སྲིད་འཛིན་བྷག་བྷོ་འཛིན་བཟུང་།

ཨའེ་ཝོ་རཱེའི་སྲིད་འཛིན་རྙིང་པ་བྷག་བྷོ་ཡི་སྒེར་གཅོད་སྲིད་དབང་དྲག་ཤུགས་ཀྱིས་བླངས་ཚར་ཡང་། ད་ཆར་མི་ཚང་མས་སེམས་འཚབ་བྱེད་ཀྱིན་པ་ནི་སྲིད་འཛིན་གསར་པ་ཨ་ལཱ་སན་གྱི་བཤད་སྤྱོད་རེད།

ཁ་སང་གཟའ་ཟླ་བའི་ཉིན་ཨའེ་ཝོ་རཱེ་ཁཱོ་སིཊ་(Ivory Coast) ནང་རྒྱལ་སྤྱིའི་ངོས་འཛིན་ཐོབ་པའི་སྲིད་འཛིན་གསར་བ་ཨ་སན་(Alassane Ouattara) ཤོག་ཁག་དང་རྒྱལ་ཚོགས་བདེ་འཇགས་དམག་དཔུང་མཉམ་སྒྲིལ་ཐོག ཨ་བྷེཌ་ཇན་ (Abidjan) གྲོང་ཁྱེར་ནང་ཡོད་པའི་སྲིད་འཛིན་རྙིང་པ་བྷག་བྷོ་(Gbagbo) ཡི་སྡོད་གནས་ལ་ཕར་རྒོལ་བྱས་མཐར། ས་འོག་ཡིབ་ཁང་ཞིག་ནས་བྷག་བྷོ་རྙེད་སོན་གྱིས་འཛིན་བཟུང་བྱས་ཡོད་འདུག

ཐེངས་འདིར་བྷག་བྷོ་འཛིན་བཟུང་བྱེད་མཁན་གཙོ་བོ་ནི་རྒྱལ་ཚོགས་བདེ་འཇགས་དམག་དཔུང་གི་ཡན་ལག་ཧྥ་རན་སིའི་ཆེད་མངགས་དམག་དཔུང་ཤོག་ཁག་དང་ཨ་ལཱ་སན་དམག་མི་ཡིན་ཞིང་། འཛིན་བཟུང་བྱས་པའི་སྲིད་འཛིན་རྙིང་པ་བྷག་བྷོ་དང་ཁོང་གི་བཟའ་ཟླ། བུ་བཅས་ད་ལྟ་གྲོང་ཁྱེར་དེ་གའི་ཌུ་གྷོལ་ཧྥི་ (Hotel du Golf) ཞེས་པའི་མགྲོན་ཁང་དུ་བཀག་ཉར་བྱས་ཡོད་འདུག སྲིད་འཛིན་རྙིང་པ་བྷག་བྷོ་ཡི་མགྲིན་ཚབ་པ་ཞིག་གིས་བརྗོད་ན། དམག་མི་སྲིད་འཛིན་ཡུབ་སར་འབྱོར་མ་ཐག་བྷག་བྷོ་ཡིས་ཁ་གཏད་འགོག་རྒོལ་མ་བྱས་པར་མགོ་འདོགས་ཞུས་སོང་ཟེར།

བྷག་བྷོ་འཛིན་བཟུང་བྱས་རྗེས་སྲིད་འཛིན་གསར་བ་སྐུ་ཞབས་ཨ་ལཱ་སན་གྱིས། ད་ནི་ང་ཚོར་རེ་བས་ཁེངས་པའི་དུས་རབས་གསར་བ་ཞིག་གི་སྐྱ་རེངས་འཆར་བ་རེད། བྷག་བྷོ་ཁོང་རྒྱལ་སྤྱིའི་ཉེས་དོན་ཁྲིམས་ཁང་ལ་སྦྱོར་དགོས་ལ། ཁོང་གི་བཟའ་ཟླ་དང་དཔུང་རོགས་ཡོངས་ལ་ཉེས་དོན་ཞིབ་བཤེར་བྱ་དགོས། གནད་དོན་འདི་དག་ཐོག་ཨའེ་ཝོ་རེ་ཡིས་གཙོ་འགན་འཁུར་ཏེ། ཞིབ་བཤེར་སྐབས་ཁོང་ཅག་གི་གཟུགས་གཞིའི་བདེ་ཐང་ལ་ཁག་ཐེག་དང་། ཆེས་མཐོང་དང་རྩ་བའི་ཐོབ་ཐང་རིགས་ལ་སྲུང་སྐྱོབ་བྱ་ངེས་ཡིན། ཞེས་དང་། དེ་བཞིན་དྲག་ཆས་དམག་དཔུང་ཕྱིར་འཐེན་གྱིས་དངོས་ཐོག་བདེན་འཚོལ་གྱི་བར་སྡུམ་ཚོགས་ཆུང་ཞིག་འཛུགས་འཆར་ཡོད་ལུགས་ཀྱང་བསྒྲགས་འདུག

བྷག་བྷོ་འཛིན་བཟུང་བྱས་པར་ཨ་རིའི་སྲིད་འཛིན་ཨོ་བྷ་མས་དགའ་བསུ་དང་སྦྲགས། དེ་ནི་ཨའེ་ཝོ་རཱེ་མི་མང་གི་འདོད་མོས་ལྟར་དམངས་གཙོའི་རྒྱལ་ཁ་ཞིག་རེད་ལ། རྒྱལ་ཁབ་བསྐྱར་འཛུགས་དང་དམངས་གཙོ་སྲ་བརྟན། དཔལ་འབྱོར་ཉམ་ཉེས་སླར་གསོ་བྱ་རྒྱུའི་གོ་སྐབས་བྱུང་པ་ཞིག་ཀྱང་རེད། ཅེས་བསྔགས་བརྗོད་བྱས་འདུག

དེ་སྔོན་ ༢༠༡༠ ཟླ ༡༡ ནང་གི་ཨའེ་ཝོ་རཱེ་ཁཱོ་སིཌ་རྒྱལ་ཡོངས་སྲིད་འཛིན་འོས་བསྡུ་ལ་དཀའ་ངལ་རིམ་པར་ཕྲད་ཡོད་པ་དང་། རྒྱལ་ཡོངས་འོས་བསྡུ་ལས་ཁུངས་ཀྱིས་གྲུབ་འབྲས་ཁྱབ་བསྒྲགས་བྱས་པར་སྐུ་ཞབས་ཨ་ལཱ་སན་ལ་འོས་གྲངས་བརྒྱ་ཆ་ ༥༥ ཟིན་ཡོད་སྟབས། རྒྱལ་ཁབ་དེ་གའི་མི་མང་དང་རྒྱལ་ཚོགས། རྒྱལ་སྤྱིའི་སྲིད་གཞུང་ཕལ་ཆེ་བས་སྐུ་ཞབས་ཨ་ལཱ་སན་ལགས་ཨའེ་ཝོ་རཱེའི་སྲིད་འཛིན་གསར་བར་ངོས་འཛིན་ཐོབ་ཡོད། འོན་ཀྱང་། སྲིད་འཛིན་རྙིང་པ་བྷག་བྷོ་ཡིས་རང་ཉིད་ཀྱི་དྲག་ཤུགས་ལ་བརྟེན་ནས་སྲིད་འཛིན་གྱི་གོ་གནས་རྩིས་སྤྲོད་མ་བྱས་པ་མ་ཟད། འོས་བསྡུའི་སྐབས་ཁོ་རང་ལ་འོས་ཤོག་ཐོབ་ཡོད་པའི་ཁྱབ་བསྒྲགས་རྫུན་མ་བྱས་ཡོད་པ་རེད།

འདས་པའི་ཟླ་ངོ་བཞི་ལྷག་གི་རིང་སྲིད་འཛིན་གསར་རྙིང་བར་གྱི་དབང་ཆའི་འཐབ་རྩོད་ཟིང་འཁྲུག་ཁྲོད། ཤོག་ཁག་ཕན་ཚུན་གྱི་དྲག་ཆས་དམག་མི་དང་མི་སེར་ལ་ཤི་རྨས་ཚབས་ཆེན་ཐེབས་ཤིང་། རིམ་བཞིན་རྒྱལ་སྤྱིའི་གནད་དོན་ཞིག་ཆགས་སྟབས། རྒྱལ་ཚོགས་བདེ་འཇགས་དམག་དཔུང་དངོས་སུ་ཨའེ་ཝོ་རཱེའི་ལ་བཏང་སྟེ། གསར་དུ་འདེམས་ཐོན་བྱུང་པའི་སྲིད་འཛིན་ཨ་ལཱ་སན་ལ་སྲུང་སྐྱོབ་དང་། ཁོང་གི་ཤོག་ཁག་དང་མཉམ་འབྲེལ་ཐོག་སྲིད་འཛིན་རྙིང་པ་བྷག་བྷོ་ལ་འཐབ་འཛིང་བྱས་ཡོད།

ད་ཆར་རྒྱལ་སྤྱིའི་ཁྱོན་ཡོངས་ནས་བློ་འཚབ་དང་དོགས་གཞི་བྱ་ཡུལ་ཞིག་ནི། རྒྱལ་ཚོགས་བདེ་འཇགས་དམག་དཔུང་གིས་ཨ་ལཱ་སན་ལ་རོགས་འདེགས་དང་སྲིད་འཛིན་རྙིང་པ་བྷག་བྷོ་འཛིན་བཟུང་བྱས་པ་དེ། དང་པོ། དམངས་གཙོའི་རྩ་དོན་དང་མཐུན་གྱི་ཡོད་མེད་དང་། གཉིས་པ། ཨ་ཝོ་རཱེ་རྒྱལ་ཁོངས་གཅིག་གྱུར་ལ་ཕན་གནོད་མཇུག་འབྲས་གང་འདྲ་འབྱུང་མིན་བཅས་རེད། ད་དུང་རྒྱལ་སྤྱིའི་ཆབ་སྲིད་དཔྱད་རྗོད་པ་མང་པོ་ཞིག་གིས་ཨ་ལཱ་སན་ནི། མང་མོས་འོས་ཤོག་ཐོབ་པ་ཞིག་ཡིན་ཡང་། ཟླ་ངོ་བཞིའི་རིང་གི་དྲག་རྒོལ་བྱེད་སྟངས་དང་། ད་ལྟ་བྷག་བྷོ་འཇུ་བཟུང་གིས་ཁྲིམས་བཤེར་བྱ་ཕྱོགས་བཅས་ལ་གཞིགས་ན། ཁོང་ནི་དྲག་སྤྱོད་དབང་འཛིན་པ་གསར་བ་ཞིག་སླར་ཡང་སྲིད་སྟེགས་སུ་སླེབ་བཞིན་ཡོད་པའི་བློ་འཚབ་གསར་པ་ཞིག་སྐྱེ་བཞིན་ཡོད།

ཁ་སང་ཕྱི་ཚེས་ ༡༡ ཉིན་སྲིད་འཛིན་རྙིང་པ་བྷག་བྷོ་འཛིན་བཟུང་བྱས་ཡོད་ཀྱང་། ཉིན་དེའི་དགོང་མོར་མུ་མཐུད་ས་ཁུལ་མང་པོ་ཞིག་ཏུ་བྷག་བྷོ་ཕྱོགས་གཏོགས་པ་དང་ཨ་ལཱ་སན་ཤོག་ཁག་བར་འཐབ་འཁྲུག་བྱུང་ཡོད་འདུག་ལ། གནས་ཚུལ་དེའི་རྐྱེན་པས་མང་ཚོགས་མང་པོ་ཞིག་བསྐྱར་དུ་སྲིད་འཛིན་རྙིང་པར་དགའ་མོས་ཡོད་པར་འགྱུར་གྱི་ཡོད་པ་མ་ཟད། བྷག་བྷོ་ཕམ་ཉེས་འཛིན་བཟུང་བྱས་པ་དང་། ལྷག་པར་དུ་སྲིད་འཛིན་གསར་པའི་གཏམ་བཤད་ནང་། བྷག་བྷོ་རྒྱལ་སྤྱིའི་ཉེས་དོན་ཁྲིམས་ཁང་ལ་བསྐྱལ་རྒྱུ་ཡིན་ལུགས་བརྗོད་པ་དེ་དག་གིས་མི་མང་ལ་བློ་འགྱུར་ཆེན་པོ་བྱུང་བཞིན་ཡོད་འདུག

གསར་འགོད་པ། བནྡེ་སྐྱབས།