སྐྱབས་རྗེ་ཨ་པད་རིན་པོ་ཆེ།

ས་སྐྱ་བདག་ཁྲི་རིན་པོ་ཆེ་མཆོག་གི་ཡོངས་འཛིན་སྐྱབས་རྗེ་མཁན་ཆེན་ཨ་པད་རིན་པོ་ཆེ་མཆོག་ཕྱི་ལོ་ ༢༠༡༠ ཟླ་ ༡༢ ཚེས་ ༢༨ ཉིན་སྐུ་ཡི་དགུང་གྲངས་ ༨༤ བཞེས་པའི་ཐོག་བལ་ཡུལ་དུ་དགོངས་པ་ཆོས་དབྱིངས་སུ་ཐིམ་ཡོད་འདུག་ཅིང་། སྐབས་དེར་ཉིན་གསུམ་རིང་སྐུ་ཐུགས་དམ་ལ་བཞུགས་ཏེ་ངོ་མཚར་བའི་རྟགས་སྣ་ཚོགས་བྱུང་ཡོད་འདུག

ཕྱི་ཚེས་ ༧ ཉིན་ས་སྐྱ་གོང་མ་རིན་པོ་ཆེ་མཆོག་དང་ཀླུ་ལྡིང་མཁན་ཆེན་མཆོག་རྣམ་གཉིས་རྒྱ་གར་ནས་ཆིབས་ཕེབས་གནང་སྟེ། སྐུ་གདུང་ཞུགས་འབུལ་གྱི་མཛད་རིམ་བསྒྲུབས་ཡོད་ཅིང་། གདུང་རྫོགས་ཀྱི་མཛད་སྒོ་དེར་འཛམ་གླིང་ཡུལ་གྲུ་འདྲ་མིན་ནས་ཁོང་དང་བླ་སློབ་ཀྱི་འབྲེལ་བ་ཡོད་པའི་རུས་མེད་རྗེས་འཛིན་མང་པོ་དང་། རྒྱ་གར་གདན་ས་ཁག་གི་སྐུ་ཚབ་སོགས་ཆེད་ཕེབས་གནང་ཡོད་འདུག

སྐྱབས་རྗེས་མཁན་ཆེན་ཨ་པད་རིན་པོ་ཆེ་མཆོག་ནི། ཕྱི་ལོ་ ༡༩༢༧ ལོར་མདོ་ཁམས་སྡེ་དགེ་ཀུ་སེ་ཡུལ་དུ་སྐུ་འཁྲུངས་ཤིང་གསེར་ལྗོངས་དགོན་དུ་ཆོས་སྒོར་ཞུགས། སྡེ་དགེ་སྨད་ཤོད་ཁམས་བྱེ་མ་ཐང་རྫོང་གསར་བཤད་གྲྭ་ལྔ་རིག་ནང་བསྟན་སློབ་གླིང་དུ་མཁས་ཆེན་མང་པོའི་ཞབས་རྡུལ་སྤྱི་བོར་བླངས་ཏེ་མཁས་པའི་མཚན་སྙན་ཐོབ་ཅིང་། དེའི་རྗེས་དབུས་སུ་ཕེབས་ཏེ་གཙང་ངོར་དཔལ་ཨ་ཝཾ་ཆོས་ལྡན་གདན་སའི་བཤད་གྲྭའི་མཁན་པོ་མཛད།

བོད་ནང་དུས་འགྱུར་སྐབས་རྒྱ་གར་ལ་ཞབས་སོར་བཀོད་དེ། ས་སྐྱ་ཁྲི་ཐོག་ཞེ་གཅིག་པ་མཆོག་གི་ཡོངས་འཛིན་གནང་ཞིང་། ས་སྐྱ་མཐོ་སློབ་གསར་འཛུགས་ཀྱིས་བཤད་གྲྭའི་མཁན་པོ་དང་འགན་འཛིན་གཅིག་ལྕོགས་གནང་། རྗེས་སུ་བལ་ཡུལ་དུ་ཕེབས་ཏེ་རྒྱལ་ཡོངས་ས་ཆེན་གསུང་རབ་སློབ་གཉེར་ཁང་གསར་འཛུགས་མཛད་དེ། སྔོན་བྱོལ་བོད་པའི་མཁས་ཆེན་དག་གི་ཡིག་ཆ་བསྡུ་རུབ་ཀྱིས་གསུམ་འབུམ་ཕྱོགས་བསྒྲིགས་ཀྱི་མཛད་མཁན་བཞེས་ཤིང་། ལོ་ལྟར་དད་ལྡན་ཆོས་ཞུ་བ་མང་པོར་བློ་སྦྱོང་ཞེན་པ་བཞི་བྲལ་དང་བློ་སྦྱོང་དོན་བདུན་མ་སོགས་ཀྱི་བཀའ་ཆོས་བསྩལ་ཡོད་འདུག