ད་བར་དུ་གྲོས་ཚོགས་ནས་ཡེ་ཤེས་དབྱིངས་དཔྱད་ལ་དད་པ་དང་ཡིད་ཆེས་བྱས་ནས་བསྡད་པ་རེད།སྐབས་དང་དུས་ལ་བབ་ན། ཡེ་ཤེས་དབྱིངས་དཔྱད་ཀྱང་རྩིས་མེད་གཏོང་གྲབས་བྱེད་ཀྱི་འདུགབླ་ན་མེད་པའི་སྟོན་པ་ཆེན་པོ་ཁོང་གིས། བཀའ་སློབ་གསུང་འཕྲིན་ཡང་དང་རིམ་པས་གནང་བ་ལྟར།བོད་གཞུང་མང་གཉིས་ངོས་ནས་མ་མཐའ་ཡང་གྲ་སྒྲིག་ཅིག་དགོས་ངེས་ཀྱང་། ད་དུང་ཡང་དགུང་ལོ་དོན་དྲུག་ལ་ཕེབས་པའི་བགྲེས་སོང་ཁོང་གི་སྟེང་ལ་དཀའ་སྡུག་གི་ལས་འགན་མང་བོ་ཞིག་འགེལ་གྱི་ཡོད་པའི་ཚོར་སྣང་བྱུང་། སྐད་ཆ་སྡུག་ས་ནས་བཤད་ན། དུས་འདི་ལྟ་བུ་ཞིག་ལ་ཁོང་གི་དགོངས་པ་གཞན་དུ་གཏད་ཚེ།གྲོས་ཚོགས་ཀྱི་འཐུས་མི་རྣམས་ཀྱིས་ད་དུང་མིག་ཆུ་བཏང་ནས་འདུག་གི་ཡིན་ནམ།
བཀའ་སློབ་གསུང་འཕྲིན་དུ་གསལ་གསལ་ཐིང་ཐིང་ཡིན་པ་ལྟར་ན། དེར་ཡིད་ཆེས་མེད་པ་ལྟར་ཕྱིར་ལྡོག་པའི་རྣམ་པ་དང་གླེང་སློང་བྱེད་སྟངས་ཤིག་གང་ན་ཡོད། བདག་ལ་མཚོན་ན་སྟོན་པ་མཆོག་གིས་མ་འོངས་པའི་ཕུགས་རྒྱང་རིང་བོར་དགོངས་གཞི་གཏད་པ་ཞིག་ཡིན་པ་འདི་ལྟར་རེད། གལ་སྲིད་ཁོང་གིས་སྐུ་དབང་ཡོད་ཚད་མང་ཚོགས་ལ་མ་གནང་བར་འདི་ལྟར་དགོངས་པ་རྫོགས་པ་ལྟ་བུ་བྱུང་ཚེ། སྐུ་ཕྲེང་བཅོ་ལྔ་བ་དེ་ད་ལྟའི་བཅུ་བཞི་བ་ནང་བཞིན་ཞིག་འབྱུང་ཐུབ་བམ།གལ་སྲིད་མ་ཐུབ་པར་སྐུ་དབང་བེད་སྤྱོད་ལོག་པར་བཏང་སྟེ་ར་སྟག་གི་ལོ་རྒྱུས་ལྟ་བུ་ཞིག་བྱུང་ན། དེ་དུས་བོད་རྒྱ་ཆེའི་མི་མང་གིས་ང་ཚོར་མང་གཙོ་དང་ཐོབ་ཐང་དགོས་ཞེས་སྐུ་མདུན་ལ་སྐད་འབོད་བྱེད་སྟངས་ཤིག་ཨེ་ཡོད།
དེ་བས་ལོ་རྒྱུས་ཀྱི་རིན་ཐང་ལྡན་པའི་དགོངས་གཞི་འདིར་གདེང་འཇོག་ཡོད་པའི་སྒོས། བླ་ན་མེད་པ་དང་མཆོག་ཏུ་གྱུར་བའི་དབུ་ཁྲིད་ཁོང་གི་བཀའ་དེ་དེང་ལེན་བྱ་འོས། བདག་གིས་ཚེས་བཅོ་ལྔ་ཉིན་གྱི་གྲོས་ཚོགས་ལ་བརྙན་འཕྲིན་བརྒྱུད་ནས་ཉན་པ་ཡིན། འཐུས་མི་དག་གིས་གླེང་གཞི་བོར་ནས་ངུ་བཤུམ་བྱེད་པ་དང་སྟོན་པ་མཆོག་ལ་སྡུག་ཡུས་ལྟ་བུ་འདོན་པ་ལས་དོན་གྱིས་གླེང་སློང་བྱེད་མཁན་ཞིག་བྱུང་མ་སོང་བའི་ཚོར་སྣང་བྱུང་། ལྷག་པར་དུ་སྟོན་པ་མཆོག་གི་ཐག་ཆོད་པོའི་བཀའ་སློབ་ཀྱི་དགོངས་དོན་ལ་བསམ་ཚུལ་ཞུ་མཁན་མ་བྱུང་བར་མཐོང་།
དེ་ནི་སྐབས་བཅུ་བཞི་བའི་གྲོས་ཚོགས་འཐུས་མི་འདི་དག་ལ་ཕུགས་བསམ་དང་གདེང་ཚོད་མེད་པའི་མཚོན་རྟགས་རེད། སྔོན་མ་ནས་སྟོན་པ་མཆོག་གིས་གྲོས་ཚོགས་ལ་ང་མེད་པ་ནང་བཞིན་གྱིས་ཞོག་ཨ་གསུངས་དགོས་པའི་རྒྱུ་མཚན་འདི་རེད། འདི་འདྲའི་དུས་ཚོད་ཅིག་མགོ་ལ་འབབ་རག་བར་དུ་བསྒུགས་ཏེ། དངོས་སུ་གནད་དོན་དེར་གདོང་ཐུག་བརྒྱབ་དུས་གཞི་ནས་ཨ་ཆད་ཨུ་ཐུག་གི་གསོལ་འདེབས་ཞུ་བ་ལས་མེད་པ་འདིས། གྲོས་ཚོགས་ཀྱི་འཐུས་མི་རྣམས་ཀྱིས་རང་འགན་འཁུར་བའི་ལས་དོན་ཞིག་བྱས་ཡོད་མེད་ཀྱི་ཚད་གཞི་ཕྱིར་མངོན་པ་དེ་རེད་འདོད།
བདག་གི་བསམ་ཚུལ་ཡིན་ན། ཉིན་འདིར་སླར་ཡང་སྟོན་པ་མཆོག་གི་བཀའ་སློབ་ལྡོག་རྩིས་མི་བྱེད་པར་དེའི་ཕུགས་རྒྱང་དང་ལོ་རྒྱུས་ཀྱི་རིན་ཐང་ལྡན་པའི་དགོངས་གཞི་ལ་གདེང་འཇོག་བྱེད་པའི་བགྲོ་གླེང་ཞིག་བྱ་འོས། ད་དུང་འཐུས་མི་ཁ་ཤས་ཀྱིས་དགའ་ལྡན་ཕོ་བྲང་གི་བརྒྱུད་རིམ་དང་དེའི་གསེང་ལ་འཛུལ་རྩིས་བྱེད་ཀྱིན་པ་སོགས་མཐོང་ན་དངོས་གནས་སེམས་སྐྱོ་བ་ལས་མི་འདུག
ང་ཚོའི་མང་གཙོར་ལོ་ངོ་བཞི་བཅུའི་ལོ་རྒྱུས་ཡོད་ཀྱང་། རྒྱ་ནག་གིས་ད་བར་དུ་སྒེར་གཅོད་དང་བཤུ་གཞོག་ཡིན་པར་སྒྲོག་པའི་ཁ་བརྡུང་མྱངས་ནས་བསྡད་པ་རེད། མང་གཙོ་མ་ཡིན་པར་བསྒྲགས་པའི་ལག་པ་འཇུ་སའང་འདི་ལས་ཅི་ཞིག་ཡིན། དེའི་སྟབས་ཀྱིས་ད་རེའི་སྟོན་པ་མཆོག་གི་བླ་ན་མེད་པའི་དགོངས་གཞི་འདིར་བོད་གཞུང་མང་གཉིས་ཀྱིས་དེང་ལེན་ཡོད་པའི་སྒོས། མ་འོངས་པའི་མི་རེ་ངོ་རེའི་འོས་འགན་དེ་ཕྲག་ལ་འཁུར་རྒྱུ་གལ་ཆེ་བར་མཐོང་ལ། ཁོང་གི་སྐུ་འཚོ་བཞུགས་པའི་གོ་སྐབས་ལ་བརྟེན་ནས་རང་མགོ་ཐོན་མིན་ལ་ཚོད་ལྟ་ཞིག་བྱ་ཆོག་པར་འདོད།
གྲོས་ཚོགས་འཐུས་མི་ཚོའི་མིག་ཆུའི་ནང་དོན་ལ་གོང་དུ་སྨྲོས་པ་ལས་གཞན་པའི་ནང་དོན་ཞིག་ཡོད་པ་ནི་འབྲལ་མི་ཕོད་པའི་ཆ་དེ་རེད། དེ་ཡང་རང་ཉིད་ཀྱི་རྡོག་འཁྲེས་ལ་སྐྲག་པ་མ་ཡིན་པར་བཤད་མི་ཤེས་ཤིང་བཤད་མི་དགོས་པའི་ཚོར་བ་ཞིག་གིས་བཙིར་བ་རེད། གལ་སྲིད་མི་མང་ལ་སྐད་ཆ་དྲིས་པ་ཡིན་ན་ཁོང་ཚོས་འདི་ལས་ལྷག་ཅིག་བྱེད་ངེས་རེད། འཐུས་མི་ནི་འཐུས་མི་སྟེ་མི་མང་གྱི་འཐུས་ཚབ་ཡིན་པས་མི་མང་གི་སེམས་འདུན་མཚོན་ལོས་དགོས།
རྩོམ་པ་པོའི་ཚོད་ཀྱིས་རྩོམ་ཡིག་འདིའི་ནང་དུ་ཡིག་སྐྱོན་མང་པོ་འདུག་པས་ཐུགས་གཟབ་གནང་ན་ལེགས། དགོངས་དག
ཉིད་ཀྱིས་གསལ་གསལ་ཐིང་ཐིང་བརྗོད་འདུག དེ་ནི་ངོ་མའི་ཆ་ནས་དྲང་ཕྱོགས་རེད་ལ་བདེན་དོན་ཡང་དེ་རེད། དེ་སྔ་ངས་ཀྱང་མཆན་གང་མང་ཞིག་གི་ནང་༸གོང་ས་མཆོག་གིས་བགྲེས་ཡོལ་གནང་བ་ཆབ་སྲིད་དང་ཕྱོགས་གང་ནས་བལྟས་ཀྱང་དགོངས་གཞི་རླབས་ཆེན་ཞིག་རེད་ལ། དེ་ལ་དེ་འབྲེལ་གྱི་བསམ་ཚུལ་ཡང་བརྗོད་མྱོང་ཡོད། ཐེངས་འདིའི་གྲོས་ཚོགས་འཐུས་མི་རྣམས་ནས་དེ་ལྟར་དགོངས་བཞེས་མི་གནང་བའི་བསམ་ཚུལ་བཏོན་པ་ང་ཚོས་མཐའ་གཅིག་ཏུ་ནོར་འདུག བསམ་ཞིབ་མ་གནང་བ་རེད་ཞེས་ཁ་ཚིག་བཅད་ནས་བརྗོད་མི་རུང་སེམས། བསམ་བློ་ཞིབ་མོ་ཞིག་བཏང་ན་འདི་ཡང་འགྲོ་སྟངས་སྙིང་རྗེ་མོ་ཞིག་རེད་ལ་ཆབ་སྲིད་ཀྱི་གནས་བབ་ནས་བལྟས་ན་ཡང་འོས་ཤིང་འཚམས་པ་ཞིག་རེད། འདི་ནི་རྒྱ་ནག་ལ་ཡང་བརྡ་ལན་ཞིག་དོན་གྱིས་སྤྲད་ཡོད་བསམ། འདི་ལ་གང་མང་ཞིག་འགྲེལ་རྒྱུ་འདུག་མོད་མང་དོགས་ཀྱི་རྗེས་མ་ལྷོད་གླེང་བྱེད།
ལྷ་ཆབ་ལ་བདེན་པ་འདུག ཡིན་ན་ར་ད་ཨ་ཁུ་འབྲོག་པ་ཚང་གི་ཐུག་པའི་ནང་ན་ཤ་མེད་པའི་སྐད་ཆ་དེ་བཤད་མ་བཤད་མེད་གི གང་ལྟར་ཁོང་ཚོ་ཕེབས་རན་ཡོད་རེད། དེ་ལས་སང་ཉིན་གྱི་སྤྱི་འཐུས་དེ་ཚོའི་འགན་འཁྱེར་སྟངས་ཀྱི་སྐོར་ནས་བགྲོ་གླེང་རེ་གནང་ཐུབ་ན་ཡག་གི་འདོད་གི ད་མང་ཚོགས་ཀྱིས་ག་འདྲ་ཞིག་འདེམས་ཡོད་མེད་སུས་ཤེས།
ལྷ་ཆབ་གི་གསུང་ལ་རྒྱབ་སྐྱོར་ཡོད།
དགའ་ལྡན་ཕོ་བྲང་གིས་སྲིད་ཀྱི་འགན་དབང་ཡང་རྫོགས་མང་ཚོགས་ལ་གནང་བ་མང་ཚོགས་ཀྱིས་དགའ་བཞིན་སྤྲོ་བཞིན་བཞེས་དགོས་པ་དེ་བོད་མིའི་ལས་འགན་རེད།
རྐུབ་སྟེགས་ཤིག་འདུག་ན་ངའི་འཇོན། ཁོའི་འཇོན་ཞེས་བཤད་ཀྱི་འདུག མགོ་ཐོག་ཏུ་བབས་དུས་ཕར་གཡོ་གིན་འདུག
ཀློག་མཁན་དག་གིས་བསྔགས་བརྗོད་གནང་བར་ཐུགས་རྗེ་ཆེ།
དེ་སྔ་ཕྱི་ལོ་༢༠༠༨ ལོར་༸གོང་ས་མཆོག་གི་བཀའ་ལ་གྱེན་ལྡོག་གི་མ་འགྲོས་བསམ་པ་གཅིག་མཐུན་གྱི་སྐད་ཆ་ཞིག་གི་རྒྱ་ཆེན་མི་མང་གི་བསམ་ཚུལ་ངོ་མ་རྣམས་ནག་སུབ་ལ་བཏང་བ་དང་སླར་ཡང་འདི་ལོ་གསོལ་བ་ཕུར་ཚུལ་དུ་ལྟབས་ནས་༸གོང་ས་མཆོག་གི་བཀའ་ནག་སུབ་ལ་གཏོང་ཐབས་མཛད་པའི་སྤྱི་འཐུས་རྣམས་པས་རང་མདོག་མི་མང་ལ་བསྟན་པ་ནི། སྤྱི་འཐུས་རྣམས་པས་མི་མང་ལ་གོ་བརྡ་ཆེན་པོ་ཞིག་སྤྲད་པ་ཡིན། དེ་ཡང་མི་མང་ཁྱེད་རང་ཚོའི་བརྟགས་དཔྱད་ཡང་དག་པ་མ་བྱས་པ་སྤྱི་འཐུས་འོས་བླུགས་སྐབས་ཟབ་ཟབ་པས་ང་ཚོར་ཐབས་ཤེས་མིན་འདུག་ཟེར་བ་དང་ཤིན་ཏུ་འདྲ།
རྩོམ་པ་པོ་ལྷ་ཆབ་ལགས་ཀྱི་གསུངས་པ་ལ་མོས་མཐུན་ཡོད། ངོ་མ་ད་ནི་དུས་ལ་བབ་པའི་གནས་སྟངས་ཤིག་རེད་ལ། ངུ་བཤུམ་རྒྱག་ནས་སྡོད་པའི་དུས་ཚོད་ཤིག་ག་ལ་ཡིན།
ངོ་མ་ངུ་བཤུམ་རྒྱག་འདོད་ཡོད་ན། སྤྱི་འཐུས་ལས་མར་དགོངས་པ་ཞུས་ནས་རང་ཁྱིམ་དུ་ངུ་ནས་སྡོད་པ་ལས། གྲོས་ཚོགས་ཀྱི་དུས་ཚོད་རྩ་ཆེན་འདི་བཞིན་འཕྲོ་བརླག་མི་འགྲོ་བ་བྱེད་དགོས་པ་ཡིན། ད་ནི་ངུ་ནི་ཅི་བྱས། ཨ་ཕོ་ལ་འཇོན་ཐང་ཡོད་ན། བྱང་ཐང་སྟོང་པ་རེད་དོ།
གྲོས་ཚོགས་ལམ་ལྷོང་ཡོང་བའི་སྨོན་ལམ་ཞུ།
ཡག་པོ་གསུངས་འདུག རྒྱབ་སྐྱོར་ཡང་ཆ་ཚང་ཡོད་དོ།།
རྩོམ་པ་པོ་གྲགས་ཆེན་ལྷ་ཆབ་ལགས་ཀྱི་གསུང་བ་ལ་མངོན་པར་བསྟོད་དོ།
ད་ལྟ་ཡེ་ཤེས་དབྱིངས་དཔྱད་ལ་བཀའ་སྤྱི་གཉིས་ནས་ཅི་ཞིག་གི་ལྟ་སྟངས་འཛིན་བཞིན་པ་ཚང་མ་ལོར་ངོ་འཕྲོད་སོང་བ་རེད། དེ་གལ་ཆེན་རེད།
སྐབས་བཅུ་བཞི་བའི་སྤྱི་འཐུས་དེ་ཚོའི་བྱ་སྟངས་བྱེད་སྟངས་ལ་བལྟས་ཀྱིན་དོགས་པ་ཟ་བ་ཞིག་རེད། དེ་ཚོའི་ཁྲོད་དུ་རྒྱ་དམར་གྱི་ནུས་པ་ཞིག་སླེབས་མེད་དམ་སྙམ་གྱི་འདུག དཔེར་ན་བལ་ཡུལ་བཞིན།
འགའ་རེས་ཅིག་འཁྲབ་ཀྱིན་བསྡད་དུས་སྤྱི་འཐུས་རེ་ཟུང་གི་ཀླད་པའི་ནང་དུ་རྣག་མ་གཏོགས་ཅང་མེད་པ་དེ་ཚོ་ཆུ་སྣ་གར་ཁྲིད་རེད།
ངའི་སེམས་ཚོར་ཟུར་ཙམ་བཤད་ན།
༸གོང་ས་མཆོག་གིས་ལོ་མང་རིང་ཕྲུ་གུ་ཆུང་ཆུང་ཞིག་ལ་གོམ་པ་རྒྱག་སྟངས་བསླབ། ཕྲུ་གུ་དེ་འཚར་ལོངས་བྱུང་། རང་རྐྱ་འཕེར་བའི་གོམ་པ་སྤོ་སྟངས་ཤེས།
ཕྲུ་གུ་དེས་ད་དུང་༸གོང་ས་མཆོག་ལ་འཐམ། ང་གཅིག་པུར་འགྲོ་གི་མིན། ལམ་དུ་དགྲ་ཇག་ཆོམ་རྐུན་དང་། གཡང་གཟར་འཇིགས་པ་མང་། ད་དུང་རོགས་མགོན་གནང་རོགས་ཟེར། ཕྲུ་གུ་དེ་གཅེས་ལངས་དུ་ཤོར། ཕྲུ་གུ་དེ་ནམ་ཡང་ཕྲུ་གུའི་གནས་མལ་དུ་ཉལ་རྩིས་བྱས། ནམ་ཞིག་ཉལ་ས་ནས་ལངས་མ་ཐུབ་པར་ལུས། དེ་ནས་ཕྲུ་གུའི་སྒྲུང་དེ་སུ་ཡིས་ཤེས། མུ་མཐུད་གསུངས་དང་།
ལ་བཤད་ལུང་བཤད་བརྒྱ་བྱས་ན་ནས་ལས་བབ་རྒྱུ་རྩམ་པ་ཡིན་དུས་ད་ནི་གྲོས་ཆོད་བཞག་པའི་དུས་མིན་གྱི་གྲྭ་བསྒྲིག་བྱེད་དགོས་པའི་དུས་ཡིན། མིག་ཆུ་བཏང་འདུག་པའི་དུས་མ་ཡིན་གྱི། དགའ་ནས་ལས་དགོས་པའི་དུས་ཡིན།
དུས་ལས་བབ་པ་ཡིན། རྒྱ་མཚོ་ཆུ་སྲིན་རྣམས་གྱིས་ནི། །དུས་ལས་ཡོལ་བར་འགྱུར་སྲིད་ཀྱང་། གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་སྲིད་ཞེས་པ་ལྟར་༸གོང་ས་ཡིད་བཞིན་ནོར་བུའི་བཞེད་པ་འདི་ནི་དགོས་པ་ཅན་གྱི་བཞེད་པ་ཕུལ་དུ་ཕྱིན་པ་ཞིག་ཡིན་གྱི།
གོང་གི་ལྷ་ཆབ་སྦྱིན་པ་ལགས་ཀྱིས་ཞེན་བསྐུལ་བཞིན་འདི་རྗེས་སུ་ཡི་རང་དང་དེ་དེ་བཞིན་དུ་མཛད་གྲུབ་པའི་འབོད་བསྐུལ་ཞུ་གི་ཡོད།
ལྷ་ཆབ་ལགས།
ཁྱེད་ནི་མུན་པའི་ཁྲོད་འཚེར་བའི་འོད་དཀར་ཞིག་རེད། ཁྱེད་ཀྱི་གསུང་ལ་ཡི་རངས་ཡོད། ཀླད་པ་རྡོ་ལྟར་འཁྲེགས། གཤིས་རྒྱུད་རྭ་ལྟར་གྱོང་བའི་སྤྱི་འཐུས་རྣམས་ཀྱིས་༸རྒྱལ་བའི་བཀའ་ལ་རྒོལ་ལན་སློག་པའི་སྙིང་སྟོབས་དེ་དགྱ་ནག་གིས་སྤྲད་པ་རེད་དམ། ཨ་མཚར་ཆེ་་་་་་་་་་་་་་་་་་་་་་་་་་་་་་་་་་་་་་