ད་ལྟ་རང་གནས་ཚུལ་བཏང་འབྱོར་བྱུང་བ་ལྟར་ན། དེ་རིང་ཉིན་གུང་ཆུ་ཚོད་ ༡༢ ཡས་མས་སུ་རྒྱ་དམག་འབོར་ཆེན་རྔ་པ་ཀིརྟི་དགོན་པའི་ནང་འགྲོ་རྩིས་བྱས་སྐབས། ས་གནས་བོད་རིགས་མང་ཚོགས་ཀྱིས་དམག་མིའི་མདུན་བཀག་སྟེ་འགྲོ་རུ་བཅུག་མེད་པ་དང་། སྐབས་དེར་ཉེན་རྟོག་པ་དང་དྲག་ཆས་དམག་མིས་མི་མང་ལ་གཅར་རྡུང་དྲག་པོ་བཏང་ཡོད་པ་མ་ཟད། དམིགས་བསལ་སྦྱོར་བརྡར་ཅན་གྱི་སྤྱང་ཁྱི་མང་པོ་མང་ཚོགས་ནང་བཏང་སྟེ། མི་མང་ལ་ཁྱིས་རྨུག་པ་དང་སྡེར་འབྲད་བྱས་པ་སོགས་ཀྱིས་རྨས་སྐྱོན་ཚབས་ཆེན་ཕོག་ཡོད་འདུག
མི་མང་གིས་དམག་མིའི་གཅར་གཏོང་དང་སྤྱང་ཁྱིའི་སོ་འབྲད་གང་ལའང་མ་འཛེམས་པར་ཕྱི་བཤོལ་བྱས་མེད་སྟབས། དམག་མི་རྣམས་དགོན་པའི་ནང་འཛུལ་ཐུབ་མེད་པ་དང་། དེའི་རྗེས་དགོན་པའི་ཆོས་ལུགས་དོ་དམ་ཁང་གི་འགན་འཛིན་སོགས་ཡོང་སྟེ། མི་མང་ལ་བཀའ་ནན་ཕེབས་པ་ལྟར་མང་ཚོགས་ཕྱི་ནུར་ཙམ་བྱས་ཡོད་ཀྱང་། ཉིན་རྒྱབ་ཆུ་ཚོད་ ༣ དང་ཕྱེད་ཀ་ཙམ་ལ་ད་དུང་མང་ཚོགས་དང་དམག་མི་གདོང་ཐུག་གིས་ཛ་དྲག་གི་གནས་སྟངས་འོག་ལྷག་ཡོད་འདུག
དེ་རིང་གི་དོན་རྐྱེན་དེ་ནི། ཉིན་ཤས་གོང་ནས་གྲྭ་པ་དགུང་ལོ་ ༡༨ ནས་ ༤༠ བར་ཚང་མ་ས་གནས་གཞན་ཞིག་ལ་སློབ་སྦྱོང་གི་མིང་ཐོག་ནས་འཁྲིད་རྒྱུ་དང་། ལས་དོན་དེ་ཕྱི་ཚེས་ ༡༢ ཉིན་ལག་བསྟར་བྱ་རྒྱུ་ཡིན་པའི་གནས་ཚུལ་ཞིག་ཕྱི་ཚེས་ ༡༡ ཉིན་གྱི་དགོང་མོ་ནས་ཡོངས་ཁྱབ་ཆགས་ཡོད་སྟབས། ས་གནས་མི་མང་གིས་དགོན་མཐའ་གཡས་གཡོན་ནས་དོགས་ཟོན་བྱས་བསྡད་ཡོད་པ་དང་། གལ་སྲིད་དེ་འདྲའི་གནས་ཚུལ་བྱུང་སྐབས་རང་སྲོག་བློས་གཏོང་གིས་འགོག་རྒོལ་བྱ་རྒྱུར་གྲ་སྒྲིག་ཡོད་སྟབས། དེ་རིང་ཉིན་གུང་རྒྱ་དམག་འབྱོར་མ་ཐག་དོན་རྐྱེན་དེ་བྱུང་ཡོད་འདུག
ད་ཆར་རྔ་པ་རྫོང་གི་འགྲིམ་འགྲུལ་ཡོངས་རྫོགས་བཀག་སྡོམ་བྱས་ཡོད་པར་མ་ཟད། ཉིན་ཤས་གོང་ནས་རྔ་པ་ཀིརྟི་དགོན་གྱི་ཉེ་འཁྲིས་ཀྱི་གྲོང་སྡེ་ཁག་གི་བྱིས་པ་རྫོང་ཐོག་ལ་སློབ་གྲྭར་འགྲོ་མཁན་དག་ཀྱང་ཕྱིར་ནང་ལ་ལོག་མི་ཆོག་པ་བཟོས་ཡོད་འདུག་ལ། དེ་ནི་དགོན་པར་གཏོར་བཅོམ་བྱ་འཆར་ཡོད་སྟབས་སློབ་མ་རྣམས་ལ་སྲུང་སྐྱོབ་བྱས་པ་ཡིན་པའི་བསམ་ཚུལ་ཡོང་གི་ཡོད་འདུག ཅེས་བཀོད་འདུག
གནས་ཚུལ་གཞན་ཞིག་ནི། ཟླ་འདིའི་ཕྱི་ཚེས་ ༨ ཡས་མས་ཤིག་ལ་རྔ་པ་ཁུལ་འཛམ་ཐང་རྫོང་བར་མ་ཞང་གི་ཉེན་རྟོག་ལས་ཁུངས་མདུན་དུ་མི་གྲངས་ ༣༠ ཙམ་གྱིས་ངོ་རྒོལ་སྐད་འབོད་བྱས་སྐབས། འཕྲལ་དུ་ཉེན་རྟོག་མི་སྣས་གཅར་རྡུང་དྲག་པོ་བཏང་སྟེ། བོད་མི་གཞོན་སྐྱེས་ལོ་ ༣༠ ཡས་མས་ཅན་ཞིག་རྐྱེན་ལམ་དུ་བཏང་ཡོད་ཅིང་། སྐབས་དེར་མི་མང་གི་ངར་ཤུགས་སྔར་ལས་ཇེ་ཆེར་སོང་སྟེ་མི་ ༡༠༠༠ ལྷག་གིས་ངོ་རྒོལ་སྐད་འབོད་བྱས་ཡོད་སྟབས། རྒྱ་སྒོར་འབུམ་བདུན་ ༧༠༠༠༠༠ ཙམ་སྤྲོད་རྒྱུའི་ཁས་ལེན་འོག་གནས་སྐབས་རིང་ཞི་འཇགས་ལྟ་བུ་བྱུང་ཡོད་ཀྱང་། དེ་རྗེས་སླར་ཡང་བཀག་སྡོམ་ཤུགས་ཆེ་རུ་བཏང་ཡོད་འདུག
ཕྱི་ཟླ་བཞི་བའི་ཚེས་ཤར་ནས་དགོན་པའི་ཕྱི་ནང་གི་འགྲོ་སྐྱོད་བཀག་སྡོམ་བྱས་ཏེ་དགོན་གྲོང་ཐུག་འཕྲད་བྱེད་འཇུག་གི་མེད་སྟབས། དགེ་འདུན་པ་རྣམས་ལ་བཞེས་ལག་འཆད་རྒྱུའི་ཉེན་ཁར་ཐུག་སྟེ། མི་མང་གིས་དང་བླང་ཐོག་རྩམ་པ་དང་མར་ཕྱུར་སོགས་དགོན་པའི་གཞུང་ལ་བསྐྱལ་བ་བགོ་འགྲེམས་བྱེད་ཀྱི་ཡོད་ཀྱང་། ཕྱི་ཚེས་ ༤ ཡས་མས་ནས་མི་མང་གི་བཟའ་བཅའ་བསྐྱལ་རྒྱུར་ཡང་བཀག་སྡོམ་བྱས་ཤིང་། ཉིན་ཤས་གོང་ནས་རྔ་པ་རྫོང་གི་གྲོང་སྡེའི་ལས་ཁུངས་ཁག་ཏུ་མི་མང་བསྡུས་ཏེ། གུང་ཁྲན་ཏང་ལ་བསྟོད་བསྔགས་ཀྱི་ཚོགས་འདུ་སྐོང་བ། ཕྱི་ཚེས་ ༣ ཡས་མས་ནས་དགོན་པའི་ཤར་ཕྱོགས་ཀྱི་གྲྭ་ཤག་མང་པོའི་ནང་རྒྱ་དམག་བཙན་ཤེད་ཀྱིས་འཛུལ་ནས་སྒོ་དང་སྒེའུ་ཁུང་བཅག་པ་དང་། བཅའ་དངོས་རྐུ་འཕྲོག་བྱས་པ། གྲྭ་པ་རྣམས་ལ་གང་བྱུང་དུ་རྡུང་རྡེག་གཏོང་བཞིན་ཡོད་པ། ཕྱི་ཚེས་ ༩ ཉིན་དམག་མི་ ༨༠༠ ཙམ་རྔ་པ་རྫོང་ལ་འཕར་སྣོན་བྱས་ཡོད་པ་སོགས་ཀྱིས། ད་བར་དགོན་པའི་བླ་མ་དང་ལས་སྣེ་ཡི་བཀའ་གསུང་འོག གྲྭ་མང་གིས་བཟོད་བསྲན་ཆེན་པོས་ཞི་འཇགས་ལྷོད་ཡངས་ཡོང་རེ་བྱས་ཡོད་ཀྱང་། ད་ཆར་ཛ་དྲག་གི་གནས་སྟངས་ཅི་ཆགས་ཚོད་དཔག་དཀའ་བར་གྱུར་འདུག ཅེས་བཀོད་འདུག
ད་བར་འདི་ནས་ཤེས་རྟོགས་བྱུང་བའི་རྒྱ་ནག་གིས་འཛིན་བཟུང་བྱས་པ་ ༣༠ ཡོད་པ་དག་ནི། འཛམ་ཐང་རྫོང་ནས་སློབ་གྲྭའི་དགེ་རྒན་དཔལ་ཁོ་དང་རྡོ་རྗེ། ཨ་རྡོར། འོད་གསལ་རྡོ་རྗེ་སོགས་མི་ ༨ དང་། རྔ་པ་རྫོང་མཐའ་བ་འགབ་མའི་ཚེ་རིང་སྐྱིད། མཐའ་བ་གོང་མའི་བློ་བཟང་འཇམ་དབྱངས། དབང་ཕྱུག བསོད་ནམས་སོགས་མི་ ༨ ། རྨེའུ་རུ་མའི་ཕུན་ཚོགས། རྔ་པ་ཀིརྟིའི་དགོན་གྱི་གྲྭ་བློ་བཟང་བརྩོན་འགྲུས། ཕུན་ཚོགས་ཀྱི་སྤུན་ཆུང་བ་བློ་བཟང་སྐལ་བཟང་། བསམ་འགྲུབ། བློ་བཟང་བསྟན་འཛིན། བློ་བཟང་ཆོས་འཕེལ། བློ་བཟང་དངོས་གྲུབ། བློ་བཟང་ཚེ་དཔག དོན་ཡོད་རྡོ་རྗེ། བསྟན་འཛིན་རྒྱམ་ཁོ། བཀྲ་ཤིས། ཕ་ཡུལ་ཡུལ་ཤུལ་ནས་ཡིན་པའི་གྲྭ་དཀོན་ཚེ་དང་གྲྭ་དཔལ་ལྡན། གཅའ་རུ་བའི་བཀྲ་ཤིས། ཆོས་རྗེ་མའི་སེང་གེ ཁང་སར་མའི་བསྟན་ཚེ། དཀོན་མཆོག་ཚུལ་ཁྲིམས་བཅས་དགེ་འདུན་པ་ ༡༤ བཅས་ཡིན་ཞིང་། དེ་དག་ལས་ད་ལྟ་མུ་མཐུད་བཀག་ཉར་བྱས་ཡོད་པ་གྲྭ་པ་ ༨ དང་མི་སྐྱ་ ༡༡ བཅས་ཡོད་འདུག
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་བཏང་འབྱོར་བྱུང་།
རྔ་བའི་རྒྱལ་གཅེས་དཔའ་བོ་དཔའ་མོ་རྣམས་ལ་སྙིང་ཁོང་ནས་གུས་འདུད་ཞུ
འཚེ་མེད་ཞི་བས་འཚེ་བ་མི་འགོག་ན།
མཚན་མེད་ཡོན་ཏན་བསྐྱོར་ནས་རྫོགས་རེ་སྐན།
གྲི་མདུང་དབྱུག་པར་འཇུས་པའི་མི་ཕོ་འགས།
རོ་ལ་རོ་བསྐྱིན་ཁྲག་ལ་ཁྲག་གི་ལན།
ཡ་ཆུང་བྲང་ན་མེ་རུ་འབར་འདི་ཅི།
ཁེད་ཅིག་ཡིན། སུས་ཁེད་ན་པཱ་ལེ་ཞིག་རིན་མེད་ཡིན།
བཞུགས་སྒར་རྡ་ས་ནས་སྣེ་ཁྲིད་དེ། ད་ལྟའི་འཛའ་དྲག་གི་གནས་སྟངས་མྱུར་སྐྱོབ་དང་། འདི་ལ་བརྟེན་ནས་བོད་དོན་ཁྱབ་བསྒྲགས། ལྷག་པར་དུ་བོད་མདོ་དབུས་ཁམས་གསུམ་གྱི་སྐྱེ་བོ་ཕོ་མོ་མནར་གཅོད་མྱང་དང་མྱོང་བཞིན་པ་དག་གློད་གྲོལ་ཆེད་ལས་འགུལ་གྲུབ་འབྲས་གསལ་བ་ཞིག་སྤེལ་རན་རེད། འཛའ་དྲག འཛའ་དྲག གོ་སྐབས། འགྲོ་གྲོན།
ད་ལྟའི་གནས་ཚུལ་འདི་ཚོན་བོད་ནང་ཛ་དྲགས་ཀྱི་གནད་དོན་རྣམས་རྒྱལ་སྤྱིའི་གནད་དོན་ཅན་དུ་འགྱུར་ཐབས་ལ་འབད་ན་ཕན་དོགས་ཅུང་ཐོན་ངེས་པས་དེར་བཙན་བྱོལ་བ་ཚང་མས་ནུས་པ་མཉམ་དུ་སྤུང་ཐུབ་ན་བསམ། དེ་མིན་ཕ་ཡུལ་གྱི་མི་མང་གི་སྡུག་བསྔལ་རྒྱུན་གཅོད་མི་ཐུབ།
བསྟན་དང་དེ་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོད་ཡོངས་བཏང་བའི།།
དཀའ་བ་བརྒྱ་ཕྲག་བསྒྲུབ་པའི་སྐྱེ་འགྲོ་རྣམས།།
གྲུ་འཛིན་མགོན་དེས་ཐུགས་རྗེ་སྐྱོང་བར་མཛོད།།
མདོར་ན་མགོན་པོ་སྤྱན་རས་གཟིགས་དབང་གིས།།
སྲས་བཅས་རྒྱལ་བའི་སྤྱན་སྔར་གངས་ཅན་ཞིང་།།
ཡོངས་བཟུང་རྒྱ་ཆེན་སྨོན་ལམ་གང་མཛད་པའི།།
བདེན་པའི་དོན་རྣམས་གེགས་མེད་མྱུར་འགྲུབ་ཤོག།
བོད་ནང་དུ་གནས་ཚུལ་ཐབས་སྡུག་པོ་ག་ཚོད་བྱུང་ཡང་། རྒྱལ་སྤྱིའི་སྐྱེ་བོ་སུས་ཀྱང་ཤེས་ཐབས་མེད་པ་དེ་མུན་ནག་གི་སྤྱི་ཚོགས་དེའི་ཁ་སྟབས་ཤིག་རེད། འོན་ཀྱང་སྐུ་ཞབས་བློ་བཟང་ཡི་ཤེས་དང་ཀ་ཉག་ཚེ་རིང་ལགས་ཀྱིས་གསར་འགྱུར་དེ་དག་བསྡུ་རུབ་ཐུབ་པ་ནི་མུན་ནག་བཙན་གྱིས་གཏོར་བའི་སྒེ་ཁུང་ཞིག་རང་རེད།
མང་ཚོགས་ལ་བརྡབ་གསིག་ཆེན་པོ་མི་ཡོང་བའི་ཐབས་ཤེས་ཤིག་བཞུགས་སྒར་ནས་འཐེན་རན་མ་རེད་དམ།
ལོ་སྔ་ཕྱི་འདི་དག་གི་རིང་ལ་རྒྱ་ནག་གི་ལྕགས་ཁྲིམས་བཙན་པོའི་འོག་ནས་གཞིས་ལུས་བོད་མི་ཡོངས་དང་སྒོས་སུ་རྔ་པ་ཀིརྟི་དགོན་གྲོང་གཉིས་ནས་༼ལུས་སྲོག་ལོངས་སྤྱོད་༽ཅི་ལ་ཡང་མ་འཛེམས་པར་ངོ་རྒོལ་མུ་མཐུད་ནས་བྱས་པ་རེད།
བོད་ནང་གི་ས་གནས་སྤྱི་ལ་རང་དབང་འཐབ་རྩོད་ཀྱི་འཐབ་བྱུས་རེ་དགོས་པར་འདུག་ལ། ༼སྐྱིད་སྡུག་མཉམ་མྱོང་༽ཅེས་པའི་འབོད་ཚིག་གསལ་བོ་དེ་དོན་ལ་གནས་པ་ཞིག་དགོས་པ་རེད། དེ་མིན་ས་གནས་དམིགས་བཀར་བ་རེ་ནས་འདི་ལྟར་ཨུ་ཚུགས་ཀྱིས་ངོ་རྒོལ་བྱས་ན་བརྡབ་གསིག་ཆེན་པོ་ཡོང་རྒྱུ་ནི་ཐེ་ཚོམ་མི་འདུག
གནས་ཚུལ་གང་ཡོད་པ་དེ་དྲང་མོར་བཤད་རྒྱུ་ལས་དོན་མེད་ཀྱི་སྒྲོ་སྐུར་དང་འུད་བརྗོད་བྱས་ན། ཕ་ཡུལ་གྱི་མི་དམངས་ཚོར་དཀའ་ངལ་ཧ་ཅང་ཆེ་བས། གནས་ཚུལ་མཁོ་གཏོང་བ་དག་གི་དེ་ཕྱོགས་སུ་གཟབ་དགོས་པར་མཐོང་།
ཅི་དྲག་གང་དྲག་འཁྲུགས་པ་མི་ཤོར་བར་བྱེད་མ་ཐུབ་ན་གསོད་རྒྱུ་ལས་གསོན་རྒྱུ་མེད་ཐག་ཆོད་ཕུག་རྒྱང་རིང་པོའི་བསམ་གཞིག་ཅི་ནས་ཀྱང་བཏང་དགོས་པར་འདུག་གླེན་པ་དྲག་འཛིང་གི་གར་ཡང་མི་སླེབ་པས་ཁོང་ཁྲོ་ཡོད་པ་ཡིན་ཡང་བཟོད་པ་ནི་དེ་བཞིན་གཤེགས་པའི་གསུང་དྲི་མ་མེད་པ་འདི་དུས་འདི་ལྟ་བུ་ལ་གཉེར་དགོས་ཀྱི་ཁོག་ཆེ་དཀྱེལ་ཡང་གི་སྒོ་ནས་ཀིརྟི་དགོན་གྱི་དགེ་འདུན་པ་ཡོངས་ཀྱིས་རྒྱུད་བསྐུལ་ནན་པོ་བྱེད་རོག་ཞེས་འབོད་བསྐུལ་ཡང་ཡང་ཞུ་གི་ཡོད།