རྒྱ་ནག་འཕེལ་རྒྱས་ཀྱི་དགེ་སྐྱོན།

རྒྱལ་སྤྱིའི་རང་དབང་དམངས་བཤེར་ལས་ཁུངས་(GlobeScan)དང་ཨ་རིའི་མ་ལིས་ལན་སློབ་ཆེན་གྱི་དམངས་འདུན་ཞིབ་བཤེར་བརྟག་དཔྱད་སྡེ་ཁག་(PIPA)གཉིས་མཉམ་འབྲེལ་ཐོག་འཛམ་གླིང་གི་རྒྱལ་ཁབ་ ༢༧ ཙམ་གྱི་མི་གྲངས་ ༢༨༦༡༩ ལྷག་ལ་བསམ་ཚུལ་བསྡུས་པའི་ཁྲོད། རྒྱ་ནག་ཚུད་པའི་རྒྱལ་ཁབ་ ༡༣ ཙམ་གྱི་མང་ཚོགས་ཚོས་རྒྱ་ནག་གི་དཔའ་འབྱོར་ཡར་རྒྱས་ཀྱིས་འཛམ་གླིང་ལ་དགེ་ཕན་ཆེ་བར་ངོས་འཛིན་དང་། ཡུ་རོབ་དང་ཨ་རི། ཉི་ཧོང་སོགས་རྒྱལ་ཁབ་ ༡༤ ཙམ་གྱིས་རྒྱ་ནག་གི་དཔལ་འབྱོར་ཡར་རྒྱས་ཀྱིས་འཛམ་གླིང་ལ་ཉེན་འཚབ་ཆེ་བར་ངོས་འཛིན་བྱས་འདུག  

ཐེངས་འདིའི་ཞིབ་བཤེར་མཇུག་འབྲས་ནི་ཕྱི་ལོ་ ༢༠༠༥ ལོའི་བྷི་བྷི་སི་གསར་ཁང་གིས་ཞིབ་བཤེར་བྱས་པའི་མཇུག་འབྲས་དང་བསྡུར་ན། རྒྱ་ནག་གི་འཕེལ་རྒྱས་ཏེ་འཛམ་གླིང་གི་ཉེན་ཚབ་དུ་མཐོང་མཁན་གྱི་གྲངས་འབོར་དེ། ཧྥ་རན་སིར་བརྒྱ་ཆ་ ༣༡ ནས་ ༥༣ དང་། ཁ་ན་ཊར་བརྒྱ་ཆ་ ༣༧ ནས་ ༥༥ ། འཇར་མན་དུ་བརྒྱ་ཆ་ ༤༤ ནས་ ༥༣ །  ཨི་ཊ་ལིར་བརྒྱ་ཆ་ ༤༧ ནས་ ༥༧ ། ཨ་རིར་བརྒྱ་ཆ་ ༤༥ ནས་ ༥༤ ། དབྱིན་ཇིར་བརྒྱ་ཆ་ ༣༤ ནས་ ༤༡ བཅས་རྒྱལ་ཁབ་སོ་སོའི་ནང་སྔར་བས་མང་དུ་འཕར་ཡོད་པ་རེད། 

མང་ཚོགས་ཁྲོད་རྒྱ་ནག་གི་དཔའ་འབྱོར་ཡར་རྒྱས་དེ་ཉེན་འཚབ་ཅིག་ཏུ་ངོས་འཛིན་བྱས་དོན་ནི། རྒྱ་ནག་ནང་དཔལ་འབྱོར་ལམ་ལུགས་ཁྲིམས་མཐུན་དྲང་སྙོམས་མེད་པ་དང་། སྤྱི་དམངས་ཀྱི་དཔལ་འབྱོར་ཅི་ཙམ་འཕེལ་རྒྱས་སུ་སོང་བ་དེ་ཙམ་གྱིས་གཞུང་ཕྱོགས་ནས་བཤུ་གཞོག་གཉའ་གནོན་ཤུགས་ཆེ་རུ་གཏོང་བ་མ་ཟད། དམག་ཤུགས་དང་དམག་ཆས་རྒྱ་སྐྱེད་གཏོང་རྒྱུར་འཇིགས་སྣང་བྱེད་ཀྱི་ཡོད་འདུག  

རྒྱ་ནག་གི་འཕེལ་རྒྱས་དེ་འཛམ་གླིང་གི་མཐུན་འགྱུར་དུ་ངོས་འཛིན་གནང་མཁན་ནི། རྒྱ་ནག་དང་མཛའ་འབྲེལ་ཡོད་པའི་ཨེ་ཤ་ཡ་དང་། ཨ་ཧྥི་རི་ཀ ལ་ཌེན་ཨ་ཧྥི་རི་ཀ་བཅས་འབྱོར་འབྲིང་ཅན་གྱི་རྒྱལ་ཁབ་ཁག་ཅིག་ཡིན་འདུག རྒྱ་ནག་གི་དཔལ་འབྱོར་དགེ་ཕན་ལ་ལྟ་མཁན་བརྒྱ་ཆ་མཐོ་གྲས་དག་ནི། གྷེ་རེ་ཡ་ཉི་རི་ལིས་ཡཱ(Nigeria) སྟེ་བརྒྱ་ཆ་ ༨༥ དང་། ཁིན་ཡཱ་(Kenya)བརྒྱ་ཆ་  ༧༣  ། གྷ་ན་(Ghana)བརྒྱ་ཆ་ ༧༢ བཅས་ཡིན་ཞིང་། ཉེན་འཚབ་དུ་མཐོང་མཁན་བརྒྱ་ཆ་མཐོ་གྲས་དག་ནི། ཡུ་རོབ་དང་ཨ་རི། ཁ་ན་ཌ། ལྷོ་ཀོ་རི་ཡ། ཉི་ཧོང་། རྒྱ་གར་བཅས་ཡིན་འདུག 

གསར་འགོད་པ། ཚེ་རིང་རྒྱལ།