ངོ་དེབ་རྒྱ་ནག་ལ་འཁོར་བ།

འཛམ་གླིང་ནང་ཁྱབ་རྒྱ་ཆེ་བའི་བརྒྱུད་ལམ་ངོ་དེབ་ Facebook ལས་ཁུངས་ཀྱིས་རྒྱ་ནག་གི་པེ་ཏུའུ་བརྒྱུད་ལམ་དུ་མཉམ་འབྲེལ་བྱས་ཏེ། རྒྱ་ནག་ནང་ངོ་དེབ་མ་ཡིན་པའི་དྲ་གནས་གསར་པ་ཞིག་འཛུགས་འཆར་ཡོད་འདུག

ཕྱི་ཚེས་ ༡༡ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། འཛམ་གླིང་ནང་དྲ་རྒྱའི་བརྒྱུད་ལམ་ཁྱབ་ཆེ་ཤོས་སྟེ་ངོ་དེབ་ Facebook ཡིས་ད་ལྟའི་བར་རྒྱ་ནག་དང་མཉམ་འབྲེལ་བྱས་མེད་ཀྱང་།  ཟླ་འདིའི་ཕྱི་ཚེས་ ༡༡ ཉིན་རྒྱ་ནག་ནང་ཁྱབ་ཆེ་ཤོས་བརྒྱུད་ལམ་པེ་ཏུའུ་དང་མཉམ་འབྲེལ་བྱས་ཡོད་འདུག་ལ། གནས་ཚུལ་ཁྱབ་བསྒྲགས་བྱས་མ་ཐག་ཨ་རིའི་ཚོང་རའི་ཁྲོད་ཀྱི་མ་རྐང་སྔར་ལས་བརྒྱ་ཆ་ ༤ ཙམ་ཡར་འཕར་ཡོད་འདུག

༢༠༠༩ ལོར་རྒྱ་ནག་གིས་རྒྱལ་ནང་གི་དྲ་རྒྱ་ཁག་ལ་དོ་དམ་སྟངས་འཛིན་བྱས་ཡོད་པ་མ་ཟད། རྒྱལ་སྤྱིའི་དྲ་གནས་ཁག་དང་དྲ་རྒྱ་བེད་སྤྱོད་གཏོང་མཁན་ཡོངས་ལ་དམ་དྲག་ཤུགས་ཆེན་བྱས་ཏེ། ད་ཆར་འཛམ་གླིང་གི་མི་གྲངས་དུང་ཕྱུར་ ༥༌༧ ལྷག་གིས་བེད་སྤྱོད་གཏོང་བཞིན་པའི་ངོ་དེབ་ཀྱང་སྟངས་འཛིན་འོག་བཅུག་ཡོད། སྔར་ལོའི་ཕྱི་ཟླ་ ༡༢ པའི་ནང་ངོ་དེབ་བརྒྱུད་ལམ་གསར་གཏོད་པ་སྐུ་ཞབས་མེལ་ཁེ་ཊ་ཁུ་བྷོལ་ལགས་རྒྱ་ནག་ཏུ་ཕྱིན་ཏེ། རྒྱ་ནག་ནང་ཁུལ་གྱི་པེ་ཏུའུ་དྲ་བ་དང་ཞིན་ལཱང་། ཨ་ལི་པཱ་པཱ། རྒྱ་ནག་རྒྱལ་ཡོངས་བརྒྱུད་ལམ་དོ་དམ་ལྟེ་གནས་བཅས་སུ་གཟིགས་སྐོར་བྱས་ཡོད་ཅིང་། འདི་ལོ་ནས་བཟུང་ངོ་དེབ་བརྒྱུད་ལམ་གྱིས་ཧོང་ཀོང་ནང་ཡན་ལག་ལས་ཁུངས་ཤིག་གསར་འཛུགས་དང་། པེ་ཏུའུ་བརྒྱུད་ལམ་དང་མཉམ་འབྲེལ་ཆིངས་ཡིག་བཞག་སྟེ། མ་འོངས་པར་ངོ་དེབ་དྲ་གནས་དང་འབྲེལ་བ་མེད་པའི་བརྒྱུད་ལམ་གཞན་ཞིག་གསར་གཏོང་བྱ་འཆར་ཡོད་འདུག    

གསར་འགོད་པ། དོན་གོ