བོད་ཀྱི་སྐུ་དྲག་གྲལ་རིམ་དེ་མི་གཅིག་གཉིས་དང་མི་རབས་གཅིག་གཉིས་ཀྱིས་ཡོང་ཐུབ་པ་ཞིག་མིན་པར། མི་རབས་བཅུ་ཕྲག་ལྷག་བརྒྱུད་ནས་བྱུང་བ་ཞིག་ཡིན་སྟབས། སྐུ་དྲག་གྲལ་རིམ་གྱིས་སྔ་མོ་ནས་བོད་ཀྱི་སྤྱི་ཚོགས་བརྟན་ལྷིང་བཟོས་ཡོད་པ་གསལ་སྟོན་བྱས་ཡོད་ཟེར།
དེ་རིང་ཕྱི་ཚེས་ ༢༥ ཉིན་གྱི་ཞོགས་པའི་ཆུ་ཚོད་ ༩ པའི་སྟེང་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས། རྒྱ་རིགས་བུད་མེད་རྩོམ་པ་པོ་ཀྲུའུ་རེའུ་ཡིས་བརྩམས་པའི་༼དུས་བཟང་གི་ལྷ་ས༽ཞེས་པའི་རྒྱ་ཡིག་དཔེ་དེབ་ཅིག་གསར་དུ་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོ་དེར་བོད་དང་རྒྱ་གར་གྱི་གསར་འགོད་པ་ཉི་ཤུ་ལྷག་མཉམ་ཞུགས་བྱས་ཡོད། དཔེ་དེབ་འདི་ནི་བོད་རིགས་སྐུ་དྲག་བུད་མེད་ཅིག་བརྗོད་བྱར་བཟུང་སྟེ་བརྩམས་པ་ཞིག་ཡིན་པར་མ་ཟད། བརྩམས་ཆོས་འདི་ཉིད་ཀྱི་རྒྱུ་ཆ་འཚོལ་ཞིབ་དང་དངོས་ཡོད་འཚོལ་བ་ཚུར་སྣང་ཆེད་རྩོམ་པ་པོ་ཁོང་མོ་བོད་ཀྱི་ལྷོ་ཁ་དང་ལྷ་མོའི་བླ་མཚོ་སོགས་སུ་ཕྱིན་ཏེ། དུས་ཡུན་རིང་པོར་མང་ཚོགས་དང་འབྲེལ་བ་བྱས་ཡོད་འདུག
རྩོམ་པ་པོས་བོད་ཀྱི་སྤྱི་ཚོགས་ཞིབ་འཇུག་སྐོར་གྱི་དཔེ་དེབ་སྐོར་ངོ་སྤྲོད་གནང་དོན། རྒྱ་གཞུང་གིས་ ༡༩༥༩ སྔོན་གྱི་བོད་ནི་ཆེས་མུན་ནག་དང་གདུག་རྩུབ། ཆེས་རྗེས་ལུས་དང་ཀླ་ཀློའི་སྤྱི་ཚོགས་ཤིག་རེད་ཅེས་རྫུན་བསྒྲགས་བྱས་ཡོད་སྟབས། ང་རང་ཆུང་ཆུང་སྐབས་གོ་ཐོས་བྱུང་བ་ནི། བོད་ཀྱི་སྐུ་དྲག་གྲལ་རིམ་ནི་མུན་ནག་སྤྱི་ཚོགས་དེའི་ཁྲོད་གདུག་རྩུབ་ཆེ་ཤོས་ཡིན་པའི་ཚོར་སྣང་བྱུང་། རྗེས་སུ་ང་རང་དངོས་སུ་བོད་ལ་འབྱོར་ཏེ་ད་ལྟ་འཚོ་བཞིན་པའི་སྐུ་དྲག་མང་དག་ཅིག་ལ་འབྲེལ་བ་བྱས་སྐབས། སྐུ་དྲག་ནི་བོད་ཀྱི་རིག་གཞུང་མཚོན་བྱེད་ཀྱི་གྲལ་རིམ་ཞིག་ཡིན་པར་མ་ཟད། དོན་དངོས་ཐོག་ཁོང་ཚོའི་རིག་གཞུང་དེ་བྱམས་བརྩེ་ལྡན་དང་ཤེས་རབ་ཆེ་བ། མཛེས་དཔྱོད་ལྡན་པ་ཞིག་ཡིན་པ་དང་། བོད་ཀྱི་ཆོས་དང་རིག་གཞུང་གི་དད་སེམས་དེས་བོད་ཀྱི་ནང་ཆོས་ལ་ཡར་རྒྱས་ཆེན་པོ་གཏོང་ཐུབ་ཡོད་པའི་ངེས་ཤེས་སྐྱེས་བྱུང་། ཞེས་བརྗོད་བྱུང་།
བོད་ཀྱི་སྐུ་དྲག་ཅེས་ལབ་དུས་ཐ་ཤལ་ཞིག་མིན་ལུགས་ཐད་ལ། བོད་ཀྱི་སྐུ་དྲག་གྲལ་རིམ་དེ་མི་གཅིག་གཉིས་དང་མི་རབས་གཅིག་གཉིས་ཀྱིས་ཡོང་ཐུབ་པ་ཞིག་མིན་པར། མི་རབས་བཅུ་ཕྲག་ལྷག་བརྒྱུད་ནས་བྱུང་བ་ཞིག་ཡིན་སྟབས། སྐུ་དྲག་གྲལ་རིམ་གྱིས་སྔ་མོ་ནས་བོད་ཀྱི་སྤྱི་ཚོགས་བརྟན་ལྷིང་བཟོས་ཡོད་པ་གསལ་བོར་རྟོགས་ཐུབ་ཀྱི་འདུག རྒྱ་ནག་སྤྱི་ཚོགས་ལ་མཚོན་ན་སྐུ་དྲག་ཡོད་མ་རེད། རྒྱ་ནག་ལ་ཡོད་པ་ཁྲིམས་མེད་ལུགས་ཀྱི་ཐོག་རང་ཉིད་གློ་བུར་བའི་ཕྱུག་པོ་ཆགས་རྒྱུ་དེ་རེད། མི་ལོ་སྟོང་ཕྲག་ལྷག་གི་རྒྱ་ནག་གི་ལོ་རྒྱུས་ལ་བལྟས་ན། གཞུང་འཛིན་དང་མང་ཚོགས་བར་དུས་རྒྱུན་འཁྲུག་འཛིང་ཤོར་ཡོད་སྟབས། རྒྱ་ནག་སྤྱི་ཚོགས་ལ་བདེ་འཇགས་ནམ་ཡང་བྱུང་མེད། དེང་སང་ཉམས་ཞིབ་པས་འཛམ་གླིང་ལོ་རྒྱུས་ལ་ཞིབ་འཇུག་བྱས་སྐབས། རྒྱ་ནག་ནི་འཛམ་གླིང་སྤྱི་ཚོགས་ཁྲོད་མང་ཚོགས་ཀྱིས་གཞུང་ལ་ངོ་ལོག་བྱས་པ་ཛ་དྲག་ཆེ་ཤོས་དེ་ཆགས་ཡོད། ཅེས་བརྗོད་སོང་།
དཔེ་དེབ་ཀྱི་བརྗོད་བྱའི་སྐོར་ལ། ངའི་དེབ་ནང་བོད་རིགས་སྐུ་དྲག་བུད་མེད་གཡང་འཛོམས་ཚེ་རིང་ཀྱི་མི་ཚེ་གཅིག་གི་ལོ་རྒྱུས་དང་འབྲེལ་ནས། སྐབས་དེའི་བོད་ཀྱི་དངོས་ཡོད་སྤྱི་ཚོགས་མཚོན་པར་བྱས་ཡོད། དེ་མིན། དེབ་དེར་ཕྱི་ལོ་ ༡༨༨༠ ནས་ ༡༩༦༠ བར་གྱི་བོད་སྲིད་གཞུང་དང་སྐུ་དྲག ཞིང་པ་དང་འབྲོག་པ་སོགས་ཀྱི་གནས་སྟངས་ཞིབ་ཕྲ་བཀོད་དེ། དུས་སྐབས་སོ་སོར་བོད་ནི་ལྷིང་འཇགས་ཀྱི་ཆོས་ལྡན་རྒྱལ་ཁབ་ཅིག་ཡིན་པ་གསལ་པར་བྱས་ཡོད། དེབ་འདིའི་བརྗོད་དོན་རྣམས་དངོས་ཡོད་ཁོ་ན་ཡིན་པ་ལས། ང་རང་གིས་རྟོགས་བཟོ་བྱས་པ་གཅིག་ཀྱང་མེད། ཅེས་བརྗོད་ངོ་སྤྲོད་བྱས་བྱུང་།
མཇུག་ཏུ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་གསུངས་དོན། རྒྱ་རིགས་ཤིག་གིས་བོད་ཀྱི་དངོས་ཡོིད་གནས་ཚུལ་དེ་སྒྲུང་བཤད་པ་ལྟར་མིན་པར། ད་ལྟ་གསོན་པོར་གནས་ཡོད་པའི་མི་སྣ་ཚོར་ཐད་ཀར་ངོ་ཐུག་སྟེ། དངོས་ཡོད་གནས་ཚུལ་ཐོག་རྒྱུས་ལོན་ཟབ་མོ་བྱས་ཡོད་པ་དང་། རྒྱ་གཞུང་གིས་བོད་པ་ཞེས་ལབ་དུས་འགྲོ་སྟངས་མི་ཤེས་མཁན་ཞིག་ཏུ་ངོས་འཛིན་བྱེད་ཀྱི་ཡོད། དེ་རིང་རྒྱ་རིགས་ཤིག་གིས་ལྷ་ཀླུའི་ལྕམ་དབྱངས་འཛོམས་ཚེ་རིང་ལགས་ཀྱི་མི་ཚེའི་ལོ་རྒྱུས་ལས་འཕྲོས་ཏེ། བོད་ཀྱི་རིག་གཞུང་སྤྱི་དང་ཁྱད་པར་དུ་ནང་ཆོས་ཀྱི་བཟང་སྤྱོད་ལྡན་པའི་བོད་མིའི་ཉིན་རེའི་འཚོ་བ་བསྐྱལ་སྟངས་གསལ་པོར་བྲིས་ཡོད།
ཅེས་དང་། འདས་པའི་མི་ལོ་ ༥༠ རྗེས་སུའང་བོད་མི་ཚོ་ད་དུང་འཇིགས་སྣང་འོག་གནས་བཞིན་པའི་སྐབས་འདིར། རྒྱ་མི་ཞིག་གིས་དངོས་ཡོད་གནས་ཚུལ་ཇི་བཞིན་བརྗོད་པར་བསྔགས་བརྗོད་ཡོད། ཅེས་གསུངས་སོང་། རྩོམ་པ་པོ་ཀྲུའུ་རེའུ་ལགས་ནི་རྒྱ་ནག་ནས་བྲོས་བྱོལ་དུ་ཕེབས་པའི་དམངས་གཙོན་དོན་གཉེར་བ་ཞིག་དང་རང་དབང་རྩོམ་པ་པོ་ཞིག་ཡིན་ཞིང་། ཁོང་གིས་དེ་སྔ་བོད་དོན་དང་འབྲེལ་བའི་དཔེ་དེབ་གསུམ་བརྩམས་ཡོད་ལ། ༼དུས་བཟང་གི་ལྷ་ས༽ཞེས་པའི་དཔེ་དེབ་འདི་ནི་ཁོང་གིས་བརྩམས་པའི་དེབ་ཕྲེང་བཞི་པ་དེ་ཆགས་ཡོད།
གསར་འགོད་པ། དཔལ་ལྡན།
རྒྱ་མི་ཞིག་གི་ངོས་ནས་བོད་དོན་བྲིས་པ་ཡག་པོ་འདུག ཡིན་ནའི། གཅིག་བྱས་ན་བཙན་བྱོལ་སྤྱི་ཚོགས་ནང་དུ་སྐུ་དྲག་ལ་ལྟ་སྟངས་གང་འདྲ་ཞིག་འདུག་མིན་གྱི་ཡིག་ཚད་ཅིག་ལེན་གྱི་ཡོད་སྲིད་པས། ཧྲིལ་བོ་ཟ་བའམ་ཧྲིལ་བོ་འདོར་བ་ནི་སྐྱོན་ཆེན་པོ་ཞིག་ཡིན་ཙང་། ཟ་ཤེས་འཐུང་ཤེས་བྱེད་པའི་དུས་ཚོད་ལ་ཐོན་མེད་པའང་མ་རེད།
དེབ་དེ་བོད་ཡིག་ཐོགས་ཡོད་མེད་བྲིས་མི་འདུག་ཀྱང་རྩོམ་པ་པོས་ངོ་སྤོད་སྟངས་ལ་གཞིགས་ན་མོས་སྐུ་དྲག་ཚོའི་བྱ་སྤོད་ངོ་མ་ཤིས་མེད་པ་འདྲ། རྒྱ་གཞུང་གིས་གུང་ཁྲན་ཏང་ཡང་དག་པ་ཡིན་རབས་བཤད་པ་ནི་མཐའ་གཅིག་ཏུ་ཧམ་བཤད་ཁོ་ན་ཡིན་ཡང་སྐུ་དྲག་གི་སྐོར་གྱི་འགྲེལ་བཤད་ལ་བདེན་ཆ་མི་ཉུང་བ་ཡོད། ཐག་རིང་པོར་དཔྱོད་མི་དགོས་པར་གོང་ས་སྐུ་ཕ྄ེང་བཅུ་གསུམ་པ་ནས་བཟུང་ང་དགུའི་བར་གྱི་སྐུ་དྲག་གི་ལས་སྟངས་ལ་དཔྱོད་ན་ཤིས། འོན་ཀྱང་རང་རེའི་སྐོར་ལ་རྩོམ་ཡིག་བྲིས་པར་དགའ་བསུ་ཞུ།
སྐུ་དྲག་གི་གཞུང་འཛིན་སྟངས་དང་ད་ལྟའི་Libya གཞུང་འཛིན་པ་ Gaddafi གཞུང་འཛིན་སྟངས་གཉིས་མི་འདྲ་ས་ལས་འདྲ་ས་མང་གི་རེད།
ཁོ་མོའི་སྐད་ཆ་ལ་གནས་ལུགས་ཅི་ཡང་མི་འདུགབོད་ལ་སྐུ་དྲག་མང་སོང་པས་བོད་མང་ཚོགས་ལ་རྒྱུ་ནོར་དང་ས་ཞིང་ཅི་ཡང་མེད་པར་མནར་གཅོད་འོག་འཚོ་བ་མྱོང་དགོས་བྱུང་པ་རེད།
འོན་ཀྱང་རང་རེའི་སྐོར་ལ་རྩོམ་ཡིག་བྲིས་དགའ་བསུ་ཞུ།
དེབ་དེ་བོད་ཡིག་ཐོགས་ཡོད་མེད་བྲིས་མི་འདུག་ཀྱང་རྩོམ་པ་པོས་ངོ་སྤོད་སྟངས་ལ་གཞིགས་ན་མོས་སྐུ་དྲག་ཚོའི་བྱ་སྤོད་ངོ་མ་ཤིས་མེད་པ་འདྲ། རྒྱ་གཞུང་གིས་གུང་ཁྲན་ཏང་ཡང་དག་པ་ཡིན་རབས་བཤད་པ་ནི་མཐའ་གཅིག་ཏུ་ཧམ་བཤད་ཁོ་ན་ཡིན་ཡང་སྐུ་དྲག་གི་སྐོར་གྱི་འགྲེལ་བཤད་ལ་བདེན་ཆ་མི་ཉུང་བ་ཡོད། ཐག་རིང་པོར་དཔྱོད་མི་དགོས་པར་གོང་ས་སྐུ་ཕ྄ེང་བཅུ་གསུམ་པ་ནས་བཟུང་ང་དགུའི་བར་གྱི་སྐུ་དྲ་གི་ལས་སྟངས་ལ་དཔྱོད་ན་ཤིས།
རྣམ་དཔྱོད་དང་ལྡན་པའི་རྒྱ་མོ་ཁོང་ལ་ཐུགས་བརྗེ་བླ་མེད་དུ་ཆེ་ཞུ་རྒྱུ་ཡིན། དེ་ནི་དེང་སང་ཆོལ་གསུམ་ཁ་གཏོར་དུ་གཏོང་སྙམ་པའི་མི་རབས་གསར་རྙིང་དང་། སྐུ་དྲག་མི་དཀྱུས། སོགས་ཆབ་སྲིད་ཀྱི་ཚིག་རྫུས་མང་དག་གཅིག་གིས་མི་མང་བསླུ་ཁྲིད་བྱ་བཞིན་པར་ཏོག་ཙམ་ཕན་རེ་སྙམ། མྱུར་བ་བོད་ཡིག་ཏུ་བསྒྱུར་ཐུབ་པའི་རེ་འབོད་ཞུ།