ཁ་སང་སླར་ཡང་སྐྱེ་རྒུ་མདོ་ནས་གནས་ཚུལ་འབྱོར་བྱུང་བ་ལྟར་ན། ཕྱི་ཚེས་ ༥ ཉིན་བསྐྱར་དུ་སྐྱེ་རྒུ་མདོའི་མང་ཚོགས་ཉིས་བརྒྱ་ཡས་མས་ཤིག་གེ་སར་ཐང་ཆེན་དུ་འཛོམས་ཏེ། སྔར་ཉིན་འཛིན་བཟུང་བྱས་པ་དག་ཀློད་གྲོལ་དགོས་པའི་འབོད་སྐུལ་ཞུས་ཡོད་འདུག་ལ། འཛིན་བཟུང་བྱས་ཟིན་པ་དེ་དག་གི་མིང་དང་ལོ་རྒྱུས་གསལ་བོ་ཤེས་རྟོགས་ཐུབ་མེད་ཀྱང་། མང་ཆེ་བ་ལོ་ན་ ༦༠ ཡས་མས་ཀྱི་རྒན་འཁོགས་དང་། ས་འགུལ་ཁྲོད་དབང་བོ་སྐྱོན་ཅན་དུ་གྱུར་ཡོད་པ་དག་ཡིན་འདུག ཨ་ཁྲོ་ཀརྨ་ཞུ་བའི་ལོ་ན་ ༧༣ ལ་སོན་པའི་རྒན་འཁོགས་ཤིག་ཡོད་པ་དང་། ཁོང་འཛིན་བཟུང་བྱས་རྗེས་ཁོང་གི་བུ་མོ་ཆེ་བར་སེམས་ནད་ཅིག་ཕོག་ཡོད་འདུག་ལ། ནད་གཡོག་ཏུ་འགྲོ་མཁན་ཞིག་གིས་བརྗོད་ན། མོའི་སེམས་ནད་ཧ་ཅང་ཚབས་ཆེན་ཡིན་སྟབས་འཆི་སྲིད་པའི་ཉེན་ཁ་འདུག་ཟེར།
གནས་ཚུལ་ནང་མུ་མཐུད་དུ་བཀོད་དོན། སྐྱེ་རྒུ་མདོར་གསར་འཛུགས་བྱས་ཡོད་པའི་རྒྱ་ནག་གི་ཨུ་ཡོན་ལྷན་ཁང་ཁག་ཏུ་ཉིན་ལྟར། ས་གནས་མང་ཚོགས་བརྒྱ་སྐོར་རེ་དཀའ་ངལ་ཞུ་གཏུག་བྱེད་དུ་འགྲོ་བཞིན་ཡོད་པ་དང་། ཉེ་ལམ་ས་ཞིང་དང་ཁང་པ་མང་ཚོགས་ལ་སྤྲོད་རྒྱུ་མིན་པར་གཞུང་བཞེས་བྱ་རྒྱུའི་སྐད་ཆ་དེ་ཁྱབ་མ་ཐག ཉིན་རེར་མང་ཚོགས་སྟོང་ཕྲག་ཡས་མས་ཁུལ་སྲིད་གཞུང་གི་ལས་ཁུངས་ཁག་དང་། ཨུ་ཡོན་ལྷན་ཁང་ཁག་ལ་ཞུ་གཏུག་བྱེད་དུ་འགྲོ་བཞིན་འདུག་ལ། ཕྱི་ཚེས་ ༥ ཉིན་ཡུལ་ཤུལ་རྫོང་གི་དྲུང་ཆེ་དང་ཁུལ་སྲིད་གཞུང་གི་རྒྱུན་ལས་ཤིག་བཅས་ཉེན་རྟོག་པ་དང་། ལག་ཏུ་དྲག་ཆས་ཐོགས་ཤིང་། མགོ་ལ་རས་ནག་པོས་བཏུམ་ཡོད་པའི་དམིགས་བསལ་དམག་དཔུང་བརྒྱ་སྐོར་ཞིག་ཁྲིད་ཡོང་སྟེ་མང་ཚོགས་ལ། ཁ་སང་ཁྱེད་ཅག་གི་བྱེད་སྟངས་དེ་དྲག་སྤྱོད་པའི་བྱེད་སྟངས་རེད། ཨ་རི་ལྟ་བུ་ཡིན་ན། གཞུང་དམག་གིས་ཁ་སང་ཁྱེད་ཅག་རྩ་མེད་བཟོས་ཚར་བ་རེད། ཉིན་འདི་གར་ཟིང་ཆ་སློང་མཁན་མང་ཆེ་བ་ས་འགུལ་ཁྲོད། ཏང་དང་རྒྱལ་ཁབ་ཀྱིས་ས་འོག་ནས་ཚེ་སྲོག་བསྐྱབས་པ་ཤ་སྟག་རེད། ཁྱེད་ཅག་གིས་རྒྱལ་ཁབ་ལ་དྲིན་ལན་ལོག་འཇལ་བྱེད་ཀྱི་འདུག ང་ཚོས་བཀག་ཉར་བྱས་ཡོད་པ་དེ་དག་ཡུལ་ཤུལ་བསྐྱར་འཛུགས་ལ་འགོག་རྐྱེན་དང་། མི་མང་གི་བདེ་འཇགས་ལ་གཏོར་བརླག་གཏོང་མཁན་གཏེ་བོ་དག་ཡིན། ད་དུང་འདུག་ཚོད་མ་ཟིན་ཚེ། ཡང་བསྐྱར་མི་མང་པོ་འཛིན་བཟུང་བྱས་ཏེ་དོན་དག་ཅི་ཞིག་བྱུང་ཡང་འགན་ཆ་ཚང་མང་ཚོགས་ཀྱིས་འཁུར་དགོས། ཞེས་འཇིགས་སྐུལ་བྱས་ཡོད་འདུག
