རྒྱ་གར་མཚོ་དམག་གིས་ཨ་རཱ་བྷེན་མཚོ་གླིང་ནས་མཚོ་ཇག་ ༦༡ ཙམ་འཛིན་བཟུང་བྱས་ཡོད་འདུག
ཨ་རཱ་བྷེ་རྒྱ་མཚོ་དང་རྒྱ་གར་རྒྱ་མཚོའི་ཉེ་འཁོེར་ནས། མཚོ་ཇག་གིས་དེ་སྔ་རྒྱ་གར་དང་ཕྱི་གླིང་བའི་མཚོ་གྲུ་གང་མང་ཞིག་ལ་འཕྲོག་བཅོལ་གྱིས་མཚོན་པའི་དཀའ་ངལ་མང་པོ་བཟོས་མྱོང་ཡོད་ལྟར། ཐེངས་འདིར་ཡང་མཚོ་ཇག་གིས་དམག་མིའི་གྲུ་གཟིངས་ཡིན་མ་ཤེས་པར། རྒྱ་གར་མཚོ་དམག་གི་གྲུ་གཟིངས་སྟེང་ཚུར་རྒོལ་བྱས་སྐབས། རྒྱ་གར་མཚོ་དམག་གིས་རྒོལ་ལན་སྤྲད་དེ་མཚོ་ཇག་༦༡འཛིན་བཟུང་བྱས་ཡོད་ཅིང་།མཚོ་ཇག་༡༣འཛིན་མ་ཐུབ་པར་བྲོས་ཐར་བྱས་ཡོད་འདུག
ལོ་སྔོན་མར་བྷང་ལཱ་ཌེ་ཤི་ཡི་མཚོ་གྲུ་ཞིག་ལ་བཙན་འཕྲོག་བྱེད་མཁན་གྱི་མཚོ་ཇག་དེའང་། ཐེངས་འདིའི་མཚོ་ཇག་གི་དཔུང་ཁག་ཡིན་པར་དོགས་སློང་བྱེད་བཞིན་ཡོད་པ་རེད།ལོ་སྔ་མར་བྷང་ལཱ་ཌེ་ཤི་ཡི་མཚོ་གྲུ་བཙན་འཕྲོག་བྱས་སྐབས་གྲུ་གཟིངས་བདག་པོས་ཨ་སྒོར་ས་ཡ་བཞི་སྤྲད་རྗེས་འཛིན་བཟུང་བྱས་པའི་མཚོ་གྲུ་དང་མི་རྣམས་ཕྱིར་གློད་ཡོད་པ་རེད། རྒྱ་གར་མཚོ་དམག་གིས་བརྗོད་པ་ལྟར་ན།ཐོག་མར་ཁོང་ཚོས་དུས་ཡུན་གང་འཚམ་རིང་ཕན་ཚུན་མེ་མདའ་འཕེན་རེ་བྱས་རྗེས། མཚོ་ཇག་གི་གྲུ་གཟིངས་འཛིན་བཟུང་བྱེད་ཐུབ་བྱུང་ཡོད་པ་དང་། མཚོ་ཇག་གི་གྲུ་གཟིངས་ནང་མེ་མདའ་ཆེ་ཆུང་རིགས་མང་པོ་ཞིག་ཀྱང་ལག་སོན་བྱུང་པའི་གནས་ཚུལ་བཀོད་འདུག མཚོ་ཇག་དེ་ཚོ་རྒྱལ་ཁོངས་གང་ནས་ཡིན་མིན་གསལ་བོ་ཤེས་རྟོགས་བྱུང་མེད་ཀྱང་།ཁོ་ཚོ་ནི་མཚོ་ཇག་གི་གྲུ་གཟིངས་ལྟེ་བ་ཞིག་ཡིན་པར་བརྗོད་ཡོད་འདུག
གསར་འགོད་པ།བནྡེ་སྐྱབས།
