ཟླ་འདིའི་ཕྱི་ཚེས་ ༢༧ ཉིན་དབུས་འོས་བསྡུ་ལྷན་ཁང་གིས་སྐབས་གསུམ་པའི་བཀའ་བློན་ཁྲི་པ་དང་སྐབས་བཅོ་ལྔ་པའི་བོད་མི་མང་སྤྱི་འཐུས་ཀྱི་འོས་བསྡུའི་གྲུབ་འབྲས་གསལ་བསྒྲགས་གནང་སྟེ་ཁྲིམས་ལུགས་ཆེད་མཁས་པ་བློ་བཟང་སེང་གེ་མཆོག་སྐབས་གསུམ་པའི་བཀའ་བློན་ཁྲི་པར་བདམས་ཐོན་བྱུང་ཡོད་པ་ལྟར། ཁ་སང་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་བོད་མི་མང་གིས་ཐད་ཀར་འོས་འདེམས་བྱས་པའི་སྐབས་གསུམ་པའི་བཀའ་བློན་ཁྲི་པ་བློ་བཟང་སེང་གེ་མཆོག་ལ་འཚམས་འདྲིའི་བཀྲ་ཤིས་བདེ་ལེགས་ཞུ་ཡིག་ཅིག་ཕུལ་འདུག
ཁོང་གི་འཚམས་འདྲིའི་ནང་འཁོད་དོན། ཁ་སང་དབུས་སྤྱི་ཁྱབ་འོས་བསྡུ་ལྷན་ཁང་ནས་བཀའ་ཁྲི་གསར་པའི་འོས་བསྡུའི་གྲུབ་འབྲས་གསལ་བསྒྲགས་གནང་བ་ལྟར། སྐུ་ཞབས་བློ་བཟང་སེང་གེ་ལགས་སུ་མང་མོས་མཐོ་པོའི་ཐོག་ནས་བཀའ་ཁྲིར་འོས་འདེམས་བྱུང་བ་དེར་ང་དང་ངའི་ལས་རོགས་བཀའ་ཤག་གི་བཀའ་བློན་ཚང་མས་ཁོང་ལ་འཚམས་འདྲིའི་བཀྲི་ཤིས་བདེ་ལེགས་ཞུ་བཞིན་ཡོད། ད་རེས་ཀྱི་འཕོ་འགྱུར་དེ་གལ་གནད་ཆེ་བའི་འཕོ་འགྱུར་ཞིག་གི་སྐབས་ལ་བསླེབས་པར་བརྟེན། བཀའ་ཁྲི་གསར་པ་དེ་དགུང་ལོ་གཞོན་གཞོན་དང་མཁྱེན་ཡོན་ཆེན་པོ། ལྷག་བསམ་དང་སྙིང་སྟོབས་ཆེན་པོ་ཞིག་ལ་ཐོབ་པ་དེས་ང་ཚོ་བློ་བདེ་པོ་དང་རེ་བ་ཆེན་པོ་བྱུང་། དེར་བརྟེན་ཁོང་གི་ལས་དོན་ཚང་མ་ལམ་ལྷོང་ཡོང་བའི་རེ་འདུན་ཞུས་པ་དང་ཆབས་ཅིག་བཀྲ་ཤིས་བདེ་ལེགས་ཡོད། ཅེས་འཁོད་ཡོད་འདུག
དེ་བཞིན་ཁ་སང་ཨོ་སི་ཊོ་ལི་ཡའི་རྒྱ་རིགས་དམངས་གཙོ་ཚོགས་པ་ཁག་གསུམ་ཐུན་མོང་གིས་ཀྱང་བོད་གཞུང་སྐུ་ཚབ་དོན་གཅོད་བརྒྱུད་དེ་མཁས་དབང་བློ་བཟང་སེང་གེ་མཆོག་ལ་འཚམས་འདྲིའི་བཀྲ་ཤིས་བདེ་ལེགས་ཞུ་ཡིག་ཕུལ་ཡོད་པའི་ནང་། གུས་པར་འོས་པའི་སྐུ་ཞབས་བློ་བཟང་སེང་གེ་མཆོག་ལ། སྐུ་ཉིད་བཙན་བྱོལ་བོད་མི་མང་གིས་ཐད་ཀར་འོས་འདེམས་ཀྱིས་སྐབས་གསུམ་པའི་བཀའ་བློན་ཁྲི་པའི་འོས་བསྡུའི་རྒྱལ་ཁ་ཐོབ་པར་རྒྱ་ནག་དམངས་གཙོ་ཚོགས་པ་མཉམ་འབྲེལ་ལས་དོན་ལྷན་ཚོགས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། བཙན་བྱོལ་བོད་གཞུང་གི་མང་གཙོའི་འཕེལ་རིམ་དང་འོས་འདེམས་ནི་ང་ཚོ་རྒྱ་རིགས་དམངས་གཙོ་དོན་གཉེར་བས་སེམས་ཁུར་དང་སློབ་སྦྱོང་བྱེད་སའི་གལ་གནད་ཆེ་བའི་ཆ་ཤས་ཤིག་ཡིན་པ་དང་། ༸གོང་ས་ཏཱ་ལའི་བླ་མ་མཆོག་གིས་དེ་སྔོན་ད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་གང་ཉིད་ནས་བོད་ཀྱི་ཆབ་སྲིད་འགན་ཁུར་མ་དགོས་པར། མི་མང་གིས་འོས་འདེམས་བྱས་པའི་མགོ་ཁྲིད་སོ་སོས་ཆབ་སྲིད་ཀྱི་འགན་དབང་ཡོངས་རྫོགས་འཁུར་དགོས་པའི་བཀའ་སློབ་བསྩལ་བ་དེས། བཙན་བྱོལ་བོད་གཞུང་གི་བཀའ་ཤག་གསར་པར་ཆབ་སྲིད་འཕེལ་རིམ་གྱི་སློབ་ཚན་གསར་པ་ཞིག་སྒོ་འབྱེད་གནང་ཡོད།
རྒྱ་ནག་དམངས་གཙོའི་ལས་འགུལ་དང་བོད་མིའི་རང་དབང་ལས་འགུལ་ནི་ཆབ་སྲིད་ཀྱི་དམིགས་ཡུལ་ཐད་ཐུན་མོང་གི་འགལ་རྐྱེན་ཞིག་ཡོད་པ་ནི། རྒྱ་ནག་སྲིད་དབང་སྒེར་འཛིན་གཞུང་ལུགས་དེ་ཡིན་པ་དང་། ལམ་ལུགས་དེ་ནི་རྒྱ་ནག་དམངས་གཙོའི་འཕེལ་རིམ་དུ་བསྐྱོད་རྒྱུའི་འགལ་རྐྱེན་ཆེ་ཤོས་ཤིག་ཡིན་པ་མ་ཟད། བོད་མི་ས་ཡ་དྲུག་ལ་དོན་སྙིང་ལྡན་པའི་ཆེ་མཐོའི་རང་སྲིད་རང་སྐྱོང་རྩོད་ལེན་གནང་རྒྱུའི་འགལ་རྐྱེན་ཞིག་ཀྱང་ཡིན་པའི་ངོས་འཛིན་བྱེད་ཀྱི་ཡོད། ཅེས་དང་། དེ་བཞིན་འཚམས་འཕྲིན་འདིའི་ནང་ད་དུང་རྒྱ་ནག་དམངས་གཙོ་ཚོགས་པའི་མཉམ་འབྲེལ་ལས་དོན་ལྷན་ཚོགས་ནས་སྐབས་གསར་པའི་བཙན་བྱོལ་བོད་གཞུང་དེ་ཁོང་གིས་དབུ་ཁྲིད་འོག་སྔོན་ཆད་ལྟར་འདས་ཟིན་པའི་ལོ་ངོ་ ༢༠ ལྷག་རིང་རྒྱ་ནག་དམངས་གཙོ་ལས་འགུལ་བ་དང་བོད་ཀྱི་རང་དབང་ལས་འགུལ་བར་ཕན་ཚུན་མཉམ་ལས་འབྲེལ་ལམ་ཐོག་རྒྱུན་འཛིན་གྱི་ཤུགས་སྣོན་གནང་རྒྱུ་དང་། ང་ཚོའི་ཆབ་སྲིད་ཀྱི་དགོས་དབང་བསྒྲུབ་རྒྱུའི་རེ་སྒུག་ཞུ་མུས་ཡིན། ཞེས་འཁོད་ཡོད་འདུག
གསར་འགོད་པ། དོན་གོ
ཁ་སང་གསལ་བསྒྲགས་ཐོན་མ་ཐག་འཚམས་དྲི་ཞུས་པ་ཡིན། ད་ཞབས་བཀྱག་ཐོབ་ནས་ཁ་དན་ཚིག་ལ་གནས་པ་གནང་ནས་ཕྱག་ལས་ཡག་པོ་གནང་རོགས་མཁྱེན། ན་གཞོན་ཁྱེད་ཀྱི་ཕྱག་ཏུ་གཏད་པའི་ད་ཡོད་བཙན་བྱོལ་གཞུང་ཐབ་ཆུང་ཆུང་མེ་ཚ་པོ་ཡོད་པ་དེ་ཟང་ཟིང་མ་བཟོ་རོགས་ཞེས་རེ་བསྐུལ་ཞུ།
མཁས་དབང་བློ་བཟང་སེང་གེ་མཆོག་ཐེངས་འདིའི་རྒྱལ་ཁ་ཐོབ་པ་ལ་རྒྱལ་སྤྱིའི་བལྟ་སྟངས་ནི་རང་དབང་ཚད་ལྡན་ཡོད་པའི་ལུང་པའམ་རྒྱལ་ཁབ་ཅིག་དང་མི་རིགས་ཅིག་གི་དབུ་ཁྲིད་ལས་ལྷག་པའི་བལྟ་སྟངས་ཐོག་འཚམས་འདྲི་ཞུ་བ་དང་གསར་འགྱུར་རྒྱུད་ལམ་ཁག་ཏུ་དེ་བཞིན་དོ་སྣང་བྱུང་འདུག། འདི་ནི་བོད་མི་རིགས་ཀྱི་ལོ་རྒྱུས་ནང་བྱུང་མྱོང་མེད་པའི་ལེའུ་གསར་པ་ཞིག་དང་འགྱུུར་བ་གསར་པ་ཞིག་གི་སྟིང་མཁས་དབང་ཁོང་བོད་མི་རིགས་ཀྱི་དོན་དུ་བཀའ་ཁྲིའམ་སྲིད་འཛིན་གྱི་ཕྱག་ལས་མ་གནང་སྔོན་གྱི་གྲུབ་འབྲས་ཀྱི་ཁ་ཕྱོགས་ཧ་ཅང་ཡག་པོ་ཞིག་རེད་། བྱུང་ན་ཁོང་གི་རེ་བ་བཞིན་ཕྱག་རོགས་བཀའ་བློན་རྒན་པ་ཉམས་མྱོང་ཅན་གསུམ་དང་གཞོན་པ་ཤེས་ཡོན་ཅན་བཞི་འདེབས་ཐུབ་པ་དགོས།
དཔལ་ལྡན་བཀའ་ཤག་གིས་གཙོས་སྒེར་བ་མི་ཉུང་བ་ཞིག་གིས་བཀའ་ཁྲི་གསར་བར་འཚམས་འདྲི་བྱེད་སྟངས་ལ་གཞིགས་ན། གལ་ཏེ་བཀའ་ཁྲི་གཞན་ཞིག་ཕེབས་ཡོད་ན་འདི་དག་གིས་ཅི་ཞིག་བཤད་ཡོང་ངམ་སྙམ་པའི་དོགས་པ་ཞིག་ངང་གིས་སླེབས་ཡོང། སྤྱིར་ན་སོ་སོའི་འདོད་པ་ཡོད་པའི་མི་ཞིག་འོས་འདེམས་བྱ་རྒྱུ་གལ་ཆེ་ཡང་་དེའི་ལྡོག་ཕྱོགས་ཀྱི་མི་ཞིག་ཕེབས་པ་ཡིན་ན་ཡང་འཚམས་འདྲིའམ་བརྩི་འཇོག་ཞུ་འོས། དམངས་གཙོ་ནི་མང་མོས་ལྟར་ཐག་གཅོད་དང་དེ་བཞིན་ལག་བསྟར་ཡང་བྱེད་དགོས་པ་ཞིག་ཡིན་ན་ངེས་པར་དེ་ལྟར་ཡིན།
ངའི་འདོད་པ་མ་ཚིམ་ས་ནི་ཐེངས་འདིར་བཀའ་ཁྲིའི་འོས་གཞི་ཁྱབ་བསྒྲགས་དང་འོས་འཕེན་གྱི་ཐོབ་ཐང་གལ་ཆེ་ཚུལ་ཅི་ཙམ་ཞིག་གསལ་བསྒྲགས་ཡང་བསྒྲགས་བྱས་པའི་ཚོད་ཀྱིས་དངོས་གཞིའི་འོས་འཕེན་པ་བརྒྱ་ཆའི་དྲུག་ཅུ་མ་ལོངས་ཙམ་ལས་མེད་པ་འདི་རེད། མང་མོས་ཀྱི་ཚད་གཞི་ཅི་ཙམ་ཡིན་མིན་དེ་དེ་ཙམ་གནད་འགག་མིན། གཙོ་བོ་ཕྱག་ལས་གནང་སྟངས་ལ་ཐུག་ཡོད། དེ་བས་བདག་གིས་འདི་ནས་ཆེད་དུ་ཞུ་འདོད་པ་ནི། བཀའ་ཁྲིར་བཞེངས་སྐབས་ཀྱི་དམིགས་ཡུལ་དང་དམ་ཚིག་དག་ལག་ལེན་འཁྱོལ་བ་གནང་རོགས་ཞུ་རྒྱུ་དེ་རང་ཡིན་ལ། ཁོང་ལ་འོས་མ་བླུགས་པ་ཚོས་ཀྱང་བརྩི་འཇོག་དང་བྱ་བ་ལམ་འགྲོ་ཡོང་བར་འགན་ནུས་མཉམ་འདོན་བྱེད་དགོས་པའི་རེ་བ་འདོན་གྱིན་ཡོད།
སྐབས་གསུམ་པའི་བཀའ་བློན་ཁྲི་བ་བློ་བཟང་སེང་གེ་མཆོག་ལ་བཀའ་ཁྲིར་འོས་འདེམས་བྱུང་བར་མཚམས་འདྲིའི་བཀྲ་ཤིས་བདེ་ལེགས་དང་། སྐུ་ཉིད་ཀྱི་བསམ་དོན་ཡིད་བཞིན་འགྲུབ་པའི་བཀྲ་ཤིས་སྨོན་འདུན་གྲངས་མེད་ཞུ།
ཤེས་འཇོན་ལྷག་བསམ་གྱི་རབ་ཏུ་ཕྱུགས་པའི་དེང་གི་མཁས་དབང་བློ་བཟང་སེངྒེ་མཆོག་ལ།བཀའ་ཤག་སྐབས་གསུམ་པའི་བཀའ་ཁྲིར་འོས་འདེམས་བྱུང་བར་འཚམས་འདྲིའི་བཀྲིས་བདེ་ལེགས་དང་།ཉིད་ཀྱི་བསམ་དོན་ལྷུན་གྱིས་འགྲུབ་པའི་སྨོན་འདུན་ཡོད་པ་ཞུ།
བཀའ་ཁྲི་བློ་བཟང་སེང་གེ་ལ་བཀྲ་ཤིས་ལེགས་ཞུ་་་་་མ་འོངས་ཁྱེད་ཀྱི་ཐམས་ཅད་ལམ་ལྷོང་ཡོད་བའི་སྨོན་འདུན་ཞུ།
བློ་སེང་ལགས་ལ་བཀའ་ཁྲིའི་འོས་ཤོག་ཐོབ་པར་རྟེན་འབྲེལ་བཀྲ་ཤིས་བདེ་ལེགས་ཡོད།
ཐེ་ཝན་མང་གཙོ་ཡར་ཐོན་ཚོགས་པས་བློ་བཟང་སེང་གེར་འཚམས་འདྲི་ཞུས་པ་ཞིག་ད་ནང་ཞོགས་ཀར་འདིར་འབྱོར་འདུག འདི་ལ་གནད་འགག་ཅིག་འདུག་པས་འདིར་བཀོད་ཡོད།
༼ །ཕྱི་ལོ་ ༢༠༡༡ ཟླ་ ༤ ཚེས་ ༢༧ ཉིན་བཙན་བྱོལ་བོད་གཞུང་གི་སྐབས་གསུམ་པའི་བཀའ་བློན་ཁྲི་པར་ སྐུ་ཞབས་བློ་བཟང་སེང་གེར་འདེམས་ཐོན་བྱུང་འདུག འདི་ལོ་ཕྱི་ཟླ་ ༣ ནང་༧གོང་ས་ ཏཱ་ལའི་བླ་མ་མཆོག་གིས་བཙན་བྱོལ་བོད་གཞུང་གི་ཆབ་སྲིད་དབུ་ཁྲིད་ཀྱི་ཐུགས་འགན་དེ་བཞིན་མི་མང་གིས་ཐད་ཀར་འོས་འདེམས་བྱས་པའི་མི་སྣར་བརྩིས་སྤྲོད་མཛད་རྒྱུའི་གསལ་བསྒྲགས་བསྐྱངས་པ་དེ་ནི་བོད་ཀྱི་མང་གཙོའི་ལམ་སྲོལ་ལེགས་ཚུགས་སུ་བཏང་བ་ཞིག་རེད།
ཐེངས་འདིའི་འོས་བསྡུ་ནི་བོད་ཀྱི་མང་གཙོའི་འཕེལ་རིམ་ནང་གི་གལ་གནད་ཆེ་བའི་ རྡོ་རིང་ཞིག་ཡིན་པར་བརྟེན། མང་གཙོ་ཡར་ཐོན་ཚོགས་པས་སྐབས་གསུམ་པའི་བཀའ་བློན་ཁྲི་པར་སྐུ་ཞབས་བློ་བཟང་སེང་གེ་ལགས་ལ་འོས་འདེམས་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག
བོད་མི་མང་གིས་མང་གཙོའི་ལམ་སྲོལ་ཐོག་ནས་གཞུང་གི་འགོ་ཁྲིད་འདེམས་བསྐོ་ གནང་བར་དགའ་མགུ་ཡི་རང་ཡོད། ད་རེས་ཀྱི་འོས་བསྡུའི་གྲུབ་འབྲས་དེ་བཙན་བྱོལ་ བོད་གཞུང་གི་རྒྱལ་ཁ་ཡིན་པ་མ་ཟད། བོད་མི་མང་གི་རྒྱལ་ཁ་ཞིག་ཀྱང་ཡིན།
བོད་མིའི་དབུ་ཁྲིད་༧གོང་ས་ཏཱ་ལའི་བླ་མ་མཆོག་གིས་བཙན་བྱོལ་བོད་གཞུང་གི་དབུ་ ཁྲིད་ཀྱི་ཐུགས་འགན་བཞེས་རིང་བོད་མིའི་འགྲོ་བ་མིའི་ཐོབ་ཐང་དང་མང་གཙོ། རང་དབང་རྩོད་ལེན་སོགས་ཀྱི་ཐོག་རླབས་ཆེན་གྱི་མཛད་འཕྲིན་བསྐྱངས་ཡོད།
དེ་བཞིན་ཐེ་ཝན་དུ་ཡང་ཆིབས་སྒྱུར་ལན་མང་བསྐྱངས་ཏེ། ཐེ་ཝན་མི་མང་དབར་མཛའ་ བརྩེའི་འབྲེལ་ལམ་གཏིང་ཟབ་འཛུགས་གནང་མཛད་པ་མ་ཟད། ཐེ་ཝན་ནང་ཆུ་ལོག་གི་གནོད་འཚེ་བྱུང་སྐབས། ༧གོང་ས་མཆོག་འཕྲལ་མར་ཐེ་ཝན་དུ་༧ཞབས་སོར་འཁོད་དེ་གནོད་འཚེ་ཕོག་ཡུལ་དུ་༧ཞབས་བཅག་ནས་ཡུལ་མིར་ཐུགས་སྨོན་ཡང་སྩལ་ཡོད།
བཀའ་ཁྲི་བློ་བཟང་སེང་གེ་ལགས་སུ་གོ་སྐབས་བྱུང་ན་ཐེ་ཝན་དུ་འཚམས་གཟིགས་ལ་ཕེབས་ནས་ཐེ་བོད་བར་གྱི་འབྲེལ་ལམ་སྔར་ལྷག་དམ་ཟབ་གཏོང་བའི་རེ་བ་ཡོད།
བཀའ་ཁྲི་བློ་བཟང་སེང་གེ་ལགས་ནི་བོད་དང་རྒྱལ་སྤྱིའི་ཁྲིམས་ལུགས་ཐོག་མཁས་ དབང་ཡིན་པས། ཐེངས་འདིར་ཁོང་བཀའ་ཁྲིར་འོས་འདེམས་བྱས་པ་དེས་བོད་མི་མང་ནས་རང་ དབང་དང་མང་གཙོར་ཕྱོགས་པའི་བསམ་ཚུལ་མངོན་གསལ་ཆགས་ཡོད། མང་གཙོ་ཡར་ཐོན་ཚོགས་ པས་རྒྱ་ནག་གཞུང་ལ་གོ་སྐབས་འདི་བཟུང་ནས་ལྷག་བསམ་གཡོ་མེད་ཐོག་བོད་ཀྱི་བཀའ་ ཁྲི་མཆོག་དང་ལྷན་གྲོས་མོལ་གྱིས་བོད་མིའི་རེ་འདོད་བརྩི་སྲུང་དང་། བོད་མི་མང་ གིས་རང་སྐྱོང་རྩོད་ལེན་ལ་ཆེད་མངགས་དམའ་འབེབས་མི་གཏོང་བར། བོད་མིའི་འཚོ་གནས་ རང་དབང་དང་། འགྲོ་བ་མིའི་ཐོབ་ཐང་སྲུང་སྐྱོབ་སྐོར་དངོས་སུ་དོན་འཁྱོལ་ཡོང་ བའི་འབོད་སྐུལ་ཞུ་རྒྱུ་ཡིན།
ང་ཚོ་ནི་གསར་དུ་དར་སྤེལ་བྱུང་བའི་མང་གཙོའི་རྒྱལ་ཁབ་ཅིག་ཡིན་པའི་ཆ་ནས། ཐེ་ ཝན་གྱིས་མང་གཙོའི་བརྒྱུད་རིམ་ནང་གི་དཀའ་ངལ་མྱོང་ཚོར་ཡོད་ཅིང་། རང་དབང་གི་ གྲུབ་འབྲས་དེ་རྩ་ཆེན་ཡིན་པར་ཡང་ཤེས་རྟོགས་ཡོད། ང་ཚོས་བོད་མི་མང་གིས་མང་གཙོ་ དང་རང་དབང་རྩོད་ལེན་བྱས་དང་བྱེད་མུས་ཡིན་པར་རྒྱབ་སྐྱོར་ཡོད།
བཙན་བྱོལ་བོད་གཞུང་དེ་མང་གཙོ་ཅན་དུ་བསྐྱོད་བཞིན་པའི་གལ་ཆེའི་དུས་སྐབས་འདི་ དང་བསྟུན་ནས། མང་གཙོ་ཡར་ཐོན་ཚོགས་པས་མ་ཡིང་ཇུའི་གཞུང་ལ་འགྲོ་བ་མིའི་ཐོབ་ཐང་ དང་མང་གཙོའི་སྐོར་རྒྱ་ནག་དང་བསམ་ཚུལ་བརྗེ་ལེན་བྱེད་དགོས་ཤིང་། བོད་ཀྱི་མང་ གཙོར་རྒྱབ་སྐྱོར་བྱེད་དགོས་པ་ལས། རྒྱ་ནག་ལ་ཕོག་ཐུག་འགྲོ་དྭོགས་ཀྱིས་བོད་ དོན་སྐོར་གཡོལ་ཐབས་བྱས་ཏེ། རྒྱལ་སྤྱིའི་ཐོག་ཐེ་ཝན་ལ་མིང་ཤས་ངན་པ་བཟོ་མི་ རུང་བའི་འབོད་སྐུལ་ཞུ་རྒྱུ་ཡིན།།༽
སྐབས་གསུམ་པའི་བཀའ་བློན་ཁྲི་པ་བློ་བཟང་སེང་གེ་མཆོག་ལ་འཚམས་འདྲིའི་བཀྲ་ཤིས་བདེ་ལེགས་ཞུ་་རྒྱུ་དང་། ཁྱེད་ཀྱི་བཀའ་ཁྲིའི་སྐབས་བོད་བདེན་མཐའ་སེལ་བའི་སྨོན་འདུས་ཞུ་ཞུ།།