སློབ་གསོའི་ནང་དོན་གཞན་ལ་མ་བཤད།

ཕྱི་ཚེས་ ༢༠ ཉིན་ཀིརྟི་དགོན་པའི་ནང་ཝུན་ཁྲན་རྫོང་དང་མོང་འན་རྫོང་། སྐ་ཁོག་རྫོང་། མཛོད་དགེ་རྫོང་། འབར་ཁམས་རྫོང་། རྔ་པ་རང་སྐྱོང་ཁུལ། རྔ་པ་རྫོང་བཅས་ཀྱི་ལས་བྱེད་པ་ ༨༠༠ ལྷག་བསླེབས་ཏེ། ཉིན་དེའི་སྔ་དྲོར་དགེ་འདུན་པ་རྣམས་འདུ་ཁང་གི་རྡོ་གཅལ་འོག་ཏུ་ཚོགས་བཅུགས་ཏེ། རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་འཆར་ཅན་ལྟར་སྤེལ་བ་དང་། ཕྱི་དྲོར་ལས་བྱེད་པ་དང་དྲག་ཆས་དམག་མི། ཉེན་རྟོག་མི་སྣ་བཅས་བཅུ་སྐོར་རེ་མཉམ་དུ་གྲྭ་ཤག་རེ་རེ་བཞིན་ཉུལ་ནས་གྲྭ་པ་རྣམས་ལ་དྲི་བ་དྲིས་པ་དང་བསམ་ཚུལ་ཤོད་འཇུག་པ་སོགས་བྱས་ཤིང་། བློར་མ་བབ་པ་རེ་བྱུང་སྐབས་གང་བྱུང་དུ་གཅར་རྡུང་བྱེད་པ་དང་། རྭ་སྐོར་ནང་ནས་བསྡམས་བཀྱིག་གིས་ཡུན་རིང་བཞག་སྟེ། ནང་ལོགས་ཡོངས་རྫོགས་སྔོག་བཤེར་བྱས་པ་སོགས་བྱས་འདུག

ཕྱི་ཚེས་ ༡༩ ཉིན་རྒྱལ་གཅེས་ཆོས་ཀྱི་སློབ་གསོ་སྤེལ་མཁན་རྒྱ་གཞུང་གི་དཔོན་པོ་དེས་གྲྭ་པ་ཚོ་ལ་ཁྱེད་ཚོས་འགྲོ་ ཤེས་འདུག་ཤེས་མ་བྱས་ཚེ་སྐར་མ་གཅིག་གི་རིང་ཁྱེད་ཚོ་རྩ་མེད་བཟོ་རྒྱུའི་དབང་དང་སྟོབས་ང་ཚོར་ཡོད་ཚུལ་སོགས་བརྗོད་ནས་འཇིགས་སྐུལ་བྱས་ཡོད་འདུག ཆབ་སྲིད་སློབ་གསོ་སྤེལ་བའི་ནང་དོན་ཁག་ཕྱི་ཕྱོགས་སུ་བཤད་རྒྱུ་ཕར་ཞོགས་རང་གི་ཕ་མ་ལའང་གཏན་ནས་བཤད་མི་ཆོག་ཚུལ་བཙན་བསྒྲགས་བྱས་ཡོད་འདུག  

ཕྱི་ཚེས་ ༢༠ ཉིན་ཀིརྟིའི་དགོན་མཐའི་མ་ཎྀ་འཁོར་ཁང་ཁ་ཤས་བསྐྱར་དུ་སྒོ་ཕྱེས་ཏེ། མི་མང་ལ་སྐོར་བ་བྱེད་ས་ཡོད་པའི་རྣམ་འགྱུར་བསྟན་ཡོད་ཀྱང་། མི་མང་ཡོང་མཁན་མ་རག་སྟབས་མི་རེར་རྒྱ་སྒོར་ ༣༠ རེ་སྤྲད་དེ་འཁོར་ལོ་སྐོར་བཅུག་པ་དང་། དྲག་རྩུབ་ཀྱིས་འཁོར་ལོ་སྐོར་བཅུག་པ་སོགས་བྱས་ནས་པར་དང་བརྙན་པར་བླངས་ཡོད་འདུག

ཕྱི་ཚེས་ ༡༧ ཙམ་ནས་རྔ་པའི་འབྲོག་ཕྱོགས་ཀྱི་རྨེའུ་རུ་མ་དང་གཅའ་རུ་བ། ཕྱུགས་ལས་གོང་འོག རྭ་རུ་བ། ནག་ཚང་མ་སོགས་ཀྱི་རི་གྲོང་ཚང་མར་དམག་མི་མང་པོ་བསླེབས་ཡོད་པ་དང་། འབྲོག་པ་རྣམས་ཀྱི་རུ་བ་གར་ཡོད་སར་སོང་ནས་ཡི་གེ་ཞིག་ལ་ཞི་དྲག་སྣ་ཚོགས་ཀྱིས་མཛུབ་ཐེལ་རྒྱག་འཇུག་གི་ཡོད་ཀྱང་། འབྲོག་དམངས་ཚོར་ཡི་གེ་དེའི་ནང་དོན་ཅི་ཡིན་ཤེས་རྟོགས་བྱེད་ཅིག་མི་འདུག  

ཉིན་ཤས་སྔོན་རྨེའུ་རུ་མའི་རུ་ཆེན་བཞི་བའི་ཕ་ཨ་དགའ་དང་མ་རིག་ལི་གཉིས་ཀྱི་བུ་རང་ལོ་ ༢༤ ཡིན་པའི་ཀིརྟི་དགོན་གྱི་གྲྭ་ཚེ་རིང་ལགས་འཛིན་བཟུང་བཀག་ཉར་བྱས་ཡོད་ཀྱང་། ད་ལྟ་གང་དུ་ཡོད་མེད་ཀྱི་གནས་ཚུལ་གསལ་པོ་ཤེས་རྟོགས་ཐུབ་མི་འདུག  

ཕྱི་ཚེས་ ༡༩ ཉིན་དགོན་པའི་གླིང་ཡོངས་ལ་པར་ལེན་འཕྲུལ་ཆས་དང་སྒྲ་ལེན་འཕྲུལ་ཆས་མང་པོ་བཞག་སྟེ། གྲྭ་པ་རྣམས་ཀྱི་ཉིན་མཚན་དུས་དྲུག་གི་འགྲོ་འདུག་སྤྱོད་གསུམ་ལ་ཞིབ་བཤེར་ནན་མོ་བྱེད་ཀྱི་ཡོད་འདུག

གསུམ་པའི་བཅུ་དྲུག་གི་རྗེས་སུ་འཛིན་བཟུང་བཀག་ཉར་བྱས་པ་རྣམས་རྔ་པ་རང་སྐྱོང་ཁུལ་ཁོངས་ཀྱི་རྫོང་ཁག་གཞན་དུ་ཁྱེར་ཡོད་ཚུལ་རེ་གོ་ཐོས་འདུག་ཀྱང་གསལ་པོ་ཤེས་ རྟོགས་ཡོང་གི་མེད་འདུག་ཅིང་། དེ་སྔོན་འཛིན་བཟུང་བཀག་ཉར་བྱས་པ་ཁག་ཅིག་གློད་གྲོལ་བཏང་ཡོད་ཀྱང་བདུན་ཕྲག་གཉིས་རེ་སོང་མཚམས་ཀྱང་ད་དུང་རང་མགོ་མི་ཐོན་པའི་གནས་སྟངས་ཡོད་མུས་ཡིན་པ་སོགས་བཀག་ཉར་བྱས་པ་རྣམས་གཅར་རྡུང་མནར་གཅོད་ཀྱི་གོ་རིམ་སྐྱི་གཡའ་བ་མང་པོ་བརྒྱུད་དགོས་ཀྱི་ཡོད་དེ།

བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་བཏང་འབྱོར་བྱུང་།