ལོ་གསར་ལ་བཀྲ་ཤིས་བདེ་ལེཊ་ཞུ།

དེ་རིང་ནི་བོད་རྒྱལ་ལོ་༢༡༣༨དང་། ལྕགས་མོ་ཡོས་ལོའི་ལོ་གསར་ཚེ་གཅིག་ཡིན་ཞིང་། ཞོགས་པ་སྔ་པའི་ཉི་ཟེར་དང་ལྷན་དུ་རྒྱ་གར་བྱང་ཕྱོགས་ངྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་རྣམ་རྒྱལ་གྲྭ་ཚང་གི་དགེ་འདུན་པ་རྣམ་པ་དང་། བཙན་བྱོལ་བོད་གཞུང་གི་དམངས་གཙོའི་བོ་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་ལས་ཁུངས་ཁག་གི་འགན་འཛིན་དང་དྲུང་ཆེ་རྣམ་པ། ལས་བྱེད་ཆེ་ཕྲ་དང་སེར་སྐྱ་མི་མང་བཅས་འདུ་འཛོམས་ཐོག ལོ་གསར་གྱི་ཉིན་དང་པོར་ཚེ་བསྟོད་དང་སྨོན་ལམ་གསོལ་འདེབས་གནང་སོང་ལ། ༸གོང་ས་མཆོག་སྐུ་ཚེ་ཡུན་རིང་བརྟན་པ་དང་ཐུགས་ཀྱི་བཞེད་དགོངས་མཐའ་དག་དགག་མེད་ལྷུན་གྱིས་འགྲུབ་ཆེད་མནྜལ་རྟེན་གསུམ་འདེགས་འབུལ་ཞུས་སོང་།

དེའི་རྗེས་བོད་གཞུང་ཟློས་གར་ཚོགས་པས་འཁྲབ་སྟོན་ཐུང་ངུ་ཞིག་གཟིགས་འབུལ་བྱས་རྗེས་མང་ཚོགས་རྣམས་ཀྱིས་གཙུག་ལག་ཁང་གི་ལྷ་ཁང་ཁག་ཏུ་མཆོལ་མཇལ་མགོ་འཛུགས་ཞུས་སོང་ཞིང་། སྐབས་དེར་གསར་འགོད་པས་བོད་གཞུང་བཀའ་ཤག་གི་ངོས་ནས་ལོ་གསར་བའི་ནང་གཞིས་བྱེས་གཉིས་དང་བཙན་བྱོལ་བོད་མི་ཚོར་དམིགས་བསལ་གྱི་གསུང་འཕྲིན་འདྲ་ཡོད་མེད་བཀའ་འདྲི་ཞུས་པའི་ལན་དུ། ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས།ཐེངས་འདིའི་ལོ་གསར་ལ་བོད་གཞུང་བཀའ་ཤག་གི་ངོས་ནས་དམིགས་བསལ་ཞུ་རྒྱུ་གང་ཡང་མེད། བོད་གཞིས་བྱེས་རྒྱ་ཆེའི་མི་མང་ལ་གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུ་རྒྱུ་དང་། ལྕགས་མོ་ཡོས་ལོ་གནམ་ལོ་གསར་བཞད་འདི་ལ་རྟགས་དང་རྟེན་འབྲེལ་རང་འགྲིག་གིས་བོད་དོན་བདེན་མཐའ་མྱུར་ཏུ་གསལ་བ་དང་། བོད་གཞིས་བྱེས་ལྷན་འཛོམ་ཡོང་བའི་རེ་བ་བཅིངས་ཡོད་པར་མ་ཟད།༸གོང་ས་མཆོག་གི་སྐུ་ཚེ་ཡུན་རིང་བརྟན་པ་དང་།བྱ་བཞག་མ་ལུས་ཐུགས་འདུན་བཞིན་བསྒྲུབ་པའི་བཀྲ་ཤིས་ཁ་གཡང་འབོད་རྒྱུ་ཡིན། ཞེས་གསུངས་བྱུང་།