ང་ཚོ་འཇིཊ་སྐུལ་བ་མིན།

རྒྱ་ནག་གཞུང་འབྲེལ་བརྒྱུད་ལམ་མི་མང་ཉིན་རེའི་ཚགས་ཤོག་རྩོམ་སྒྲིག་པས་གཞོན་ལྷན་འཇིགས་སྐུལ་རིང་ལུགས་པ་དང་། མ་འོངས་བཙན་བྱོལ་བོད་གཞུང་འཇིགས་སྐུལ་རིང་ལུགས་པའི་སྒྲིག་འཛུགས་ཤིག་ཆགས་རྒྱུ་ཡིན་སྐོར་གྱི་རྩོམ་ཡིག་དེར་གཞོན་ནུ་ལྷན་ཚོགས་ཀྱིས་ལན་འདེབས་གནང་ཡོད།

ཁ་སང་ཕྱི་དྲོར་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་གསར་འགོད་གསལ་བསྒྲགས་ཤིག་བསྡུས་ཏེ། ཉེ་ཆར་རྒྱ་ནག་གཞུང་འབྲེལ་གསར་ལམ་མི་མང་ཉིན་རེའི་ཚགས་ཤོག་གི་རྩོམ་སྒྲིག་པ་ལི་ཧོང་མེ་ཡིས། གཞོན་ནུ་ལྷན་ཚོགས་འཇིགས་སྐུལ་རིང་ལུགས་པ་དང་། འཇིགས་སྐུལ་རིང་ལུགས་པའི་མི་སྣས་བཙན་བྱོལ་བོད་གཞུང་མགོ་འཁྲིད་རྒྱུ་རེད། ཅེས་པའི་དཔྱད་གཏམ་དེར་ལན་འདེབས་ཤིག་བྱས་སོང་།

སྐབས་དེར་གཞོན་ནུའི་ཚོགས་གཞོན་དོན་གྲུབ་ལྷ་དར་ལགས་ཀྱིས་ལེན་འདེབས་ཡིག་ཆ་སྒྲོག་སྦྱོང་བྱས་པའི་ནང་། རྒྱ་ནག་གཞུང་གིས་བོད་ཀྱི་གཞོན་ནུ་ལྷན་ཚོགས་ནི་འཇིགས་སྐུལ་རིང་ལུགས་པ་རེད་ཅེས་པའི་འཁྱོག་བརྗོད་བསྐྱར་བཤད་ཡང་བཤད་བྱེད་ཀྱི་ཡོད་པ་དང་། ཕྱི་ཟླ་ ༣ པའི་ཚེས་ ༢༢ ཉིན་གྱི་རྒྱ་ནག་མི་མང་ཚགས་ཤོག་གི་རྩོམ་སྒྲིག་པས་བོད་ཀྱི་གཞོན་ནུ་ལྷན་ཚོགས་ནི་འཇིགས་སྐུལ་རིང་ལུགས་པའི་སྒྲིག་འཛུགས་ཡིན་པ་དང་། ཨལ་ཁ་དཱ་དང་འབྲེལ་བ་ཡོད་ཚུལ་གྱི་རྩོམ་ཡིག་སྤེལ་བ་ནི། བོད་ཀྱི་གཞོན་ནུ་ལྷན་ཚོགས་ལ་ཡོད་པའི་བོད་རྒྱ་ཆེའི་མི་མང་གི་ཡིད་ཆེས་དང་། རྒྱལ་སྤྱིའི་གདེང་འཇོག་ཉམས་བརླག་ཏུ་གཏོང་རྒྱུར་དམིགས་པ་ཞིག་རེད། ཅེས་དང་།

ལྷག་པར་དུ་ད་ལྟའི་༧གོང་ས་མཆོག་གི་སྲིད་དབང་ཆ་ཚང་མི་མང་གིས་འོས་འདེམས་བྱས་པའི་དབུ་ཁྲིད་ལ་གནང་གཏན་འཁེལ་བའི་སྐབས་འདིར། བཙན་བྱོལ་བོད་གཞུང་གི་བཀའ་སྤྱིའི་འོས་བསྡུ་ལས་འཕྲོས་ཏེ། གཞོན་ལྷན་འཇིགས་སྐུལ་རིང་ལུགས་པ་ཡིན་ཚུལ། བློ་བཟང་སེང་གེ་ལགས་དེ་སྔོན་གཞོན་ལྷན་གྱི་དབུས་རྒྱུན་བྱས་མྱོང་བས། འཇིགས་སྐུལ་རིང་ལུགས་པའི་མི་སྣས་མ་འོངས་བཙན་བྱོལ་བོད་གཞུང་མགོ་འཁྲིད་རྒྱུ་རེད། ཅེས་མ་འོངས་བཙན་བྱོལ་བོད་གཞུང་དེ་འཇིགས་སྐུལ་རིང་ལུགས་པའི་སྒྲིག་འཛུགས་ཤིག་ཆགས་རྒྱུ་ཡིན་སྐོར་གླེང་བ་ནི། ད་བར་རྒྱ་ནག་གིས་བོད་དོན་འཐབ་རྩོད་དེ་ཏཱ་ལའི་བླ་མ་མི་སྒེར་གྱི་འཐབ་རྩོད་རེད་ཟེར་བ་དང་། བཀས་བཀོད་རྒྱུན་འཛིན་ཞིང་བྲན་ལམ་ལུགས་བསྐྱར་གསོ་བྱ་ཆེད་རེད་ཟེར་བའི་ཧམ་བཤད་དྲིལ་བསྒྲགས་དེ་ད་ཆར་རྒྱལ་སྤྱིའི་ཁྱོན་ལ་ཁུངས་མེད་འཁྱོག་བརྗོད་ཡིན་པ་ར་འཕྲོད་གསལ་བོ་བྱུང་སྟབས། ད་ཆ་བོད་དོན་འཐབ་རྩོད་དང་བོད་གཞུང་ལ་ཁ་གཏད་གཅོག་པར་རྫུན་གཏམ་གྱི་ལག་ཆ་གསར་པ་ཞིག་སློང་ཐབས་བྱེད་ཀྱི་ཡོད་པ་རེད། ཅེས་བཀོད་འདུག

བསྒྲགས་ཡིག་དེར་མུ་མཐུད་དུ་བཀོད་དོན། ད་བར་ལོ་ངོ་ ༤༡ རིང་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ངོས་ནས་འཐབ་རྩོད་ཀྱི་ལས་དོན་ཡོངས་རྫོངས་མཐའ་གཅིག་ཏུ་འཚེ་མེད་ཞི་བའི་ལམ་དུ་བསྐྱོད་པ་ལས། དྲག་པོའི་ལས་དོན་ནམ་ཡང་བསྒྲུབས་མྱོང་མེད། དེ་བཞིན་ད་ལྟའི་བཀའ་ཁྲིས་འོས་མི་གསུམ་པོ་གཞོན་ལྷན་གྱི་དབུས་རྒྱུན་ཟུར་པ་ཡིན་ཞིང་། འདས་པའི་ལོ་རྒྱུས་ནང་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་། བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་གཉིས་དབུས་རྒྱུན་ཟུར་པ་ཡིན་པ་ཙམ་མ་ཟད། གཞོན་ལྷན་ཐོག་མར་གསར་འཛུགས་གནང་མཁན་གྲས་ཀྱང་ཡིན། ད་ལྟའི་བཀའ་ཁྲི་ཟམ་གདོང་རིན་པོ་ཆེ་མཆོག་ཀྱང་དབུས་རྒྱུན་ཟུར་པ་རེད། ཁོང་ཚོས་བཀའ་ཁྲི་གནང་རིང་འཇིགས་སྐུལ་རིང་ལུགས་པའི་ལས་དོན་ཅི་ཞིག་གནང་ཡོད། དེ་མེད་ན་གཞོན་ནུའི་དབུས་རྒྱུན་ཟུར་པ་ཡིན་པའི་རྒྱུ་མཚན་གྱིས་མ་འོངས་བཙན་བྱོལ་བོད་གཞུང་གི་ཁ་ཕྱོགས་འཇིགས་སྐུལ་རིང་ལུགས་པར་བསྒྲུབ་པ་ནི་གནས་ལུགས་མེད་པའི་ཧམ་བཤད་རེད། ཅེས་སྒྲོག་སྦྱོང་གནང་སོང་།

གསར་འགོད་པ། བནྡེ་སྐྱབས།