ཧིག་ཆིན་ལན་གྱི་བརྩམས། འབྲོག་མིས་བསྒྱུར།
བྱང་ཨ་ཧྥི་ར་ཀ་དང་དཀྱིལ་ཤར་གྱི་དམངས་གཙོའི་རླབས་རྒྱུན་ད་དུང་རྒྱུན་མ་ཆད་པར་རྒྱལ་ཁབ་ནས་རྒྱལ་ཁབ་བར་དང་གླིང་ཕྲན་ནས་གླིང་ཕྲན་བར་འཕེལ་ཞིང་རྒྱས་ཀྱིན་པ་རེད། གསར་བརྗེ་གྱི་དྲག་རླུང་གིས་སྒེར་གཅོད་པ་སྐོར་ཞིག་སྲིད་སྟེགས་ལས་ཕར་བསྐྲད་དང་སྐྲོད་ཀྱིན་པའི་སྒང་འདིར། འཛམ་གླིང་འདི་དང་སྒོས་སུ་རྒྱ་ནག་མི་མང་གི་སེམས་སུ་འཕྲད་དུ་ཆགས་པའི་གནད་དོན་ཞིག་ནི་༼མེ་ཏོག་མ་ལི་ཀ་གསར་བརྗེ་དེ་དུས་ནམ་ཞིག་ལ་རྒྱ་ནག་ཏུ་བསླེབ་རྒྱུ་རེད་༽ཅེས་པ་དེ་རེད།
དོགས་འདྲི་འདི་སེམས་སུ་བཅངས་ཡོད་མཁན་ནི་རྒྱ་ནག་མི་མང་གཅིག་པུ་མ་ཡིན་པར་རྒྱ་ནག་གཞུང་ཡང་འདུས་ཡོད། ཊི་ཝེ་ཊི་(twitter)རུ་བཀོད་པའི་རྩོམ་ཡིག་གཅིག་གིས་ངོ་མ་དང་འདྲ་ལ་རྫུན་མ་དང་ཡང་མཚུངས་པའི་༼༢.༢༠འི་མེ་ཏོག་མ་ལི་ཀ་གསར་བརྗེ་༽ཡི་མེ་ལྕེ་རྒྱ་ནག་ཏུ་འདྲེན། རྣམ་པ་དེ་ཡིས་འཛམ་གླིང་མི་མང་གི་མདུན་དུ་རྒྱ་ནག་གཞུང་གིས་སེར་པོ་གསེར་གྱིས་བརྡུངས་པའི་མཆོག་གྱུར་བདེ་སྲུང་གི་ནུས་བ་མངོན་ཡོད་ལ། དེ་དང་མཉམ་དུ་རྒྱ་ནག་གཞུང་གིས་རྩྭ་རྩི་ཤིང་ཐམས་ཅད་དགྲ་རུ་སྣང་བའི་ཉམས་ཞན་སེམས་ཁམས་ཀྱང་ཕྱི་རུ་བཏོན་ཡོད།
རྒྱ་ནག་དང་དཀྱིལ་ཤར། བྱང་ཨ་ཧྥི་ར་ཀའི་ཁྱད་པར།
ཐའོ་ནེ་སི་ཡ་དང་ཨེ་ཇེབ་མི་དམངས་ཀྱིས་སྲིད་དབང་སྒེར་གཅོད་པ་སྲིད་སྟེགས་ལས་ཕྱིར་སྐྲོད་དགོས་པའི་རེ་འདུན་བཏོན་པའི་རྒྱུ་མཚན་རྒྱ་ནག་པར་མཚོན་ན་མིག་ལ་གོམས་ཤིང་རྣ་རུ་བྱང་ཡོད། གལ་ཏེ་དཔལ་འབྱོར་གྱི་གནས་སྟངས་ཐད་གླེང་ན། ༢༠༡༠ལོའི་རྒྱ་ནག་གི་མི་རེ་རིའི་ཆ་སྙོམས་ཀྱི་རྒྱལ་ནང་ཐོན་སྐྱེད་ཀྱི་རིན་ཐང་བསྡོམས་འབོར་ནི་ཨ་སྒོར་༣༤༠༠ཡིན། ཁ་སང་དེ་རང་མི་དམངས་ཀྱི་གྱེན་ལངས་ངོ་རྒོལ་བྱས་དང་བྱེད་ཀྱིན་པའི་བྱང་ཨ་ཧྥི་རི་ཀ་དང་དཀྱིལ་ཤར་གྱི་རྒྱལ་ཁབ་ཁག་གི་ཁྲོད་དུ་ཨེ་ཇེབ་དང་ཡའེ་མིན་གཉིས་ཀྱི་མི་རེ་རིའི་ཆ་སྙོམས་ཀྱི་རྒྱལ་ནང་ཐོན་སྐྱེད་ཀྱི་རིན་ཐང་བསྡོམས་འབོར་རྒྱ་ནག་ལས་ཅུང་ཞིག་དམའ། ད་ལྟ་གྱེན་ལངས་ཤེད་ཆེན་པོས་བྱེད་ཀྱིན་པའི་ལེ་པེ་ཡའི་མི་རེ་རིའི་ཆ་སྙོམས་ཀྱི་རྒྱལ་ནང་ཐོན་སྐྱེད་ཀྱི་རིན་ཐང་བསྡོམས་འབོར་ནི་༡༡༨༥༢རེད། ཐའོ་ནེ་སི་ཡ་དང་ཨེལ་པ་ནེ་ཡ་སོགས་རྒྱལ་ཁབ་ཀྱི་མི་རེ་རིའི་ཆ་སྙོམས་ཀྱི་རྒྱལ་ནང་ཐོན་སྐྱེད་ཀྱི་རིན་ཐང་བསྡོམས་འབོར་དེ་རྒྱ་ནག་ལས་ལྡབ་འགྱུར་གྱི་མཐོ་བ་དང་། གལ་ཏེ་དབུལ་ཕྱུག་གི་ཁྱད་པར་དང་། ལས་ཤོར། དངུལ་སྒོར་འགྲེམ་ཐལ་ཤོར་བ། མི་དམངས་ཀྱི་ཆབ་སྲིད་ཐོབ་ཐང་སོགས་རྣམ་གྲངས་རེ་རེ་བཞིན་ཞིབ་འཇུག་བྱས་ཚེ། ཐའོ་ནེ་སི་ཡའི་སྤྱི་ཡོངས་ཀྱི་གནས་སྟངས་དེ་རྒྱ་ནག་ལས་བཟང༌། ཨེ་ཇེབ་ཀྱི་ལས་ཤོར་དང་དངུལ་སྒོར་འགྲེམ་ཐལ་ཤོར་བ། སྲིད་གཞུང་གི་ལྐོག་ཟ་རུལ་སུངས་སོགས་ཀྱི་ཚད་རིམ་དེ་ཐའོ་ནེ་སི་ཡ་ལས་ཅུང་ཚབས་ཆེ་ཡིན། འོན་ཀྱང༌། རྒྱ་ནག་ལས་བལྟོས་བཅས་ཀྱིས་ཞི་འཇགས་ཡིན། འབངས་མིའི་ཆབ་སྲིད་ཀྱི་སྟོང་ཆ་ནས་བལྟས་ན། གོང་ཞུས་རྒྱལ་ཁབ་འདི་ཚོ་ནི་བསམ་ཤེས་ཀྱི་སྲིད་དབང་སྒེར་གཅོད་རྒྱལ་ཁབ་ཏུ་ངོས་འཛིན་བྱ་རུང་། ལོ་དུ་མའི་སྔོན་ནས་བཟུང་ཚོགས་མང་ལམ་སྲོལ་ལག་བསྟར་བྱས་ཡོད་པ་མ་ཟད། གསར་འགྱུར་ལས་དོན་དོ་དམ་ཐད་ནས་ཀྱང་སྲིད་ཇུས་ཅུང་གུ་ཡངས་པོ་ཡོད་ལ། དམངས་ཁྲོད་དུ་ཕྱི་རྒྱལ་ཀྱི་གཞུང་འབྲེལ་མིན་པའི་ཚོགས་པ་རྩ་འཛུགས་དང་མཉམ་འབྲེལ་ལས་འགུལ་སྤེལ་ཆོག སྤྱོད་སྟངས་འདི་དག་གིས་རྒྱལ་ཁབ་དང་མི་སྒེར་བར། སྤྱི་ཚོགས་ཁྲོད་སྟོང་ཆ་ཞིག་ལྷག་ནས་འབངས་མིའི་ཐོབ་ཐང་གི་འདུ་ཤེས་དེ་མེད་པ་ནས་ཡོད་པ་དང༌། ཡོད་པ་ནས་དྲགས་པོར་གྱུར་བ་དང་ཆབས་ཅིག་འབངས་མིའི་རྩ་འཛུགས་ཀྱི་ནུས་ཤུགས་གསོ་སྐྱོང་ཐུབ་ཡོད།
ཆབ་སྲིད་དབང་ཆ་སྟངས་འཛིན་བྱ་ཕྱོགས་ཐད། ཐའོ་ནེ་སི་ཡ་དང་ཨེ་ཇེབ་གཉིས་རྒྱ་ནག་དང་ཁྱད་པར་ཅུང་ཆེན་པོ་ཡོད། ཐའོ་ནེ་སི་ཡ་དང་ཨེ་ཇེབ་གཉིས་ནི་ཚོགས་པ་ཆེན་པོ་གཅིག་ཁོ་ན་ཅན་དང༌། སྲིད་འཛིན་ཚོགས་པ་མིན་པའི་ཚོགས་པའི་ལས་འགུལ་ནུས་ཤུགས་ལ་ཚད་བཀག་ནན་མོ་ཡོད། དམངས་གཙོ་འགྲོ་སྲོལ་ལྟར་རྣམ་པའི་སྟེང་གི་འོས་འདེམས་ཡོད་ཀྱང་དོན་དངོས་སུ་ཡོད་ཚད་ཆེས་མཐོའི་དབང་འཛིན་པས་སྟངས་འཛིན་བྱས་ཡོད། པེན་ཨ་ལེ་ཡིས་ཐའོ་ནེ་སི་ཡ་ལོ་ངོ་༢༣རིང་དབང་བསྒྱུར་བྱས་པ་དང༌། མའུ་བྷ་རག་ཨེ་ཇེབ་ཀྱི་སྲིད་འཛིན་བཞུགས་ཁྲི་རུ་ལོ་ངོ་༣༠འི་རིང་བཞུགས་ཡོད་པ་མ་ཟད། ད་དུང་སྲིད་འཛིན་གྱི་གོ་གནས་ཁོང་གི་བུ་ལ་བརྒྱུད་སྤྲོད་བྱ་འཆར་ཡོད།
རྒྱ་ནག་ནི་ཚོགས་པ་གཅིག་ཁོ་ནས་སྒེར་གཅོད་ཅན་ཡིན། འོན་ཀྱང་ཆེས་མཐོའི་དབང་བསྒྱུར་བས་དཔོན་རབས་རེས་མོས་ཏེ་དཔོན་རབས་གོང་མས་དཔོན་རབས་རྗེས་མར་དབང་ཆ་རྩིས་སྤྲོད་བྱས་ནས་(འབྲེལ་བ་གཞི་རུ་བཟུང་ནས་)དབང་ཆ་རེས་མོས་ཀྱི་ཚུལ་གྱིས་དབང་བསྒྱུར་བྱེད་ཀྱིན་ཡོད་པ་དང༌། དེ་ནི་དབང་བསྒྱུར་ཤོག་ཚོགས་ནང་ཁུལ་དུ་ཐུན་མོང་གིས་འགོ་ཁྲིད་བྱེད་ཀྱིན་པའི་(ཡང་ན་དབང་ཆ་མཉམ་སྤྱོད་ཀྱང་ཟེར་ཆོག )སྒེར་གཅོད་ལམ་ལུགས་ཤིག་སྟེ། ལྟོས་ས་ལྟོས་འཇོག་གིས་བཤད་ན། རྒྱ་ནག་གི་དབང་ཆ་ཐུན་མོང་གིས་ལོངས་སུ་སྤྱོད་པའི་མ་དཔེ་འདི་ཆབ་སྲིད་འཇོན་ཐང་ཚོགས་ཁག་གི་ནང་ཁུལ་གྱི་འགལ་ཟླ་དེ་དབང་ཆ་ཁེར་འཛིན་ཀྱི་ཐའོ་ནེ་སི་ཡ་དང་ཨེ་ཇེབ་ལས་ཅུང་ཆུང༌།
རྒྱ་ནག་ནང་མིག་སྔར་སྤྱི་ཡོངས་རང་བཞིན་ཅན་གྱི་སྤྱི་ཚོགས་ངོ་རྒོལ་བསླང་མེད། འོན་ཀྱང་། ངོ་རྒོལ་གྱེན་ལངས་རིགས་མ་ལངས་པ་དེ་རྒྱ་ནག་ནང་སྤྱི་ཚོགས་འགལ་ཟླ་གོང་ཞུས་རྒྱལ་ཁབ་དེ་དག་ལས་ཉུང་བས་མིན་ལ། དེ་ནི་རྒྱ་ནག་གཞུང་གིས་ཉེ་བའི་ལོ་འདི་དག་གི་ནང་དུ་འགྲོ་གྲོན་ཁ་མེད་མིག་མེད་དུ་བཏང་ནས་བདེ་འཇགས་སྲུང་སྐྱོང་བྱས་ཡོད་པས་ཡིན།
བདེ་སྲུང་(བདེ་འཇགས་བརྟན་བརླིང་སྲུང་སྐྱོབ་ཅེས་པའི་བསྡུས་ཚིག)ཞེས་པའི་ཚིག་འདི་རྒྱ་ནག་ནང་ཆབ་སྲིད་ཀྱི་ཐ་སྙད་གལ་འགངས་ཅན་ཞིག་ཏུ་གྱུར་ཡོད་ལ། རིམ་པ་སོ་སོའི་ཞིང་ཆེན་དང་རྫོང་སྲིད་གཞུང་གིས་རྒྱལ་ནང་ཐོན་སྐྱེད་ཀྱི་རིན་ཐང་བསྡོམས་འབོར་ཞེས་པ་དེ་གྲུབ་འབྲས་ཨང་དང་པོ་རུ་བཞག་ཡོན་ན་བདེ་འཇགས་བརྟན་བརླིང་སྲུང་སྐྱོབ་ཀྱི་ལས་དོན་ནི་ཨང་གཉིས་པར་གྱུར་ཡོད།
རྒྱ་ནག་གི་མེ་ཏོག་མ་ལི་ཀ་གསར་བརྗེ་ལ་གང་དག་འདང་མེད་དམ།
ད་ལྟའི་ཆར། བྱང་ཨ་ཧྥི་ར་ཀ་དང་དཀྱིལ་ཤར་གྱི་གནས་སྟངས་ལ་གཞིགས་ན། རྒྱལ་ཁབ་འདི་ཚོའི་ཆབ་སྲིད་ཀྱི་མདུན་ལམ་ལ་གསལ་ཁ་མེད་པ། དེ་གའི་མེ་ཏོག་མ་ལི་ཀ་གསར་བརྗེ་ཡིས་རྒྱལ་ཁབ་དེ་དག་དམངས་གཙོ་རང་དབང་གི་ཕྱོགས་སུ་ཁྲིད་རྒྱུ་རེད་དམ། ཡང་ན་ཨེ་རན་ཇི་བཞིན་དམངས་གཙོ་ནི་ཨེ་སི་ལམ་གདོད་མའི་ཆོས་ལུགས་དབང་ཤུགས་ཀྱི་ཕྱི་ཤུན་ལྟ་བུར་གྱུར་མིན་ཁ་ཚོན་གཅོད་མི་ནུས་མོད། འོན་ཀྱང་གསར་བརྗེ་དེ་དག་གིས་རྒྱ་ནག་ལ་ཤུགས་རྐྱེན་ཉིས་བརྩེགས་ཐེབས་ཡོད་པ་ནི་སྲིད་གཞུང་ལ་འཇིགས་སྣང་བསྐུལ། མི་དམངས་ལ་ངོ་རྒོལ་བརྒྱུད་སྤྱི་ཚོགས་ལམ་ལུགས་ལ་འཕོ་འགྱུར་གཏོང་རྒྱུའི་སེམས་ཤུགས་བསྐྱེད།
རྒྱ་ནག་ནང་ད་བར་དུ་གསར་བརྗེ་ལངས་མ་ཐུབ་པའི་རྒྱུ་མཚན་ནི། རྒྱ་ནག་ནང་གི་སྤྱི་ཚོགས་འགལ་ཟླ་ཐའོ་ནེ་སི་ཡ། ཨེ་ཇེབ། ལེ་པེ་ཡ་སོགས་རྒྱལ་ཁབ་ལས་ཛ་དྲག་མི་ཆེ་པས་མིན། ཐའོ་ནེ་སི་ཡ་དང་ཨེ་ཇེབ་སོགས་སུ་གྱིན་ལངས་ངོ་རྒོལ་བསླངས་གཞི་རུ་གྱུར་པའི་མེ་རྟ་ནི་འབངས་མས་རང་ལུས་མེར་བསྲེགས་པ་དང༌། རང་ཤི་བརྒྱབ་པའི་དོན་རྐྱེན་རིགས་ཡིན། རྒྱ་ནག་ཏུ་དེ་འདྲའི་དོན་རྐྱེན་བཅུ་གྲངས་ཤིག་བྱུང་ཟིན་པས་ཡ་མཚར་སྐྱེ་མི་སྲིད། དེའི་ཐོག་རྒྱ་ནག་གཞུང་གིས་དོགས་ཟོན་ནན་མོ་བྱས་ཏེ་༼བརྟན་བརླིང་ལ་གནོན་པའི་རྒྱུ་རྐྱེན་ཡོད་ཚད་མགོ་འབུར་མ་དག་བཅོམ་ནས་ཚང་ནང་དུ་གཙང་སེལ་བྱ་དགོས་༽ཞེས་པའི་གཞི་རྩའི་སྲིད་ཇུས་ལག་བསྟར་མཐར་ཕྱིན་བྱས་ཡོད། དེ་ལྟར་བསྒྲུབ་ཐུབ་རྒྱུའི་ཆེད་དུ་རྒྱ་ནག་གཞུང་གིས་མ་གནས་ལ་བསམ་བློ་གཏོང་མི་སྲིད་ལ། ད་བར་དུ་༢༠༡༠ལོའི་འབྲེལ་ཡོད་བསྡོམས་རྩིས་ཁག་ད་དུང་སྤྱི་བསྒྲགས་བྱས་མེད། འོན་ཀྱང་༢༠༠༩ལོའི་བདེ་སྲུང་གི་འགྲོ་གྲོན་ལས་རྒྱ་ནག་ནོར་སྲིད་ཀྱི་ཡོང་སྒོའི་ཁྲོད་བདེ་སྲུང་ཀྱི་བསྡུར་ཚད་དེས་ག་ཚོད་ཅིག་ཟིན་ཡོད་པ་ཤེས་ཐུབ། ༢༠༠༩ལོར། རྒྱ་ནག་གི་ནོར་སྲིད་ཡོང་སྒོ་ནི་ཁྲག་ཁྲིག་ཆེན་མོ་༦དང་ཁྲག་ཁྲིག་༨། ཐེམ་འབུམ་ཆེན་མོ་༤དང་ཐེར་འབུམ་༧། དུང་ཕྱུར་༧ རེད། དེའི་ནང་བདེ་སྲུང་འགྲོ་སོང་གིས་ཁྲག་ཁྲིག་༥དང་ཐེར་འབུམ་ཆེན་མོ་༡། ཐེར་འབུམ་༤ཟིན་ཡོད་པས། བདེ་སྲུང་འགྲོ་གྲོན་གྱིས་རྒྱ་ནག་རྒྱལ་ཡོངས་ཀྱི་ནོར་སྲིད་ཡོང་སྒོའི་༧.༥%ཟིན་ཡོད། ང་ཚོའི་མིག་ལམ་དུ་ལྷག་པའི་དྲི་བ་ནི་རྒྱ་ནག་ལས་གཞན་རྒྱལ་ཁབ་སུ་ཞིག་གིས་བདེ་སྲུང་ཆེད་འགྲོ་སོང་དེ་ལས་ཆེ་བ་བཏང་ཡོད་དམ།
དམག་དཔུང་གི་བར་གནས་ཀྱིས་སྒེར་གཅོད་པ་དང་འབངས་མིའི་བར་གྱི་སྟོབས་ཤུགས་བསྡུར་ཚད་ལ་འཕོ་འགྱུར་ཐེབས་ཡོད།
ཐེངས་འདིའི་བྱང་ཨ་ཧྥི་རི་ཀ་དང་དཀྱིལ་ཤར་ཁག་ཏུ་གསར་བརྗེ་བསླངས་རྗེས། དམག་དཔུང་གི་བར་གནས་ཀྱིས་སྒེར་གཅོད་པ་དང་འབངས་མིའི་བར་གྱི་སྟོབས་ཤུགས་ལ་འཕོ་འགྱུར་ཐེབས་ཡོད། འདིའི་ཐད་ནས་བཤད་ན་རྒྱ་ནག་མི་དམངས་ཐའོ་ནེ་སི་ཡ་དང་ཨ་ཇེབ་མི་དམངས་ནང་བཞིན་རླུང་རྟ་བརྒྱུགས་མེད། ཕྱི་ལོ་༡༩༨༩ལོ་ནས་བཟུང་། རྒྱ་ནག་གཞུང་ལ་༼སྲོལ་རྒྱུན་བདེ་འཇགས་གྱི་ཁོངས་སུ་མི་གཏོགས་པའི་གློ་བུར་བའི་དུས་འགྱུར་ལ་ནུས་བ་ལྡན་པའི་ཁ་གཏད་འཇལ་དགོས་ན། ནང་ཁུལ་ལ་དམིགས་པའི་བདེ་སྲུང་གི་ནུས་པ་ཇེ་ཆེ་གཏོང་དགོས་པ་དང་། ལོ་ལྟར་ནང་ཁུལ་བདེ་སྲུང་གི་ནུས་ཤུགས་འཛུགས་སྐྲུན་ཆེད་རིམ་བཞིན་འགྲོ་གྲོན་ཇེ་ཆེ་གཏོང་དགོས་པའི་༽ངེས་ཤེས་སྐྱེས་ཡོད། ད་ལྟའི་རྒྱ་ནག་གི་སྤྱི་བདེ་མི་སྣ་དང་། ཉེན་རྟོག་དམག་མིས་གྲུབ་པའི་དྲག་ཟིང་འགོག་རྒོལ་དམག་མིའི་སྒྲིག་ཆས་དེ་འཛམ་གླིང་སྟེང་རྩེ་བུད་རེད་ཅེས་ལབ་ཆོག་ལ། མི་ཁྲི་འགའི་ཟིང་སློང་ལ་དམག་མི་བཀོལ་མི་དགོས་པའི་ཚད་ལ་བསླེབས་ཡོད།
དམག་མིར་སྤྲད་པའི་བསལ་བློའི་སློབ་གསོ་དང་དམག་ཁུལ་གྱི་ལྐོག་ཟ་རུལ་སུངས་ལ་གཞིགས་ན། དམག་དཔོན་ཚོར་སྲིད་གཞུང་གི་བདེ་སྲུང་ནུས་ཤུགས་ལ་ཡིད་ཆེས་ཡོད་ཚེ། དྲུག་བཞིའི་དུས་སྐབས་ཀྱི་ཞིའུ་ཆིན་ཞན་དམག་སྤྱི་ལྟ་བུའི་མི་མང་པོ་མེད། གལ་སྲིད་ལེ་པེ་ཡ་ཇི་བཞིན་ག་འགྲོ་འདི་འགྲོའི་གལ་ཆེའི་དུས་སུ་བསླེབ་ཚེ། ཁེ་བཟང་ལེན་མཁས་པའི་དམག་དཔོན་ཚོས་རྔ་ཇི་ལྟར་རྡུང་ན་འཆམ་དེ་ལྟར་འཁྲབ་སྲིད་པ་ལས། ལམ་ལུགས་ཀྱི་དུར་རྫས་དེ་བས་ཀྱང་བྱ་འདོད་མེད།
རྒྱ་ནག་མི་དམངས་ཀྱི་ངོ་རྒོལ་འདུ་ཤེས་དང་ནུས་པ་སོགས་སུ་བསམ་བློ་བཏང་ན། འདས་པའི་ལོ་ལྔའི་ནང་ལོ་རེ་རེར་ངོ་རྒོལ་ཆེ་ཆུང་འབུམ་གཅིག་ལྷག་བྱུང་ཡོད་པ་ལས་རོབ་ཙམ་ཤེས་ཐུབ་སྙམ། རྒྱ་ནག་མི་དམངས་ཡོངས་སུ་རྫོགས་པར་ངོ་རྒོལ་གྱི་འདུ་ཤེས་ཁྲག་རྒྱུན་ན་མེད་པ་མིན་ལ། དེ་ནི་ངོ་རྒོལ་གྱི་ནུས་པ་ཞན་པས་ཡིན། འདི་ལ་རྒྱུ་རྐྱེན་གཉིས་ཡོད་ལ་གཅིག་ནི་གཞུང་དང་འབངས་མིའི་བར་གྱི་ནུས་ཤུགས་ལ་ཆེ་ཆུང་ཆེ་དྲགས་པས་ཡིན། གཉིས་པ་ནི་རྒྱ་ནག་གཞུང་གིས་འབངས་མིས་རང་དབང་ངང་རྩ་འཛུགས་བྱ་རྒྱུའི་ནུས་པ་བཙན་འཕྲོག་དང་ཁོར་ཡུག་རྨེག་མེད་དུ་བཏང་བས་ཡིན།
ཐེངས་འདིའི་༢.༢༠་ཡི་མེ་ཏོག་མ་ལི་ཀ་གསར་བརྗེ་དེའང་དྲ་རྒྱའི་སྟེང་གི་སྐུལ་སློང་ཙམ་ཡིན། འོན་ཀྱང་པེ་ཅིན། ཧྲང་ཧེ་སོགས་གྲོང་ཁྱེར་དུ་མི་མི་ཉུང་བ་ཞིག་འདུ་འཛོམས་ཀྱི་ས་གནས་སུ་སོང་ནས་ལྟད་མོར་བལྟས་ཡོད། ལྟད་མོ་བ་མང་པོ་ཞིག་ལྟད་མོ་བ་ནས་ནང་ཞུགས་པར་གྱུར་ཆོག་ཆོག་རེད།
རྒྱ་ནག་དམར་ཤོག་ཚོགས་པས་རང་ཉིད་ཀྱི་ལོ་ངོ་སུམ་ཅུའི་རིང་གི་གསང་བའི་ལས་དོན་གྱི་ཉམས་མྱོང་དང་ལོ་ངོ་དྲུག་ཅུའི་རིང་གི་གཞུང་འཛིན་གྱི་ཉམས་མྱོང་ཕྱོགས་གཅིག་ཏུ་བསྡུས་ཏེ། རང་གིས་དེ་སྔོན་བཀོལ་མྱོང་བའི་ཐབས་ཤེས་ཚང་མ་བཀག་སྡོམ་བྱས་ཡོད། ཡིན་ན་ཡང། ༢.༢༠ཉིན་གྱི་མེ་ཏོག་མ་ལི་ཀ་གསར་བརྗེ་ཡིས་གསར་བརྗེ་རྙིང་པ་ལ་གནད་དོན་གསར་བར་འཕྲད་ཡོད།
དྲ་རྒྱའི་དུས་རབས་སུ་གསར་བརྗེའི་ལས་འགུལ་བྱུང་ཚེ། ལས་འགུལ་གྱི་ངོ་བོ་ཁ་འཐོར་དང་གཟིགས་མེད་ཀྱི་རྣམ་པར་གནས་ཀྱང་ག་ས་གང་དུ་ཡོད། རྩ་འཛུགས་ཀྱི་གདོས་བཅས་མེད་པ་འདྲ་ཡང་འགུལ་སྐྱོད་དང་སྣེ་ཁྲིད་ཀྱི་ནུས་བ་ལྡན་ཡོད། ཕར་ལྟོས་ཚོད་ཀྱི་དབུ་ཁྲིད་མེད་པར་སྣང་ཡང་ཁྱབ་རྒྱ་ཆེན་པོའི་སྐུལ་འདེད་དམ་གཅིག་གྱུར་གྱི་ནུས་པ་ཐོན་པ་སོགས་ཀྱི་ཁྱད་ཆོས་ལྡན་ཡོད། ༢.༢༠ཉིན་གྱི་མེ་ཏོག་མ་ལི་ཀ་གསར་བརྗེ་ཡི་གནས་ཚུལ་ཕྱི་ཟླ་༢པའི་ཚེས་༡༧ཉིན་ཊི་ཝེ་ཊི་རུ་སྤེལ་གཏོང་བྱས་རྗེས། པེ་ཅིན་སྲིད་གཞུང་འདི་ལྟ་བུའི་ངོ་ཚ་ཁ་སྐྱེངས་ལ་ཐུག་ཡོད། ཐོས་ཀྱང་མ་ཐོས་ཤེས་ཀྱང་མ་ཤེས་པའི་བརྟུལ་ཞུགས་འཛིན་པ། གཟིགས་མེད་རྗེས་མེད་ཀྱི་འགྲན་སྐུལ་འདིའི་རིགས་གཅིག་བགྱིས་ན་མགྱོགས་མྱུར་ངང་གཞི་གཅིག་ཏུ་འདུས་ནས་རྔམ་བརྗིད་ཆེ་བའི་འདུ་འཛོམས་ཡ་མེད་དུ་གྱུར་སྲིད་པའི་སེམས་ཁྲལ། ཌོ་མེ་ནོ་ཤོ་རྡེའུ་ཡི་ཤོ་རྡེའུ་དང་པོ་རུ་གྱུར་མི་སྲིད་པ་མིན།
དགྲ་ཆེན་པོ་མདུན་ནས་ཐོན་འདྲའི་འཇིགས་སྐྲག་ངང་གདོང་ལེན་བྱེད་སྟངས་ཀྱིས་ཚེས་༢༠འི་ཉིན་སྒྲིག་ཆས་གོན་ཡོད་མེད་གཉིས་ཀའི་སྤྱི་བདེ་མི་སྣ་དང་ཉེན་རྟོག་པ་འབོར་ཆེན་ཆེད་དུ་མངགས་ནས་མངོན་གསལ་ཡིན་མིན་གྱི་མི་ཚོགས་དང་ཁ་གཏད་དུ་ལངས་བའི་དགོད་བྲོ་བའི་རྣམ་པ་དེ་ཤར་བ་རེད། རྣམ་པ་དེ་ལས་སྲིད་གཞུང་གི་དངངས་སྐྲག་དང་རང་གིས་རང་ལའང་གདེང་ཚོད་མེད་ཅིང་ཡིད་ཐང་ཆད་པའི་རང་གཟིགས་ངོ་མ་དེ་ཕྱི་རུ་གསལ་བོར་བཏོན་པ་རེད།
ད་ལྟ་ང་ཚོས་བཤད་ཕོད་པ་ཞིག་ནི། དེ་རིང་གི་རྒྱ་ནག་གི་ཆབ་སྲིད་གནས་བབ་དང་སྤྱི་ཚོགས་ཀྱི་ཛ་དྲག་གནས་སྟངས། དེའི་ཁར་རྒྱ་ནག་དམར་ཤོག་ཚོགས་པ་དྲག་ཤུགས་ལ་བསྟུན་དྲགས་པ་སོགས་ཀྱི་དབང་གིས། རྐྱེན་ངན་གོད་ཆག་རིགས་ཐམས་ཅད་ནམ་བྱུང་འདི་བྱུང་མེད་པར་གློ་བུར་བའི་ཚུལ་གྱིས་བྱུང་སྲིད་པར་ཡིད་ཆེས་བྱས་ཆོག
