༢༠༡༡ ལོའི་བོད་ཀྱི་དུས་སྟོན།

གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིས་ཚེས་བརྒྱད་ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་ནེ་རོ་གཙུག་ལག་སློབ་གཉེར་ཁང་གི་བོད་རིགས་མཐོ་རིམ་སློབ་མ་དག་གི་གོ་སྒྲིག་འོག ཉིས་སྟོང་བཅུ་གཅིག་ལོའི་བོད་ཀྱི་དུས་སྟོན་ཞེས་པའི་མཛད་སྒོ་ཞིག་སློབ་གྲྭ་དེ་གའི་ཁྲིམས་ལུགས་སྡེ་ཚན་དུ་ཚོགས་ཡོད་ཅིང་། དུས་སྟོན་དེའི་ཐོག་༼ བོད་དང་རྒྱ་ནག རྒྱ་གར་བཅས་ཀྱི་འབྲེལ་ལམ ༽ཞེས་པའི་བརྗོད་གཞིའི་ཐོག་མཁས་དབང་རྣམ་པས་གཏམ་བཤད་བགྲོ་གླེང་གནང་ཡོད།

མཛད་སྒོའི་སྐུ་མགྲོན་གཙོ་བོ་དག་ནི། ནེ་རོ་གཙུག་ལག་སློབ་གཉེར་ཁང་གི་སྤྱི་ཚོགས་ཚན་རིག་གླིང་གི་སློབ་དཔོན་ཆེན་མོ་ཨ་ནན་ཌ་ཁོམ་མར་དང་། བོད་གཞུང་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས། རྒྱ་གར་རྒྱལ་ཡོངས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་ལས་སྐུ་ཞབས་སྦ་ར་ཌ་ཀར་ཎ་ཏི། ནེ་རོ་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དང་ལྡི་ལི་རྒྱ་ནག་ཉམས་ཞིབ་ལྷན་ཁང་གི་འགན་འཛིན་གཅིག་ལྕོག་སྐུ་ཞབས་སཱ་རེ་ཀ་ཏི་ཀོ་ཌེ་ཕ་ལེ་སོགས་ཆེད་ཕེབས་གནང་འདུག

ཐེངས་འདིའི་མཛད་རིམ་སློར་ལ་ལས་འགུལ་གཙོ་སྐྱོང་ལས་རོགས་འཇིགས་མེད་ལགས་ཀྱིས་བརྗོད་དོན། བོད་ཀྱི་དུས་སྟོན་ཞེས་པའི་ལས་འགུལ་འདི་ཚན་པ་ལྔར་བགོས་ཏེ་གོ་སྒྲིག་བྱས་ཡོད། དང་པོ། བོད་ཀྱི་ཁྱད་ཆོས་ལྡན་པའི་ཟས་རིགས་དང་པར་རིས་འགྲེམས་སྟོན་དང་། གཉིས་པ། བོད་ཀྱི་ཞབས་བྲོ་འཁྲབ་སྟོན། གསུམ་པ། བོད་དང་རྒྱ་གར། རྒྱ་ནག་བཅས་ཀྱི་འགྲེལ་ལམ་ཐད་གཏམ་བཤད་དང་དྲི་བ་དྲིས་ལན་གནང་ཡོད། བཞི་པ། ༼སྤྲིན་རྒྱབ་ཀྱི་ཉི་མ༽ ཞེས་པའི་བོད་དོན་སྐོར་ཀྱི་གློག་བརྙན་གཟིགས་འབུལ་ཞུས་པ་ཡིན། ལྔ་པ། མཇུག་བསྡོམས་གསུང་བཤད་དང་སྦྲགས་གདན་ཞུའི་སྐུ་མགྲོན་དག་ལ་ལེགས་སྐྱེས་ཕུལ་བ་ཡིན། ཞེས་དང་། ནེ་རོ་གཙུག་ལག་སློབ་གྲྭར་དུས་སྟོན་འདི་གོ་སྒྲིག་བྱེད་ཐེངས་དང་པོ་ཡིན་ཡང་། ཕྱོགས་ཡོངས་ནས་ཡག་པོ་བྱུང་སོང་། མ་འོངས་པར་ཡང་བསྐྱར་གོ་སྒྲིག་ཞུ་ཐུབ་ན་སྙམ་པའི་རེ་བ་བྱེད་ཀྱི་ཡོད། ཅེས་བརྗོད་བྱུང་།  

ནེ་རོ་མཐོ་སློབ་ཀྱི་སློབ་ཕྲུག་ཤེས་རབ་རྡོ་རྗེ་ལགས་ཀྱིས་བཏང་འབྱོར་བྱུང་།