ཨ་རིའི་མཐོ་སློབ་དང་མཉམ་འབྲེལ།

བོད་ལྗོངས་མི་རིགས་སློབ་གླིང་དང་ཨ་རིའི་ནཱ་སཱ་ལི་གཙུག་ལག་སློབ་གྲྭ་གཉིས་མཉམ་འབྲེལ་ཐོག མ་འོངས་པར་དགེ་སློབ་བར་གྱི་བསམ་བློ་དང་རིག་གཞུང་སྤེལ་རེས་ཀྱི་བྱ་འགུལ་སྤེལ་འཆར་ཡོད་ཟེར།

ཟླ་འདིའི་ཕྱི་ཚེས་ ༡ ཉིན་བོད་ལྗོངས་མི་རིགས་སློབ་གླིང་དང་ཨ་རིའི་ནཱ་སཱ་ལི་སློབ་ཆེན་གཉིས་ཀྱིས་རིག་གཞུང་དང་སློབ་གསོའི་ལས་དོན་མཉམ་འབྲེལ་ཀྱི་ལས་གཞི་མགོ་བརྩམས་ཡོད་ཅིང་། བོད་ལྗོངས་མི་རིགས་སློབ་གླིང་གི་སློབ་སྤྱི་ཧོང་ཧྲུན་དང་ནཱ་སཱ་ལི་སློབ་གླིང་གི་སློབ་སྤྱི་གཞོན་པ་སྐུ་ཞབས་བྷོར་ཁྲོན་ཝེར་སྦི་ (Dr. Burton Webb) གཉིས་ཀྱིས་ལས་གཞི་མཉམ་འབྲེལ་གྱི་ཡིག་ཆར་མིང་རྟགས་བཀོད་ཡོད་འདུག

མ་འོངས་པར་ཕྱོགས་གཉིས་ཀྱི་དགེ་སློབ་ཕན་ཚུན་བར་མངགས་གཏོང་གིས་སློབ་སྦྱོང་སྤྲོད་རྒྱུ་དང་། སློབ་མ་རང་སྟེང་ནས་འགྲོ་གྲོན་བཏང་སྟེ་ཕན་ཚུན་གྱི་སློབ་གྲྭའི་ནང་སློབ་སྦྱོང་བྱེད་པའི་གོ་སྐབས་བསྐྲུན་རྒྱུ། མཉམ་འབྲེལ་སྒོས་རིག་གཞུང་ཞིབ་འཇུག་དང་རིག་གཞུང་མཉམ་འབྲེལ་བྱ་འགུལ་སྤེལ་བ་དང་ཆབས་ཅིག  པར་སྐྲུན་ཐོན་རྫས་དང་དཔེ་ཚོགས།  ཆ་འཕྲིན་ཡིག་ཚགས།  དངོས་རྫས་བཤམས་སྟོན། སློབ་ཁྲིད་འཆར་འགོད་དང་སློབ་ཁྲིད་ཞིབ་བརྗོད་སོགས་ཀྱི་ཆ་ནས་ཕན་ཚུན་བརྗེ་རེས་བཅས་བྱ་རྒྱུ་ཡིན་འདུག

དེའི་ཐད་ཨ་རིའི་ནཱ་སཱ་ལི་སློབ་གླིང་གི་སློབ་གཙོ་གཞོན་པ་སྐུ་ཞབས་བྷོར་ཁྲོན་ཝེར་སྦི་ཡིས། ཁོང་རང་ཉིད་ཀྱི་ངོས་ནས་ལས་གཞི་འདིར་རྒྱབ་སྐྱོར་དང་མཐུན་འགྱུར་གནང་འཆར་ཡོད་ལ། ང་ཚོས་ལས་གཞི་འདི་ལྟར་སྤེལ་བའི་དམིགས་ཡུལ་གཙོ་བོ་ནི། སློབ་གྲྭའི་དགེ་སློབ་ཕན་ཚུན་བར་བསམ་བློ་བརྗེ་རེས་དང་སློབ་སྦྱོང་སྤེལ་རེས་ཀྱི་འབྲེལ་འདྲིས་བརྒྱུད་དེ། སློབ་མ་ཚོས་བོད་ལྗོངས་ལ་སྔར་ལས་ལྷག་པའི་རྒྱུས་ལོན་ཟབ་ཞུགས་བྱ་རྒྱུ་དེ་ཡིན། ཞེས་བརྗོད་ཡོད་འདུག  

ཨ་རིའི་ནུབ་བྱང་ཨེ་ཌ་ཧོ་བྷོ་སི་ (Idaho Boise) གྲོང་ཁྱེར་ཉེ་འགྲམ་གྱི་ནཱ་པ་ (Nampa) དུ་ཡོད་པའི་ནཱ་སཱ་ལི་སློབ་གླིང་ (Northwest Nazarene University )ནི། སྤྱི་ལོ་ ༡༩༡༣ ལོར་གསར་འཛུགས་གནང་བའི་ལོ་རྒྱུས་ཆེས་རིང་བའི་སྒེར་གཉེར་མཐོ་སློབ་ཅིག་ཡིན་ཞིང་། ད་ལྟའི་ཆར་སློབ་གླིང་འདིར་ཚོང་ལས་དང་སློབ་གསོ། གླུ་གཞས། མང་ཚོགས་བརྙན་སྤེལ།  ནད་གཡོག སྒྱུ་རྩལ། རྩིས་འཁོར། སྐྱེ་དངོས། རང་བྱུང་ཚན་རིག ལུས་རྩལ། དབྱིན་ཡིག་གླིང་བཅས་ནང་གསེས་སྡེ་ཚན་ ༡༢ ལྷག་ཡོད་པ་དང་། དེའི་ཁྲོད་དངོས་གཞིའི་ཆེད་ལས  ༦༠ ལྷག་དང་རབ་འབྱམས་པའི་ཆེད་ལས ༣༠ ལྷག་གསར་འཛུགས་གནང་ཡོད་འདུག

གསར་འགོད་པ། དོན་གོ