ནགས་ལྷ་གནས་རི་ནི་ཨོ་རྒྱན་པདྨའི་གཏེར་རི་དང་། ས་གནས་ཡུལ་མིས་ཟས་ཁམ་གང་ཟ་དུས་ཀྱང་མཆོད་ཁ་འཕེན་ཡུལ་ཡིན། གལ་སྲིད་རྒྱ་གཞུང་གིས་གཏེར་ཁ་སྔོག་འདོན་བྱས་པ་ཡིན་ན། རང་སྲོག་གཏོང་དགོས་ཀྱང་མཐའ་གཅིག་ཏུ་ངོ་རྒོལ་བྱ་ངེས་རེད་ཟེར།
ན་ནིང་སྟོན་མཇུག་འབྲི་རུ་རྫོང་གི་ནགས་ལྷ་གནས་རིར་གཏེར་ཁ་སྔོག་འདོན་བྱ་རྒྱུར་ས་གནས་མི་མང་གིས་ངོ་རྒོལ་ཞུ་འབོད་བྱས་སྐབས། རྒྱ་གཞུང་གིས་མི་མང་ ༣༠༠ འཇུ་བཟུང་བྱས་ཏེ་གཅར་རྡུང་འདྲི་གཅོད་ཚ་ནན་བྱས་རྗེས་ཀློད་ཡོད་ཀྱང་། རང་ལོ་ ༣༠ ཙམ་ཡིན་པའི་དཀོན་མཆོག་ཐར་པ་དང་། རང་ལོ་ ༤༠ ཡས་མས་ཡིན་པའི་ཁྲོ་བྷོ། དེ་མིན་ཚྭ་ཆུ་ཞང་གི་མི་གཉིས་བཅས་རྒྱ་གཞུང་གི་བཀག་ཉར་འོག ད་ལྟའང་གར་ཡོད་གསལ་ཁ་མེད་པ་ཆགས་ཡོད། དེ་བཞིན། ལོ་སྔོན་མའི་ཕྱི་ཟླ་ ༡༡ པའི་ནང་རྫ་སེར་ཤུལ་དགོན་པའི་བླ་མ་ཁྲི་པ་རིན་པོ་ཆེ་མཆོག་ནགས་ཤོད་ལུང་བར་ཕེབས་ཏེ་མི་མང་གིས་མཇལ་ཁ་ཞུ་སྐབས། ཉེན་རྟོག་དམག་མིས་མང་ཚོགས་བླ་མར་མཇལ་མི་ཆོག་པའི་བཙན་བཀའ་བཏང་སྟེ་བཀག་སྡོམ་བྱས་ཡོད་ཅིང་། སྐབས་དེར་མི་མང་གིས་ཆོས་དད་རང་དབང་དགོས་པའི་ངོ་རྒོལ་སྐད་འབོད་བྱས་སྐབས། ཉེན་རྟོག་པས་ཧོར་རྨེ་ས་ཁུལ་གྱི་མི་ ༥ འཇུ་བཟུང་བྱས་རྗེས་མི་གཅིག་ཕྱིར་ཀློད་ཡོད་ནའང་། གཞན་དག་མུ་མཐུད་བཀག་ཉར་གྱིས་ད་ལྟ་ཁོང་ཅག་གང་དུ་ཡོད་པ་དང་གནས་སྟངས་ག་རེ་ཆགས་ཡོད་མེད་ཤེས་རྟོགས་ཐུབ་ཀྱི་མི་འདུག་ཟེར།
ཕྱི་ཚེས་ ༡༧ ཉིན་འདི་གའི་གསར་འགོད་པ་དབུས་སྣེ་ལེན་ཁང་དུ་བསྐྱོད་དེ། ཉེ་སྔོན་བོད་ནས་གསར་དུ་འབྱོར་བའི་འབྲི་རུ་རྫོང་གི་ཡུལ་མི་ཆོས་དགའ་ལགས་སུ། ན་ནིང་སྟོན་མཇུག་འབྲི་རུ་རྫོང་གི་ནགས་ལྷ་གནས་རིར་རྒྱ་གཞུང་གིས་གཏེར་ཁ་སྔོག་འདོན་སྐབས་རྙོག་ཟིང་ལངས་པའི་སྐོར་ལ་བཅར་འདྲི་ཞུས་སྐབས་ཁོང་གིས་ངོ་སྤྲོད་གནང་དོན། ན་ནིང་སྟོན་མཇུག་འབྲི་རུ་རྫོང་སྡ་ཐང་ཞང་དུ་ཡོད་པའི་ནགས་ལྷ་གནས་རིར་རྒྱ་གཞུང་གིས་གློག་ཁང་གསར་རྒྱག་ལ་ཁ་གཡར་ཏེ་གཏེར་ཁ་སྔོག་འདོན་བྱས་པར། ས་གནས་མི་མང་ ༧༠༠ ལྷག་གིས་ངོ་རྒོལ་སྐད་འབོད་བྱས་པར་བརྟེན་རྒྱ་མི་གཏེར་བརྐོ་བ་རྣམས་ཕྱིར་ལོག་དགོས་བྱུང་ཡོད་ནའང་། རྗེས་སུ་རྒྱ་གཞུང་གི་ཉེན་རྟོག་པས་ཞིབ་བཤེར་རྩད་གཅོད་བྱས་ཏེ། སྐབས་དེའི་ངོ་རྒོལ་ཁྲོད་ཞུགས་མཁན་ ༣༠༠ ལྷག་འཇུ་བཟུང་གིས་གཅར་རྡུང་འདྲི་གཅོད་བྱས་སོང་།
ད་དུང་བཙན་ཤེད་ཀྱིས་གཏེར་ཁ་སྔོག་འདོན་ལ་མོས་མཐུན་ཡོད་པའི་ཡིག་ཆའི་སྟེང་མཛུབ་ཐེལ་རྒྱག་ཏུ་བཅུག་པ་དང་། མི་རེའི་ལག་ནས་རྒྱ་སྒོར་ཁྲི་བཞི་ལྔ་རེ་གཏའ་མར་བླངས་རྗེས། གནམ་ནི་གུང་བྲན་ཏང་གི་གནམ་ཡིན་པ་དང་། ས་ནི་གུང་བྲན་ཏང་གི་ས་ཡིན་པས། ལོ་རྗེས་མར་གཏེར་ཁ་སྔོག་འདོན་བྱེད་སའི་གནས་རིའི་ཉེ་འཁོར་དུ་མི་སུ་ཞིག་སོང་བ་ཡིན་ན། དེ་ཆབ་སྲིད་ཀྱི་གནད་དོན་ལ་བརྩིས་ཏེ་བཙོན་འཇུག་ཁྲིམས་ཐག་གཅོད་རྒྱུ་ཡིན་ལ། མི་སུ་ཞིག་གིས་ཕྱི་ཕྱོགས་སུ་སྐད་ཆ་འདྲ་མིན་བཤད་པ་ཡིན་ན་གཏའ་མར་བླངས་པའི་སྒོར་མོ་ཕྱིར་སྤྲོད་རྒྱུ་མིན་པ་སོགས་བཙན་དྲག་འཇིགས་སྐུལ་སྣ་ཚོགས་བྱས་མཐར་མི་མང་རྣམས་ཕྱིར་ཀློད་སོང་།
སྐབས་དེར་རང་ལོ་ ༣༠ ཙམ་ཡིན་པའི་འབྲུ་རི་རྫོང་གི་དཀོན་མཆོག་ཐར་པ་ལགས་དང་། རང་ལོ་ ༤༠ ཡས་མས་ཡིན་པའི་འབྲུ་རི་རྫོང་གི་ཁྲོ་བྷོ་ལགས། གཞན་ཚྭ་ཆུ་རྫོང་གི་བོད་མི་གཉིས་བཅས་ཀྱིས་གཏེར་ཁ་སྔོག་འདོན་གྱི་མོས་མཐུན་ཡིག་ཆར་མཛུབ་ཐེལ་མ་བརྒྱབ་པར་བརྟེན། ད་ལྟ་རྒྱ་གཞུང་གི་བཀག་བསྐྱིལ་འོག་གར་སོང་ཆ་མེད་དུ་གྱུར་ཡོད། ཅེས་བརྗོད་བྱུང་།
གཞན་ཡང་། ཁོང་གིས་བརྗོད་པ་ལྟར་ན། ལོ་སྔོན་མའི་ཕྱི་ཟླ་ ༡༡ པའི་ནང་རྫ་སེར་ཤུལ་དགོན་པའི་བླ་མ་ཁྲི་པ་ཆེན་པོ་ཆེ་ལགས་ནགས་ཤོད་དུ་ཕེབས་ཏེ་མང་ཚོས་ཀྱིས་མཇལ་ཁ་ཞུ་སྐབས། རྒྱ་ནག་གི་ཉེན་རྟོག་པས་བཀག་སྡོམ་བྱས་ཏེ་བླ་མར་མཇལ་ཁ་ཞུ་བཅུག་མེད་སྟབས། མང་ཚོགས་ཀྱིས་ང་ཚོར་ཆོས་དད་རང་དབང་མི་འདུག་ཅེས་སྐད་འབོད་ངོ་རྒོལ་བྱས་ཤིང་། སྐབས་དེར་ཉེན་རྟོག་པ་ཚོས་ནག་ཆུ་ཧོར་མེ་ས་ཁུལ་གྱི་མི་ ༥ འཇུ་བཟུང་བྱས་ཡོད་པ་དང་། རྗེས་སུ་མི་གཅིག་ཀློད་གྲོལ་བཏང་ཡོད་ནའང་། རོགས་པ་གཞན་རྣམས་ཉེན་རྟོག་པས་བཙན་འཁྲིད་བྱས་ཏེ་ད་ཆར་གར་སོང་ཆ་མེད་ཆགས་ཡོད། ཅེས་བརྗོད་སོང་།
མཇུག་མཐར་ཁོང་གིས་འབོད་སྐུལ་གྱི་ཚུལ་དུ་བརྗོད་རྒྱུར། དེང་སྐབས་འབྲི་རུ་རྫོང་གི་རི་སྒང་གང་སར་གཏེར་ཁ་འཚོལ་བཤེར་བྱེད་མཁན་རྒྱ་མི་རེ་གཉིས་མེད་སའི་ལུང་བ་གཅིག་ཀྱང་ཡོད་པ་མ་རེད། རྒྱ་གཞུང་གིས་ད་ལོའི་དཔྱིད་ཀ་ས་གཞིར་དྲོད་བབས་རྗེས་ནགས་ལྷ་གནས་རིའི་གཏེར་ཁ་བསྐྱར་དུ་བསྔོག་རྒྱུ་ཡིན་སྐོར་གོ་སོང་། མང་ཚོགས་ཀྱི་ངོས་ནས་གནས་རི་འགངས་ཆེན་གྱི་གཏེར་ཁ་སྔོག་འདོན་དང་། ཆུ་མཛོད་བརྒྱབ་སྟེ་གློག་ཁང་སོགས་འཛུགས་སྐྲུན་བྱས་ཏེ། གནས་རི་དང་ས་གཞིར་གཏོར་སྐྱོན་བཏང་བ་ལ་བརྟེན་ཏེ། ས་འགུལ་དང་ས་རུད་ཆུ་ལོག་སོགས་རང་བྱུང་གི་གནོད་འཚེ་འབྱུང་རྒྱུར་སེམས་འཚབ་ཆེན་པོ་བྱེད་ཀྱི་འདུག ལྷག་པར་དུ་ནགས་ལྷ་གནས་རི་ནི་ཨོ་རྒྱན་པདྨའི་གཏེར་རི་ཡིན་པས། ས་གནས་ཡུལ་མི་རྣམས་ཀྱིས་ཟས་ཁམ་གང་ཟ་དུས་ཀྱང་མཆོད་ཁ་འཕེལ་ཡུལ་ཡིན། འབྲི་རི་རྫོང་གཅིག་པུ་ཙམ་མ་ཡིན་པར། པ་ཆེན་དང་སོག་རྫོང་། ལྷ་རི་རྫོང་སོགས་ཀྱི་ཡུལ་མི་ཚང་མས་གལ་སྲིད་ནགས་ལྷ་གནས་རིར་གཏེར་ཁ་སྔོག་འདོན་བྱས་པ་ཡིན་ན། རང་སྲོག་གཏོང་དགོས་ཀྱང་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཅེས་དམ་བཅའ་བརྟན་པོ་བཟུང་ཡོད་པ་རེད། གལ་སྲིད་རྒྱ་གཞུང་གིས་མི་མང་གི་སྐད་ཆར་ཉན་འཇོག་མ་བྱས་པར་སྔར་བཞིན་གཏེར་ཁ་བརྐོས་པ་ཡིན་ན། ཡུལ་དེར་མི་ཤི་རྟ་འགྱེད་ཀྱི་དོན་རྐྱེན་ཆེན་པོ་ཞིག་འབྱུང་རྒྱུའི་ཉེན་ཁ་ཏན་ཏན་ཡོད་པ་རེད། ཅེས་བརྗོད་སོང་།
གསར་འགོད་པ། ཚེ་རིང་རྒྱལ།
མི་ཤི་རྟ་འགྱེད་ཡིན་ནམ། མི་ཤི་རྟ་འགྱེལ་ཞེས་བྲིས་མི་དགོས་སམ།