མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

ཉིན་གྲངས་བཅོ་ལྔའི་སྐྱབས་བཅོལ་ལག་འཁྱེར།

བོད་ཀྱི་དུས་བབ།
༢༠༡༡/༠༤/༡༨
Share on FacebookShare on TwitterShare on EmailShare on Whatsapp

རྒྱ་གར་ནང་གི་བོད་པ་སྐྱབས་བཅོལ་བ་ཚོར་འདས་པའི་ལོ་མང་རིང་སྐྱབས་བཅོལ་ལག་དེབ་ RC ཐད། དཀའ་ངལ་རབ་དང་རིམ་པ་འཕྲད་བཞིན་ཡོད་པ་ལྟར། ཕྱི་ལོ་ ༢༠༠༣ ཟླ་ ༥ ཚེས་ ༣༠ རྗེས་སུ་རྒྱ་གར་ནང་འབྱོར་རིགས་ལ། བལ་ཡུལ་རྒྱ་གར་གཞུང་ཚབ་ཀྱིས་རྒྱ་གར་ནང་འཛུལ་ཞུགས་ཆོག་པའི་དམིགས་བསལ་དེབ་དཀར་པོ་ཞིག་བཟོས་ཡོད། ལག་འཁྱེར་དེའི་སྟེང་། སྐྱབས་བཅོལ་དང་གནས་སྐོར། ཤེས་ཡོན། གཞན་ཞེས་རིགས་ ༤ ཙམ་ཡོད་ཅིང་། སྐྱབས་བཅོལ་བཀོད་ཡོད་པ་ཧ་ཅང་ཉུང་། ༢༠༠༨ ལོའི་ཟླ་ ༩ པ་ནས་ཤེས་ཡོན་དང་སྐྱབས་བཅོལ་གཉིས་ལ་རྒྱ་གར་ནང་གནས་སྡོད་ཆོག་པའི་ལག་ཁྱེར་ RC བཟོ་མགོ་བརྩམས་ཡོད་ཀྱང་། གནས་སྐོར་དང་གཞན་གཉིས་ལ་གྲགས་འགུལ་མེད་པར་ལུས།

བོད་ནས་གསར་དུ་འབྱོར་རིགས་ཚང་མ་བལ་ཡུལ་སྣེ་ལེན་ཁང་དུ་འབྱོར་སྐབས། སྐྱབས་བཅོལ་བ་ཡིན་པ་གཅིག་མཚུངས་ཡིན་ཡང་། ཕྱི་སྐད་ཕྱི་ལུགས་མ་ཤེས་པ་དང་། རྒྱ་གར་ནང་གི་འགྲོ་སྟངས་ལ་རྒྱུས་མངའ་མེད་པའི་དབང་གིས་བལ་བོད་ས་མཚམས་བརྒལ་བ་ནས་“རྒྱལ་བ་རིན་པོ་ཆེ་ལ་མཇལ་དུ་ཡོང་བ་ཡིན” ཞེས་ཐུན་མོང་གི་སྐད་ཆ་གཅིག་ལས་མེད། བལ་ཡུལ་སྣེ་ལེན་ཁང་བརྒྱུད་དེ་རྒྱ་གར་གཞུང་ཚབ་ཏུ་སྐྱོད་སྐབས་ཀྱང་། རྒྱ་གར་གཞུང་གི་ངོས་འཛིན་བྱེད་སྟངས་ཤིག་ཡིན་ནམ། བལ་ཡུལ་སྣེ་ལེན་ཁང་གི་ལས་བྱེད་ཚོས་སྐད་སྒྱུར་ཚུལ་བཞིན་མ་བྱས་པས་ལན། གང་ལྟར། སྐྱབས་བཅོལ་བོད་མི་མང་ཆེ་བར་གནས་སྐོར་དང་གཞན་སོགས་ཀྱི་མིང་ཐོག་ནས་ཐོ་འགོད་བྱས་ཡོད་པ་མ་ཟད། ལོ་བཅོ་ལྔ་ཉི་ཤུ་ཅན་གྱི་ན་གཞོན་དག་ལའང་གནས་སྐོར་ཞེས་བཀོད་ཡོད།   

ཉེ་བའི་ལོ་འགའི་ནང་ཁོང་ཅག་བོད་གཞུང་བཀའ་ཤག་དང་། སྤྱི་འཐུས་ལྷན་ཁང་སོགས་བཅར་ཏེ་སྐྱབས་བཅོལ་ལག་འཁྱེར་ RC རག་ཐབས་ལ་འབད་བརྩོན་རིམ་པར་བྱས་ཤིང་། ཐེངས་ཤིག་མི་ ༥༠༠ ཙམ་ལྷན་དུ་འཛོམས་ཏེ་ཆོལ་ཁ་རེ་ནས་འཐུས་མི་གཅིག་རེ་བདམས་ཏེ། མིང་ཐོ་བསྡུ་རུབ་ཀྱིས་བོད་གཞུང་ལ་ཞུ་འབོད་བྱས་འདུག སྟབས་ལེགས་པ་ཞིག་ལ་ཉེ་ཆར་ཕྱི་ཟླ་ ༢ པའི་ནང་གློ་བུར་དུ་གསལ་བརྡ་ཞིག་འབྱོར་ཏེ། མི་འགྱང་བར་ RC བཟོ་རྒྱུ་ཡིན་ཚུལ་དང་། པར་དང་མཛུབ་ཐེལ། གནས་ལེན་ཁང་གི་འབྱོར་ཐོ་སོགས་གྲ་སྒྲིག་དགོས་རབས་བསྒྲགས་སྐབས། མང་པོ་ཞིག་ཧ་ཅང་དགའ་སྤྲོ་ཆེན་པོས་ཡུན་རིང་ཡིད་ལ་བརྣག་པའི་ལག་འཁྱེར་དེ་བཟོ་བར་བཅར།

ལག་འཁྱེར་དེ་བཟོ་མགོ་བརྩམས་ཏེ་ཟླ་གཅིག་ལས་མ་འགོར་བར་དོ་བདག་སོ་སོའི་ལག་ཏུ་རག་ཡོད་ཀྱང་། ཡིད་ཕངས་པ་ཞིག་ལ། ལག་འཁྱེར་དེ་རག་སྐབས་དུས་ཡུན་རྫོགས་རྒྱུར་ཉིན་ ༡༥ ལས་མེད་པ་མ་ཟད། དེ་མ་ཐག་རྒྱ་གར་འབྲེལ་ཡོད་ལས་ཁུངས་སུ་བཅར་སྐབས། དུས་ཡུན་ཕར་འགྱང་གི་ཆོག་མཆན་སྤྲད་མི་འདུག འདི་དང་མཉམ་དུ་སློབ་གྲྭ་ཁག་ཅིག་ནས་ཐོན་པའི་སློབ་ཕྲུག་ཚོའི་སྐྱབས་བཅོལ་ལག་འཁྱེར་གྱི་དུས་ཡུན་ཕར་འགྱང་ཕྱིར་བསྡུ་བྱས་ཡོད་འདུག དེ་ནི་རྒྱ་གར་འབྲེལ་ཡོད་ལས་ཁུངས་ཀྱིས། ཁྱེད་ཅག་ཤེས་ཡོན་གྱི་མིང་ཐོག་ནས་སྐྱབས་བཅོལ་ལག་འཁྱེར་བཟོས་ཡོད་སྟབས། སློབ་གྲྭ་ཐོན་པ་དང་མཉམ་དུ་ RC ཡི་དུས་ཡུན་ཡང་རྫོགས་ཚར་བ་རེད། ཅེས་བརྗོད་ཡོད་འདུག

 

འདི་གའི་གསར་འགོད་པས་གནད་དོན་དེ་དག་ལ་རྒྱུས་ལོན་བྱ་ཆེད། མང་ཚོགས་ཀྱིས་བདམས་པའི་སྐྱབས་བཅོལ་ལག་འཁྱེར་བཟོ་བར་ལས་ཀ་བྱེད་མཁན་ཕུན་ཚོགས་ཆོས་སྡོང་ལགས་སུ་བཅར་འདྲི་ཞུས་སྐབས་ཁོང་གིས་བརྗོད་རྒྱུར། དང་པོ་ང་ཚོ་མི་སྐོར་ཞིག་ངྷ་སའི་པདྨ་ཐང་དུ་འཛོམས་པ་ཡིན། ཁོང་ཅག་ཚང་མའི་ལག་དེབ་དཀར་པོའི་སྟེང་གནས་སྐོར་ཞེས་བཀོད་ཡོད་པ་རྐྱང་རེད། ང་ཚོས་མཉམ་རུབ་ཐོག་སྙན་ཞུ་ཞིག་བྲིས་ཏེ་བཀའ་ཤག་དང་སྤྱི་འཐུས། བདེ་སྲུང་དང་ནང་སྲིད་བཅས་སུ་ཕུལ་བ་ཡིན། སྙན་ཞུ་སྔ་ཕྱི་ཐེངས་གཉིས་ཙམ་ཕུལ་རྗེས་གཞི་ནས་བཀའ་ཤག་གིས་སྐྱབས་བཅོལ་ལག་འཁྱེར་ཞུ་མཁན་ཚོའི་མིང་ཐོ་འཁྱེར་ཤོག་ཟེར། དུས་ཡུན་ཐུང་ཐུང་ནང་མིང་ཐོ་ ༥༠༠ ལྷག་འབྱོར་སོང་། བཀའ་ཤག་གིས་སྤྲད་པའི་འགེངས་ཤོག་སྐོང་སྐབས། གནས་སྐོར་དང་གཞན་བཅས་ཁྱོན་བསྡོམས་མི་ ༧༠༠ ལྷག་འདུག

ཉེ་ཆར་ལག་འཁྱེར་བཟོས་ཏེ་ང་ཚོའི་ལག་ཏུ་འབྱོར་སྐབས། སྔ་མ་དག་དང་མི་འདྲ་བར་ཡིག་ཆའི་སྟེང་གནས་སྐོར་ཞེས་ཡི་གེ་དམར་པོ་ཞིག་བྲིས་འདུག་ལ། དུས་ཡུན་ཡང་ ༢༠༡༡ ལོའི་ཟླ་ ༣ ཚེས ༣༡ བར་རྒྱ་གར་ནང་སྡོད་རྒྱུར་ཆོག་མཆན་ཡོད། ཅེས་བཀོད་འདུག ལོ་རེའི་དུས་ཚིགས་ཕར་འགྱང་གི་ཟླ་ཚེས་ཀྱང་བསུབས་འདུག སྐབས་དེར་ལག་འཁྱེར་གྱི་དུས་ཚོད་རྫོགས་རྒྱུར་ཉིན་ ༥ ལས་མེད་སྟབས། ང་ཚོ་ལམ་སང་རྒྱ་གར་ RC ལས་ཁུངས་སུ་ཕྱིན་ཡང་ཕར་འགྱང་ངོས་ལེན་བྱས་མ་སོང་། ཞེས་བརྗོད་བྱུང་།

ཁོང་ལ་གནས་ཚུལ་འདིའི་སྐོར་ལ་བོད་གཞུང་བདེ་སྲུང་ལས་ཁུངས་ཀྱིས་ལམ་སྟོན་འདྲ་གནང་ཡོད་མེད་དྲིས་སྐབས། ང་ཚོ་འཕྲལ་དུ་བདེ་སྲུང་ལས་ཁུངས་ལ་བཅར་བ་ཡིན། འོན་ཀྱང་ཁོང་ཅག་ལ་ཡང་གསལ་བཤད་ཞུ་རྒྱུ་གང་ཡང་མི་འདུག ལག་འཁྱེར་རྩ་བ་ནས་མེད་པ་ལས་ཅིག་ཡོད་ན་དགའ་བ་རེད། ཅུང་ཙམ་སྒུགས་དང་རིམ་བཞིན་ག་རེ་བྱ་དགོས་མིན་ལྟ་ཆོག་གི་རེད་ཟེར། དེ་ནས་མང་པོ་ཞིག་སྤྱི་འཐུས་ལྷན་ཁང་ལ་ཕྱིན་ཏེ་ཡིག་ངག་གཉིས་ཐོག་ནས་དཀའ་ངལ་ཞུས་སྐབས། སྤྱི་འཐུས་ཚོགས་གཞོན་དང་ང་ཚོའི་འཐུས་མི་བཅས་རྒྱ་གར་ RC ལས་ཁུངས་ལ་བཅར་རྒྱུ་བྱས་ཡོད་ཀྱང་། རྗེས་སུ་སྤྱི་འཐུས་ཚོགས་གཞོན་དང་བཀའ་བློན་ཁྲི་པའི་བར་བཀའ་མོལ་བྱུང་སྟེ། གནད་དོན་འདིའི་ཐད་རྒྱ་གར་གཞུང་ལ་ཡར་ཞུ་བྱས་ཡོད། ཁྱེད་ཚོ་སྔོན་ལ་མ་འགྲོ་བར་གཞུང་གི་བཀའ་ལན་ལ་སྒུགས་དང་། རྗེས་སུ་ཅི་ཞིག་བྱ་དགོས་མིན་ལྟ་ཆོག་གི་རེད་ཟེར་ནས་ལན་ཕེབས་འདུག ཅེས་བརྗོད་བྱུང་།

ཡང་ཁོང་ལ་ཁྱེད་ཅག་གི་ལག་དེབ་དཀར་པོའི་སྟེང་གནས་སྐོར་བཀོད་ཡོད་པའི་རྒྱུ་མཚན་གང་ལ་ཐུག་ཡོད་སྐོར་དྲིས་པར། ནོར་འཁྲུལ་འདི་དག་བཟོ་མཁན་བལ་ཡུལ་སྣེ་ལེན་ཁང་རེད། ང་ཚོ་བལ་ཡུལ་སྣེ་ལེན་ཁང་དུ་འབྱོར་ཏེ་ཐོ་འགོད་བྱས་སྐབས། དོ་བདག་ལ་སྐད་ཆ་མི་འདྲི་བར་གང་དྲན་དྲན་འབྲི་བཞིན་འདུག མི་རེ་ཟུང་གིས་རང་ཉིད་གནས་སྐོར་བའི་ཐོ་གཞུང་ནང་ཡོད་པ་ཤེས་འཕྲལ། འབྲེལ་ཡོད་ལས་བྱེད་ཚོར་བསྒྱུར་བཅོས་གཏོང་རོགས་ཞེས་འབོད་སྐུལ་ཞུས་ཀྱང་། ཁྱེད་ཚོས་ཧ་གོ་བ་མ་རེད་ཟེར་ནས་ཉན་འཇོག་བྱས་མི་འདུག དེའི་དབང་གིས་རྒྱ་གར་གཞུང་ཚབ་ནས་ཀྱང་ངོས་འཛིན་གཅིག་མཚུངས་བྱས་པ་རེད། ཅེས་བརྗོད་བྱུང་།

 

གནད་དོན་འདིའི་ཐད་བོད་གཞུང་བདེ་སྲུང་དྲུང་ཆེ་དངོས་གྲུབ་རྡོ་རྗེ་ལགས་སུ་བཀའ་འདྲི་ཞུས་པར་ཁོང་གིས། གནས་སྐོར་བའི་ཁོངས་སུ་ཐོ་འགོད་བྱས་པའི་རིགས་ལ་དེ་སྔོན་ RC བཟོ་སྲོལ་མེད་ནའང་། རྒྱ་གར་དབུས་གཞུང་ལ་སྙན་སེང་རིམ་པར་ཞུས་པར་བརྟེན། ད་ཆར་བཟོ་ཐུབ་ཙམ་བྱུང་བ་རེད། འོན་ཀྱང་དེ་དག་ ༢༠༡༡ ཟླ་ ༣ ཚེས ༣༡ ཉིན་དུས་ཚོད་རྫོགས་ཡོད་པ་དངོས་ཡོད་རེད། ད་ལྟ་བཀའ་ཤག་དང་བདེ་སྲུང་གིས་རྒྱ་གར་དབུས་གཞུང་ལ། སྐབས་དེར་ནོར་འཁྲུལ་ག་རེ་ཤོར་ཡོད་ནའང་། མང་པོ་ཞིག་གནས་སྐོར་བའི་ཐོ་གཞུང་ནང་ཐེབས་ཡོད་པ་རེད། ཁོང་ཚོ་མང་ཆེ་བ་ཆབ་སྲིད་དང་འབྲེལ་བ་ཆགས་ཡོད་ཅིང་། ཤེས་ཡོན་ཁོངས་སུ་ནི་ལོ་ཚད་ཀྱི་ཆ་ནས་ཚུད་ཐབས་མེད་པ་དང་། སྐྱབས་བཅོལ་སྤྲོད་ཀྱི་མེད་སྟབས་གནས་སྐོར་བའི་ཁོངས་སུ་མིང་ཐོ་མི་འགོད་རང་འགོད་ཆགས་པ་རེད། ཕྱིར་བོད་དུ་ལོག་རྒྱུར་དཀའ་ངལ་ཆེན་པོ་ཞིག་ཆགས་ཡོད་སྟབས། ཐེངས་གཅིག་ཁོང་ཚོར་དུས་འགྱང་གི་ཆོག་མཆན་ཡོད་པའི་ལག་འཁྱེར་ RC བཟོ་རྒྱུར་ཆོག་མཆན་གནང་རོགས་ཞེས་སྙན་སེང་ཞུས་ཡོད་པ་རེད། ཅེས་གསུངས་བྱུང་།

ཁོང་ལ་སློབ་གྲྭ་ཁག་ཅིག་ནས་ཐོན་པའི་རིགས་ལའང་སྐྱབས་བཅོལ་ལག་འཁྱེར་ཕར་འགྱང་རག་གི་མེད་པའི་སྐོར་དྲིས་པར། རྒྱ་གར་གཞུང་གི་གཏན་འབེབས་སྲིད་ཇུས་ཀྱི་ལངས་ཕྱོགས་ཧ་ཅང་བརྟན་པོ་རེད། ཐོག་མར་ག་རེའི་ཆེད་དུ་ཡོང་བ་ཡིན་ན་དེར་འགྱུར་བ་གཏོང་ཆོག་གི་མེད་ཅེས་པའི་སྲིད་ཇུས་འདི་ནས་འཕྲོས་ཡོང་པ་ཞིག་རེད། ཤེས་ཡོན་ཁོངས་སུ་ཐོ་འགོད་བྱས་ཡོད་ན། སློབ་གྲྭ་མ་ཐོན་བར་དུ་སྐྱབས་བཅོལ་ལག་དེབ་འཛིན་ཆོག་པ་དང་། ཤེས་ཡོན་སྡེ་ཚན་ནས་ཐོན་ཡོང་སྐབས། ཐོག་མའི་ཡོང་དགོས་པའི་དམིགས་ཡུལ་མཇུག་སྒྲིལ་བ་ཡིན་སྟབས། ཤེས་ཡོན་གྱི་ཐོ་གཞུང་ལ་འགྱུར་བ་བཏང་སྟེ་སྡེ་ཚན་གཞན་ཞིག་གི་ཁོངས་སུ་ཐོ་འགོད་བྱ་ཆོག་གི་མེད་པའི་སྲིད་ཇུས་འཛིན་གྱི་ཡོད་པ་རེད། ཅེས་གསུངས་སོང་།

གསར་འགོད་པ། བནྡེ་སྐྱབས།

 

འབྲེལ་ཡོད་གསར་འགྱུར།

༸གོང་ས་མཆོག གསར་འགྱུར།

བོད་ལྗོངས་མདོ་སྨད་ཆོལ་ཁས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

ཆུ་ཚོད་ ༡༨ སྔོན་ལ།
 འབུམ་རམས་པ་ལྷ་མོ་འཚོའི་དཔེ་དེབ་དབུ་འབྱེད་གནང་། བོད་ཀྱི་དུས་བབ་གསར་ཁང་གི་པར། ༢༠༢༥།༦།༢༧
Mobile App

འབུམ་རམས་པ་ལྷ་མོ་འཚོའི་དཔེ་དེབ་དབུ་འབྱེད་གནང་། 

༢༠༢༥/༠༦/༢༧
Mobile App

དབུས་གཙང་གཞོན་སྐྱེས་ཚོགས་ཆེན་ཐེངས་དང་པོ་འཚོག་བཞིན་འདུག

༢༠༢༥/༠༦/༢༧
In this handout image released by the Chinese Embassy on June 26, 2025, the first batch of Indian pilgrims at the Manasarovar Lake, in Tibet.
Mobile App

རྒྱ་གར་གྱི་གནས་མཇལ་བ་ཚོ་དངོས་སུ་བོད་ནང་གནས་མཇལ་དུ་ཕྱིན།

༢༠༢༥/༠༦/༢༧
Close view of Chinese PLA combat helicopter in Tibet_January 05 2021
Mobile App

བོད་ནང་གི་ཛ་དྲག་གི་གནས་སྟངས་ལ་གཟིགས་ཞིབ་དགོས་པའི་རེ་སྐུལ་ཞུས། 

༢༠༢༥/༠༦/༢༦
Mobile App

མི་འགྱངས་བར་སྟོབས་ཆེན་རྒྱལ་ཁབ་ལྔ་ཡིས་ཚོགས་ཆེན་འཚོག་རྒྱུ་ཡིན་འདུག 

༢༠༢༥/༠༦/༢༦

མཆན། 17

  1. རྡོ་རྗེ་ཚེ་རིང་། says:
    ལོ་ 14 སྔོན།

    བཙན་བྱོལ་གཞུང་ལ་ཁ་མ་གཏོང་ན་སུ་ལ་གཏོང་དགོས་རེད། དོན་དངོས་སུ་བཙན་བྱོལ་གཞུང་རང་ནས་སྤྲད་པའི་འཛིན་གྲྭ་བཅུ་གཉིས་དང་ཚད་མཉམ་གྱི་ལག་འཁྱེར་དེ་ད་ཆ་བཙན་བྱོལ་གཞུང་རང་དུ་འཛིན་གྲྭ་བརྒྱད་པའི་ལག་འཁྱེར་ཚད་མཉམ་དུའང་ངོས་ལེན་བྱེད་ཀྱི་མིན་འདུག དེ་ལས་བྱེད་རེ་ཟུང་ནས་བཟོས་པ་རེད་དམ་ཡང་ན་གཞུང་གིས་རྐང་བཙུགས་ནས་བཟོས་པ་རེད། བསམ་བློ་ཐོངས ཕལ་ཆེར་བཙན་བྱོལ་གཞུང་གི་དམིགས་ཡུལ་གཙོ་བོ་དེ་བོད་ནང་གི་མི་མང་རྣམས་བེད་སྤྱོད་བྱས་ཏེ་ཁོ་རང་ཚོའི་གྲོད་ཁོག་ཁེངས་ཐབས་བྱེད་ཀྱིན་འདུག་བསམ་པའི་ཚོར་སྣང་ཡོང་གིན་འདུག

    Reply
  2. གསར་འབྱོར། says:
    ལོ་ 14 སྔོན།

    ང་ཚོས་འདི་ནས་གསར་འབྱོར་བ་ལ་ལྟ་སྟངས་ཡག་པོ་མི་འདུག་ཅེས་བཤད་དོན་ནི་བོད་གཞུང་བཀའ་སྤྱི་གཉིས་ཀྱིས་གྲོས་ཆོད་བཞག་ནས་སྒྲུབ་པ་ཞིག་རེད་ཅེས་བཤད་ཀྱིན་མེད། གཙོ་བོ་ལས་ཀྱི་སྣེ་མོ་བ་དག་གིས་གཞུང་འབྲེལ་ལས་དོན་རྣམས་རང་ཉིད་ཀྱི་དགའ་སྡུག་གི་སེམས་ཁམས་ལྟར་ཁ་རུ་ངོ་མདོག་སྐྱོ་བའི་གསར་འབྱོར་བ་ཚོའི་སྟེང་དུ་སྟོན་གྱིན་འདུག་ཅེས་བཤད་ཀྱིན་ཡོད། བོད་གཞུང་ལས་བྱེད་དག་གིས་མི་ཞིག་ལས་ཁུངས་དུ་འཇུལ་མ་ཐག་ནས་དེའི་རྣམ་པ་ལ་ལྐོག་ལྟ་ཞིག་བྱས་རྗེས་ཁ་རུ་ངོ་མདོག་སྐྱོ་བའི་གསར་འབྱོར་བ་ཞིག་ཡིན་ཚེ་གདོང་གཤིས་འགྱུར་ཅིང་སུན་སྣང་གི་རྣམ་འགྱུར་ཞིག་རང་བཞིན་གྱིས་སྟོན་ཡོང་གི་འདུག་ལ། གལ་སྲིད་མི་དེ་རྣམ་པ་འདྲ་ཆགས་པ་ོཞིག་ཡིན་ཚེ་རང་བཞིན་གྱིས་རྐུབ་བཅག་ལས་ཡར་ལངས་གྲབས་ལངས་གྲབས་བྱེད་ཀྱིན་འདུག་པའི་བྱེད་སྟངས་འདི་དག་གིས་ངའི་སེམས་ཁམས་ལ་བཟོད་དུ་མེད་པའི་རྨ་ཁ་ཟབ་མོ་ཞིག་བཟོས་སོང་། སྐུ་ངོ་ཡིན་ཟེར་མཁན་གྱི་མི་དེ་དག་གི་འགྲམ་ལ་སོང་ཚེ་གསར་འབྱོར་བས་སྐད་ཆ་བཤད་བཞིན་པའི་བར་ནས་ནང་དུ་ཡོང་བའི་ཁོང་གི་ངོ་ཤེས་དེ་ཚོ་དང་མཉམ་དུ་དོན་མེད་ཀྱི་སྐད་ཆ་བཤད་ནས་རྣམ་པ་སྐྱོ་བའི་གསར་འབྱོར་བ་ང་ཁོང་གི་མིག་མདུན་ནས་འབུ་ཞིག་གི་སྣང་བ་ཡང་མི་འདུག་པ་མ་ཟད། ཁོང་ཚོ་སྐད་ཆ་བཤད་ཚར་རྗེས་གསར་འབྱོར་བ་ང་ལ་ལྟ་ཙམ་བྱས་ནས་ཡ་ཡ་ད་ངས་ཧ་གོ་སོང་དེ་རིང་ཆུ་ཚོད་མི་འདུག་རྗེས་མ་ཤོག་ཟེར་བཞིན་འགྲོ་དུས་གསར་འབྱོར་བ་ངས་མིག་ཆུ་ཕྱུ་རུ་གཏོང་འདོད་མེད་ཀྱང་སེམས་ནས་ཨག་སྐད་རེ་འདོན་དགོས་བྱུང་། གསར་འབྱོར་བས་གནས་འདིའི་འགྲོ་སྟངས་འདུག་སྟངས་མི་ཤིས་ལ་སྐད་དང་ཡི་གེ་དེ་བས་ཀྱང་མི་ཤིས་པས་སེམས་ཁོངས་སུ་རང་བཞིན་གྱི་ཉམས་ཆུང་བའི་སྐྱོ་སྣང་ཞིག་གིས་ཁེངས་ཡོད་པའི་ཐོག་ལ་སྐུ་ངོ་དང་ལས་བྱེད་མང་ཤོས་ཤིག་གི་སྣང་མེད་དང་མཐོང་ཆུང་གི་བྱེད་སྟངས་འདི་དག་གིས་གསར་འབྱོར་བས་རྡ་སའི་ར་སྒང་ནས་ས་ལ་རྐང་པ་བརྡབས་ཅིང་གནམ་ལ་ལག་ཟུང་བསྲིང་ནས་ཀུ་རིང་དེ་འདེད་དགོས་བྱུང་བ་ཉུང་ཉུང་མིན། གསར་འབྱོར་བའི་སྐྱོ་གདོང་གི་སྐྲ་ལོ་རིང་དུ་ཕྱིན་ཅིང་རྡ་སའི་སྲིང་ལམ་ནས་ཕྱི་གླིང་བ་ག་ཤས་ཀྱི་རྗེས་ལ་སྤྲང་མིང་མེད་ཀྱང་སྤྲང་བོ་བཞིན་རྒྱུག་དགོས་ཐུག་དུས་གསར་འབྱོར་བ་ཚོ་སྐུ་ངོ་དང་ལས་བྱེད་ཚོའི་མིག་ནང་གི་ངོ་ཚ་ཡིན། གསར་འབྱོར་བར་འདང་ངེས་ཀྱི་ལྟོས་ཆས་མེད་པས་ངོ་གདོང་གི་དཔག་མདངས་སྐྱོ་ཞིང་ལག་འབབ་ཀྱི་དངུལ་ལོ་མེད་པས་གྱོན་གོས་ཀྱི་ཁ་དོག་ལོག་དུས་གསར་འབྱོར་བ་སྐུ་ངོ་ཚོའི་བུ་ཆུང་གི་ངུ་ཁ་ལེན་བྱེད་ཡིན། གསར་འབྱོར་བས་གནས་སྟངས་འདི་དག་མཐོང་དུས་ཕ་ཡུལ་གངས་ཅན་ཞིང་གི་ནིང་མི་སྤུན་མཆེད་དྲེན་པ་གྲངས་ཀྱིས་ག་ལ་ལོངས། གྲོགས་པོ་ཚོ་བོད་དུ་ལོག་འགྲོ་གནས་འདི་ང་ཚོའི་ས་མ་རེད། ས་འདི་ང་ཚོའི་ཁྱིམ་མ་རེད། གསར་འབྱོར་ང་བོད་དུ་ལོག་གི་ཡིན། བདེ་མོ། སྐུ་ངོ་ཚོ་དེ་རིང་ནས་ཁྱོད་ལ་སུན་པོ་བཟོ་མཁན་གཅིག་མེད་པར་ཆགས་ངེས།

    Reply
  3. རྫ་ཚེ་རིང་བཀྲ་ཤིས། says:
    ལོ་ 14 སྔོན།

    འོན་ཀྱང་རྒྱ་གར་ལ་དགེ་མཚན་ཞིག་ཡོད་པ་ནི་རང་དབང་གི་ཁོར་ཡུག་ཆེ་ཙམ་ཡོད་པ་དེ་ཡིནཞིང་། ང་ཚོའི་གཞུང་ཚབ་ཀྱི་དེབ་དཀར་པོ་བརྒྱུད་ནས་ལག་འཁྱེར་བཟོ་བ་དང་། དེ་བཞིན་ཉེ་ཆར་གནས་སྐོར་བ་རྣམ་ལ་མནའ་མ་ཟོས་ཙམ་གྱི་ལག་འཁྱེར་གྱི་གོ་སྐབས་འདི་གནང་བ་སོགས་ཀྱང་རིམ་པ་བརྒྱུད་པ་དུས་ལ་སྒུག་པ་གཞུང་མང་གཉིས་ཀྱིས་རེ་བ་དང་སྙན་ཞུ་བཅས་ལ་ལྟོས་ནས་བྱུང་བ་ཡིན་ལ་གོང་རིམ་གྱི་ཐག་གཅོད་འདི་རིགས་ལ་དངོས་ཡོད་ཀྱི་ནོར་འཁྲུལ་དང་ང་ཚོའི་འཚོ་སྡོད་ལ་དངོས་ཡོད་ཀྱི་དཀའ་ངལ་ཡོད་པ་དངོས་འབྲེལ་ཡིན་སྟབས། རྒྱ་གར་གཞུང་ནས་ཀྱང་དགོངས་པ་ཞིག་སྔ་ཕྱིར་མ་ལྟོས་པར་བཞེས་རྒྱུ་རེད། དེ་ཡང་ང་ཚོ་སྤྲོ་ལངས་མིན་ལ་མ་ལྟོས་པར་གཞུང་བརྒྱུད་ནས་ལས་ཀ་བྱེད་པ་ལས་གཞན་པའི་ཐབས་ལམ་གང་ཡང་མེད་པས་བོད་གཞུང་ལ་རྒྱ་གར་ལ་སླར་ཡང་ཞུ་དགོས་པའི་མཉམ་རུབ་ཀྱི་སྙན་ཞུ་དང་ཞུ་འབོད་དེ་བཞིན་རྒྱ་གར་གཞུང་ལ་ཡང་བྱེད་དགོས།
    ཐབས་ལམ་འཚོལ་དགོས། དེ་ནི་ཐ་མའི་བདམས་ཀ་ཡིན།

    Reply
  4. རྫ་ཚེ་རིང་བཀྲ་ཤིས། says:
    ལོ་ 14 སྔོན།

    ངོ་ཚོའི་ཡིད་ཆེས་ལ་ཐལ་དྲགས་རྒྱུ་མེད་ལ། བློ་ཕམ་ལ་ཡང་ཐལ་དྲགས་རྒྱུ་མེད།
    ང་ཚོའི་བཙན་བྱོལ་གཞུང་འདིར་ནུས་པ་མི་འདུག་ཟེར་ན་ངས་ངོས་ལེན་ཡོད་དེ། ང་ཚོ་ནི་རྒྱ་གར་གྱི་ངོས་ནས་རྫོང་ཞིག་གི་མངའ་མངའ་ཁོངས་སུ་ཡོད་པའི་སྒྲིག་འཛུགས་ཤིག་རེད།
    བཙན་བྱོལ་དེ་ནུས་ཆུང་ཆུང་ཡིན་པའི་མྱུང་ཚོར་མང་པོ་བྱུང་། ཡིན་ན་ཡང་སྐབས་དེར་ང་ཚོ་སྤྲོ་ལངས་རྒྱུའི་ཚབ་ཏུ་ང་ཚོའི་ལས་དབང་དྲན་དགོས། བསམ་གཞིག་བྱེད་དགོས། བཙན་བྱོལ་གཞུང་གཉོམ་པ་ནི་བཙན་བྱོལ་བོད་པ་གཉོམ་པ་ཡང་རེད་ལ་ཁྱེད་དང་ང་གཉོམ་པ་ཡང་རེད།
    ང་ཚོས་སོ་སོའི་ཁེ་ཕན་མ་འགྲུབ་པའི་སྐབས་དེར་སུ་ལ་ཡང་མི་རྩི་བ་དངོས་འབྲེལ་ཆགས་ཀྱི་འདུག གསར་འབྱོར་ཚོའི་ནང་ན་ཡང་ང་རང་ཐེ་བའི་ཅི་འདྲའི་མང་པོ་ཞིག་གིས་རྒྱལ་བ་རིན་པོ་ཆེ་མཇལ་འདོད་ཡོད་པ་དང་ཡང་ན་སློབ་གཉེར་བྱ་འདོད་ཡོད་པ།
    དེང་སང་གི་གསར་འབྱོར་མང་ཤོས་ནི་དབྱིན་ཡིག་སྦྱོང་དུ་ཡོང་བ་ལྟ་བུ་རེད། ངར་ཆེ་དྲགས་རྒྱུ་གཏན་ནས་ཡོད་མ་རེད།
    དེ་བས་ཀྱང་དེང་སང་གི་གསར་འབྱོར་མང་པོ་ཞིག་གིས་སྣེ་ལེན་ཁང་དུ་འབྱོར་བ་དང་ཆབ་སྲིད་བཙོན་པ་བཟོ་མཁན་ཡོད་པ་མ་ཟད། སྤྱིར་བཏང་ཞིག་ཡིན་ན་ཡང་རང་གི་ལག་འཁྱེར་སྦས་ནས་ལམ་ཁ་ནས་བཙན་བརྒལ་བྱས་འདོགས་སྟོན་པ་འདི་རྒྱུན་ལྡན་གྱི་སྣེ་ལེན་ཁང་དུ་འཛུལ་སྟངས་ཞིག་རེད་ལ། ལམ་སང་རྡ་ས་ནས་དབྱིན་ཇི་ཅུང་ཟད་ཀྱི་རྨང་གཞི་བཙུགས་རྗེས་ནུབ་ཕྱོགས་ལ་འཕུར་རྒྱུའི་བསམ་བློ་གཏོང་གིན་ཡོད་པ་ཅི་བས་མང་།
    ག་དུས་ཡིན་ན་ཡང་ཕྱོགས་གཞན་ལ་མིག་འབུར་ཚུགས་སུ་ལྟ་དུས་རང་ཉིད་མ་བརྗེད་པ་གནང་རོགས།
    ཡང་བོད་ནས་དཀའ་ལས་ཆེན་པོ་རྒྱབ་ནས་འདིར་ཡང་རེ་བ་ཆེན་པོ་རྒྱབ་ཡོད་པར་ཐད་ཀར་སེམས་ཁ་མ་གང་ལྟ་བུའི་གནས་སྟངས་ཡོང་གིན་ཡོད་པ་ངས་ཀྱང་ཚོར་གྱི་ཡོད། དེ་ལ་རྒྱུ་རྐྱེན་གཉིས་ཡོད།
    ང་བློ་ཕམ་བྱེད་ས་གཅིག་སྟེ། བལ་ཡུལ་སྣེ་ལེན་ལས་བྱེད་པས་ང་ཚོར་གནས་སྐོར་དང་སློབ་སྦྱོང་གང་ཡིན་ཅི་ལྟར་རྒྱག་དགོས་ཀྱི་གསལ་ཁའི་ལམ་སྟོན་མ་གནང་བར་བློ་འགྱོད་ཡོད།
    འོན་ཀྱང་དེ་ཡང་ལས་བྱེད་ཚོས་མ་འབྱོན་པ་དང་འཐུས་ཤོལ་ཡིན་པ་ལས་བསམ་བཞིན་བོད་གཞུང་གིས་གཅིག་བཟོས་བ་གང་ཡང་མ་རེད།
    སྐྱབས་བཅོལ་ལག་འཁྱེར་སློབ་སྦྱོང་གི་ཐོག་ནས་བཟོས་པ་དེར་སློབ་སྦྱོང་གི་དུས་ཡུན་རྫོགས་ན་ཡང་ན་སློབ་གྲྭ་གཞན་ལ་འཛུལ་ཞུགས་བྱས་པའི་དངོས་འབྲེལ་དཔང་ཡིག་ལྟ་བུ་ཡོད་ན་མི་ཤེས་མ་གཏོགས་གཞི་རྩའི་རྒྱ་གར་གྱི་ཁྲིམས་ལྟར་ན་དེ་ནས་དུས་ཚོད་ཡོད་མ་རེད་ཟེར་བ་འདི་ངས་ཀྱང་ལག་དེབ་གཟོ་བའི་སྐབས་ནས་གོ་ཐོས་བྱུང་ལ།་ངས་ལག་འཁྱེར་གྱི་དགོན་པའི་ངོས་སྦྱོར་ལ་ཡང་ལོ་བཅུ་གྲངས་ཞིག་ཕོག་ཡོད་པ་རེད།
    ལར་གཅིག་བྱས་ན་རྒྱ་གར་གཞུང་ཚབས་ཀྱིས་ང་ཚོ་མང་ཤོས་གནས་སྐོར་ལ་རྒྱག་རྒྱུ་དང་དེ་ནས་སློབ་སྦྱོང་། སྐབས་བཅོལ་ཟེར་བ་ཧ་ཅང་ཉུང་ཉུང་ཞིག་ལས་མི་འབྲི་བ་འདི་ཁོང་ཚོའི་དམིགས་ཡུལ་ཞིག་ཡིན་འདྲ་སྟེ།
    ང་ལ་མཚོན་ན་རྒྱ་གར་དུ་བསྡོད་གཏན་ཁེལ་ནས་བལ་ཡུལ་སྣེ་ལེན་ཁང་དུ་འཛུལ་་བ་དང་། མ་ཟད་རྒྱ་གར་གཞུང་ཚབ་ལ་འགྲོ་སྟབས་ཀྱང་བོད་ནང་དུ་སྡོད་པའི་དཀའ་ངལ་སོགས་དང་རྒྱ་མིའི་འཇུ་བཟུང་བཙོན་འཇུག་བྱས་པའི་དཔྱད་ཁྲ་སོགས་དཔང་རྟགས་ཆ་ཚང་ཁུར་ཡོད་པར་མ་ཟད་ཁོང་ཚོས་་ཀྱང་ཆབ་སྲིད་འབྲེལ་ཡོད་ཡིན་པའི་ངོས་ལེན་གྱིས་ལོགས་སུ་གནས་ཚུལ་མང་པོའི་སྟེང་དྲི་བ་བྱས་ཡོད་ན་ཡང་ཐ་མ་དེར་དེབ་དཀར་པོའི་སྟེང་སློབ་སྦྱོང་ཞེས་བྲིས་འདུག
    གང་ལྟར་དེ་འདྲ་ཞིག་རེད་ལགས།
    ང་ཚོ་མང་པོ་ཞིག་ནི།
    རྣམ་འགྲེལ་ལས།
    དེ་དག་སྔར་ཡང་གྲུབ་མཐའ་ནི། །རང་གི་འདོད་པ་ཉིད་ཀྱིས་འཛིན། །
    དེ་ནི་ཕྱིས་ཀྱང་ཅི་ཞིག་ལྟར། །གཞན་འཛིན་པ་ནི་ཅིས་མི་འཐོབ། །ཅེས་གསུངས་པ་ལྟར་གྱུར་ཡོད་དེ་ཕངས་སོ།།

    Reply
  5. ཟུར་མཚོ་རྒྱ་མཚོ། says:
    ལོ་ 14 སྔོན།

    ༄༅། །ངའི་མཐར་འཇུག་གི་རེ་བ་ནི་ཁྱེད་ཅག་བོད་གཞུང་གི་ལས་ཁུངས་ཁག་རྣམས་པ་དང་ལས་བྱེད་རྣམས་པ་ཚང་མར་སྙིང་ཁོངས་རུས་པ་གཏིང་ནས་སྙིང་གཏམ་ཡིན། བོད་ནང་ནས་གསར་དུ་འབྱོར་མཁན་རྣམས་དང་གཞིས་ལུས་བོད་མི་རྣམས་ནི་ཁྱེད་རང་ཚོ་ལ་ཧ་ཅང་གི་རེ་བ་དང་ཡིད་ཆེས་བློ་གཏད་ཆེ་བོ་བྱས་ནས་ཕ་མ་བུ་ཕྲུག་ཚང་མ་ཁ་གཏོར་གྱིས་སྐྱབས་བཅོལ་དུ་ཡོང་གི་ཡོད་པ་རེད། སྐྱབས་བཅོལ་ནང་ལ་སླེབས་པའི་བོད་མི་གསེར་འབྱོར་བ་ཚོ་ལ་མཐོང་ཆུང་དང་ཁྱད་གསོད་ཀྱི་རྣམ་པ་འདྲ་མིན་གྱི་ད་ནི་ཞེན་པ་ལོག་ནས་བོད་གཞུང་ལ་ཁ་གཏོང་བྱེད་མཁན་ཀྱང་མང་པོ་བྱུང་འདུག། དེའི་རྒྱུ་མཚན་ནི་ཁྱེད་རང་ཚོ་གསར་འབྱོར་རྣམས་ལ་སྐྱབས་བཅོལ་གྱི་ལག་འཁྱེར་ཡག་པོ་བཟོས་པ་དང་གཅིག་སྐྱབས་བཅོལ་པའི་ཐོབ་ཐང་མ་སྤྲད་པའི་ངེས་ལན་རེད། དངོས་གནས་ད་རེ་བ་མི་འདུག་ རང་རེའི་མི་སེར་རྣམས་ལ་ལྟ་སྐྱོང་བྱེད་མ་ཐུབ་པ་བོད་རང་བཙན་དང་རང་སྲིད་རང་སྐྱོང་གཅིག་ནི་སེམས་བདག་རེད། ད་ཨ་ཞང་རྒྱ་མི་ལ་དགོངས་དག་ཞུས་ནས་བོད་ལ་ལོག་ན་ཡག།???????????????????????????????????????

    Reply
  6. རིགས་པ་སྨྲ་བ། says:
    ལོ་ 14 སྔོན།

    བོད་ནས་གསར་དུ་འབྱོར་བ་རྣམས་ལ་རྒྱ་གར་དུ་སྐྱབས་བཅོལ་ལག་འཁྱེར་སྤྲོད་ཀྱི་མེད་པ་འདི་ནི་བོད་ཀྱི་བཙན་བྱོལ་གཞུང་གི་རྩ་བའི་སྲིད་ཇུས་དང་གཞུང་གི་ལས་ཁུངས་ཁག་གིས་ལག་ལེན་དུ་བསྟར་བའི་དགོས་མཁོའི་སྲིད་ཇུས་ཤིག་ཡིན། ང་ཚོ་བོད་དུ་ཡོད་པའི་སྐབས་སུ་ཁོ་ཚོས་ང་ཚོ་ལ་གཅེས་མདོག་དང་ཕན་ཐོགས་མདོག་སོགས་རྒྱལ་སྤྱིའི་ཁྲོད་དུ་ཁྱབ་བསྒྲགས་བྱས་ཏེ་ཁོ་ཚོའི་དགོས་མཁོ་བསྒྲུབས་ཡོད། ད་ལྟ་ང་ཚོ་དངོས་སུ་འདིར་བསླེབས་ཏེ་གཞུང་གི་ལས་ཁུངས་ཁག་གི་ནང་དུ་འགྲོ་དུས་ཁོ་ཚོས་འཇོན་མདོག་དང་ཤེས་ཡོན་ཡོད་མདོག་སོགས་བསྟན་ཏེ་ང་ཚོ་ལ་ཁ་ཡ་མི་བྱེད་པ་དང་མཐོང་ཆུང་བྱེད་ཀྱི་འདུག ཁོ་ཚོས་ང་ཚོ་བོད་དུའང་སྡོད་པར་མ་བཅུག་པ་དང་རྒྱ་གར་དུའང་སྡོད་མི་ཐུབ་པའི་དཀའ་ངལ་དེ་བསམ་བཞིན་དུ་བཟོ་བཞིན་པ་རེད། ཁོ་ཚོ་ལ་སྐྱབས་བཅོལ་ལག་དེབ་དང་མི་སེར་ལག་དེབ་དང་ཕྱི་རྒྱལ་གྱི་ལག་དེབ་སོགས་བཟོས་ནས་བེད་སྤྱོད་བྱེད་བཞིན་ཡོད་ནའང་བོད་ནས་ཡོང་བའི་དཀའ་སྡུག་མྱོང་མཁན་ཚོ་ལ་སྐྱབས་བཅོལ་ལག་དེབ་ཙམ་གྱི་རོགས་རམ་མི་བྱེད་པའི་གནས་ལུགས་འདི་ཅི་ཞིག་ཡིན་ནམ། བོད་ནས་ཡོང་བའི་སྐྱབས་བཅོལ་བ་ཚོས་བཙན་བྱོལ་དུ་སོ་སོས་ཧུར་བརྩོན་གནང་སྟེ་བོད་ཀྱི་རིག་གཞུང་དང་རྒྱལ་ཞེན་ཀྱི་ལ་རྒྱ་དང་བོད་ནང་གི་མི་དམངས་ལ་སེམས་ཤུགས་སྦར་བའི་འབྲེལ་མཐུད་གང་མང་གནང་ཡོད། གལ་སྲིད་ང་ཚོ་ལ་བོད་དུ་མཉམ་འཛོམ་གྱི་གོ་སྐབས་ཤིག་བྱུང་བ་ཡིན་ན་ང་ཚོས་ཁོ་ཚོ་ལ་ཡ་ལན་གྱི་སྡུག་སྦྱོང་དེ་ངེས་པར་དུ་སྤྱོད་དགོས་པ་དང་འདི་ནི་བོད་ནང་གི་མི་དམངས་ཚོས་ཀྱང་ངེས་པར་དུ་ཤེས་དགོས་ངེས་ཡིན།

    Reply
  7. འབྲོང་བུ་སོག་ཚ། says:
    ལོ་ 14 སྔོན།

    དྲྭ་གྲོགས་ཚོ། བོད་གཞུང་ལ་དེ་ལྟ་བུ་ཁ་གཏོང་རྒྱུ་ཅི་ཨེ་ཡོད་ན། ད་ལྟ་གཞན་དབང་སྟབས་བསྟུན་ཞིག་ལས་རང་ལ་དབང་བའི་རྒྱལ་ཁབ་ནི་ཡོད་ནི་མ་རེད། དམ་པའི་གསུངས་ལས། །རང་དབང་ཐམས་ཅད་བདེ་བ་སྟེ། །གཞན་དབང་ཐམས་ཅད་སྡུག་བསྔལ་རྒྱུ། ཞེས་གསུངས་ལས་ཤེས་པར་རིགས་སོ།

    Reply
  8. ཇ་མ་ says:
    ལོ་ 14 སྔོན།

    གསར་འབྱོར་བ་ཚོའི་སྐྱབས་བཅོལ་ལག་འཁྱེར་ལ་སྐོར་ལ་བོད་གཞུང་གི་ལས་སྣེ་ཚང་མའི་འགན་ཡག་པོ་འཁུར་དགོས་པ་རེད། ནང་དགོས་སུ་༧རྒྱལ་བ་རིན་པོ་ཆེའི་ཡང་འགན་འདི་འཁུར་དགོས་པ་ཞིག་རེད། གང་ཡིན་ཟེར་ན་བོད་མི་གསར་བ་ཚོ་༧རྒྱལ་བ་རིན་པོ་ཆེ་བསམ་ནས་ཡིད་ཆས་རེ་བཅོལ་བྱས་ནས་ཡོང་བ་རེད།

    Reply
  9. རྡོ་རྗེ་ཚེ་རིང་། says:
    ལོ་ 14 སྔོན།

    ངའི་ཐ་མའི་ཐག་གཅོད་དེ་རང་བཙན་གཙང་མའི་སྒྲིག་འཛུགས་དང་བོད་མིའི་རྩ་དོན་ལ་ཁ་ཞེ་གཉིས་མེད་ཀྱི་དོ་འཁུར་བྱ་མཁན་གྱི་གཞུང་གཅིག་སྐྱབས་བཅོལ་རྒྱུ་ཡིན་ལ། ད་བར་རང་གི་མངའ་འབངས་ལ་རང་གི་སྡུག་སྦྱོང་གཏོང་མཁན་གྱི་གཞུང་འདི་ལྟ་བུ་ཞིག་སྐྱབས་བཅོལ་བ་ངའི་མི་ཚེའི་ནང་གི་འགྱོད་པ་ཆེ་ཤོས་དེ་ཡིན།

    Reply
  10. རྡོ་རྗེ་ཚེ་རིང་། says:
    ལོ་ 14 སྔོན།

    ཁ་སང་སྐྱབས་བཅོལ་ལག་དེབ་མ་རགས་བར་དུ་བོད་གཞུང་ལ་་རེ་བ་ཆེན་པོ་བྱས་པ་ཡིན། ད་རེ་བྱས་ཀྱང་ཅང་མིན་འདུག

    Reply
  11. སྤྲོ་ཚིགས་དགེ་འདུན says:
    ལོ་ 14 སྔོན།

    ཅི་ཡང་བཤད་རྒྱུ་མིན། བཤད་ཀྱང་མི་འདོད་གི གང་ལྟར་གསར་འབྱོར་བ་ཚོ་གནས་གང་དུ་ཕྱིན་ཀྱང་སྡུག་མྱང་རྒྱུ་རེད། འདི་ངེད་ཅག་གསར་འབྱོར་བ་ཚའི་སྤྱི་མཐུན་གྱི་ལས་ལ་སྒོམས་རྒྱུ་ལས་ཐབས་གཞན་ཅི་ཞིག་ཡོད།

    Reply
  12. རྟུལ་ཕོད། says:
    ལོ་ 14 སྔོན།

    ད་ཡིན་ན་བོད་གཞུང་ལ་རེ་བ་རྒྱག་ས་ཞིག་མེད་ནོ་ངོ་མ་ཤེས་སོང་། ང་ཚོར་ལྟ་སྟངས་གཞན་ཞིག་ཡོད་པ་ཁོ་ཐག་རེད། ང་ལྟ་བུ་ལ་མཚོན་ན་དེའི་ཐད་ནས་དཀའ་ངལ་ག་ཚོད་ཡོད་ཀྱང་། འགྲོ་སོང་ག་ཚོད་བཏང་ཡང་། ད་བར་དུ་བོད་གཞུང་ལ་རེ་བ་མ་རླག་ཐབས་བྱས་པ་ཡིན་ཡང་། ད་ངོ་མ་ཧ་གོ་སོང་། རེ་བ་ཆད་སོང་། ཡུལ་གྱར་གཞུང་གིས་བོད་ནང་གི་སྤུན་ཟླ་ཚོའི་ཤ་ཁྲག་ཟོས་ནས་རྒྱག་པ་ཆགས་ཡོད་ཀྱང་དོན་དངོས་ཀྱིས་བོད་ནང་གི་བོད་མི་ཚོར་ཅི་ཞིག་ཕན་ཐོག་ཡོད་དམ། བོད་ནས་རེ་བ་ཆེན་པོ་དང་ཡིད་ཆེས་གཙང་མ་ཞིག་བཟུང་ནས་འདིར་ཡོང་མཁན་ཚོར་སྐྱབས་བཅོལ་བའི་ཐོབ་ཐང་ལག་ཁྱེར་ཙམ་ཡང་སྒྲུབ་ཐུབ་ཀི་མེད་ན་བོད་རྒྱ་ནག་གི་བཙན་འོག་ནས་སྐྱོབ་དགོས་པར་བཤད་པ་དེ་ཚོ་ནི་ཆོ་མེད་པ་རང་རེད། སྐྱག་རྫུན་རང་རེད་འདུག ད་ནས་བཟུང་བོད་ནང་གི་བོད་མི་ཚོ་ཟེར་ནས་སྐད་རྒྱག་རྒྱུའི་ཐོབ་ཐང་རྩ་བ་ནས་མེད་པ་བཟོ་དགོས་འདུག་ད་དཀོན་མཆོག་གསུམ། རྒྱུ་མཚན་བོད་ནང་གི་བོད་མིའི་ཚབ་མཚན་ཚོར་སྐྱབས་བཅོལ་ལག་ཁྱེར་ཙམ་གྱིས་རོགས་སྐྱོར་བྱེད་འདོད་མེད་པ་དང་བྱེད་ཐུག་གི་མེད་ན་བོད་ནང་གི་བོད་མི་ཚོ་ཇི་ལྟར་སྐྱོབ་རྒྱུ་ཡིན་ནམ????????????????????????????????????????????????????????????????????????????????????????????????????????

    Reply
  13. ཟུར་མཚོ་རྒྱ་མཚོ། says:
    ལོ་ 14 སྔོན།

    ༄༅། །བཀའ་ཤག་དང་སྤྱི་འཐུས། བདེ་སྲུང་དང་ནང་སྲིད་ལ་སོགས་པ་བོད་གཞུང་དང་གཞུང་ཞབས་རྣམས་ལ་ཞུ་རྒྱུ།
    ༢༠༠༤དང་༢༠༠༥བར་བོད་ནས་གསར་དུ་འབྱོར་བའི་བོད་མི་མང་པོ་ཞིག་ལ་གནས་སྐོར་དང་གཞན་ཞེས་པའི་མིང་སྣ་ཚོགས་ཤིག་གཏགས་ནས་བོད་གཞུང་ནས་སྐྱབས་འབྱོར་ལག་འཁྱེར་(R.C)ཞེས་པ་དེ་ཡང་བཟོ་ཐབས་ཀྱི་རོགས་རམ་ཡག་པོ་བྱེད་ཀྱི་མི་འདུག། གང་ཡིན་ཟེར་ན་དེ་སྔོན་བདེ་སྲུང་ལས་ཁུངས་ལ་སྐད་ཆ་དྲི་བར་འགྲོ་སྐབས་སྐད་ཆ་རྫིག་རྫིག་དང་ཤོད་ཤོད་བཏང་བ་མ་ཟད་བོད་ལ་ལོག་རྒྱུག་ཟེར་འདུག་པས། དེ་འདྲ་བའི་སྐད་ཆ་བཤད་སྟངས་དེ་ཚོ་རྒྱ་ནག་གི་ལས་ཁུངས་ཁག་དང་ལས་བྱེད་ཚོས་ཀྱང་ཤོད་ཀྱི་མི་འདུག། གལ་སྲིད་སྐྱབས་འབྱོར་ལག་དེབ་བཟོ་ཐུབ་ཀྱི་མེད་ན་གསལ་འགྲེལ་གནང་རོགས་ ང་རང་ཚོས་ཐབས་ཤེས་གཞན་བརྒྱུད་ནས་བཟོ་ན་འདྲ་བོད་ལ་ལོག་ནས་རྒྱ་ནག་གི་R.Cཨེ་བཟོ་ཐུབ་ལྟ་རྒྱུ་དང་རྒྱ་ནག་གི་མི་སེར་བྱེད་རྒྱུ་ལས་རླག་མ་སོང།

    Reply
  14. གསར་འབྱོར། says:
    ལོ་ 14 སྔོན།

    གསར་རྙིང་གི་ལྟ་བ་ཤུགས་ཆེན་ཡོད་མཁན་གྱི་ལས་བྱེད་ཁ་གཅིག་གི་ངོ་གདོང་ལ་སྤྲེལ་ལེད་བྱེད་པ་ལས་བོད་ནང་དུ་ཕྱིར་ལོག་བྱེད་པའམ་རང་དབང་དང་འདྲ་མཉམ་གྱི་ཐོབ་ཐང་ཡོད་པའི་ཕྱི་རྒྱལ་ལོང་བ་ཞིག་ལ་འགྲོ་ཐབས་བྱས་ན་ཡག་ཤོས་རེད། གནས་དེ་རུ་ཁྱོད་ལས་ཁུངས་ནང་དུ་འཇུ༹ལ་མ་ཐག་ནས་ངོ་གདོང་ལ་ལྟས་ནས་དགའ་མིན་གྱི་ཕྱོགས་ཞེན་བྱེད་མཁན་མེད་ལ་སྐུ་ངོ་དང་ཕྱུག་བདག་ཡིན་འདོག་གིས་འགྱིང་ནས་སྡོད་མཁན་ཡང་མེད།

    Reply
  15. རོང་རྒྱལ་ཐང༌། says:
    ལོ་ 14 སྔོན།

    གསར་འབྱོར་བའི་སྐྱབས་བཅོལ་ལག་འཁྱེར་གྱི་དཀའ་ངལ་དེ། ད་ཐེངས་གཅིག་པོ་ག་ལ་ཡིན།
    བདུན་ཅུ་དོན་དགུའི་ཚུན་ཆད་ལ་སླེབས་པ་ལ་གསར་འབྱོར་བ་ཟེར་གི་ཡོད་ལ། གསར་འབྱོར་བ་ལ་གྲོས་ཆོད་གྲོས་འཆར་ཡང་རབས་དང་རིམ་པ་བཞག་ཡོད་ནི་རེད། ཡིན་ཡང་བཙན་བྱོལ་བའི་ཐོབ་ཐང་གཅིང་ཀྱང་མེས་པས་ཕྱིར་བོད་ཡུལ་དུ་ལོགས་དགོས་པའང་གྲོས་འཆར་བཞག་ཡོད་ནི་རེད། དེ་གཞུང་གི་འགྲོ་སྟངས་རེད། ད་ལྟའི་ལག་ཁྱེར་སྐོར་འདི་མགོ་བཀའ་ཁྲི་ནས་བལ་ཡུལ་གྱི་ལས་བྱེད་དཀྱིལ་མ་སོགས་ཀྱིས་ལས་ནོར་ཞིག་རེད། དེ་ཡིན་པའི་རྒྱུ་མཚན་གྱིས་འབྱུང་འགྱུར་འདི་ལྟར་དཀའ་ངལ་འཕྲད་དང་འཕྲད་ཀྱི་ཡིན་པ་སྨོས་ཅི་དགོས། མི་འགྱངས་བར་བཀའ་ཁྲི་གསར་པ་སླེབས་དུས། གསར་འབྱོར་བ་སྤྱི་བའི་འཐུས་མི་སོགས་ཀྱིས་སྐྱབས་བཅོལ་ལག་ཁྱེར་སྐོར་བགྲོ་གླེང་བྱ་དགོས་པ་མ་ཟད། ད་དུང་གསར་འབྱོར་བའི་ཐཽབ་ཐང་ཀྱང་གླེང་དགོས་པ་སྤྱི་བའི་འཐུས་མི་ལ་རགལས་པ་ན། འདི་སྐོར་རྣམ་གཡེང་ལ་མ་བཏང་བར་སོ་སོ་ལ་དཔེ་བཞག་ཏེ་གཙང་གསལ་བཟོ་དགོས་པའི་དུས་ལ་སླེབས་ཡོད་པ་རེད།

    Reply
  16. འབྲོང་བུ་སོག་ཚ། says:
    ལོ་ 14 སྔོན།

    རང་རེའི་སྐྱབས་བཅོལ་བའི་ལག་འཁྱེར་དེ་རྒྱ་གར་གཞུང་གིས་ཕྱིར་འགྱངས་མི་བྱེད་པའི་རྒྱུ་མཚན་ནི། ཕལ་ཆེར་༧རྒྱལ་བ་རིན་པོ་ཆེ་བོད་ཀྱི་དབུ་འཁྲིད་ནས་དགོངས་པ་ཞུས་པ་ལ་བརྟེན་ནས་བྱུང་བ་ཞིག་མ་ཡིན་ནམ།?? གང་ལགས་ཤེ་ན། ད་ལྟ་རྒྱ་གར་གཞུང་གི་སྲིད་བྱུས་ཀྱི་ལང་ཕྱོགས་ཤིག་ལ་བཙན་བྱོལ་བོད་གཞུང་འདི། བཙན་བྱོལ་དུ་ཡོད་པའི་བོད་མི་ཡོངས་ཀྱི་ཚབ་མཚོན་པའི་གཞུང་མ་ཡིན་པར། ༧རྒྱལ་བ་རིན་པོ་ཆེ་དང་། ཁོང་གི་ཆོས་ཕྱོགས་ཀྱི་འབྲེལ་ལམ་གནང་སའི་ཆེད་དུ་བཙུགས་པའི་གཞུང་ཞིག་ལ་ངོས་འཛིན་གནང་གི་ཡོད་པས། ད་༧རྒྱལ་བ་རིན་པོ་ཆེ་བོད་ཀྱི་དབུ་འཁྲིད་མིན་ན། སྤྱི་བྱིངས་བོད་རིགས་ཡོངས་ལ་དེ་ལྟ་བུའི་འཛུགས་རྒྱུའི་ཐོབ་ཐང་ཞིག་ཁྲིམས་ཀྱི་ཐོག་ནས་མི་སྤྲད་རྒྱུའི་རྒྱ་གར་གཞུང་གིས་སྔོན་བརྡ་ཞིག་མ་ཡིན་ནམ།

    Reply
  17. རིག་པའི་རལ་གྲི says:
    ལོ་ 14 སྔོན།

    བཅོས་མིན་སེམས་ཀྱི་ན་ཟུག་ཆེར་ལང་ནས། །རིང་མིན་འགྱོག་པོར་ཀློག་རྗེས་ཚིག་བཅད་འགའ། །དབང་མེད་སྐྱོ་བའི་ངང་ནས་དུས་བབ་ཐོག འགོག་མེད་ཤོར་བ་འདི་ལ་གསན་པར་འཚལ། ཡུན་ནས་གཉེན་ཉེར་སོང་བའི་རྒྱ་ནག་གིས། །དྲངས་བདེན་མེད་པའི་གཉའ་གནོན་བཤུས་གཞོག་འོག། །ས་འཐར་འཁྱམས་པའི་བོད་པའི་སྐྱབས་བཅོལ་བ། །རིང་ནས་སེམས་ཀྱིས་འབྲེལ་བའི་རྒྱ་གར་ལ། །ཁ་ཞེ་མེད་པའི་སྐྱབས་སུ་བཅོལ་ན་ཡང་། །རང་གི་ཁེ་ཕན་ཆེད་དུ་རྩེད་ཆས་སུ། །བེད་སྤྱོད་ལས་གཞན་མེད་པའི་ངང་ཚུལ་འདིས། བཙན་བྱོལ་གཞུང་གིས་གོམ་པ་གསར་བ་ཞིག མི་འདོད་ངང་ནས་མི་སྤོ་ཐབས་མེད་རེད། ཀུན་ལ་ཕན་པའི་ཐབས་ལམ་ལེགས་ཤོས་འགའ། །དོན་དུ་ལེགས་པའི་ལམ་ལས་འདས་ན་ཡང་། །ཅིས་ཀྱང་ཀུན་གྱིས་དཔྱད་པ་མཛད་པར་རིག རྒྱ་གར་མི་སེར་འགྱུར་བའི་ཐབས་ལམ་དང་། །གཞུང་འབྲེལ་ངང་ནས་གཞན་དུ་ཡུལ་སྤོས་དང་། །བཙན་གནོད་འོག་ཏུ་ལོག་རྒྱུ་གསུམ་པོ་རེད། ་ །སྣང་མེད་བཞག་ན་འགྲིག་མེད་བལ་ཡུལ་དང་། །བོད་ཀྱི་གནས་ཚུལ་ཉིད་དང་རྒྱ་གར་དང་། །བོད་ཀྱི་ཡུལ་མིའི་བར་གྱི་འབྲེལ་ལམ་བལྟོས། །སྔོན་སོང་འབྲས་རྟགས་ཕར་བལྟས་ཚུལ་གསལ་ཀྱང་། །སྐྱིད་ཉལ་ངང་ནས་རྨོངས་དད་ཀྱིས་སྒྲིབ་ནས། །འགྲིགས་འགྲོ་སྙོམས་པས་བོད་མི་སྐྱབས་མི་ཐུབ།
    རྐྱེན་ངན་མུན་པ་གཏིབས་པོའི་ཀློང་རོལ་ནས། །རྣམ་དཔྱོད་སྒྲོན་མེ་ཆུང་ངུ་ཀུན་གྱིས་སྦོར། །ལེགས་ཉེས་གནད་ཀྱི་ཐོག་ལ་ཕྱི་བཤོལ་དང་། སྒྱིད་ལུགས་མེད་པའི་ངང་ནས་བགྲོས་ན་ལེགས། ཁྲིམས་འཐུན་མེད་པའི་ལས་ཀ་གང་བྱས་ཀྱང་། །ནག་ཉེས་ཅན་གྱི་གྲས་ལས་མི་འདས་པས། །མི་རབས་ཚ་རྒྱུད་ཀུན་ཀྱང་ནག་ཉེན་ཅན། །བྱེད་པར་འདོད་དམ་དབུ་ནག་སྤུན་ཟླ་དག འཛམ་གླིང་བགྲོད་བཞིན་སེམས་རྨ་ཇེ་གཟེར་རེད། །གནས་ཚུལ་དྲན་བཞིན་སེམས་མུན་ཇེ་གཏིབས་རེད། །འོན་ཀྱང་གང་ཡང་ཅིས་ཀྱང་བྱེད་ཐུབ་པས། །ཞུམས་མེད་སྤོབས་པ་འཆང་ཞིག་སྤུན་ཟླ་དག

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese