ཕྱི་ཚེས་ ༢༢ ཉིན་གནས་ཚུལ་ཐོན་པ་ལྟར་ན། འདས་པའི་ལོ་འགའི་གོང་ནས་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འགན་འོག བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གྱི་ཕྱག་ལས་གནང་མཁན་མི་སྣ་བྱས་རྗེས་ཅན་དག་ལ་བདེན་པའི་འོད་སྣང་ཞེས་པའི་གཟེངས་རྟགས་ཤིག་འབུལ་བཞིན་ཡོད་པ་ལྟར། འདི་ལོ་ ༢༠༡༡ ལོའི་བདེན་པའི་འོད་སྣང་གི་གཟེངས་རྟགས་དེ་ཨེར་ལན་ཌི་ནས་ཡིན་པའི་སྐུ་ཞབས་ཇོར་ཇི་པེ་ཊར་སོན་ Mr.George Patterson ལགས་སུ་འབུལ་གཏན་འཁེལ་ཡོད་པ་རེད།
དེ་ནི་སྐུ་ཞབས་ཁོང་གིས་འདས་པའི་ལོ་ངོ་བཅུ་ཕྲག་འགའི་རིང་བོད་དོན་ཐོག་ཕྱག་ལས་མང་པོ་གནང་ཡོད་པ་མ་ཟད། བོད་གཞིས་བྱེས་གཉིས་ཀྱི་སྤྱི་ཚོགས་ནང་དངོས་སུ་འཛུལ་ཞུགས་ཀྱིས་ཉམས་ཞིབ་གནང་སྟེ། ཞིབ་འཇུག་དཔྱད་རྩོམ་སྔ་ཕྱིར་སྤེལ་བ་དེ་དག་གིས་བོད་དོན་ཁྱབ་བསྒྲགས་ཐད་ནུས་པ་ཆེན་པོ་ཐོན་ཡོད་པ་བཅས་ལ་བརྟེན་ཐེངས་འདིར་བདེན་པའི་འོད་སྣང་གི་ཕྱག་འཁྱེར་དེ་ཁོང་ལ་འབུལ་གཏན་འཁེལ་བ་ཞིག་ཡིན་འདུག
ཁོང་དང་འབྲེལ་བའི་གནས་ཚུལ་ཁག་ནི། ༡༩༦༠ ལོར་བོད་པའི་འཇབ་དམག་གིས་བལ་ཡུལ་མཐའ་མཚམས་སུ་ཡོད་པའི་གློ་སྨོན་ཐང་ Mustang དུ་རྒྱ་ནག་གི་དམག་མིར་འཇབ་རྒོལ་དམར་འཛིང་བྱས་པའི་དངོས་བྱུང་གློག་བརྙན་སོགས་སུ་གསལ་བོར་འཁོད་ཡོད་ཅིང་། བདུན་ཕྲག་རྗེས་མར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་ལྕམ་མེ་རི་བྷེ་ཁེ་ Mary Beth Markey ལགས་ཀྱིས་སྐུ་ཞབས་ཁོང་ལ་འདི་ལོའི་བདེན་པའི་འོད་སྣང་གི་གཟེངས་རྟགས་དེ་དངོས་སུ་འབུལ་རྒྱུ་ཡིན་འདུག
གསར་འགོད་པ། དོན་གོ
