རེ་བ་སྟོང་པ་དང་ཡོང་རྒྱུ་མེད་པའི་རྨི་ལམ་ཞིག་རེད།

ཁ་ཤས་ཀྱིས་རྒྱལ་བ་རིན་པོ་ཆེས་ཆབ་སྲིད་དང་འཛིན་སྐྱོང་སྲིད་དབང་རྩིས་སྤྲོད་གནང་བའི་ཉེར་ལེན་གྱིས། དབུ་མའི་ལམ་གྱི་སྲིད་བྱུས་རང་བཞིན་གྱིས་ཡལ་འགྲོ་བ་རེད་ཟེར་བ་དེ། རེ་བ་སྟོང་པ་དང་ཡོང་རྒྱུ་མེད་པའི་རྨི་ལམ་རེད། ཅེས་ཟམ་གདོང་རིན་པོ་ཆེས་གསུངས།

དབུ་མའི་ལམ་མི་མང་ལས་འགུལ་ཁང་དང་བོད་རྒྱལ་ཡོངས་ཆབ་སྲིད་བཙོན་གྲོལ་ཚོགས་པ། དབུས་གཙང་ཆོལ་ཁ་གསུམ་ཐུན་མོང་གི་གོ་སྒྲིག་འོག ཁ་སང་ཕྱི་ཚེས་ ༡༠ ཉིན་གྱི་ཕྱི་དྲོའི་ཆུ་ཚོད་ ༣ པའི་སྟེང་ངྷ་ས་མེག་གྷན་ཉིན་སློབ་ཚོགས་ཁང་དུ། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་ས་གནས་མང་ཚོགས་ལ། ༧གོང་ས་མཆོག་བགྲེས་ཡོལ་དུ་ཕེབས་རྗེས་ལམ་དབུ་མའི་སྲིད་བྱུས་ལ་འགྱུར་བ་འགྲོ་མིན་ཐོག གཏམ་བཤད་ཅིག་གནང་ཡོད། བགྲོ་གླེང་ཚོགས་འདུ་དེར་ངྷ་སའི་སེར་སྐྱ་མང་ཚོགས་ ༡༠༠ ལྷག་འདུ་འཛོམས་གནང་ཡོད།  

ཐོག་མར་སྤྱི་འཐུས་ཟླ་བ་ཚེ་རིང་ལགས་ཀྱིས་བགྲོ་གླེང་གི་དམིགས་ཡུལ་ཐད་ལ་བརྗོད་དོན། ༧གོང་ས་མཆོག་ཆབ་སྲིད་དང་འཛིན་སྐྱོང་གི་གོ་གནས་ནས་བགྲེས་ཡོལ་ཕེབས་པ་དེར། རྒྱ་ནག་གཙོས་པའི་དྲ་རྒྱ་འདྲ་མིན་ཁག་ཏུ། ཏཱ་ལའི་བླ་མ་བགྲེས་ཡོལ་ཕེབས་དོན་ནི་ལམ་དབུ་མའི་སྲིད་བྱུས་ཁུངས་མ་འཁྱོལ་བ་རེད་ཟེར་བ་དང་། ཁོང་བགྲེས་ཡོལ་དུ་ཕེབས་ན། མང་གཙོའི་འགྲོ་ལུགས་ཐོག་ལམ་དབུ་མའི་སྲིད་བྱུས་རང་བཞིན་གྱིས་ཡལ་འགྲོ་ཡི་རེད་ཟེར་བ། རིགས་ཁ་ཤས་ཀྱིས་སོ་སོའི་ལྟོ་གོས་ཀྱི་ཆེད་དུ། ༧གོང་ས་སྐུ་ཕྲེང་ལྔ་པ་ནས་བཅུ་བཞི་བར་འགོག་རྐྱེན་དང་དཀའ་ངལ་འཕྲད་པ་རྣམས་སྐུ་ཕྲེང་རིམ་བྱོན་གྱིས་མ་འཇོན་པ་ཞིག་ཡིན་ཚུལ་བརྗོད་དེ་༧གོང་ས་མཆོག་ལ་དམའ་འབེབས་དང་ཟུར་ཟ་དེ་འདྲ་ཡོང་གི་ཡོད་སྟབས། ང་ཚོས་མང་ཚོགས་རྣམས་བཤད་ཡམས་དེའི་རྗེས་སུ་མི་འགྲོ་རྒྱུར་དམིགས་ཏེ་ལས་འགུལ་འདི་གོ་སྒྲིག་ཞུས་པ་ཡིན། ཞེས་བརྗོད་སོང་། 

དེའི་རྗེས་སྐུ་མགྲོན་གཙོ་བོ་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ༧གོང་ས་མཆོག་གིས་བོད་མིའི་ཆབ་སྲིད་དང་འཛིན་སྐྱོང་དབུ་ཁྲིད་དེ། བཅའ་ཁྲིམས་ནང་གསལ་བའི་མང་ཚོགས་ཀྱིས་འོས་འདེམས་བྱས་པའི་དབུ་ཁྲིད་ཁག་ལ་རྩིས་སྤྲོད་གནང་རྒྱུར་ཐག་གཅོད་གནང་སྟེ། ཉེ་ཆར་ཕྱི་ཟླ་ ༣ ཚེས་ ༡༤ ཉིན་གྱི་གྲོས་ཚོགས་ཚོགས་དུས་ ༡༡ ཐོག་གསུང་འཕྲིན་བསྩལ་སྐབས། གྲོས་ཚོགས་ནས་བསྐྱར་དུ་དགོངས་གཞི་ཡོང་རྒྱུར་གསོལ་འདེབས་ཞུས་ཀྱང་གསན་དགོངས་མེད་སྟབས། ད་ལྟ་༧གོང་ས་མཆོག་གི་བཀའ་དགོངས་བཞིན་བཅའ་ཁྲིམས་བསྐྱར་བཅོས་བྱ་རྒྱུའི་ལས་རིམ་ཐོག་འགྲོ་བཞིན་ཡོད། མི་འགྱང་བར་རྒྱལ་ཡོངས་གཞུང་མང་ཚོགས་ཆེན་དང་། སྐབས་བཅུ་བཞི་པའི་གྲོས་ཚོགས་ཚོགས་དུས་འཕར་མའི་སྟེང་བཅའ་ཁྲིམས་ལ་འགྱུར་བ་འགྲོ་ཡི་ཡོད།  བཅའ་ཁྲིམས་ཀྱི་འཆར་ཅན་འགྱུར་བ་ཕྱིན་ན། ང་ཚོས་ལག་ལེན་བསྟར་བཞིན་པའི་བཅའ་ཁྲིམས་དོན་ཚན་ ༣༩ ཙམ་བསྐྱར་བཅོས་འགྲོ་རྒྱུ་རེད། བསྐྱར་བཅོས་སྐབས་༧གོང་ས་མཆོག་གི་མཚན་ཐོག་ལ་ཡོད་པའི་ཆབ་སྲིད་དང་འཛིན་སྐྱོང་སྐུ་དབང་གཉིས། མང་ཚོགས་ཀྱིས་འོས་འདེམས་བྱས་པའི་བཀའ་ཁྲི་དང་སྤྱི་འཐུས་ལྷན་ཚོགས་བཅས་ལ་ཆ་བགོས་བྱས་ཏེ། མ་འོངས་པར་བཅའ་ཁྲིམས་ནང་ཁོང་གི་སྐུ་དབང་མེད་པ་ཆགས་རྒྱུ་ཡིན་པ་དེ་དངོས་ཡོད་གནས་ཚུལ་རེད། ཅེས་གསུངས།

ཡང་ཁོང་གིས་མུ་མཐུད་དོན། བར་ལམ་ཞིག་ནས་༧གོང་ས་མཆོག་གིས་ཕྱེད་བགྲེས་ཡོལ་དང་བགྲེས་ཡོལ་ཆ་ཚང་ཞེས་པའི་བཀའ་ཐེངས་མང་གནང་ཡོད་ལ། དེ་ནི་འཆར་ཅན་བཀའ་མོལ་གནང་བའི་ཚིག་ཅིག་ཡིན་པ་ལས། ༧གོང་ས་མཆོག་གི་གསུང་འཕྲིན་ཁག་ལ་གཟིགས་ན་བགྲེས་ཡོལ་ཟེར་བའི་ཚིག་དེ་ཡོད་པ་མ་རེད། གསུམ་བཅུའི་དུས་དྲན་དང་གྲོས་ཚོགས་སུ་བསྩལ་བའི་གསུང་འཕྲིན་ཁག་ལ་ཚང་མས་ཐུགས་ཞིབ་གནང་ཡོད། ལྷག་པར་དུ་གྲོས་ཚོགས་སུ་བསྩལ་བའི་གསུང་འཕྲིན་ཞིབ་ཚགས་པོ་ཡོད། དེའི་མགོ་ནས་མཇུག་བར་སྐུ་དབང་ཕྱིར་གནང་རྒྱུའི་སྐོར་གྱི་བཀའ་མོལ་ལས་བགྲེས་ཡོལ་ཟེར་བའི་ཚིག་བེད་སྤྱོད་བཏང་མེད། བགྲེས་ཡོལ་ཟེར་བའི་སྐབས་སུ། ན་ཚོད་ཀྱི་ཆ་ནས་ལས་མཚམས་འཇོག་དགོས་རྒྱུའི་གནས་སྟངས་ཤིག་ཆགས་ཡོད་དུས། གཅིག་བྱས་ན། ཚིག་དེ་ཆབ་སྲིད་ཀྱི་གནས་བབ་ཐོག་ནོར་འཁྲུལ་འགྲོ་སྲིད་པ་ཞིག་རེད། ༧གོང་ས་བཅུ་བཞི་པ་ཆེན་པོ་དགུང་ལོ་མཐོ་བོར་བསླེབ་ན་བགྲེས་ཡོལ་གནང་རྒྱུ་ཞིག་དང་། ཡང་རྒྱལ་བ་སྐུ་ཕྲེང་གཞན་ཞིག་དགུང་ལོ་གཞོན་གཞོན་ཆགས་ན་བསྐྱར་དུ་འགན་བཞེས་གནང་གི་རེད་སྙམ་པའི་གོ་བ་ལེན་སྲིད་པ་ཞིག་རེད། ཅེས་དང་། 

བོད་ལ་དམངས་གཙོ་ཚད་ལྡན་ཞིག་ཡོང་ཆེད་སྲིད་དབང་རྩིས་སྤྲོད་གནང་དོན་སྐོར་ལ། ༧གོང་ས་མཆོག་གིས་སྐུ་དབང་རྩིས་སྤྲོད་གནང་དོན་ནི། བོད་པའི་སྤྱི་ཚོགས་ནང་དམངས་གཙོའི་ལམ་སྲོལ་གྱི་འཕེལ་རིམ་ཆ་ཚང་ཞིག་ཡོང་ཆེད་རེད། དམངས་གཙོའི་ལམ་སྲོལ་ཡང་དག་ཅིག་འོང་བར་མགོ་ཁྲིད་མཐོ་དམན་སུ་ཡིན་རུང་། ཆབ་སྲིད་དང་འཛིན་སྐྱོིང་གི་འགན་ཆེ་ཤོས་འཁྱེར་མཁན་དེ་སྐུ་ཕྲེང་རིམ་བྱོན་དང་རྒྱུད་པ་འཛིན་པ་སོགས་མིན་པར། དུས་ནས་དུས་སུ་མང་ཚོགས་ཀྱིས་འོས་འདེམས་བྱས་པའི་མགོི་ཁྲིད་ཅིག་དགོས་པ་རེད་ཅེས་བཀའ་གནང་ཡོད། ད་ལྟ་དམངས་གཙོའི་འཕེལ་རིམ་ཡོངས་སུ་རྫོགས་པའི་རྒྱལ་ཁབ་ཁག་ཏུ། མགོ་ཁྲིད་མཐོ་ཤོས་འོས་བསྡུའི་ལམ་ནས་ཡོང་གི་མེད་མཁན་སོགས་ཡོད་ཀྱང་། ༧གོང་ས་མཆོག་གིས་མི་གཅིག་ལ་རག་ལས་མི་དགོས་རྒྱུ་དེ་གལ་ཆེན་ཞིག་ཡིན་སྐོར་གསུང་བཞིན་ཡོད་ལ། བཀའ་སློབ་དེ་ནི་གློ་བུར་དུ་གནང་བའི་བཀའ་ཞིག་ཆགས་ཡོད་པ་མ་རེད། ༡༩༦༩ ལོའི་གསུམ་བཅུའི་དུས་དྲན་ཉིན་ནས་ད་ལོའི་བར། ༧གོང་ས་མཆོག་གིས་མང་ཚོགས་ལ་ཡང་ནས་བསྐྱར་དུ། རྒྱལ་བ་རིན་པོ་ཆེར་བརྟེན་མི་དགོས་པ་དང་ལྟོས་མི་དགོས་པར་མི་མང་ཚོ་རང་རྐྱ་འཕེར་ཐུབ་པ་ཞིག་དགོས་ཞེས་ཐེངས་མང་གསུངས་ཡོད། ཅེས་གསུངས་བྱུང་།   

བཀའ་ཁྲི་མཆོག་གིས་སྐུ་ཕྲེང་བཅུ་བཞི་པའི་སྲིད་དབང་མཇུག་བསྡུ་རྒྱུ་དེ། སྐུ་ཕྲེང་རིམ་བྱོན་གྱིས་མཛད་རྗེས་ལ་དོ་ཕོག་མི་ཡོང་ཆེད་ཡིན་ལུགས་གསུངས་དོན། ༧གོང་ས་ལྔ་བ་ནས་ད་བར་མི་ལོ་ ༣༦༩ ཙམ་ཕྱིན་ཡོད་ཅིང་། དེའི་རིང་བོད་མི་ཚོས་རྒྱལ་བ་སྐུ་ཕྲེང་ན་རིམ་སྟེང་སྐྱིད་ཉལ་བརྒྱབ་སྟེ་བསྡད་ཡོད་སྟབས། བསམ་བློའི་བག་ཆགས་མཐུག་པོ་དེ་དུས་ཚོད་ཐུང་ངུའི་ནང་སངས་ཐུབ་ཀྱི་ཡོད་པ་མ་རེད། ༡༦༤༢ ལོར་༧གོང་ས་ལྔ་བ་ཆེན་པོས་བཙུགས་པའི་དགའ་ལྡན་ཕོ་བྲང་གཞུང་གི་གནས་བབ་དེར། གཞིས་བྱེས་བོད་མི་ཡོངས་ཀྱིོས་ཁྲིམས་མཐུན་གྱི་གཞུང་ཞིག་ལ་ངོས་འཛིན་གནང་བཞིན་ཡོད་ལ། དེ་འདྲའི་གཞུང་དེར་ཁྲིམས་མཐུན་གནས་བབ་རག་རྒྱུར་ད་ལྟ་ཁྲིམས་མཐུན་གནས་བབ་གང་ཡོད་པ་དེའི་ཐོག་རྩིས་སྤྲོད་གནང་རྒྱུ་གལ་ཆེན་རེད། རྒྱལ་བ་ལྔ་བས་མགོ་བཙུགས་པ་དེ་རྒྱལ་བ་བཅུ་བཞི་པས་མཇུག་བསྡོམས་རྒྱག་རྒྱུ་དེ་སྐུ་ཕྲེང་བཅུ་བཞི་པར་ཡོད་པ་ཞིག་རེད། མི་གཞན་གྱིས་ཐག་གཅོད་མ་བྱས་གོང་༧གོང་ས་མཆོག་གིས་ཐག་གཅོད་པ་དེ། སྐུ་ཕྲེང་གོང་མ་ན་རིམ་གྱི་མཛད་པ་རྣམས་ནག་གསུབ་ཏུ་མི་འགྲོ་རྒྱུའི་དོན་དུ་རེད། ཅེས་གསུངས་སོང་། 

༧གོང་ས་མཆོག་ཆབ་སྲིད་དང་འཛིན་སྐྱོང་འགན་དབང་ལས་ཕྱིར་བུད་ནའང་། ཁོང་གིས་ལམ་སྟོན་གནང་པའི་དབུ་མའི་ལམ་གྱི་སྲིད་བྱུས་ལ་འགྱུར་བ་གང་ཡང་མེད་པའི་ཐད་ལ།  ཐེངས་འདིར་༧གོང་ས་མཆོག་གིས་སྲིད་དབང་རྩིས་སྤྲོད་གནང་བ་དེས། དབུ་མའི་ལམ་གྱི་སྲིད་བྱུས་ལ་དངོས་ཤུགས་བརྒྱུད་གསུམ་ནས་འབྲེལ་བ་ཡོིད་པ་མ་རེད། དང་ཐོག་དབུ་མའི་ལམ་གྱི་སྲིད་བྱུས་ལ་བརྟེན་ནས། རྒྱལ་སྤྱི་དང་རྒྱ་ནག་གཉིས་ཀར་ང་ཚོར་བསམ་ཡུལ་ལས་འདས་པའི་རླབས་ཆེན་གྲུབ་འབྲས་ཐོན་ཡོད་ལ། མ་འོངས་པར་ཡང་གྲུབ་འབྲས་མུ་མཐུད་ནས་འཐོན་ཐུབ་ཀྱི་རེད། དབུ་མའི་ལམ་གྱི་སྲིད་བྱུས་ལ་གྲུབ་འབྲས་མ་ཐོན་པ་རེད་ཟེར་བ་དེ། སོ་སོའི་མཐོང་ཕྱོགས་ཤིག་རེད་མ་གཏོགས། ཉི་ཤར་ལ་སྤར་མོས་ཁེབས་ཐུབ་ཐབས་ཡོད་པ་མ་རེད། དབུ་མའི་ལམ་གྱི་སྲིད་བྱུས་ཀྱིས་གྲུབ་འབྲས་ཐོན་ཡོད་མེད་གཞིས་བྱེས་མི་མང་དང་རྒྱལ་སྤྱིའི་མགོ་ཁྲིད་ཚོས་ཀྱང་ཤེས་རྟོགས་བྱུང་ཡོད། དེར་མི་ཁ་ཤས་ཀྱིས་གྲུབ་འབྲས་ཐོན་མེད་ལབ་ནའང་། ང་ཚོས་སྐད་ཆ་དེར་དོ་སྣང་དང་རྩ་ཆེན་དུ་བརྩི་དགོས་པའི་གནས་བབ་གང་ཡང་མེད་ལ། ༧གོང་ས་མཆོག་གིས་སྲིད་དབང་རྩིས་སྤྲོད་བྱས་རྗེས། དབུ་མའི་ལམ་གྱི་སྲིད་བྱུས་མཇུག་སྐྱོང་བྱེད་མཁན་མེད་པའི་བསམ་ཚུལ་ཡོད་ན། དེ་ལས་ཀྱང་བགད་མོ་ཤོར་བའི་གཞི་རྩ་ཆགས་འགྲོ་བ་རེད། ཅེས་དང་།

ཁོང་གིས་མུ་མཐུད་དུ་དབུ་མའི་ལམ་གྱི་སྐོར་ལ་བསྟན་དོན། དབུ་མའི་ལམ་གྱི་སྲིད་བྱུས་༧གོང་ས་མཆོག་མི་གཅིག་གིས་ཐག་བཅད་པ་མིན་པ་ཚང་མས་ཤེས་ཀྱི་ཡོད། སྲིད་བྱུས་དེ་༧གོང་ས་མཆོག་གིས་ལམ་སྟོན་གནང་པའི་གནས་ཚུལ་ཞིག་ཡིན་ཡང་། ཐག་གཅོད་དམངས་གཙོའི་ལམ་སྲོལ་བརྒྱུད་མི་མང་གིས་ཐག་གཅོད་བྱས་པ་ཞིག་ལས། རྒྱལ་བ་རིན་པོ་ཆེས་སྐུ་རྐྱང་གིས་ཐག་བཅད་པའི་གནས་སྟངས་ཤིག་ཆགས་མེད། ཁ་ཤས་ཀྱིས་རྒྱལ་བ་རིན་པོ་ཆེས་ཆབ་སྲིད་དང་འཛིན་སྐྱོང་གི་སྲིད་དབང་རྩིས་སྤྲོད་གནང་བའི་ཉེར་ལེན་གྱིས། དབུ་མའི་ལམ་གྱི་སྲིད་བྱུས་རང་བཞིན་གྱིས་ཡལ་འགྲོ་ངེས་རེད་ཟེར་བ་དེ་རིགས་ནི། རེ་བ་སྟོང་པ་དང་ཡོང་རྒྱུ་མེད་པའི་རྨི་ལམ་ཞིག་རེད། སྲིད་བྱུས་མང་ཚོགས་ཀྱིས་གཏན་ལ་འབེབས་དགོིས་པ་ཞིག་ཡིན་དུས། མང་ཚོགས་ཀྱིས་བསམ་ཚུལ་ལ་འགྱུར་བ་མ་ཕྱིན་བར་མི་རེ་ཟུང་གིས་དབུ་མའི་ལམ་གྱི་སྲིད་བྱུས་ལ་འགྱུར་བ་གཏོང་རྒྱུ་དང་། དུས་རྒྱུན་དབུ་མའི་ལམ་གྱི་སྲིད་བྱུས་ལ་འགྱུར་བ་གཏོང་འདོད་བྱས་ཏེ། བརྒྱུད་ལམ་ཁག་དང་ངྷ་རམ་ས་ལའི་སྲང་ལམ་ཁག་ཏུ། ལས་ཀ་དང་འགན་འཁུར་མེད་པར་བཤད་སྡོད་མཁན་གྱི་བསམ་ཚུལ་དང་བཤད་སྟངས་ཤིག་གི་ཐོག་ནས། ཡང་ནས་ཡང་དུ་མང་ཚོགས་ཀྱིས་སྲེག་བཅད་བརྡར་བའི་གསེར་བཞིན་གཏན་ལ་ཕབ་པའི་སྲིད་བྱུས་ཤིག་འགྱུར་བ་འགྲོ་ཐུབ་ཀྱི་མ་རེད་ལ། འགྱུར་བ་འགྲོ་དགོས་དོན་ཡང་ཡོད་པ་མ་རེད། ནམ་ཞིག་མང་ཚོགས་ཀྱིས་ངེས་པ་རྙེད་དེ་སྲིད་བྱུས་ལ་འགྱུར་བ་གཏོང་དགོས་པ་ཞིག་དང་། དེ་ལས་ལྷག་པའི་གདམ་ཀ་ཡག་པོ་ཞིག་སྟོན་ཐུབ་པའི་གནས་བབ་བྱུང་ན། སྐབས་དེར་གདམ་ཀ་བྱ་ཆོག་ལ་གདམ་ཀ་བྱ་རྒྱུའི་དཀའ་ངལ་གང་ཡང་ཡོད་པ་མ་རེད། ཅེས་གསུངས་བྱུང་།

                                                                                                                  གསར་འགོད་པ། དཔལ་ལྡན།