འཛིན་སྐྱོང་ལས་བགྲེས་ཡོལ་གནང་ཚེ་གུས་བཀུར་ཞུ།

བོད་མིའི་སྒེར་ལངས་ཐེངས་ང་གཉིས་པའི་དུས་དྲན་ཉིན་གྱི་ཕྱི་དྲོའི་ཆུ་ཚོད་ ༦ གི་སྟེང་།  བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་གི་གོ་སྒྲིག་འོག  བོད་མི་བརྒྱ་ཕྲག་འགའ་འདུ་འཛོམས་ཐོག་དྷ་ས་མེག་གྷན་རླངས་འཁོར་འབབ་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་མར་མེ་ཁྲོམ་སྐོར་གྱི་ལས་འགུལ་ཞིག་གནང་སོང་།

སྐབས་དེར་བོད་དབུས་གཞོན་ནུའི་ཚོགས་གཞོན་དོན་གྲུབ་ལྷ་དར་ལགས་ཀྱིས། བོད་ཀྱི་གཞོན་ནུ་ལྷན་ཚོགས་ཀྱིས་ངོས་ནས་ཐེངས་འདིའི་བོད་མིའི་སུམ་བཅུའི་སྒེར་ལངས་ ༥༢ པའི་དུས་དྲན་སྐབས་སྤེལ་བཞིན་པའི་ལས་འགུལ་ཁག་ངོ་སྤྲོད་དང་འབྲེལ་བརྗོད་དོན། ལོ་རྒྱུས་ཐོག་བོད་དང་དབྱིན་ཇིའི་བར་འདྲ་མཉམ་གྱི་ཆིངས་ཡིག་བཞག་ཡོད་པ་དང་། འདས་པའི་བྱུང་རབས་ནང་བོད་རང་བཙན་གྱི་གནས་བབས་ཏེ་དབྱིན་ཇིའི་གཞུང་གིས་གསལ་བོ་མཁྱེན་རྟོགས་ཡོད་པར་མ་ཟད།  འདས་པའི་བྱུང་རབས་ནང་དབྱིན་གཞུང་ནས་ངོས་འཛིན་ཡོད་པ་ཞིག་ཆགས་བསྡད་ཡོད་སྟབས། ཕྱི་ཚེས་ ༡༡ ཉིན་གཞོན་ལྷན་དབུས་རྒྱུན་ཁག་ཅིག་དབྱིན་ཇིའི་གཞུང་ཚབ་ཁང་ལ་བཅར་ཏེ། དབྱིན་གཞུང་ལ་བོད་རང་བཙན་ངོས་འཛིན་དྲན་སྐུལ་བྱ་རྒྱུ་དང་། རྒྱ་གར་སྲིད་བློན་ལས་ཁུངས་ལ་བཅར་ཏེ། མི་ལོ་ ༥༠ རིང་ལ་བོད་གཞུང་དམངས་གཉིས་ལ་རྒྱ་གར་ས་ཐོག་ནས་འཐབ་བརྩོད་དང་འཚོ་གནས་ཀྱི་ཁོར་ཡུག་བསྐྲུན་པར་ཐུགས་རྗེ་ལེགས་འབུལ་ཞུ་རྒྱུ་ཡིན་ཟེར།

དེའི་རྗེས་ཁོས་གཞོན་ལྷན་གྱི་གསུམ་བཅུའི་སྒེར་ལངས་ཐེངས་ ༥༢ པའི་བསྒྲགས་གཏམ་སྒྲོག་འདོན་གནང་དོན། གསུམ་བཅུ་དུས་དྲན་གྱི་ཉིན་མོ་འདི་ནི། གངས་ཅན་ཆོལ་གསུམ་དཔའ་བོ་ཁྲི་འབུམ་དུ་མས་བོད་ཀྱི་རྒྱལ་ས་ལྷ་སར་ཆིག་སྒྲིལ་དང་རྒྱལ་གཅེས། རིགས་ཞེན་བཅས་ཀྱི་སྒོ་ནས་ལོ་རྒྱུས་ཀྱི་བདག་དབང་དང་རྒྱལ་ཁབ་ཀྱི་དབུ་ཁྲིད་སྲུང་སྐྱོབ་ཆེད། རང་སྲོག་བློས་གཏོང་གིས་༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག  བོད་རང་བཙན་གཙང་མ་ཡིན། རྒྱ་མི་བོད་ནས་ཕྱིར་རྒྱུགས་ཞེས་པའི་གཅིག་གྱུར་གྱི་འབོད་སྒྲ་བསྒྲགས་ཏེ། ཞི་དྲག་ཟུང་གིས་དགྲ་བོ་འགོག་རྒོལ་ཆེད་ཡར་ལངས་གནང་པའི་ཉིན་མོ་རླབས་ཆེན་ཞིག་ཡིན། འབོད་ཚིག་དེ་གསུམ་ནི་ཤི་བོའི་ཁ་ཆེམས་དང་གསོན་པའི་རེ་བ། བོད་ཕྱི་ནང་གཉིས་དམ་གཙང་ཆིག་སྒྲིལ་ངང་བོད་རང་བཙན་སླར་གསོའི་འཐབ་རྩོད་མ་ཤི་རྒྱུན་འཆང་གསོན་གནས་བྱེད་པའི་སྦྲེལ་ཐག་ཀྱང་ཡིན། ཅེས་དང་།

གཞན་ཡང་། གསུང་འཕྲིན་དེའི་ནང་དུ། བོད་གཞུང་གིས་བོད་དོན་འབད་རྩོན་གནང་ཕྱོགས་ཐད་ནས་གུ་ཡངས་དང་བློས་གཏོང་ཇི་ལྟར་གནང་ཡང་། དགྲ་བོ་རྒྱ་དམར་གྱིས་བཟང་ཕྱོགས་ཀྱི་བརྡ་ལན་གང་ཡང་མེད་པ་དེ་ནི།  བོད་རྒྱ་འབྲེལ་མོལ་ཐེངས་དགུ་དང་། བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་རྗེས་སུ་ཡང་བོད་ནང་བཟང་ཕྱོགས་ཀྱི་འགྱུར་བ་མེད་པར། ཁྲིམས་འགལ་ངང་བོད་མི་རྣམས་ལ་ཁྲིམས་ཆད་སྣ་ཚོགས་དང་། ཤེས་ལྡན་པའི་དཔུང་ཁག་འབུར་འཇོམ། ཁོར་ཡུག་གཏོར་བརླག  བོད་ཀྱི་སྐད་ཡིག་སྦྱོང་སྤྱོད་འགོག་སྡོམ་སོགས་ལས་གསལ་རྗེན་དུ་ཐོན་ཡོད།  འབྱུང་འགྱུར་སྐབས་གསར་པའི་བཀའ་སྤྱིའི་ངོས་ནས་ཀྱང་། ངེས་པར་བྱུང་རབས་རང་བཞིན་གྱི་རྩ་དོན་བོད་རང་བཙན་སླར་གསོའི་ཐད་གཅིག་གྱུར་ཡོང་བའི་འགྱུར་བ་དང་། སྣེ་འཁྲིད་དགོས་པ་ཧ་ཅང་གལ་ཆེན་ཡིན་པ་གསལ་འདེབས་ཞུ་རྒྱུ་ཡིན། ཞེས་བཀོད་འདུག

བཀའ་སྤྱིའི་འོས་བསྡུའི་ཐད། ཉིན་ཤས་རྗེས་ཡོང་རྒྱུའི་བཀའ་སྤྱིའི་འོས་བསྡུ་ནི། བོད་རྒྱལ་ཁབ་དང་བོད་མི་མང་གི་མ་འོངས་པའི་བདེ་སྡུག་དང་མདུན་ལམ་ཐད་ཧ་ཅང་གལ་གནད་ཆེ་བའི་དོན་ཆེན་ཞིག་ཡིན་སྟབས། འགྱུར་བ་དེ་ཉིད་ང་ཚོའི་མ་འོངས་ཆིག་སྒྲིལ་རྒྱུན་འཆང་གོང་འཕེལ་དང་། བོད་ཕྱི་ནང་གི་དཀའ་སྡུག་སེལ་ཞིང་བོད་རང་བཙན་སླར་གསོ་བྱེད་པའི་སྟོབས་ཤུགས་གསར་པ་ཞིག་ཏུ་སྨིན་ཆེད། ཚང་མས་རྒྱལ་ཞེན་དང་གུ་ཡངས། ཆིག་སྒྲིལ་གྱི་སྒོ་ནས་དབུ་ཁྲིད་ཚན་ལྡན་འདེམས་ཐོན་དང་། འོས་ཤོག་གི་བརྒྱ་ཆ་ཚད་མཐོན་པོར་བསླེབ་རྒྱུར་འགན་འཁུར་ཡོད་པའི་སྒོ་ནས་འོས་བསྡུའི་ཆ་ཤས་ངེས་པར་ལེན་དགོས། ཞེས་དང་།

བསྒྲགས་གཏམ་དེའི་ནང་༧གོང་ས་མཆོག་གི་བགྲེས་ཡལ་གནད་དོན་སྐོར་བཀོད་དོན། ཉེ་ལམ་༸གོང་ས་མཆོག་བགྲེས་ཡོལ་ཕེབས་རྒྱུའི་གནད་དོན་ཐད། གཞོན་ལྷན་གྱིས་མགོན་པོ་མཆོག་གི་སྤྱན་སྔར་མཚན་འཁོད་སྙན་ཞུ་ཕུལ་ཟིན་པ་ལྟར། དམངས་གཙོ་མདུན་སྐྱོད་སོགས་ཀྱི་སླད། འཛིན་སྐྱོང་གི་ལས་དོན་ནས་བགྲེས་ཡོལ་གནང་གཏན་འཁེལ་ཚེ་དེར་གུས་བཀུར་ངོས་འཛིན་ཞུ་རྒྱུ་ཡང་། རྒྱལ་ཁབ་དང་འཐབ་རྩོད་ཀྱི་དབུ་ཁྲིད་ནས་བགྲེས་ཡོལ་མི་གནང་བའི་གསོལ་འདེབས་ཞུས་ཟིན་པ་དེ། དུས་དྲན་གྱི་སྐབས་དང་བསྟུན་ནས་ཡང་བསྐྱར་ནན་གྱིས་གསོལ་འདེབས་དང་གསལ་བརྗོད་ཞུ་རྒྱུ་ཡིན། ཅེས་བཀོད་འདུག 

གསུང་འཕྲིན་གྱི་མཐའ་སྡོམ་དུ།  རྒྱ་ནག་གི་འགྱུར་བ་དང་རྒྱལ་སྤྱིའི་རྒྱབ་སྐྱོར་ཙམ་གྱིས་ང་ཚོའི་བདེན་པའི་མཐའ་གསལ་མི་ཐུབ་པར། བོད་ཀྱི་རྩ་དོན་དང་འཐབ་རྩོད་ཀྱི་བདག་པོ་ངེད་བོད་མི་རྣམས་ཡིན་པ་བཞིན། གཙོ་བོ་ང་ཚོས་བོད་རྒྱལ་ཁབ་ཀྱི་བྱུང་རབས་དང་མདུན་ལམ་ལ་འགན་འཁུར་སྣེ་འཁྲིད་ཀྱིས་འཐབ་རྩོད་ཚད་མཐོ་རུ་གཏོང་ནས་བོད་རང་བཙན་སླར་གསོ་དགོས་པ་བཞིན། ཕྱི་ལོ་ ༢༠༠༨ ལོར་བོད་ནང་བོད་རང་བཙན་སླར་གསོའི་རླབས་ཆེན་གྱི་ཡར་ལངས་དང་། དེ་རྗེས་སྐྱེ་རྒུ་མདོའི་ས་ཡོམ་སྐབས་སྐྱིད་སྡུག་མཉམ་མྱོང་གི་ལག་ལེན་དངོས།  ཕྱི་ལོ་ ༢༠༡༠ ལོར་བོད་ཀྱི་སྐད་ཡིག་གི་བདག་དབང་ཆེད་སློབ་མའི་ཡར་ལངས། སྔ་ལོ་དང་འདི་ལོ་ནས་བོད་ཆོལ་གསུམ་ཡོངས་གཅིག་གྱུར་གྱི་ལོ་གསར་གཏོང་རྒྱུའི་ངོས་འཛིན་དང་། ཆོད་སེམས་བཅས་ནས་གངས་ཅན་པའི་མདུན་ལམ་གྱི་འོད་སྣང་ཇེ་ཉེ་ཇེ་གསལ་དུ་འགྲོ་བ་མཚོན་ཐུབ། ཅེས་བརྗོད་འདུག 

གསར་འགོད་པ། ཚེ་རིང་རྒྱལ།