དངུལ་ལ་མཐའ་གཅིག་ཏུ་བློ་གཏད་པ་ཡིན་ན་རང་ཉིད་ལ་དཀའ་ངལ་ཆེན་པོ་འཕྲད་སྲིད་པས། བྱམས་དང་བརྩེ་བར་གཞི་བཅོལ་བའི་བདེ་སྐྱིད་འཚོ་བ་ཞིག་སྐྱེལ་ཐབས་ལ་འབད་དགོས། ཞེས་༧གོང་ས་མཆོག་གིས་གསུངས་ཡོད།
ཨར་ལན་ཌི་བྱིས་པའི་ཐེབས་རྩ་ཁང་གཙོས་པའི་ཚོགས་པ་ཁག་གསུམ་ཐུན་མོང་གི་གདན་ཞུ་ལྟར། ཟླ་འདིའི་ཕྱི་ཚེས་ ༡༣ ཉིན་༧གོང་ས་མཆོག་ཡུ་རོབ་ཨར་ལན་ཌིའི་གྲོང་ཁྱེར་ཌོབ་ལིན་ Dublin དུ་འཚོགས་བཞིན་པའི་༼ ༢༠༡༡ ལོའི་བསྒྱུར་བཅོས་ཀྱི་གོ་སྐབས་ ༽ཞེས་པའི་ཚོགས་འདུའི་སྟེང་ཆིབས་བསྒྱུར་བསྐྱངས་ཡོད་ཅིང་། ཡུལ་དེའི་སྲིད་འཛིན་ཟུར་བ་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་པའི་འགན་འཛིན་ཟུར་པ་ལྕམ་མེ་རི་རོ་བྷིན་སན་ Mary Robinson ལགས་གཙོས་པའི་ས་གནས་མང་ཚོགས་ ༢༠༠༠ ལྷག་ལ་བཀའ་སློབ་བསྩལ་ཡོད་འདུག
སྐབས་དེར་༧གོང་ས་མཆོག་གིས་གསུངས་དོན། དེང་སང་སྤྱི་ཚོགས་ནང་འཕྲད་བཞིན་པའི་དཀའ་ངལ་མང་དག་ཅིག་འགྲོ་བ་མིས་བཟོས་པ་ཞིག་རེད། གལ་སྲིད། ང་ཚོས་འགྲོ་བ་མི་ཁོ་ན་ཙམ་མིན་པར་འཛམ་གླིང་སྟེང་འཚོ་གནས་བྱེད་བཞིན་པའི་སྲོག་ཆགས་གཞན་ལའང་གཅེས་སྐྱོང་བྱ་ཐུབ་ཚེ། མི་གཞན་ལ་འཛིན་པའི་བརྩེ་བའི་བསམ་པ་ཤུགས་ཆེ་རུ་འགྲོ་བ་རེད། དུས་རབས་འདི་མི་གསོད་ཁྲག་སྦྱོར་དང་ཞི་བདེའི་དུས་རབས་ཤིག་བསྐྲུན་ཐུབ་མིན་ནི་གཙོ་བོ་གཞོན་སྐྱེས་ཚོར་རག་ལས་ཡོད་སྟབས། གཞོན་སྐྱེས་ཚོའི་ཕྲག་སྟེང་དུ་ལས་འགན་ཆེན་པོ་ཞིག་བབས་ཡོད་པ་རེད། ད་བར་འཛམ་གླིང་ཐོག་འཁྲུག་རྩོད་ཀྱིས་རྐྱེན་པས་མི་མང་ས་ཡ་མང་པོ་དམར་གསོད་བྱས་ཡོད། དུས་རབས་ ༢༡ འདི་དཀའ་ངལ་རྣམས་གྲོས་མོལ་གྱི་ལམ་ནས་སེལ་རྒྱུུ་ནི་རྒྱུ་མཚན་ལྡན་པའི་ཐབས་ལམ་གཅིག་པུ་དེ་རེད། ཅེས་གསུངས་འདུག
ཁོང་གིས་མི་ཚེ་དོན་སྙིང་ལྡན་པ་ཞིག་ཡོང་ཐབས་སྐོར་ལ། དངུལ་གྱིས་མིའི་སེམས་ལ་བདེ་སྐྱིད་བསྐྲུན་ཐུབ་ཐབས་ཡོད་པ་མ་རེད། སྒོར་མོ་དུང་ཕྱུར་བརྒལ་བའི་འབྱོར་ལྡན་ཚོའི་སེམས་ལའང་ཞི་བདེ་ཡིས་ཕོངས་སྡོད་མཁན་མང་པོ་ཡོད། ཁོང་ཚོར་དབང་ཤུགས་ཆེན་པོ་ཡོད་ཀྱང་སེམས་ཀྱི་གཏིང་ལ་སེམས་ཁྲལ་དང་དངངས་འཚབ་ཀྱིས་ཁེངས་བསྡད་ཡོད། བདེ་སྐྱིད་བསྐྲུན་རྒྱུ་ནི་མཐར་ཐུག་ན་རང་རང་གི་ལག་ཏུ་ཡོད་པ་ཞིག་རེད། ངོས་ཀྱིས་དངུལ་གྱི་འགྲོ་སྟངས་སྐོར་དེ་ཙམ་ཤེས་ཀྱི་མེད་ཀྱང་། ངོས་ཀྱི་གྲོགས་པོ་ཚོས་བརྗོད་ན། འཛམ་གླིང་ནང་དཔལ་འབྱོར་གྱི་དཀའ་ངལ་ Global Recession འཕྲད་བཞིན་པའི་རྒྱུ་རྐྱེན་གཙོ་བོ། ཕུགས་རྒྱང་རིང་པོའི་བསམ་བློ་མེད་པ་དང་འགྲོ་བ་མིའི་འདོད་རྔམ་ལས་བྱུང་བ་ཞིག་རེད་ཟེར་གྱི་འདུག ཅེས་གསུངས།
ཡང་༧གོང་ས་མཆོག་གིས་འཚོ་བའི་དཀའ་སྡུག་ལ་གདོང་ལེན་བྱེད་ཕྱོགས་སྐོར་བཀའ་གནང་དོན། དངུལ་ལ་མཐའ་གཅིག་ཏུ་བློ་གཏད་པ་ཡིན་ན་རང་ཉིད་ལ་དཀའ་ངལ་ཆེན་པོ་འཕྲད་སྲིད་པས། བྱམས་དང་བརྩེ་བར་གཞི་བཅོལ་བའི་བདེ་སྐྱིད་འཚོ་བ་ཞིག་སྐྱེལ་ཐབས་ལ་འབད་དགོས། ཨར་ལན་ཌིའི་ཡུལ་འདིར་ཡང་འཛམ་གླིང་སྤྱི་མཚུངས་ལྟར་དཔལ་འབྱོར་གྱི་དཀའ་ངལ་འཕྲད་ཡོད་ཀྱང་། ཁྱོད་ཚོ་སེམས་ཤུགས་མ་ཆག་པར་མུ་མཐུད་བྱ་བཞག་ཐོག་དཀའ་ལས་རྒྱག་དགོས། བཟོད་བསྲན་བྱ་རྒྱུ་ནི་དྲན་པ་བརྗེད་དགོས་པའི་དོན་མིན་པར་ནོར་འཁྲུལ་བཟོ་མཁན་ཚོར་སྐྱོན་བརྗོད་དགོས་པ་ཞིག་ཡིན། ཡིན་ནའང་། ཁོང་ཁྲོ་ལངས་ན་འགྲིག་གི་མེད། ཁོང་ཁྲོའི་གནས་སྐབས་སུ་ཕྱོགས་ལྷུང་གི་བསམ་བློ་དེ་རང་བཞིན་གྱིས་སླེབ་ཡོང་གི་ཡོད། ཅེས་གསུངས།
སྐབས་དེར་༧གོང་ས་མཆོག་གིས་ཡུལ་དེར་གནས་སྡོད་བོད་རིགས་མང་ཚོགས་ལ་བོད་མིའི་ཆོས་དང་རིག་གཞུང་། སྐད་ཡིག་སྲུང་སྐྱོབ་བཅས་ཀྱི་ཐོག་དམིགས་བསལ་བཀའ་སློབ་ཞིག་གནང་ཡོད་ལ། དེའི་རྗེས་༧གོང་ས་མཆོག་བྷི་རི་གི་ཌི་ཡུ་ཤུའི་ལྷ་ཁང་ St Brigid`s Parish Church ཞེས་པར་ཕེབས་ཏེ། ས་གནས་མང་ཚོགས་ ༧༠༠ ལྷག་ལ་ ༼བྱམས་བརྩེའི་བསམ་བློ་༽ ཞེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད་འདུག དེ་བཞིན། མ་འོངས་པའི་ཉིན་ཤས་ནང་སི་ཌན་དང་ཌན་མག་རྒྱལ་ཁབ་བཅས་སུ་ཆོས་ཕྱོགས་ཀྱི་མཛད་འཕྲིན་ཁག་མུ་མཐུད་བསྐྱང་རྒྱུ་ཡིན་པ་རེད།
གསར་འགོད་པ། དཔལ་ལྡན།
སྐུ་ཚེ་ཁྲི་ལོ་བརྟན་པར་ཤོག་་ཤོག་
༄༅། །སྐྱབས་སུ་མཆི། མཛད་འཕྲིན་གོང་འཕེལ་ཡོང་བའི་སྨོན་འདུན་ཞུ།