གསར་བརྗེ་ལས་འགུལ།

བོད་ཀྱི་དུས་བབ་སྤྱིའི་འདོན་ཐེངས་ ༥༡༣ པའི་སྟེང་གི་རྩོམ་སྒྲིག་པའི་གཏམ།

དཀྱིལ་ཤར་ཡུལ་གྲུའི་བ་སྤྲུའི་མེ་ཏོག་གི་གསར་བརྗེ་ལས་འགུལ་དེ་ཤར་ཨེ་ཤ་ཡའི་ནང་ཁྱབ་བཞིན་འདུག ཐེངས་འདིའི་རྒྱ་ནག་གི་མེ་ཏོག་བ་སྤྲུའི་གསར་བརྗེ་ལས་འགུལ་དེ་ཧ་ཅང་ཐབས་ཇུས་ལྡན་པ་ཞིག་དང་། ནུས་སྟོབས་ཆེན་པོ་ཞིག་ཆགས་རྒྱུ་ཡིན་པ་གདོན་མི་ཟ་ཞིང་། ལས་འགུལ་དེར་མདུན་དུ་སྣེ་ཁྲིད་མཁན་མེད་ལ། རྒྱབ་ཏུ་བཀོལ་བྱུས་གཏོང་མཁན་ཡང་མེད། མི་མང་རང་ངོས་ནས་དྲ་ཚིགས་དང་ཁ་པར་གྱི་འཕྲིན་ཐུང་བརྒྱུད་དེ་གནས་ཚུལ་བརྗེ་ལེན་དང་བསྒྲགས་གཏམ་ཁྱབ་སྤེལ་བྱས་ཏེ། ལས་འགུལ་གྱི་ངར་ཤུགས་རྒྱ་ཁྱབ་ཏུ་གཏོང་བཞིན་ཡོད་ཅིང་། དེ་ནི་རྒྱ་ནག་གིས་ཀྲུང་གོ་ནི་འཛམ་གླིང་ཐོག་དྲ་བ་བེད་སྤྱོད་གཏོང་མཁན་གྱི་དྲ་དམངས་ཆེས་མང་བའི་རྒྱལ་ཁབ་གཅིག་པུ་དེ་ཡིན་ཞེས་པའི་སྤོབས་པའི་སྐད་ཆ་དེ་མངོན་འགྱུར་བྱེད་པའི་དུས་སུ་བསླེབས་ཡོད།

རེས་གཟའ་ཉི་མ་ནམ་ཡིན་གྱི་ཉིན་གུང་ཆུ་ཚོད་ ༢ པའི་ཐོག་པེ་ཅིན་དང་ཀོང་ཀྲུག ཧྲང་ཧེ། ཞི་ཨན་སོགས་རྒྱ་ནག་གི་གྲོང་ཁྱེར་ཆེ་ཁག་ ༢༣ གྱི་མི་མང་འདུ་ཚོགས་ཆེ་སའི་ཁྲོམ་གཞུང་དག་ཏུ་ངོ་མཚར་བའི་ལྟད་མོ་ཇེ་མང་དུ་འགྲོ་ངེས་ཡིན་ལ། མེ་ཏོག་བ་སྤྲུའི་གསར་བརྗེ་ཡི་རླབས་རྒྱུན་འཕྱུར་སའི་གྲོང་ཁྱེར་དེ་དག་ནང་མི་གསོད་ཁྲག་སྦྱོར་གྱི་དོན་རྐྱེན་རེ་ཟུང་ཡང་འབྱུང་སྲིད་མོད། སྔར་དྲུག་བཞིའི་དོན་རྐྱེན་སྐབས་རྒྱ་ནག་གི་མཐོ་རིམ་སློབ་མ་ཁྲི་སྟོང་མང་པོས་དམངས་གཙོར་རེ་སྙེག་བྱས་ཏེ། གནམ་སྡེ་སྒོ་མོ་ཆེའི་ཐང་ཆེན་གྱི་ཡ་ང་བའི་དོན་རྐྱེན་དེ་བྱུང་ཡོད་ལ། ཐེངས་འདིར་མེ་ཏོག་བ་སྤྲུའི་ལས་འགུལ་ནང་ཞུགས་མཁན་ཡང་མང་ཆེ་བ་སློབ་ཕྲུག་ཡིན་རབས་བཤད་ཅིང་། ནམ་རྒྱུན་དྲ་ཚིགས་སྔོག་མཁན་དང་གྲོང་ཁྱེར་དུ་སྡོད་མཁན་ཡང་སློབ་ཕྲུག་དང་ཤེས་ལྡན་མི་སྣ་ཆགས་ཡོད་སྟབས། དྲུག་གཞིའི་དོན་རྐྱེན་གཉིས་པ་འབྱུང་མི་སྲིད་པའི་ངེས་པ་ཡང་མེད།

སྤྱིར་འཛམ་གླིང་ལ་གསར་བརྗེ་སྔ་ཕྱི་རིམ་པ་མང་པོ་ཞིག་བྱུང་མྱོང་ལ། གསར་བརྗེ་ཡི་ནང་དོན་དང་རྣམ་པ་ཡང་འདྲ་མིན་སྣ་ཚོགས་རེད། ཆེས་སྐད་དྲག་ཆེ་བའི་གསར་བརྗེ་ཁག་ནི། ཡུ་རོབ་བཟོ་ལས་གསར་བརྗེ་དང་། ཉི་ཧོང་མེ་རྗེ་གསར་བརྗེ། ཡུ་རོབ་རིག་རྩལ་བསྐྱར་དར། རྒྱ་ནག་གི་རིག་གནས་གསར་བརྗེ་སོགས་ཆགས་ཡོད་ཀྱང་། འདི་དག་ནི་དུས་ཚོད་ཀྱི་ཆ་ནས་བྱུང་བ་སྔ་ཞིང་། ངོ་བོའི་ཆ་ནས་རྒྱལ་ཡོངས་རང་བཞིན་གྱི་ཞི་དྲག་གཉིས་ལྡན་ཞིག་ཆགས་ཡོད། གསར་བརྗེ་ཡི་ལས་འགུལ་རེ་རེ་ནི་མང་ཚོགས་ལ་རྟོག་སད་དང་སྤྱི་ཚོགས་ལ་འཕོ་འགྱུར་འགྲོ་བའི་དཀྱོགས་མཚམས་རེ་རེ་ཆགས་ཡོད་ཅིང་། རིག་གནས་ཀྱི་ཁྱབ་ཁོངས་ནས་བཤད་ན་གསར་བརྗེ་ཞེས་པ་ནི་རྙིང་ཚབ་གསར་པས་བྱེད་པ་ཞིག་དང་། ཆབ་སྲིད་ཀྱི་ཁྱབ་ཁོངས་ནས་གཞུང་མགོ་རྟིང་སློག་པ། ཡང་ན་སྲིད་ལུགས་ལ་འགྱུར་ལྡོག་ཕྱིན་པ་ཞིག་ལ་གོ་དགོས།

ཉེ་རབ་འཛམ་གླིང་ལོ་རྒྱུས་ཁྲོད་ཀྱི་གསར་བརྗེ་མང་ཆེ་བ་ཞིག་གསར་བརྗེ་བྱུང་ཡུལ་གྱི་ཆ་ནས་ཁ་དོག་གི་མིང་དང་། ངོ་བོའི་ཆ་ནས་མེ་ཏོག་དང་སྲོག་ཆགས་སེམས་ཅན་གྱི་མིང་འདོགས་སྲོལ་ཡོད་པ་ལྟར། ཐེངས་འདིའི་རྒྱ་ནག་གི་མེ་ཏོག་བ་སྤྲུའི་ལས་འགུལ་དེར་ཡང་། ཐོག་མའི་འབྱུང་ཁུངས་ཊོའུ་ནེ་ཤི་ཡའི་ས་བབ་ཀྱི་ཁ་དོག་དང་ངོ་བོ་ཞི་བ་ཡིན་སྟབས་མེ་ཏོག་གི་མིང་བཏགས་ཡོད། དཔེར་ན། ཉིས་སྟོང་བཞི་ལོར་Georgia ཡི་རྒྱ་སེ་མེ་ཏོག་གསར་བརྗེ་དང་། Uyraine གྱི་མེ་ཏོག་ཨ་འབྲུམ་གསར་བརྗེ་དང་། ཡང་ན་ཀུ་ཤུའི་གསར་བརྗེ་རུ་འབོད་སྲོལ་ཡང་ཡོད། ཉིས་སྟོང་ལྔ་ལོར་ Kyrgyz གྱི་མེ་ཏོག་ཡུལ་རྒྱན་གསར་བརྗེ། ཉིས་སྟོང་བདུན་ལོར་འབར་མ་ Burma ཡི་གྲྭ་བའི་འོས་ལངས་ལ་ངུར་སྨིག་གསར་བརྗེ་སོགས་སུ་བཏགས་ཡོད།

ད་ལྟ་རྒྱ་མག་གི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཐེངས་འདིའི་མེ་ཏོག་བ་སྤྲུའི་གསར་བརྗེ་ཡི་ལས་འགུལ་སྤེལ་སའི་ཁྱབ་ཁོངས་སུ་བོད་ཀྱི་རྒྱལ་ས་ལྷ་ས་དང་། ཡུ་གུར་གྱི་རྒྱལ་ས་ཝོ་རོ་མུའུ་ཆི། སོག་པོའི་གྲོང་ཁྱེར་ཆེ་ཁག་དག་ཀྱང་ཚུད་ཡོད་རབས་བཤད་ཅིང་། དེ་ནི་ཞི་བ་ནས་དྲག་པོ་དང་། རང་དབང་ནས་རང་བཙན་ལ་འགྱུར་རྒྱུའི་སྔ་ལྟས་ཤིག་ཡིན་ཡང་སྲིད།