ཐེངས་འདིའི་སྐུ་མདུན་གྱི་བགྲེས་ཡོལ་གསུང་འཕྲིན་ཐད་ཚང་མས་ལྟ་ཚུལ་གཅིག་རང་གཅིག་བཟུང་ཡོད། བཀའ་ཤག་གི་གསུང་འཕྲིན་འདི་བློ་ངོར་མི་ཤོང་བའི་གསལ་བཤད། གྲོས་ཚོགས་ཀྱི་གསུང་འཕྲིན་འདི་ལ་འགན་དབང་མི་ཐུབ་པའི་གྲོས་ཆོད། སྐུ་མདུན་ནས་གྲོས་ཆོད་ཕྱིར་སློག་གནང་བ། ད་དུང་། བར་སྐབས་དེར་བོད་མི་མི་རེ་ངོ་རེ་དང་། ཚོགས་པ་སྐྱིད་སྡུག ས་གནས་ཁག་ནའང་། སྐུ་མདུན་ལ་ཨུ་ཚུགས་ཀྱི་གསོལ་བ་འདེབས་མཁན། བཀའ་ཤག་དང་སྤྱི་འཐུས་ལ་ལོ་རྒྱུས་ཀྱི་ནག་ཉེས་འཛུགས་མཁན། གང་ལྟར། ཚང་མས་༼ ལོ་རྒྱུས་ཀྱི་བཅོས་བསྒྱུར་༽ ཞེས་པ་འདི་གཞི་རྩར་བཟུང་ནས། ཐེངས་འདིའི་གསུང་འཕྲིན་ལ་མཐུན་དང་མི་མཐུན་པའི་ལྟ་སྣང་མཐོང་ཚུལ་བརྗོད་ཡོད། དེ་ལོས་ཡིན། སྐུ་མདུན་ནས་ཀྱང་གསུང་འཕྲིན་གྱི་དབུ་ལོ་རྒྱུས་ནས་བཙུགས་ཡོད་པ་མིན་ནམ།
བགྲེས་ཡོལ་སྐོར་བོད་མི་ཚོར་གསར་པ་གང་ཡང་མིན། ཐོག་མར་དྲུག་ཅུ་རེ་གྲངས་ནས་གསུངས་ཡོད། འོན་ཀྱང་། བགྲེས་ཡོལ་གྱི་དུས་ཚེས་ནི་བོད་འཛིན་སྐྱོང་བྱེད་པའི་གོ་སྐབས་བོད་མི་ཚོར་བྱུང་བའི་ཉིན་མོ་ཡིན། གོ་བདེ་བོ་བྱས་ན། གཞིས་བྱེས་མཉམ་འཛོམས་ཀྱི་ཉིན་མོ་དེ་ཡིན། མཚམས་ལ་རེར། གྲ་སྒྲིག་སྡུག་ས་ནས་བྱེད་དགོས་པའི་གསལ་འདེབས་རེ་གནང་བ་ལས། སྔ་ལོའི་བར་དུ་དུས་ཚེས་འདི་ལ་འགྱུར་བ་འགྲོ་ཉེན་གྱི་མངོན་རྟགས་གང་ཡང་བྱུང་མེད། འདིའི་ནང་༢༠༠༡ ལོ་ནས་ཕེབས་པའི་ཕྱེད་བགྲེས་ཡོལ་ཡང་ཚུད་ཡོད། ད་དུང་། བོད་མིའི་སེམས་ནང་གི་བགྲེས་ཡོལ་ནི་འཛིན་སྐྱོང་གི་དབུ་ཁྲིད་ཙམ་ཡིན། དམིགས་བསལ་སྐུ་སྒེར་གྱི་འགན་དབང་ཆེན་པོ། སྡེ་སྲིད་ལྷན་ཚོགས། དགའ་ལྡན་ཕོ་བྲང་གི་མིང་གནས་ཁྱབ་ཡུལ་སོགས། ཏྰ་ལའི་བླ་མའི་མཚན་གནས་རྗེས་འབྲེལ་གང་ཡོད་ཕྱིར་བསྡུ་དགོས་པའི་༼ བགྲེས་ཡོལ་ཆ་ཚང་༽ཞིག་ལ་བསམ་བློ་འཁོར་མྱོང་མེད། མ་མཐར་ཡང་བཙན་བྱོལ་བའི་དུས་ཡུན་ནང་འདི་འདྲ་ཞིག་ཡོང་བར་སྔོན་དཔག་དང་གྲ་སྒྲིག་གང་ཡང་མེད། ད་དུང་དེའི་སྒང་ལ། བགྲེས་ཡོལ་ཆ་ཚང་འདི། མི་མང་དང་བརྒྱུད་ལམ་ལ་གོ་བརྡ་སྤྲད། གསུམ་བཅུ་དུས་དྲན་ཐོག་ཡོངས་ཁྱབ་གསལ་བསྒྲགས། གྲོས་ཚོགས་ཚོགས་དུས་འདི་རང་དུ་ལག་བསྟར་གཏན་འབེབས་ཐུབ་དགོས་པའི་རྟིང་སྐུལ། གྲོས་ཆོད་ཕྱིར་སློག གྲོས་ཚོགས་ཀྱིས་དམིགས་བསལ་ལས་འཆར་ཚོགས་ཆུང་ཆེད་འཛུགས། ཚོགས་ཆུང་ནས་སྐུའི་འགན་དབང་ཡོད་ཚད་བཀའ་ཁྲི་དང་། བཀའ་ཤག ཁྲིམས་ཞིབ་ཁང་། སྤྱི་འཐུས་གྲོས་ཚོགས། བོད་རྒྱ་ཆེ་མི་མང་བཅས་ལ་བགོ་འགྲེམ་གྱི་རྒྱབ་གཉེར་ལས་འཆར་མ་ཟིན་གཏན་འབེབས། གཏན་འབེབས་ཡིག་ཆ་ཟུར་འཛུར་དང་བཅས་པ་གྲོས་ཚོགས་ལ་སྙན་སྒྲོན། ཕྱི་ཚུལ་ནས་འདི་ལ་དགོས་ངེས་ཀྱི་ལས་རིམ་ཆ་ཚང་ཞིག་སོང་དང་འགྲོ་བཞིན་ཡོད་ནའང་། འདིའི་བྱུང་རིམ་ཆ་ཚང་ལ་ཟླ་བདུན་གྱི་དུས་ཡུན་ལས་འགོར་མེད། དེ་ལས་ཀྱང་། གནད་འགག་ཚང་མ་ཉིན་གཅིག་དང་གཉིས་ནང་འགྲོ་བཞིན་ཡོད།
གསུང་འཕྲིན་གྱི་ཚིག་རྩ་དེད་ན། བགྲེས་ཡོལ་ནི་ཏག་ཏག་དུས་ལ་སྨིན་ཡོད། འདི་ལོ་རྒྱུས་ཀྱི་ཤེད་ཤུགས་དབང་དུ་སོང་བ་ཡིན། ལོ་རྒྱུས་ཀྱི་འོས་བབ་དང་འགན་དབང་ཟུར་དུ་བཞག་ནས། ང་ཚོས་གསུང་འཕྲིན་འདི་ཡང་བསྐྱར་ཐེངས་ཤིག་བཀླགས་ན། གསུང་འཕྲིན་ནང་འཁོད་ལྟར། བགྲེས་ཡོལ་འདི་འགན་འཁུར་བྱེད་འདོད་མེད་པའམ། སེམས་ཤུགས་ཆག་པ། བོད་མིའི་འཐབ་རྩོད་བློས་བཏང་བ་ཞིག་མིན་ནའང་། བོད་ལ་དོན་དམ་དམངས་གཙོའི་འཕེལ་རིམ་ཡོངས་སུ་རྫོགས་པའི་དུས་ཚོད་ཅིག་སྨིན་ཡོད་པའང་གཏན་ནས་མིན། དམངས་གཙོའི་འཕེལ་རིམ་རྫོགས་ཀྱང་མ་རྫོགས་རུང་། སྒྲོམ་གཞི་༼ས་ཆ་མེད་པའི་རྒྱལ་ཁབ། ༽ཀྱི་རྒྱ་ལས་འགོངས་མེད། དེས་ན། དུས་ཡུན་ཐུང་ཐུང་ཞིག་གི་ནང་། བགྲེས་ཡོལ་འདི་འདྲའི་ཛ་དྲག་དང་བྲེལ་འཚུབ་ལ་ཐུག་དོན་གང་ཡིན་ནམ། འདི་གསུང་འཕྲིན་གྱིས་མང་ཚོགས་ལ་ཞལ་མ་གསལ་བའི་ཕྱོགས་ངོས་དེ་ཡིན།
ལམ་དབུ་མ་སྐུ་མདུན་སྒེར་ངོས་ནས་བཏོན་གནང་བའི་ཐབས་ལམ་དེ་ཡིན། བོད་མི་ཚོས་འདི་ལ་ཡེ་ཤེ་དབྱིངས་དཔྱད་ཀྱི་ལམ་ཞེས་ཞེ་ས་བྱེད་ཀིན་ཡོད། ད་བར་དུ་འབྲེལ་མོལ་རིམ་པ་དགུ་སོང་ཞིང་། རིམ་པ་མཐའ་མ་དེ་འདས་ལོའི་ཕྱི་ཟླ་གཉིས་པའི་ནང་ཡིན། འབྲེལ་མོལ་ཇི་ཙམ་མང་དུ་བྱས་པའམ། དུས་ཡུན་ཐུང་ངུའི་ནང་རིམ་པ་མང་ཙམ་འགྲོ་ཐུབ་ཡོད་པ་ནང་བཞིན། དེ་ཙམ་གྱིས་བོད་ལ་བཟང་ཕྱོགས་ཀྱི་གནས་ཚུལ་གང་ཡང་འཁྱེར་ཡོང་མྱོང་མེད། དེ་ལས་ལྡོག་སྟེ། བར་སྐབས་དེར་སྐུ་མདུན་ནས་རྒྱ་ནག་ལ་ཡིད་ཆེས་ཇེ་སྲབ་ཇེ་སྲབ་ཡིན་པའི་ཡོངས་ཁྱབ་བཀའ་སློབ་གནང་ཡོད། བཀའ་སློབ་འདིའམ། འབྲེལ་མོལ་མཐའ་མ་གྲུབ་ནས་ཟླ་དྲུག་གི་རྗེས་སུ། སྐུ་མདུན་ནས་གློ་བུར་དུ་བགྲེས་ཡོལ་ཤུགས་ཆེན་པོས་གསུངས་མགོ་ཚུགས། དེ་ནས་ཟླ་བདུན་གྱི་རྗེས་ནས་བགྲེས་ཡོལ་ལ་ཕེབས་གཏན་འཁེལ་བ་རེད།
དམངས་གཙོ། འདི་འབྲེལ་མོལ་རིམ་པའི་སྐབས་བོད་པའི་སྐུ་ཚབ་ཚོས་གཡུགས་ཚར་བའི་གད་སྙིགས་ཤིག་ཡིན། གུང་ཁྲན་ཏང་གི་དབུ་ཁྲིད་འོག བོད་ལ་སྤྱི་ཚོགས་རིང་ལུགས་ཀྱི་ལམ་ལུགས་ལག་བསྟར་ཞེས་པ་འདི། ངྷ་རམ་ས་ལས་པེ་ཅིན་ལ་ཕུལ་བའི་བསམ་ཚུལ་ཡིག་ཆ་དང་། དེའི་གསལ་བཤད་གཉིས་ཀྱི་གཞི་རྩའི་མ་གདན་ཡིན། གྲོས་འཆམ་ཡོང་ཆེད་ཕྱིར་བསྡུ་བྱས་ཟིན་པའི་ཅ་ལག་ཅིག བགྲེས་ཡོལ་གསུང་འཕྲིན་ནང་སླར་ཡང་ཕྱིར་མངོན་ཞིང་། དེ་ཡང་བགྲེས་ཡོལ་ནི་ཅ་ལག་དེ་ཚགས་ཚུད་ཀྱི་ཆེད་དུ་ཡིན་ཚུལ་རྩལ་དུ་བཏོན་ཡོད། འདིས་ང་ཚོ་ལ་གོ་བརྡ་ག་རེ་སྤྲོད་ཀྱི་ཡོད་དམ། གྲོས་མོལ་ལ་མཇུག་འབྲས་མེད་པའམ། ཡང་ན། ཁོང་གི་སྐུ་ཚེ་རིང་། བོད་དོན་བདེན་མཐའ་སེལ་མི་ཐུབ་པ་ཐུགས་ཐག་ཆོད་ཡོད་པར་གོ་ན་ཨེ་འགྲིག
ལོ་རྒྱུས་དང་བཅའ་ཁྲིམས་ནང་གི་སྐུ་དབང་ཚང་མ་བློས་བཏངས་ཚར་རྗེས། ལམ་དབུ་མ་མུ་མཐུད་ནས་འགྲོ་ཐུབ་བམ། བྲེལ་འཚུབ་གྱིས་འགྲོ་བཞིན་པའི་བརྒྱུད་རིམ་འདིས། བགྲེས་ཡོལ་གསུང་འཕྲིན་ནི་ལམ་དབུ་མ་བློས་བཏང་བའི་༼སྙན་ངག་༽ཡིན་པར་གོ་ཆོག་ལ། དེ་ཡང་བགྲེས་ཡོལ་དུ་ཕེབས་ཏེ་ལམ་དབུ་མ་བློས་གཏོང་གནང་བ་མིན་པར། ལམ་དབུ་མ་བློས་གཏོང་གནང་ཆེད་བགྲེས་ཡོལ་ལ་ཕེབས་གཏན་འཁེལ་བ་གནས་སྟངས་དང་མཐུན་པར་འདོད།
གལ་སྲིད། བགྲེས་ཡོལ་གསུང་འཕྲིན་ནི་ལམ་དབུ་མ་བློས་གཏོང་གནང་བའི་སྙན་ངག་ཡིན་ཚེ། གལ་སྲིད། གསུང་འཕྲིན་གྱིས་མང་ཚོགས་ལ་ཞལ་མ་གསལ་བའི་ཕྱོགས་ངོས་དེ་སྙན་ངག་འདི་ཡིན་ཚེ། ད་ལྟ་འགྲོ་བཞིན་པའི་ང་ཚོའི་ལས་རིམ་རྣམ་བཞག་དང་། བགྲེས་ཡོལ་གསུང་འཕྲིན་གཉིས་བར་ལ་གོ་འཛོལ་བའི་སྣང་ཚུལ་ཞིག་བྱུང་ཡོད། ལས་རིམ་རྣམ་བཞག་གིས་སྐུའི་དབང་ཚད་ཡར་འབུལ་མར་གནང་དང་། དབང་ཚད་དེ་འབྱུང་འགྱུར་སུ་དང་གང་ལ་བགོ་འགྲེམ་གནང་སྟངས་གཙོ་གཉེར་གནང་གི་ཡོད། འོན་ཀྱང་། གསུང་འཕྲིན་གྱིས་ང་ཚོ་ལ་ཁོང་གི་སྐུ་ཚེ་ནང་སྒྲུབ་མ་ཐུབ་པའམ། འགྲུབ་མ་ཐུབ་པའི་ལས་འགན་ལྕི་མོ་ཞིག་བརྒྱུད་སྤྲོད་གནང་གི་ཡོད། ང་ཚོས་གསུང་འཕྲིན་ལ་རྒྱབ་གཉེར་ལས་འཆར་ཚོགས་ཆུང་བཙུགས་ནས་ལས་རིམ་རྣམ་བཞག་བང་སྒྲིག་པ་ནང་བཞིན། གསུང་འཕྲིན་གྱིས་ང་ཚོར་བརྒྱུད་སྤྲོད་གནང་བའི་ལས་འགན་འདི་ལའང་ལས་རིམ་རྣམ་བཞག་ཅིག་བང་བསྒྲིག་ཐུབ་བམ།
ཁ་བ་ནག་པོ་སོགས་ཀྱི་ཉན་བརྡ་དང་། དྲི་བ་ལ་ངས་བསམས་བློ་གཏོང་དུས། ང་ལ་སྐྲག་སྣང་ཅིག་ཡོང་བགྱིད་འདུག ང་བློ་ཁོག་ཆུང་བ་ཡིན་ནམ། ཡང་ན། ངས་བོད་མིའི་བསམ་བསམ་བློ་རྒྱུས་ལོན་མ་ཐུབ་པ་ཡིན། ཡང་ན། རྒྱུ་མཚན་གཞན་ཞིག་ཡོད་པའང་སྲིད།
དེས་ན་ང་ཚོས་རྒྱ་ནག་ལ་ལོ་འདི་དང་ཟླ་བ་འདི་འདྲའི་ནང་དུ་ང་ཚོའི་རེ་བར་ཁས་ལེན་མ་བྱས་ན་བསམ་བློ་གཞན་པ་ཞིག་གཏོང་གི་ཡིན་ཞེས་ཉེན་བརྡ་ལན་མང་བསྒྲགས་པ་དེ་ནི་སྐུ་མདུན་གྱིས་ཆབ་སྲིད་ཐུགས་འགན་མི་བཞེས་རྒྱུ་འདི་ཡིན་ནམ།
ཨ་རོག ཆབ་སྲིད་ཀྱི་གཏིང་བྲུས་ནས་བཤད་ན། ཕ་ཡུལ་དུ་ལོག་པར༌༌༌༌༌༌༌༌༌༌རང་བཙན་རྐང་ལམ། དབུ་མ་མཁའ་ལམ་རེད།
དོན་ངོ་མའི་བསམ་ཚུལ་ཟེར་ན་འདི་འདྲ་དགོས་པ་རེད། གནད་འགག་གི་སྐད་ཆ་དུས་ཐོག་ཏུ་གླེང་ཐུབ་པ་འདི་ལ་དུས་བབ་ཟེར་དགོས། དུས་བབ་ཚགས་ཤོག་ལ་དུས་བབ་ཅེས་འདོགས་དོན་ཡང་རྩོམ་འདི་འདྲའི་རིགས་ལ་དམིགས་པ་ལས་ཡིན་འདོད།
སྤྱིར་ན་ཟླ་བ་ཚེ་རིང་འདི་དོན་གསར་བ་དང་། ཁ་ཕྱོགས་གསར་བ་གླེང་མཁན་ཞིག་ཡིན་ཡ།
བསམ་བློ་གཏོང་ན་དྲི་བ་་ཇི་མང་འགྲོ་བ་ཆོས་ཉིད་རེད། བྱུང་རིམ་ལ་བསམ་བློ་ཡག་པོ་བཏང་ནས་བྲིས་འདུག་པས་དཔྱད་གཞིའི་རིན་ཐང་ལྡན་འདུག།
ངའི་བསམ་ཚུལ་ནི་དབུ་མའི་ལམ་གྱི་གྲོས་མོལ་ལ་མཇུག་འབྲས་མི་ཐོན་པར་གཟིགས་པ་ལས། ཁོང་གི་སྐུ་ཚེ་རིང་བོད་དོན་བདེན་མཐའ་སེལ་མི་ཐུབ་པ་ཐུགས་ཐག་ཆོད་ཡོད་པར་གཟིགས་པ་མིན། དེ་འདྲ་གཏན་ནས་གི་མི་རུང་།
ཟླ་བ་ཚེ་རིང་འདི་ག་དུས་ཡིན་ནའང་བསམ་ཚུལ་ཡག་པོ་ཡོད་མཁན་མི་གཅིག་རེད། ཡག་པོ་བྲིས་འདུག ཐུགས་རྗེ་ཆེ་བསམ་ཚུལ་གསུངས་པར།
གོང་ས་མཆོག་བགྲེས་ཡོལ་ཕེབས་ན་ལམ་དབུ་མ་བགྲེས་ཡོལ་ཆགས་ཀྱི་རེད་དམ།
གྲོས་མཐུན་དོན་ཚན་ཅུ་བདུན་ནུས་མེད་ཆགས་ཀྱི་རེད་དམ།
ངའི་བསམ་ཚུལ་བྱས་ན་སྤྱི་ཚོགས་ཀྱི་ཁ་ཕྱོགས་དང་གཞོན་སྐྱེས་ཚོའི་སེམས་ཁམས་གཞི་ལུས་བོད་མིའི་དམིགས་ཡུལ་གང་ལ་བལྟས་ཀྱང་བོད་རང་བཙན་ཐོག་ཏུ་འགྲོ་དགོས་པའི་དེང་སྐབས་ཤར་འདུག་སྙམ།
འདི་ནི་ང་ཚོའི་ཐོབ་ཐང་རེད། རེ་འདུན་རེད། བདེན་མཐའ་ཡང་རེད། ཡིན་པ་ལ་ཡིན་པ་ཞིག་འཐབ་རྩོད་བྱེད་ན་བསམ་པའི་རེ་བ་ཆེ་ཙམ་ཡོད། བོད་མི་རིགས་འདི་རྒྱ་ཁུངས་མིན་བཞིན་དུ་རང་སྲིད་རང་སྐྱོང་གི་གནས་བབ་དོན་གཉེར་བྱས་ནི་བོད་མིའི་སེམས་ཁམས་དང་མཐུན་ཐབས་མེད་ལ་དངོས་ཡོད་ལོ་རྒྱུས་དང་དེ་བས་མཐུན་ཐབས་མེད།
རང་བཙན་གྱི་ཕྱོགས་སུ་སྐྱོད་ཐུབ་པའི་རེ་ཆེ་ཙམ་དང་བོད་མི་རིགས་འདི་མ་ཤི་རྒྱུན་གནས་ཐུབ་པའི་ཕྱོགས་སུ་ཕྱིན་ན་ག་འདྲ་ཡག་པོ།
བཅོས་བསྒྱུར་༸གོང་ས་མཆོག་གི་བཀའ་དགོངས་དང་མཐུན་པ་དགོས། བགྲེལ་ཡོལ་ཡང་འོས་པ་རེད་ལགས། དགའ་ལྡན་ཕོ་བྲང་གི་སྲིད་གཞུང་ཡང་བེད་སྤྱད་ཀྱིས་དམངས་གཙོ་ཡང་དགོས་དོན་ཨ་ཡོད། ༥༩ནས་རང་བཙན་དང་། ༧༩ནས་༸གོང་ས་མཆོག་གིས་གཉིས་སྨན་དབུ་མའི་ལམ་ལ་དབུ་འཁྲིད་གནང་བ་ཡང་། བསྒྱུར་བཅོས་གཏོང་འོས་ཀྱང་། ༸བགྲེས་ཡོལ་ཕེབས་པས་དབུས་ལམ་མིདགོས་ཚུལ་གྱི་སྙན་ངག་རེད་ཟེར་བ་ལ་ཡང་དྲང་བདེན་མ་རེད་དོ། །
རྩོམ་འདི་འདྲ་བྲིས་ན་གོ་རྒྱུ་ཆེན་པོ་འདུག རྩོམ་མཁན་ལ་ཐུགས་རྗེ་ཆེ་ཞུ་འདུན་བྱུང་སོང་།