགས་ཀྱི་དབང་གིས་གནས་ཚུལ་འདི་བྱུང་བ་རེད། ཅེས་གསུངས་འདུག

ཡང་ཁོང་གིས་ཀརྨ་བླ་བྲང་གིས་ས་ཆ་ཉོ་བའི་ལས་འཆར་སྐོར་ངོ་སྤྲོད་གནང་དོན། དོན་དག་འདི་རིགས་བླ་བྲང་གི་ཞབས་ཞུ་བ་དེ་ཚོས་མ་བྱུང་བ་རེད་མ་གཏོགས་ཀརྨ་པ་མཆོག་གིས་གཅིག་ཀྱང་མཁྱེན་གྱི་ཡོད་པ་མ་རེད་ལ། བཙན་བྱོལ་བོད་གཞུང་གིས་དེ་བས་ཀྱང་གང་ནས་ཤེས། སུ་གང་གིས་ཀྱང་ཤེས་ཀྱི་ཡོད་པ་མ་རེད། བླ་བྲང་གི་མཚན་ཐོག་ནས་དངུལ་ཁང་ནང་རྩིས་ཁྲ་ཡོད་པ་རེད། བླ་བྲང་གིས་དེབ་སྐྱེལ་བྱས་པའི་ཡིད་ཆེས་དགེ་རྩ་ཡི་མཚན་ཐོག་ནས་ཀྱང་དངུལ་ཁང་དུ་རྩིས་ཁྲ་ཡོད་པ་རེད། དངུལ་ཡོངས་རྫོགས་དེ་དག་ནང་བཅོལ་ཡོད་ཤག་མ་གཏོགས་དངུལ་རྐྱང་དེ་འདྲ་མང་པོ་ཞིག་བླ་བྲང་རང་ན་ཉར་ཡོད་པ་སུ་གང་གིས་ཀྱང་ཤེས་ཀྱི་ཡོད་པ་མ་རེད། ཅེས་དང་།

རྒྱལ་བ་ཀརྨ་པོ་རིན་པོ་ཆེ་མཆོག་ལ་བཞུགས་ཡུལ་ཚད་ལྡན་ཞིག་ད་བར་བྱུང་ཡོད་པ་མ་རེད། བཙན་བྱོལ་གཞུང་གི་ངོས་ནས་ཀརྨ་པ་བཞུགས་སའི་གཟིམ་ཤག་ཚད་ལྡན་ཞིག་དང་། ཀརྨ་པ་མཆོག་གི་ཞལ་སློབ་ཚོས་སློབ་གཉེར་གནང་ས་ཞིག་དགོས་ཀྱི་འདུག་ཟེར་ནས་ ༢༠༠༢ ལོ་ཙམ་ནས་ས་ཆ་ཞིག་བཙལ་ཡང་ཚད་ལྡན་ཞིག་རག་མེད། ༢༠༠༨ ལོ་ཡས་མས་ལ་ཏེ་ལོ་པུར་དུ་ས་ཆ་ཞིག་ལ་དགོངས་པ་བཞེས་ཀྱང་། དེ་ཡང་ཁྲིམས་མཐུན་མ་བྱུང་བར་མི་གཞན་ཞིག་གི་མིང་ཐོག་ཏུ་ཡོད་སྟབས་མཐར་ཕན་མ་ཐོགས་པ་རེད། དེའི་རྗེས་རྒྱུད་སྟོད་གྲྭ་ཚང་གི་ས་ཐོག་ཏུ་ཕོ་བྲང་རྒྱག་རྒྱུའི་འཆར་གཞི་སྒྲིག་ཀྱང་། རྒྱུད་སྟོད་གྲྭ་ཚང་གི་ས་ཡང་ཁྲིམས་མཐུན་མིན་སྟབས་ལག་ལེན་བསྟར་མ་ཐུབ་པ་རེད། ད་རེབ་རྒྱུད་སྟོད་ཀྱི་ཉེ་འཁྲིས་ཤིག་ཏུ་ས་ཆ་ཞིག་ལ་འཆར་བཟོས་ཏེ། བོད་གཞུང་བདེ་སྲུང་ལས་ཁུངས་དང་ཆོས་དོན་ལས་ཁུངས་གཉིས་ཀའི་ཕྱག་རོགས་ཞུ་བཞིན་ཡོད་ཀྱང་། རྗེས་སུ་ཤེས་སྐབས་བདེ་སྲུང་དང་ཆོས་དོན་གཉིས་ཀས་གནས་ཚུལ་ཕྱེད་ཀ་མ་གཏོགས་ཆ་ཚང་བ་ཞིག་ཤེས་མི་འདུག བཙན་བྱོལ་གཞུང་གི་ངོས་ནས་ཁྲིམས་མཐུན་རང་གི་ཐོག་ནས་འགྲོ་བཞིན་ཡོད་ཤག་མ་གཏོགས་ས་བདག་དང་བླ་བྲང་གི་བར་དུ་ཁྲིམས་འགལ་གྱི་བཀའ་མོལ་ཞིག་འགྲོ་བཞིན་ཡོད་པ་ཁྱོན་ནས་ཤེས་ཀྱི་ཡོད་པ་མ་རེད། ཅེས་གསུངས་འདུག

བཀའ་ཁྲི་མཆོག་གིས་དོན་རྐྱེན་འདི་ཐོག་མའི་བྱུང་རིམ་སྐོར་གསུངས་དོན། ཕྱི་ཟླ་ ༡ ཚེས་ ༢༧ ཉིན་རྒྱ་གར་སྐོར་སྲུང་བས་བླ་བྲང་སྔོག་བཤེར་བྱས་སྐབས་གཞི་ནས་ཧ་གོ་བ་རེད། བླ་བྲང་གིས་ཕྱི་ཚེས་ ༢༥ ཉིན་ལྡི་ལིར་ས་བདག་ལ་ཧིན་སྒོར་འབུམ་ ༡༠༠ སྤྲད་འདུག དངུལ་དེ་མི་གཉིས་ཀྱིས་ཡར་ངྷ་རམ་ས་ལར་འཁྱེར་ཡོང་སྐབས། ཕྱི་ཟླ་ ༡ ཚེས་ ༢༦ ཉིན་ཨོའུ་ནཱ་རྫོང་ནས་ཉེན་རྟོག་པས་རླངས་འཁོར་སྔོག་བཤེར་བྱས་འདུག ཉིན་དེར་རླངས་འཁོར་ཡོངས་རྫོགས་སྔོག་བཤེར་བྱེད་ཀྱི་ཡོད་པ་རེད། ཉིན་དེ་ནི་རྒྱ་གར་གྱི་རྒྱལ་ཚིགས་དུས་ཆེན་ལ་ཁེལ་ཡོད་སྟབས་སྲུང་སྐྱོབ་དམ་པོ་བྱེད་ཀྱི་ཡོད་པ་རེད། ཅེས་དང་།

ཉེན་རྟོག་པས་སྔོག་བཤེར་སྐབས་དངུལ་རྐྱང་འབུམ་ ༡༠༠ རླངས་འཁོར་ལས་ཐོན་ཡོད་སྟབས། མི་དེ་གཉིས་ཨོའུ་ན་སྐོར་སྲུང་བའི་འཛིན་བཟུང་བྱས་ཏེ་འདྲི་རྩད་བྱེད་སྐབས། ཀརྨ་བླ་བྲང་གི་དངུལ་གཉེར་གྱི་ལག་ནས་འཁྱེར་ཡོང་ཚུལ་བཤད་འདུག་པས་ངྷ་རམ་ས་ལ་ནས་དངུལ་ཉར་དེ་འཛིན་བཟུང་བྱས་འདུག དེའི་ཕྱི་ཉིན་ཉེན་རྟོག་པས་རྒྱུད་སྟོད་ཀརྨ་བླ་བྲང་སྔོག་བཤེར་སྐབས། དངུལ་གཉེར་གྱི་ཤག་ནས་དངུལ་མང་པོ་དེ་འདྲ་ཞིག་ཐོན་པ་རེད། རྒྱུ་མཚན་དེའི་དབང་གིས་ད་ལྟའི་གནས་སྐབས་ལ་བླ་བྲང་གི་དངུལ་གཉེར་དང་གྲྭ་བ་གཞན་ཞིག དེ་བཞིན་མགོན་པོ་ཟེར་བ་ཞིག་བཅས་མི་གསུམ་དང་། དངུལ་འཁྱེར་ཡོང་མཁན་མི་དེ་གཉིས་དང་རྒྱ་གར་ས་བདག ལྡི་ལའི་དངུལ་ཁང་ཞིག་གི་འགན་འཛིན་བཅས་མི་ ༧ འཛིན་བཟུང་འོག་ཡོད་པ་རེད།

མཇུག་ཏུ་ཁོང་གིས་ཀརྨ་བླ་བྲང་གི་དངུལ་དང་འབྲེལ་བ་ཡོད་མཁན་ཚོར་རྒྱ་གར་གཞུང་གིས་ཉེས་ཆད་ལྕི་མོ་གཅོད་སྲིད་སྐོར་གསུངས་དོན། དངུལ་རྐྱང་ཕོན་ཆེན་པོ་དེ་འདྲ་ཞིག་ས་བདག་ལ་སྤྲད་པ་དེ་དཔལ་འབྱོར་གྱི་ཁྲིམས་ཐོག་ནས་ཁྲིམས་འགལ་ཆེན་པོ་རེད་ལ། དངུལ་ཁང་དུ་མ་བཅུག་པར་བླ་བྲང་ནང་དངུལ་མང་པོ་ཉར་བ་དེ་ཡང་ཁྲིམས་འགལ་ཆེན་པོ་རེད། དེ་དག་གི་བྱུང་སོང་བསྡད་གསུམ་གྱི་རྩིས་ཁྲ་འབབ་ཁྲལ་ལས་ཁུངས་ཀྱིས་ཤེས་མེད་པ་དེ་ཡང་ཁྲིམས་འགལ་ཆགས་ཡོད་སྟབས། དྲུང་ཡིག་དང་དངུལ་ཉར་སོགས་དཔལ་འབྱོར་འདུ་འགོད་དང་འབྲེལ་བ་ཡོད་མཁན་ཚོར་ཏན་ཏན་ཉེས་པ་ཆེན་པོ་ཕོག་གི་རེད་ལ། ལོ་མང་པོར་བཙོན་ཁང་ནས་ལྷག་རྒྱུའི་ཉེན་ཁ་ཡང་ཡོད་པ་རེད། དེ་དག་ང་ཚོས་སྐྱོབ་ཐབས་ཡོད་པ་མ་རེད། འོན་ཀྱང་ཀརྨ་པ་རིན་པོ་ཆེ་མཆོག་ལ་སྐུ་ངལ་ཡོང་བ་དང་། ཀརྨ་པ་མཆོག་དོན་རྐྱེན་འདི་དང་འབྲེལ་བ་ཡོད་པ་དེ་འདྲ་ཡོང་གི་མ་རེད། མ་འོངས་པར་ཡང་ཁྲིམས་ཁང་ནས་ཁྲིམས་ཐག་བཅད་ཡོང་སྐབས་གསལ་བོ་ཆགས་འགྲོ་བ་རེད།

གསར་འགོད་པ། དོན་འགྲུབ་བཀྲ་ཤིས།