ཆབ་སྲིད་བཙོན་པ་ཀློད་གྲོལ།

ས་བྱི་ཞི་རྒོལ་ཆེན་མོའི་ནང་མཉམ་ཞུགས་གནང་མཁན། དཀར་མཛེས་དགོན་པའི་གྲྭ་བྱམས་པ་རྡོ་རྗེ་ལགས་རྒྱ་ནག་གི་བཙོན་ཁང་ནས་ལོ་གསུམ་གྱི་དུས་ཡུན་རྫོགས་ཏེ་ཉེ་ཆར་བཙོན་གྲོལ་ཐོབ་སྟེ་ཕྱིར་ཕ་ཡུལ་དུ་ལོག་ཡོད་འདུག  འབྲེལ་ཡོད་མི་སྣས་གནས་ཚུལ་མཁོ་སྤྲོད་བྱས་པ་ལྟར་ན། ༢༠༠༨ ལོའི་ཟླ་ ༥ བའི་ཚེས་ ༡༨ ཉིན་དཀར་མཛེས་རྫོང་ཐོག་ཏུ་༸གོང་ས་མཆོག་བོད་ནང་ཕེབས་དགོས། བོད་ལ་རང་དབང་དགོས། བོད་ནང་འགྲོ་བ་མིའི་ཐོབ་ཐང་དགོས། ཞེས་ངོ་རྒོལ་སྐད་འབོད་བྱེད་མཁན་གྲས་དཀར་མཛེས་དགོན་པའི་གྲྭ་བྱམས་པ་རྡོ་རྗེ་དང་། དཔལ་ལྡན་འཕྲིན་ལས་གཉིས་རྒྱ་ནག་གཞུང་གིས་སྐབས་དེར་འཛིན་བཟུང་བཙོན་འཇུག་བྱས་ཡོད་པར་མ་ཟད། གྲྭ་དཔལ་ལྡན་འཕྲིན་ལས་ལགས་སུ་ལོ་ ༧ གྱི་ཁྲིམས་ཆད་དང་། གྲྭ་བྱམས་པ་རྡོ་རྗེ་ལ་ལོ་ ༣ གྱི་ཁྲིམས་ཐག་བཅད་དེ་སི་ཁྲོན་ཁྲིན་ཏུའུ་ཉེ་ཁུལ་གྱི་མེན་ཡཱང་བཙོན་ཁང་དུ་བཙོན་འཇུག་བྱས་ཡོད་འདུག 

འདི་ལོའི་ཕྱི་ཟླ་ ༢ པའི་ཚེས་ ༢༥ ཉིན། རང་ལོ་ ༢༣ ཡིན་པའི་གྲྭ་བྱམས་པ་རྡོ་རྗེ་ལགས་ལོ་གསུམ་གྱི་དུས་ཡུན་རྫོགས་ཏེ་བཙོན་ཁང་ནས་ཀློད་གྲོལ་ཐོབ་ཡོད་པ་དང་། ལོ་གསུམ་རིང་བཙོན་འོག་ནས་སྡུག་སྦྱོང་མནར་གཅོད་དང་སུན་གཙེར་ཚད་མེད་བཟོས་ཏེ་ད་ལྟ་གཟུགས་པོའི་གནས་སྟངས་སྐྱོ་བོ་ཆགས་ཡོད་འདུག་ལ། གཞན། ལོ་བདུན་གྱི་ཁྲིམས་ཐག་བཅད་ཡོད་པའི་གྲྭ་དཔལ་ལྡན་འཕྲིན་ལས་ལགས་ད་ལྟའི་ཆར་ཡང་བཙོན་ཁང་གི་སྡུག་སྦྱོང་མནར་གཅོད་འོག་གནས་ཡོད་པ་མ་ཟད། སི་ཁྲོན་མེན་ཡཱང་བཙོན་ཁང་དུ་ད་ལྟའི་ཆར་ཡང་ ༢༠༠༨ ལོའི་དཀར་མཛེས་ཁུལ་གྱི་ཞི་རྒོལ་ཁྲོད་འཛིན་བཟུང་བྱས་པའི་ཆབ་སྲིད་བཙོན་པ་མང་པོ་ཞིག་བཙོན་འཇུག་བྱས་སྐོར་བརྗོད་འདུག   

གསར་འགོད་པ། དོན་གོ