གཅན་ཚའི་ལོ་གསར།

རྡོ་རྗེ་གླིང་དུ་གནས་བཞུགས་སངས་རྒྱས་རྒྱ་མཚོ་ལགས་ཀྱིས་ཕ་ཡུལ་གཅན་ཚ་ལ་ཁ་པར་བཏང་ནས་ཤེས་རྟོགས་བྱུང་བ་ལྟར་ན། ཟླ་བ་སྔོན་མའི་ཧོར་ཟླ་དང་པོར་མཚོ་སྔོན་གཅན་ཚ་རྫོང་འོག་གི་དགོན་པ་ཁག་དང་སྡེ་བའི་མི་སྣ་རྒན་རབས་པ་རྣམས་ཀྱིས་བོད་ཕྱི་ནང་དང་། མདོ་དབུས་ཁམས་གསུམ་ལོ་གསར་གྱི་དུས་ཚེས་གཅིག་གྱུར་བཟོ་རྒྱུའི་གསལ་བསྒྲགས་ཤིག་སྤེལ་ཏེ། སྲོལ་རྒྱུན་ལྟ་བུར་གྱུར་ཡོད་པའི་རྒྱ་ནག་དང་མཉམ་དུ་དཔྱིད་གསར་དུས་ཚིགས་ཀྱི་ལོ་གསར་ལ་རོལ་མེད་སྟབས། དེའི་རྗེས་གཅན་ཚ་རྫོང་མི་དམངས་སྲིད་གཞུང་གིས་ཉེན་རྟོག་པ་དང་གཞུང་གི་ལས་བྱེད་རྩ་འཛུགས་བྱས་ཏེ། དགོན་པ་ཁག་དང་སྡེ་བ་ཁག་ཏུ་ཟླ་གཅིག་རིང་རྒྱལ་ཁབ་ཀྱི་སྲིད་ཇུས་སློབ་གསོ་སྦྱོང་བརྡར་ཟེར་བའི་བྱ་འགུལ་ཞིག་སྤེལ་ཡོད་པ་དང་། དགོན་པ་རེར་ལས་བྱེད་ ༡༢ རེ་དང་སྡེ་བ་རེར་ལས་བྱེད་ ༢ རེ་གཏན་སྡོད་བྱེད་བཅུག་སྟེ། རྒྱལ་ཁབ་ཀྱི་བཅའ་ཁྲིམས་དང་སྲིད་ཇུས་ཁྱབ་བསྒྲགས་དང་འབྲེལ་སྡེ་དམངས་དང་དགོན་པའི་གྲྭ་བ་ཚོར་ལྟ་རྟོག་བྱས་ཡོད་འདུག  

དུས་དེ་ནས་བཟུང་དགོན་པའི་གྲྭ་བ་རྣམས་ལ་བཙན་སྐུལ་གྱིས་བཅའ་ཁྲིམས་དང་སྲིད་ཇུས་སློབ་སྦྱོང་བྱེད་བཅུག་ཡོད་པ་མ་ཟད། གཅན་ཚ་རྫོང་འོག་གི་དགོན་པ་ཁག་དང་། སྡེ་བ་ཁག་ཏུ་རྒྱལ་ཁབ་ཀྱི་སྲིད་ཇུས་དང་མི་མཐུན་པའི་གནས་ཚུལ་ཁག་ཁྱབ་སྤེལ་བྱུང་བ་ཡིན་ན། རྩ་འཛུགས་བྱས་པའི་ལས་བྱེད་མི་སྣ་རྣམས་གཞུང་གི་ལས་གནས་ཁག་ལས་གནས་དབྱུང་གཏོང་རྒྱུའི་བཀའ་ཁྱབ་བཏང་ཡོད་འདུག འོན་ཀྱང་རེ་སྒུག་བྱས་པའི་བོད་ལུགས་ལོ་གསར་སྐབས། བོད་རིགས་ལས་བྱེད་ཚང་མར་གུང་སེང་སྤྲད་མེད་པར་མ་ཟད། རྫོང་དང་ཡུལ་ཚོའི་སློབ་གྲྭ་ཁག་གི་སློབ་མ་རྣམས་ཀྱང་ཁྱིམ་དུ་བཏང་མི་འདུག

ཡིན་ནའང་དགོན་པ་ཁག་དང་སྡེ་བ་ཁག་ཏུ་བོད་གཞིས་བྱེས་གཉིས་ཀྱི་ལོ་གསར་ལ་མཉམ་དུ་རོལ་པར་སྔོན་མ་དང་མི་འདྲ་བར་དགོན་པ་ཁག་གི་དགེ་འདུན་པ་རྣམས་ལྷན་འཛོམས་གནང་སྟེ་བོད་ལུགས་ལོ་གསར་ལ་རོལ་ཡོད་པ་དང་། སྡེ་བ་ཁག་གི་བོད་རིགས་རྣམས་ཀྱང་སྡེ་བ་སོ་སོའི་མ་ཎྀ་ལྷ་ཁང་དུ་མཉམ་དུ་འཛོམས་བྱས་ཏེ་སྤྲོ་སྐྱིད་ལ་རོལ་ཡོད་འདུག གཅན་ཚ་རྫོང་གི་བོད་རིགས་མང་ཚོགས་ལ་བོད་ཀྱི་མདོ་དབུས་ཁམས་གསུམ་གྱི་ལོ་གསར་ཆིག་སྒྲིལ་བྱེད་པའི་བསམ་ཚུལ་འདི་ནི་ ༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས། རྒྱ་ནག་གིས་བོད་རིགས་ཡོངས་ལ་མནར་གཅོད་བཏང་བའི་དཀའ་སྡུག་གི་ཁྲོད་ནས་བྱུང་བ་ཞིག་ཡིན་འདུག