མིག་ཆུའི་ལས་དབང་།

ངྷ་ས་ཀིརྟིའི་གྲྭ་ཚང་གི་གྲྭ་ཀ་ཉག་ཚེ་རིང་ལགས་སུ་ཉེ་ཆར་བོད་ནས་འབྱོར་བའི་རྔ་པ་ཁུལ་ཁྱུང་ཆུ་རྫོང་རོང་ཐ་དགོན་པའི་གྲྭ་རྩོམ་པ་པོ་དགེ་འདུན་ཚེ་རིང་ལགས་ཀྱིས་གནས་ཚུལ་ངོ་སྤྲོད་གནང་བ་ལྟར་ན། དེ་སྔོན་ཁོང་གི་རྩོམ་ཡིག་ཕྱོགས་སྒྲིག་( མིག་ཆུ ) ཞེས་པ་དང་། རྔ་པ་ཁུལ་ཁྱུང་ཆུ་རྫོང་རོང་ཐ་གསེར་ཏེའུ་སྡེ་པ་རོང་ཐ་དགོན་པའི་གྲྭ་ཚེ་རིང་དོན་འགྲུབ་ལགས་ཀྱིས་རྩོམ་སྒྲིག་བྱས་པའི་དུས་དེབ་ (གསོན་མིག) ཅེས་གཉིས་དཔར་སྐྲུན་ཐད་རོགས་རམ་བྱས་པའི་ཉེས་འཛུགས་འོག ༢༠༡༠ཟླ་༢ཚེས་༢༦ ཉིན་རྒྱ་གཞུང་གིས་གྲྭ་ཚེ་རིང་དོན་འགྲུབ་ལགས་འཛིན་བཟུང་བྱས་ཏེ། ད་ལྟ་རྔ་པ་ཁུལ་ལྟེ་གནས་འབར་ཁམས་སུ་བཀག་ཉར་བྱས་ཡོད་འདུག

(གསོན་མིག )ཅེས་པའི་དུས་དེབ་ནི་རྩོམ་པ་པོ་དགེ་འདུན་ཚེ་རིང་སོགས་ཀྱིས་བོད་ནང་གི་དངོས་ཡོད་གནས་སྟངས་བརྗོད་གཞིར་བཟུང་བའི་རྩོམ་ཡིག་སྣ་ཚོགས་ཕྱོགས་བསྒྲིགས་བྱས་པའི་དཔེ་དེབ་ཅིག་ཡིན་ཞིང་། རྩོམ་པ་པོ་དགེ་འདུན་ཚེ་རིང་ཁོང་ཡང་དཔེ་དེབ་དེ་གཉིས་དཔར་སྐྲུན་བྱས་པའི་དབང་གིས་རྒྱ་གཞུང་གིས་སུན་གཙེར་དང་འཇིགས་སྣང་ཡང་ཡང་བསྐུལ་བར་བརྟེན། འདས་པའི་ཟླ་ངོ་མང་པོའི་རིང་བྲོས་བྱོལ་བྱས་མཐར་རྒྱ་གར་ལ་སྐྱབས་བཅོལ་དུ་ཡོང་དགོས་བྱུང་བ་ཞིག་ཡིན་འདུག

གསོན་མིག་དུས་དེབ་ནང་གི་(བྱེ་རླུང་ཁྲོད་ཀྱི་ངུ་འབོད)ཅེས་པའི་རྩོམ་ཡིག་གི་རྩོམ་པ་པོ་ཚེ་རིང་བསྟན་འཛིན་ལགས་ ༢༠༡༡ ཟླ་ ༡ ཚེས་ ༣ ཉིན་མཚོ་སྔོན་ཟི་ལིང་དབྱངས་ཅན་མ་དྲ་ཁང་དུ་འཛིན་བཟུང་བྱས་རྗེས། དེང་སྐབས་རྔ་པ་ཁུལ་གྱི་ལྟེ་གནས་འབར་ཁམས་སུ་བཀག་ཉར་བྱས་ཡོད་འདུག ཁོང་གི་ཕ་ཡུལ་རྔ་པ་ཁུལ་མཛོད་དགེ་རྫོང་ཤེར་ཕྲེང་སྡེ་བ་ནས་ཡིན་ཞིང་།ཆུང་དུས་ནས་གྲྭ་པ་བྱས་ཏེ་དཔལ་ཡུལ་དགོན་ཆེན་དུ་ཆོས་ཞུགས་བྱས་པ་དང་།དེ་སྔ་རྩོམ་ཡིག་སྣ་ཚོགས་ཤིག་དུས་དེབ་དང་དྲ་བ་སོགས་སུ་སྤེལ་ཡོད་འདུག

( མིག་ཆུ ) དང་( གསོན་མིག ) ཅེས་པའའི་དཔེ་དེབ་གཉིས་ཀྱི་དཔར་སྐྲུན་ཁང་( པཎྜིཏ་དཔར་སྒྲིགས་ལྟེ་གནས ) སུ་ལས་ཀ་བྱེད་མཁན་བུ་མོ་པདྨ་མཚོ་ཡང་ ༢༠༡༠ ཟླ་ ༢ ཚེས་ ༢༦ ཉིན་ཕ་ཡུལ་ནས་འཛིན་བཟུང་བྱས་ཡོད་ཅིང་། ཁོང་མོར་གོང་གི་དཔེ་དེབ་གཉིས་ཀྱི་ཡིག་གཏག་པ་ཡིན་པའི་ཉེས་འཛུགས་བྱས་ཡོད་འདུག དེང་སྐབས་ཁོང་མོ་རྔ་པ་ཁུལ་འབར་ཁམས་སུ་མུ་མཐུད་བཀག་ཉར་བྱས་ཡོད་འདུག

པདྨ་མཚོ་ལགས་ཀྱི་ཕ་ཡུལ་རྔ་པ་ཁུལ་ཁྱུང་ཆུ་རྫོང་སྦྲ་ཆེན་ཞང་རུ་ཆེན་གཉིས་པ་ནས་ཡིན་ཞིང་།ལྷ་སའི་དུང་དཀར་སློབ་གྲྭ་ནས་སློབ་གྲྭ་ཐོན་རྗེས་དཔར་སྐྲུན་ཁང་དེར་ལས་ཀ་བྱས་པ་ཞིག་ཡིན་འདུགདེ་བཞིན།  པཎྜིཏ་དཔར་སྒྲིགས་ལྟེ་གནས་ཀྱི་རྩོམ་སྒྲིག་པ་བུ་མོ་དབྱངས་ཅན་སྐྱིད་དམ། པུར་མིང་ལ་ལུག་རྫིའི་རྣམ་ཤེས་ཞུ་བ་ ༢༠༡༠ ཟླ་ ༣ ཚེས་ ༣༠ ཉིན་འཛིན་བཟུང་བཀག་ཉར་བྱས་ཡོད་ཅིང་། ཁོང་མོའི་ཕ་ཡུལ་བླ་བྲང་ནས་ཡིན་ཞིང་།དེང་སྐབས་ནག་ཆུ་རུ་བཀག་ཉར་བྱས་ཡོད་པའི་གནས་ཚུལ་འདུག  

གོང་གསལ་དཔེ་དེབ་གཉིས་ལ་ཁ་གཡར་སྟེ་པཎྜིཏ་དཔར་སྒྲིགས་ལྟེ་གནས་ཞེས་པའི་དཔར་ཁང་སྒོ་བརྒྱབ་ཡོད་འདུག་ལ།དཔར་ཁང་དེའི་སྦྱིན་བདག་བོད་པ་ཞིག་ཡོད་པ་དེ་ཡང་ཐོག་མར་བཀག་ཉར་བྱས་ཡོད་ཀྱང་རྗེས་སུ་ཀློད་གྲོལ་བཏང་ཡོད་འདུག