རྒྱ་གཞུང་གིས་གྷོ་གྷལ་བཀག་སྡོམ།

ཕྱི་ཚེས་༢༡ཉིན་གྷོ་གྷལ་དྲ་ཁང་གིས་རྒྱ་ནག་ནང་གྷོ་གྷལ་google དང་། གྷོ་གྷལ་གློག་འཕྲིན་ Gmail གཉིས་བཀག་སྡོམ་བྱས་ཡོད་ཚུལ་བརྗོད་འདུག ཉེ་སྔོན་ཊོའུ་ནེ་ཤི་དང་ཨི་ཇེབ་ནང་མེ་ཏོག་བ་སྤྲུའི་གསར་བརྗེ་ལས་འགུལ་ (Jasmine Revolution) རྒྱ་ཁྱབ་ཏུ་འགྲོ་བཞིན་ཡོད་སྐབས། རྒྱ་གཞུང་གིས་དྲ་དམངས་ས་ཡ་༤༥༧ལྷག་གིས་བེད་སྤྱོད་བྱེད་བཞིན་པའི་གྷོ་གྷལ་རྒྱ་ཡིག་དྲ་ཚིགས་ཚོད་འཛིན་དང་ཞིབ་བཤེར་བྱ་མགོ་བཙུགས་ཡོད་པ་དང་། ཉིན་འགའི་སྔོན་ནས་བཟུང་དྲ་གནས་དེ་གཉིས་རྒྱ་ནག་ནང་སྒོ་འབྱེད་མི་ཐུབ་པ་ཆགས་ཡོད་འདུག གནད་དོན་འདིའི་ཐད་ཨ་རིའི་དྲ་གནས་ཞིབ་བཤེར་བ་དང་གྷོ་གྷལ་དྲ་གནས་ཆེད་མཁས་པ་ཚོས་ཞིབ་འཇུག་བྱས་སྐབས། ད་ཆར་རྒྱ་ནག་ནང་གྷོ་གྷལ་དྲ་གནས་བེད་སྤྱོད་ཐུབ་ཀྱི་མེད་པ་དེ་ནི། གནད་དོན་གཞན་མིན་པར་རྒྱ་ནག་གཞུང་གིས་ཆེད་དུ་བཀག་འགོག་བྱས་པ་ཞིག་ཡིན་སྐོར་ཕྱིར་བསྒྲགས་བྱས་འདུག

ཁ་སང་ཕྱི་ཚེས་༢༢ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་མ་ཇེང་ཡུ་ Jiang Yu ཡིས་གསར་འགོག་གསལ་བསྒྲགས་ཤིག་སྤེལ་ཏེ། མི་སྣ་རེ་ཟུང་གིས་རྒྱ་ནག་གཞུང་གིས་གྷོ་གྷལ་དྲ་གནས་དང་གློག་འཕྲིན་བཀག་འགོག་བྱས་ཚུལ་རྗོད་ཀྱི་ཡོད་པ་དེ་ནི་བདེན་པ་མིན་སྐོར་བརྗོད་འདུག འོན་ཀྱང་། རྒྱ་ནག་གི་དྲ་དམངས་ཚོས་བརྗོད་པ་ལྟར་ན། ཉེ་ལམ་དཀྱིལ་ཤར་ཡུལ་གྲུའི་གསར་བརྗེ་ལས་འགུལ་རྒྱ་ནག་ནང་ཁྱབ་སྤེལ་བྱ་དགོས་པའི་གནས་ཚུལ་ཐོན་མ་ཐག གྷོ་གྷལ་དྲ་གནས་དང་གློག་འཕྲིན་གཉིས་ཁ་འབྱེད་མི་ཐུབ་པ་ཆགས་ཡོད་ཚུལ་བརྗོད་འདུག

གསར་འགོད་པ།བནྡེ་སྐྱབས།