དེ་རིང་བཞུགས་སྒར་ཁུལ་གྱི་གཞུང་འབྲེལ་མིན་པའི་ཚོགས་པ་ལྔས་རྒྱ་གར་དང་རྒྱལ་སྤྱིའི་གསར་འགོད་པ་ཚོར་ཆེད་དམིགས་ཀྱིས་ཉིན་འདི་འགའི་མདོ་སྨད་རྔ་པ་ཁུལ་གྱི་ཛ་དྲག་གི་གནས་སྟངས་སྐོར་ལ་བོད་དབྱིན་གཉིས་ཐོག་ནས་གསར་འགོད་གསལ་བསྒྲགས་ཤིག་སྤེལ་སོང་།
དེ་རིང་ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་ ༡༡ སྟེང་ངྷ་ཤོད་རྒྱ་གར་འཚིག་ཇ་གསོལ་ཁང་ (Indian coffee house) ཞེས་པར། བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། རྒྱལ་ཡོངས་མང་གཙོ་ཚོགས་པ། དགུ་བཅུ་གསུམ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཚོགས་པ་ལྔ་ཐུན་མོང་ཐོག་ཛ་དྲག་གི་གསར་འགོད་གསལ་བསྒྲགས་ཤིག་སྤེལ་སོང་། སྐབས་དེར་དབུས་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས་གལ་བསྒྲགས་སྒྲོག་སྦྱོང་གནང་སོང་།
གསལ་བསྒྲགས་ནང་བཀོད་དོན། ༡༩༤༩ ལོར་རྒྱ་གཞུང་གིས་བོད་ལ་བཙན་འཛུལ་བྱས་ཏེ་གཏོར་བཤིག་དང་དམར་གསོད། བཀག་སྡོམ་བཅས་ཀྱི་སྲིད་ཇུས་རིམ་པར་སྤེལ་ཡོད་ལ། ༢༠༠༨ ལོར་བོད་རིགས་མང་ཚོགས་རྣམས་འུ་ཐུག་ཐབས་ཟད་ཀྱིས་ཞི་བའི་ངོ་རྒོལ་བྱས་པར། རྒྱ་གཞུང་གིས་ཉིན་དང་ཟླ་བསྟུད་དེ་དམར་གསོད་དང་ཁྲིམས་ཐག་སྣ་ཚོགས་བཅད་ཡོད། བོད་མདོ་སྨད་རྔ་པ་ཁུལ་དུ་མང་ཚོགས་ཀྱིས་ཞི་བའི་ངོ་རྒོལ་བྱས་ཏེ། མི་ལོ་ཧྲིལ་པོ་ ༣ འཁོར་བའི་དུས་དྲན་སྟེ། འདི་ལོའི་ཟླ་ ༣ ཚེས་ ༡༦ ཉིན་རྔ་པ་ཀིརྟི་དགོན་གྱི་རྒྱལ་གཅེས་དཔའ་པོ་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེག་གིས་རྒྱ་གཞུང་ལ་ངོ་རྒོལ་བྱས་པར། རྒྱ་དམག་གིས་ཁོང་མྱུར་སྐྱོབ་བྱ་རྒྱུའི་ཚབ་ཏུ་ཉེས་རྡུང་ཚབས་ཆེན་བཏང་སྟབས། མཐར་ལོ་ན་ ༢༠ ཙམ་སོན་པའི་གྲྭ་ཕུན་ཚོགས་ལགས་འདས་གྲོངས་སུ་ཕྱིན་ཡོད། ཅེས་བསྟན་འདུག
གསལ་བསྒྲགས་དེར་མུ་མཐུད་དོན། ད་ལོའི་ཕྱི་ཟླ་ ༣ ཚེས་ ༡༦ ནས་ཕྱི་ཟླ་ ༤ ཚེས་ ༣ ཉིན་བར་ཉིན་གྲངས་ ༢༢ ཙམ་རིང་། རྒྱལ་གཅེས་དཔའ་པོ་ཕུན་ཚོགས་ལགས་དང་བུ་ལྷུག་ལགས། འཇམ་དབྱངས་སྦྱིན་པ་བཅས་སྔ་རྗེས་སུ་རྒྱ་གཞུང་གི་བཙན་གནོན་འོག་འདས་གྲོངས་སུ་སོང་ཡོད། ཕུན་ཚོགས་ལགས་ཀྱིས་རྒྱ་གཞུང་གི་བཙན་གནོན་ལ་ངོ་རྒོལ་བྱས་སྟབས། རྒྱ་གཞུང་ཁ་སྐྱེངས་ཏེ་ཀིརྟི་དགོན་དུ་ཆོས་ཀྱི་བྱེད་སྒོ་གཅིག་ཀྱང་སྤེལ་མི་ཆོག་པར་བཟོས་ཡོད། རྒྱལ་གཅེས་ཆོས་གཅེས་སློབ་གསོའི་ལས་འགུལ་ཟེར་བར་ཁ་གཡར་ནས། དགོན་པའི་ཕྱི་རུ་སོ་ཕག་ར་བ་བརྒྱབ་པ་དང་། ཕྱོགས་བཞིའི་སྒོ་ཆེན་ཁག་ལ་སྒོ་ལྕགས་བརྒྱབ་སྟེ། དགེ་འདུན་པ་ཚོ་ཕྱི་རོལ་དུ་སོང་མི་ཆོག་ཅིང་མང་ཚོགས་ཀྱང་དགོན་པར་འགྲོ་མཚམས་བཅད་ཡོད་སྟབས། ད་ལྟ་དགེ་འདུན་པ་ཚོ་ལྟོགས་སྐོམ་གྱི་སྡུག་བསྔལ་འོག་ལྷུང་ཡོད་ལ། ཞི་བདེ་དང་ནང་ཆོས་སློབ་གཉེར་བྱ་ཡུལ་ཀིརྟི་དགོན་པའང་ངལ་རྩོལ་བསྒྱུར་བཀོད་གྱི་བཙོན་ར་ཞིག་ཏུ་བསྒྱུར་ཡོད། ཅེས་སྒྲོག་སྦྱོང་གནང་སོང་།
གསལ་བསྒྲགས་ཀྱི་མཇུག་ཏུ། ཀིརྟི་དགོན་གྱི་རང་ལོ་ ༡༨ ནས་ ༤༠ བར་གྱི་དགེ་འདུན་པ་ཚོ་ས་གནས་གཞན་དུ་སློབ་སྦྱོང་ལ་ཁ་གཡར་ཏེ་བཙན་ཁྲིད་བྱ་འཆར་ཡོད་སྟབས། ཟླ་འདིའི་ཕྱི་ཚེས་ ༡༢ ཉིན་མང་ཚོགས་ཀྱིས་དགེ་འདུན་པར་སྲུང་སྐྱོབ་བྱ་ཆེད་རྒྱ་དམག་དགོན་ནང་དུ་འཛུལ་རྒྱུར་བཀག་འགོག་བྱས་པར། རྒྱ་དམག་གིས་མང་ཚོགས་ལ་གཅར་རྡུང་དྲག་པོ་བཏང་འདུག་ལ། སྐབས་དེར་མང་ཚོགས་ལ་ཁྱིས་རྨུག་ཏུ་འཇུག་པ་སོགས་ནི། དུས་རབས་ ༢༡ ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་ཀླ་ཀློའི་བྱ་སྤྱོད་ཅིག་ཡིན་ལ། རྒྱ་ནག་གིས་ “བཅིངས་འགྲོལ” ཟེར་བ་དེ་བཙན་འཛུལ་དང་ཀླ་ཀློའི་བྱ་སྤྱོད་རྗེན་པར་བསྟན་པ་ར་སྤྲོད་བྱུང་ཡོད། ཅེས་དང་།
གཞོན་ལྷན་ཚོགས་གཙོ་ཚེ་དབང་རིག་འཛིན་ལགས་ཀྱིས། གལ་སྲིད་རྒྱལ་ཚོགས་དང་འཛམ་གླིང་རྒྱལ་ཁབ་ཁག་གི་སྲིད་གཞུང་ལ་ཁ་བཤད་དོན་གནས་ཀྱི་འགྲོ་བ་མིའི་ཐོབ་ཐང་དང་ཚེ་སྲོག་ལ་གཅེས་སྤྲས་བྱ་རྒྱུའི་ཆོད་སེམས་ཡོད་ན། ད་ལྟའི་བོད་མདོ་སྨད་རྔ་པ་ཁུལ་གྱི་ཛ་དྲག་གནས་སྟངས་འཕྲལ་དུ་མཚམས་འཇོག་ཡོང་རྒྱུར་རྒྱ་གཞུང་ལ་གནོན་ཤུགས་སྤྲོད་དགོས། ཞེས་འབོད་ཞུས་སོང་།
མཇུག་ཏུ་གསར་འགོད་པས་མ་འོངས་པར་ཚོགས་པ་ཁག་གིས་ལས་འགུལ་སོགས་སྤེལ་རྩིས་ཡོད་མེད་དྲིས་པར་ཚེ་དབང་རིག་འཛིན་ལགས་གྱིས། ང་ཚོ་ལ་ངེས་པར་དུ་གྲ་སྒྲིག་དགོས་པ་རེད། ༢༠༠༨ ལོར་བོད་ཁྱོན་ཡོངས་སུ་གནས་ཚུལ་བྱུང་ཡོད་ལ། ཐེངས་འདིར་རྔ་པ་ཁུལ་དུ་གནས་ཚུལ་ཆེན་པོ་ཞིག་བྱུང་བ་རེད། ང་ཚོས་རྒྱུན་དུ་བོད་མི་ས་ཡ་དྲུག་གི་རྩ་དོན་ཆེད་ལས་འགུལ་སྤེལ་གྱིན་ཡོད་དུས། བོད་ནང་གི་གནས་ཚུལ་དངོས་ལ་ཞིབ་འཇུག་བྱས་ཏེ་གཞུང་ཚབ་ཁག་ལ་རྒྱ་གཞུང་ལ་གནོན་ཤུགས་སྤྲོད་དགོས་པར་འབོད་སྐུལ་ཞུ་རྒྱུ་ཡིན། ཞེས་བརྗོད་སོང་།
གསར་འགོད་པ་། དཔལ་ལྡན།
ཡག་པོ་འདུག ལས་འགུལ་འདི་ལྟར་ཆུང་ས་ནས་ཆེ་སར་སྤེལ་ན་ནུས་པ་ཐོན་རྒྱུ་རེད།