རྒྱལ་སྤྱིའི་ཉེས་ཡངས་ཚོགས་པ་བཙུགས་ཏེ་མི་ལོ་ཧྲིལ་པོ་ ༥༠ འཁོར་བའི་དུས་དྲན་མཛད་སྒོའི་ཐོག འགྲོ་བ་མིའི་ཐོབ་ཐང་གི་ཆེ་བསྟོད་གཟེངས་རྟགས་ཐོག་མ་དེ་༧གོིང་ས་མཆོག་ལ་ཕུལ་ཡོད།
ཟླ་འདིའི་ཕྱི་ཚེས་ ༤ ཉིན་ཨ་རིའི་ལྷོ་ཕྱོགས་ཁ་ལི་ཕོར་ནི་ཡའི་ལོང་བྷི་ཆི་ (Long Beach) གྲོང་ཁྱེར་དུ་རྟེན་གཞི་བྱས་པའི་ཁ་ལི་ཕོར་ནི་ཡའི་གཙུག་ལག་སློབ་གྲྭའི་ཚོགས་ཁང་དུ། རྒྱལ་སྤྱིའི་ཉེས་ཡངས་ཚོགས་པ་བཙུགས་ཏེ་མི་ངོ་ ༥༠ འཁོར་བའི་དུས་དྲན་མཛད་སྒོ་ཞིག་ཚོགས་ཡོད་ཅིང་། སྐབས་དེར་ས་གནས་འདྲ་མིན་གྱི་སྐུ་ཚབ་དང་ཚོགས་ཞུགས་པ་ཁྱོན་མི་ ༡༠༠༠ ལྷག་འཛོམས་ཡོད་འདུག མཛད་སྒོའི་སྟེང་ཚོགས་པ་དེས་འགྲོ་བ་མིའི་ཐོབ་ཐང་གི་གཟེངས་རྟགས་ཐོག་མ་དེ་༧གོང་ས་མཆོག་ལ་ཕུལ་ཡོད་ཅིང་། དེའི་ཐད་ཚོགས་པའི་འགན་འཛིན་གྱིས་བརྗོད་ན། འཛམ་གླིང་མི་མང་གིས་ཉེན་ཁའི་འོག་བདེ་སྐྱིད་ཀྱི་སྤྱི་ཚོགས་ཤིག་ལ་རེ་བ་རྒྱག་བཞིན་པའི་སྐབས་འདིར། ༧ཏཱ་ལའི་བླ་མ་མཆོག་གི་བཟང་པོའི་བསླབ་བྱ་དེ་མིའི་རིགས་ལ་སྔར་ལས་དགོས་མཁོ་ཆེན་པོ་ཆགས་ཡོད་སྟབས། རྒྱལ་སྤྱིའི་ཉེས་ཡང་ཚོགས་པའི་འགྲོ་བ་མིའི་ཐོབ་ཐང་གཟེངས་རྟཊ་ཐོག་མ་དེ། བོད་ཀྱི་༧ཏཱ་ལའི་བླ་མ་སྐུ་ཕྲེང་བཅུ་བཞི་པ་མཆོག་ལ་འབུལ་ཐུབ་པ་འདིས་ང་ཚོའི་ཚོགས་པར་ཆེ་མཐོང་ཆེན་པོ་ཐོབ་སོང་། ཞེས་བརྗོད་ཡོད།
གཟེངས་རྟགས་བཞེས་སྐབས་༧གོང་ས་མཆོག་གིས། ངོས་རང་སྒེར་བ་ཞིག་གི་ཐོག་ནས་བརྗོད་ན་ནང་པའི་དགེ་སློང་དཀྱུས་མ་ཞིག་ཡིན། གཟེངས་རྟགས་འདི་ངོས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཆེད་ཞབས་འདེགས་ཕྲན་བུ་བསྒྲུབས་པ་དེར་ངོས་འཛིན་ཐོབ་པ་ཞིག་རེད། ངོས་ཀྱིས་རྒྱལ་སྤྱིའི་ཉེས་ཡངས་ཚོགས་པས་བོད་མི་ས་ཡ་དྲུག་དང་རྒྱ་ནག་མི་མང་ས་ཡ་མང་པོའི་འགྲོ་བ་མིའི་ཐོབ་ཐང་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། རྒྱལ་སྤྱིའི་ཉེས་ཡངས་ཚོགས་པའི་ལས་དོན་ནི་གཞན་འཇིགས་པ་ལས་སྐྱོབ་ཀྱི་ཡོད་སྟབས་མི་འཇིགས་པའི་སྦྱིན་པ་ལྟ་བུ་ཆགས་ཀྱི་ཡོད། ཁྱེད་ཚོར་སེམས་ཤུགས་ནམ་ཡང་ཆག་རྒྱུ་ཡོད་པ་མ་རེད། དྲག་པོའི་སྟོབས་ཤུགས་ནི་འཕྲལ་སེལ་ཞིག་ཡིན་པ་དང་། བདེན་པའི་སྟོབས་ཤུགས་ནི་དེ་ལས་ལྡོག་སྟེ་ཡུན་གནས་ཐུབ་པ་ཞིག་ཡིན། ཞེས་གསུངས་འདུག
ཉིན་རྒྱབ་ཁ་ལི་ཕོར་ནི་ཡའི་ཨིར་ཝིན་གཙུག་ལག་སློབ་གྲྭར་ University of Irvine ཆིབས་བསྒྱུར་གྱིས་ཁུལ་དེའི་མང་ཚོགས་ ༥༠༠༠ བརྒལ་བར། ༼བྱམས་བརྩེ་དང་གོ་ལའི་དབུ་ཁྲིད། ༽ཅེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད་ཅིང་། སྐབས་དེར་༧གོང་ས་མཆོག་གིས་སེམས་ཞི་བདེ་ཡོང་ཐབས་སྐོར་ལ། བློར་གོམས་འདྲིས་བསྟེན་ཏེ་སེམས་བབ་ལྷིང་ཡོང་རྒྱུར་འབད་བརྩོན་བྱ་དགོས། བྱམས་བརྩེའི་བློ་བསྐྱེད་པར་སེམས་བག་ཕེབས་དགོས་རྒྱུ་ཧ་ཅང་གལ་ཆེན་ཡིན། འཇིགས་སྣང་དང་ཁོང་ཁྲོའི་འོག་སེམས་བག་ཕེབས་པོ་བཟོ་ཐུབ་ཀྱི་མེད། བསམ་བློ་བག་ཕེབས་པ་ཞིག་ཡོང་ཐུབ་མིན་གཙོ་བོ་མི་སྒེར་སོ་སོའི་ནང་གི་བསམ་བློར་གདེང་ཚོད་དང་བློ་སྟོབས་ཆེ་ཆུང་ཅི་ཙམ་ཡོད་མེད་ལ་རག་ལས་ཡོད། ཅེས་གསུངས་ཡོད།
གསར་འགོད་པ། དཔལ་ལྡན།
དངོས་གནས་དགའ་འོས་པ་ཞིག་རེད།
བོད་ཀྱི་བླ་ན་མེད་པའི་དབུ་འཁྲིད་འདི་འཛམ་གླིང་གི་ཡུལ་གྲུ་གང་དུ་གནས་ན། གཞི་དེར་ཞི་བདེས་དྲི་བསུང་གིས་ཁྱབ་པ་དང་། རིགས་སོ་སོའི་མི་དག་གིས་ཁོང་ལ་ཕུལ་བའི་གཟེངས་རྟགས་གྲངས་ཀྱིས་མི་ལངས་པ་དེས་ཁོང་བླ་ན་མེད་པ་མཚོན་གྱི་ཡོད།
ཕྱོགས་ཀུན་ཕེབས་ཐེངས་རེ་རེས། ཞི་བདེའི་མེ་ཏོག་བཞད་སོང།
གཟེངས་རྟགས་བཞེས་ཐེངས་རེ་རེས། དགའ་སྤོབས་ཚད་མེད་སྦྱིན་སོང།
ཁྱེད་ལ་ཐོབ་པའི་བྱ་དགའ། ཀུན་བཟང་དགེ་བའི་རྟགས་མ།
མཛད་འཕྲིན་རྣམ་པར་རྒྱས་པའི། སྨོན་ལམ་སྙིང་ནས་འདེབས་སོ།
བོད་མི་རིགས་ཀྱི་ཆེས་རླབས་ཆེན་གྱི་གྲགས་ཅན་བསམ་བློ་བ་ཆེན་མོ་རྗེ་ཙོང་ཁ་པས། མདའ་མཚོན་གོ་ཆ་མ་བཟུང་བར། །རང་ཉིད་གཅིག་པུས་བྱེ་བའི་བདུད།།མ་ལུས་ཕམ་མཛད་གཡུལ་གྱི་ལས། །ཁྱེད་ལས་གཞན་པ་སུ་ཞིག་ཡོད། །ཅེས་པ་ལྟར་
རབས་འབྱམས་རྒྱལ་བ་ཀུན་གྱི་མཛད་པའི་འཁུར། །སྙིང་སྟོབས་ཕྲག་པར་བཟུང་བའི་རླབས་ཆེན་གྱི། །འཕྲིན་ལས་ཀུན་ཕན་ནམ་མཁའི་སྙིང་པོ་ཅན། །བཞེད་པ་ཇི་བཞིན་ལྷུན་གྱིས་འགྲུབ་པར་ཤོག །