ཌོ་སེར་ཊི་བོད་ཀྱི་དྲ་གནས་ཀྱིས་གནས་ཚུལ་སྤེལ་བ་ལྟར་ན། ཟླ་སྔོན་མའི་ཕྱི་ཚེས་ ༣༠ ཉིན་སི་པན་(Spain)རྒྱལ་ཡོངས་མཐོ་རིམ་ཁྲིམས་ཁང་གིས་བོད་ལ་རྒྱ་ནག་གིས་བཙན་བཟུང་བྱས་པ་དེ་རྒྱལ་སྤྱིའི་ཁྲིམས་ལུགས་དང་འགལ་ཡོད་པར་ངོས་ལེན་ཐོབ་ཡོད་ཅིང་། ངོས་ལེན་དེ་ནི་རང་བཙན་ཡིན་པའི་བོད་དེ་སྐབས་ཤིག་ནས་རྒྱ་ནག་དམར་པོས་བཙན་བཟུང་བྱས་པ་ཞིག་ཡིན་པར་ཁྲིམས་ཐོག་ནས་ངོས་ལེན་ཞུས་པ་ཞིག་ཀྱང་ཆགས་ཡོད། ཁྲིམས་ཁང་གིས་ ༢༠༡༠ ཕྱི་ཟླ་ ༩ ནང་སི་པན་བོད་དོན་རྒྱབ་སྐྱོར་ཚོགས་པ(Comité de Apoyo al Tíbet) དང་བོད་མི་ཐུབ་བསྟན་དབང་ཆེན་ཟེར་བའི་མིང་ཐོག་ནས་ཁྲིམས་གཏུག་བྱས་པའི་གྱོད་གཞི་ཐག་གཅོད་བྱུང་པ་ཞིག་ཡིན་འདུག
༢༠༡༠ ལོའི་ཕྱི་ཟླ་ ༩ ནང་གི་ཁྲིམས་གཏུག་གྱོད་གཞིའི་ནང་རྒྱ་ནག་གིས་བོད་བཙན་འཛུལ་བྱས་པ་དེ་རྒྱལ་སྤྱིའི་ཁྲིམས་ལུགས་དང་འགལ་ཡོད་པ་མ་ཟད། ལྷག་པར་དུ་ ༡༩༤༩ ཟླ་ ༩ ཚེས་ ༡༢ ཉིན་གཏན་འབེབས་བྱས་པའི་ཇེ་ནཱི་ཝ་རྒྱལ་སྤྱིའི་ཁྲིམས་ལུགས་ཀྱི་དོན་ཚན་ ༤ (the Geneva Convention IV of Aug 12, 1949) དང་འགལ་ཡོད་པ། ༡༩༥༠ ནས་རྒྱ་ནག་གིས་བོད་བཙན་བཟུང་བྱས་ཡོད་པར་ངོས་ལེན་བྱ་དགོས་པའི་འབོད་སྐུལ། དེ་བཞིན་རྒྱ་རིགས་འབོར་ཆེན་བོད་དུ་གནས་སྤོར་བྱེད་པ་དེ་ནི་ཇེ་ནཱི་ཝ་རྒྱལ་སྤྱིའི་ཁྲིམས་ཀྱི་དོན་ཚན་༤ པའི་ཡིག་ཆ་ཨང་ ༤༩ དང་འགལ་ཡོད་པའི་གནད་དོན་བཅས་ཀྱི་ཐད་ནས་སི་པན་ཁྲིམས་ཁང་ལ་གཏུག་བཤེར་བྱས་པ་ཞིག་རེད་འདུག
དེ་སྔོན་ ༢༠༠༥ ལོར་བོད་དོན་རྒྱབ་སྐྱོར་ཚོགས་པ་འདི་དང་གྲྭ་བག་གྲོ་སོགས་མཉམ་འབྲེལ་ཐོག རྒྱ་ནག་གཞུང་གིས་བོད་ལ་བཙན་འཛུལ་བྱས་པ་ནས་བོད་མི་རིགས་རྩ་མེད་བཟོ་བའི་སྲིད་ཇུས་སོགས་ཁྲིམས་མཐུན་མིན་པའི་བྱ་སྤྱོད་སྣ་ཚོགས་ལག་བསྟར་བྱེད་ཀྱི་ཡོད་པར་ཁྲིམས་གཏུག་བྱས་ཡོད་པ་དེའང་ཐེངས་འདིའི་གྱོད་དོན་ཞུ་གཏུག་པའི་ཁོངས་སུ་ཚུད་ཡོད་འདུག
སི་པན་ཁྲིམས་ཁང་གིས་གནད་དོན་འདིའི་ཐད་ཁྲིམས་དཔོན་དང་ཞུ་གཏུག་པ་ཚོས་ཕྱོགས་ཞེན་དང་། གཞན་གྱི་གནོན་ཤུགས་ལ་མ་བལྟས་པར་ཁྲིམས་ཐོག་ནས་བདེན་དཔང་ར་སྤྲོད་བྱ་རྒྱུར་འབད་བརྩོན་བྱེད་ཀྱི་ཡོད་པ་འདི་བདེན་དོན་ཐག་གཅོད་ཡོང་པར་ཡིད་ཚིམ་པ་ཞིག་བྱུང་། རྒྱལ་སྤྱིའི་ཁྲིམས་ལུགས་ལག་བསྟར་བྱ་སྐབས་སྲིད་གཞུང་བྱེ་བྲག་པའམ། ཡང་ན་གཞན་གྱི་དབང་ཤུགས་དང་དཔལ་འབྱོར་སོགས་ཀྱི་ཐེ་ཇུས་ལས་བརྒལ་ཏེ། ཡོངས་ཁྱབ་འགྲོ་བ་མིའི་དྲང་བདེན་ནི་ནམ་ཡང་ཡོངས་ཁྱབ་རང་བཞིན་ཞིག་ཏུ་གནས་དགོས་པ་རེད། ཅེས་བསྒྲགས་ཡོད་པར་སི་པན་བོད་དོན་རྒྱབ་སྐྱོར་ཚོགས་པའི་འགན་འཛིན་སྐུ་ཞབས་ཨ་ལན་(Alan Cantos) ལགས་ཀྱིས་དགའ་བསུ་ཆེན་པོ་བྱས་འདུག
སི་པན་ཁྲིམས་ཁང་ནི་རྒྱལ་སྤྱིའི་གྱོད་དོན་རིགས་ཐག་གཅོད་དང་། ལྷག་པར་དུ་རྒྱལ་སྤྱིའི་ཁྲིམས་དང་ཡོངས་ཁྱབ་འགྲོ་བ་མིའི་ཐོབ་ཐང་གི་རྩ་འཛིན་ཡིག་ཆ་གཞིར་བཞག་སྟེང་། ཁྲིམས་འགལ་ཉེས་དོན་རིགས་ཐག་གཅོད་བྱེད་སའི་ཁྲིམས་ཁང་ཞིག་ཡིན།
གསར་འགོད་པ། བནྡེ་སྐྱབས།
ང་ཚོའི་བོད་རྒྱལ་ཁབ་ཆེན་པོ་དེ་རྒྱ་དམར་པོས་བཙན་འཛུལ་གྱིས་ད་བར་བཙན་འོག་ཏུ་ཡོད་པ་འཛམ་གླིང་འདིའི་མི་མང་ཕལ་ཆེ་བའི་ཤེས་ཀྱི་ཡོད་ནའང་རྒྱལ་ཁབ་ཆེ་ཆུང་སུ་གང་གིས་བོད་རྒྱལ་ཁབ་དེ་རང་བཙན་གཙང་མ་ཡིན་པ་ད་བར་ཁས་མ་ལེན་པའི་སྐབས་འདིར་རང་བཙན་ཡོད་པའི་རྒྱལ་ཁབ་ཅིག་གི་དྲང་བདེན་དང་ལྡན་པའི་ཁྲིམས་ཐོག་ནས་ངོས་ལེན་བྱུང་བ་དེ་གནས་ཚུལ་ཧ་ཅང་གི་བཟང་པོ་ཡིན། འབྲས་བུ་བཟང་པོ་འདི་སྨིན་དུ་བཅུག་མཁན་གྱི་འབྲེལ་ཡོད་མི་སྣ་ཡོངས་ལ་བསྔགས་བརྗོད་ཚད་མེད་ཞུ་བཞིན་ཡོད།
བོད་དེ་བཙན་བཟུང་བྱས་པའི་རྒྱལ་ཁབ་ཅིག་ཡིན་པའི་ངོས་ལེན་བྱེད་མཁན་ཐོག་མ་འདི་མིན་པར་ཨ་རིའི་རྒྱལ་ཁབ་རེད།