ཁ་སང་ཕྱི་ཚེས་ ༢༣ ཉིན་ཧྥ་རན་སའི་རླུང་འཕྲིན་ཁང་གིས་གནས་ཚུལ་བསྒྲགས་པ་ལྟར་ན། ཞིན་ཅིང་ས་གནས་ཁྲིམས་ཁང་གིས་རྒྱ་ནག་ཆེས་མཐོའི་ཁྲིམས་ཁང་གི་གཏན་འབེབས་ལྟར། ཞིན་ཅིང་རང་བཙན་འཐབ་རྩོད་ལས་འགུལ་བ་མི་ ༤ ལ་སྲོག་ཁྲིམས་བཅད་ཡོད་འདུག
ཞིན་ཅིང་ཉིན་རེའི་གསར་ཤོག་སྟེང་གནས་ཚུལ་སྤེལ་བ་ལྟར་ན། ས་གནས་ཁྲིམས་ཁང་གིས་ཁོང་ཚོར་སྲོག་ཁྲིམས་བཅད་པ་ཕྱིར་བསྒྲགས་བྱས་ཡོད་ཅིང་། རྒྱ་གཞུང་གིས་སྲོག་ཁྲིམས་བཅད་པའི་ཡུ་གུར་བ་མི་བཞིའི་ཁྲོད་ཀྱི་ཨ་པུ་གྷོ་ལ་ཐའོ་ནེའུ་ཡ་ཁཱུང་དང་ཝ་ཧི་མེ་ཐེ་ཁུའུ་ཨར་བྷང་གཉིས་ནི་ལོ་སྔོན་མའི་ཟླ་ ༨ པའི་ནང་ཞིན་ཅིང་ཨ་ཁི་སུའུ་ས་ཁུལ་གྱི་ངོ་རྒོལ་ལས་འགུལ་ཁྲོད་ཞུགས་མཁན་ཡིན་ཚུལ་དང་། ཨ་ཁུའུ་ཉེ་ཡཱ་ཁཱུང་ནའོ་ཨར་ལ་ལོ་སྔོན་མའི་ཕྱི་ཟླ་ ༡༡ པའི་ནང་རྒྱ་དམག་གཅིག་བསད་པའི་ཉེས་འཛུགས་དང་། དེ་བཞིན། ཨ་པུའུ་ཏུའུ་རིག་ཧི་མཱན་ལགས་ལ་ལོ་སྔོན་མའི་ལོ་མཇུག་ལ་ཞིན་ཅིང་ཧཱ་མེ་ས་ཁུལ་དུ་མི་གཉིས་བསད་པའི་ཉེས་མིང་བཅས་ཁག་སོ་སོར་ཆབ་སྲིད་ཀྱི་ཉེས་འཛུགས་སྣ་ཚོགས་བྱས་ཏེ་སྲོག་ཁྲིམས་བཅད་ཡོད་འདུག
ཧྥ་རན་སིའི་རླུང་འཕྲིན་གསར་ཁང་གིས་རྒྱ་ནག་ཆེས་མཐོའི་ཁྲིམས་ཁང་ལ་ཁ་པར་བཏང་སྟེ་ཡུ་གུར་བ་མི་བཞི་ལ་སྲོག་ཁྲིམས་བཅད་པའི་ཐད་སྐད་ཆ་དྲིས་སྐབས། འབྲེལ་ཡོད་མི་སྣས་ལན་འདེབས་གང་ཡང་བྱས་མེད་པ་རེད། རྒྱ་གཞུང་གིས་ཕྱི་ལོ་ ༢༠༠༩ ལོའི་ཕྱི་ཟླ་ ༧ པའི་ནང་ཞིན་ཅིང་ཝོ་རའོ་མའོ་ཆི་གྲོང་ཁྱེར་ཏུ་ཡུ་གུར་ཡར་ལངས་ལས་འགུལ་བྱུང་བའི་རྗེས། སྔ་ཕྱིར་ཞིན་ཅིང་གི་རང་དབང་འཐབ་རྩོད་བྱེད་མཁན་ཡུ་གུར་བ་ ༢༥ ལ་སྲོག་ཁྲིམས་བཅད་ཡོད་འདུག
གསར་འགོད་པ། ཚེ་རིང་རྒྱལ།
རྒྱ་ནག་སྟོབས་ཆེན་རྒྱལ་ཁབ་ཅིག་གིས་མིའི་ཚེ་སྲོག་ལ་རིན་ཐང་ཏིལ་འབྲུ་ཙམ་ཡང་མེད་པར་གཅིག་རྗེས་གཉིས་མཐུད་ཀྱིས་སྲོག་གཅོད་དང་མནར་གཅོད་གཏོང་བ་དངོས་གནས་ཐབས་སྐྱོ་བོ་རེད།
སྲོགས་ཁྲིམས་ནི། ཀླ་ཀློ་འུ་ཐུག་གི་ལུགས་སྲོལ་ལས། དེང་དུས་ཤེས་ཡོན་རྒྱས་པའི་སྤྱི་ཚོགས་བྱེད་སྟངས་ཅིག་མ་རེད། སྲོག་ཁྲིམས་ནི། ཡུལ་ལུང་གང་དུ་ཡང་མི་འཚམ་ལ། སྲོག་ཐོག་གཏོང་མཁན་ཁོ་རང་རང་གི་མགོ་བོར་ཞགས་པ་གཡོག་པ་གཅིག་མཚུངས་རེད། ལྷག་པར་དུ་ཆབ་སྲིད་ཀྱི་སྲོག་ཁྲིམས་ནི། མ་ཉེས་ཉེས་འཛུགས་སྡུག་རྩུབ་ཆེ་ཤོས་དེ་རེད།