དེ་རིང་ཕྱི་ཚེས་ ༡༦ ཉིན་བོད་གཞུང་དྲ་རྒྱའི་སྟེང་གནས་ཚུལ་བཀོད་གསལ་ལྟར་ན། ཉེ་ཆར་རྒྱ་གཞུང་གིས་མདོ་སྨད་རྔ་པ་ཀིརྟི་དགོན་གྱི་དགེ་འདུན་པ་དང་ཁུལ་དེར་གནས་སྡོད་བོད་རིགས་ཚོར་དམ་དྲག་ཤུགས་ཆེན་བྱེད་བཞིན་པའི་ཐད། ༧གོང་ས་མཆོག་གིས་ཟླ་འདིའི་ཕྱི་ཚེས་ ༡༥ ཉིན་རྒྱ་གཞུང་ལ་ཛ་དྲག་འབོད་སྐུལ་ཕྱག་འཕྲིན་ཞིག་བསྩལ་ཡོད་འདུག
འཕྲིན་ཡིག་དེའི་ནང་འཁོད་དོན། རྒྱ་ནག་ས་གནས་སྲིད་གཞུང་གི་དྲག་དམག་དང་ས་གནས་བོད་མིའི་བར་གདོང་ཐུག་བྱུང་བའི་སྟབས་ཀྱིས། ད་ལྟ་བོད་བྱང་ཤར་རྔ་པ་ཀིརྟི་དགོན་གྱི་གནས་སྟངས་ཧ་ཅང་ཚབས་ཆེན་ཆགས་ཡོད། རྒྱ་དམག་གིས་དགེ་འདུན་པ་ ༢༥༠༠ ཙམ་ཡོད་པའི་ཀིརྟི་དགོན་གྱི་མཐའ་བསྐོར་ཏེ། ཉིན་ཤས་རིང་དགོན་པའི་ནང་བཟའ་ཆས་ཉེར་མཁོའི་རིགས་ཅི་ཡང་སྐྱེལ་གཏོང་བྱས་མི་ཆོག་པར་བཟོས་ཡོད། རྒྱ་དམག་གིས་དགོན་པའི་མཐའ་སྐོར་བཞིན་པའི་གནས་སྟངས་དེར། ས་གནས་མང་ཚོགས་ཀྱིས་དགེ་འདུན་པ་མང་པོ་ཞིག་འཛིན་བཟུང་བྱ་རྒྱུར་དོགས་ཏེ། གཞུང་ལམ་དང་སྲང་ལམ་དུ་ཡོང་སྟེ་རྒྱ་དམག་གི་སྣུམ་འཁོར་རྣམས་དགོན་པའི་ཕྱི་ནང་གང་སར་འགྲོ་རུ་བཅུག་མེད།
ས་གནས་སྲིད་གཞུང་གིས་འདི་ལོའི་ཕྱི་ཟླ་ ༣ ཚེས་ ༡༦ ཉིན། ཀིརྟི་དགོན་པར་དམ་དྲག་བྱེད་དོན་གཙོ་བོ། ཀིརྟི་དགོན་པའི་གྲྭ་བ་ལོ་གཞོན་ཞིག་གིས་ ༢༠༠༨ ལོར་བོད་ས་ཡོངས་སུ་ཞི་བའི་སྒེར་ལངས་བྱས་ཏེ། མི་ལོ་ ༣ འཁོར་བའི་དུས་དྲན་སྲུང་གཙི་ཞུ་ཆེད་རང་གི་ལུས་པོ་མེར་བསྲེགས་ཏེ་རྒྱ་གཞུང་ལ་ངོ་རྒོལ་བྱེད་སྐབས། རྒྱ་མིའི་ཉེན་རྟོག་པས་མེ་གསོད་རྒྱུའི་ཚབ་ཏུ་ཁོང་ལ་ཉེས་རྡུང་བཏང་ཡོད་ལ། ཉེས་རྡུང་བཏང་སྟེ་ཉིན་གཅིག་ལས་མ་ཕྱིན་པར་ཁོང་འདས་གྲོངས་སུ་ཕྱིན་འདུག གནད་དོན་དེར་དགོན་པའི་དགེ་འདུན་པ་རྣམས་ཁོང་ཁྲོ་ཆེན་པོ་ལངས་སྟབས་ད་ལྟའི་གནས་སྟངས་འདི་བྱུང་བ་རེད། གནས་སྟངས་དེར་ངོས་རང་ལ་བློ་འཚབ་ཧ་ཅང་ཆེན་པོ་ཡོད།
ད་དུང་གནས་སྟངས་ལ་ཡར་རྒྱས་གང་ཡང་མ་ཕྱིན་ཚེ་རྔ་པ་ཁུལ་གྱི་བོད་རིགས་ཚོར་དྲག་གནོན་ཚབས་ཆེན་ཕོག་ཉེན་ཆེ་སྟབས། ངོས་ཀྱིས་ཀིརྟི་དགོན་གྱི་དགེ་འདུན་པ་དང་བོད་རིགས་སེར་སྐྱ་མང་ཚོགས་ལ། ས་གནས་སྲིད་གཞུང་ལ་དྲག་གནོན་ལ་ཁ་གཡར་སའི་ལས་ཀ་རྩ་བ་ནས་མ་བྱེད་རོགས་ཞེས་འབོད་སྐུལ་ཞུ་རྒྱུ་མ་ཟད། རྒྱལ་སྤྱིའི་ཚོགས་སྡེ་ཁག་དང་གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་རྒྱ་གཞུང་ལ་གནད་དོན་དེ་ཞི་འཇམ་ཐོག་སེལ་དགོས་པའི་འབོད་སྐུལ་གནང་རོགས་ཞེས་ཞུ་རྒྱུ་ཡིན། འདས་པའི་མི་ལོ་ ༦༠ རིང་བོད་ཀྱི་དཀའ་རྙོག་སེལ་ཆེད་རྒྱ་གཞུང་གིས་དྲག་པོའི་ཐབས་ལམ་ལག་བསྟར་བྱས་པ་དེས། དཀའ་ངལ་དང་བོད་མིའི་འཁོན་འཛིན་གྱི་རྣམ་པ་ཆེ་རུ་ཕྱིན་ཡོད་སྟབས། ངོས་ཀྱིས་རྒྱ་ནག་དཔོན་རིགས་ཚོས་བོད་མིའི་དངོས་ཡོད་དཀའ་ངལ་དེ་རྣམ་དཔྱོད་བེད་སྤྱོད་ཐོག་སེལ་ཐབས་གནང་རྒྱུ་ལས། དྲག་པོའི་བྱེད་ཐབས་ངེས་པར་མཚམས་འཇོག་དགོས་པའི་འབོད་སྐུལ་ཞུ་བཞིན་ཡོད། ཅེས་སོགས་འཁོད་འདུག
དཔལ་ལྡན་གྱིས་བསྡུ་སྒྲིག་བྱས།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
རྒྱ་དམར་དམར་གཞུང་ནི་མེ་མདའི་ཁ་ནས་སྲིད་དབང་སྐྱོང་མཁན་ཞིག་ཡིན་ལགས།
ང་ཚོ་བོད་ནི་བདེན་པ་མདར་ནས་རང་གི་ཐོབ་ཐང་བརྩོད་མཁན་ཞིག་ཡིན། འཛམ་གླིང་འགྲོ་བ་མིའི་ཐོབ་ཐང་ཐོག་དོར་མཁུར་བཞེས་མཁན་ཞིག་ཡིན་ན་དཔལ་འབྱོར་དང་དབང་ཤུགས་ལ་མགོ་བོ་མ་འགུར་བ་བདེན་པ་ལ་རྒྱབ་སྐྱོར་གནང་ནས་བདེན་དོན་གསལ་ཐབས་ཀྱི་རོགས་རམ་གནང་རོགས།།