ས་གནས་གང་དུ་དཀའ་ངལ་བྱུང་ཡང་བོད་སྤྱི་བའི་དཀའ་ངལ་ཡིན།

ཟླ་འདིའི་ཕྱི་ཚེས་ ༤  ཉིན་བཞུགས་སྒར་ཀིརྟི་བྱེས་བ་གྲྭ་ཚང་གིས་སྣེ་ཁྲིད་པའི་དགེ་འདུན་པ་བརྒྱའི་ཞི་བའི་གོམ་བགྲོད་དེ་ཡོངས་སུ་མཇུག་བསྒྲིལ་ཏེ་ཕྱིར་བཞུགས་སྒར་དུ་འབྱོར་ཡོད་བ་དང་བསྟུན་ཏེ། འདིའི་གའི་གསར་འགོད་པས་ལས་འགུལ་གོ་སྒྲིག་ཚོགས་ཆུང་གི་ཚོགས་མི་གྲྭ་ཚེ་རིང་ལགས་སུ་བཅར་འདྲི་བྱས་ཡོད།

དྲི་བ། ཐོག་མར་སྐུ་ཉིད་ཀྱིས་བཞུགས་སྒར་ཀིརྟི་བྱེས་པ་གྲྭ་ཚང་གི་སྣེ་ཁྲིད་འོག དགེ་འདུན་པ་བརྒྱ་ལྷག་གིས་བཞུགས་སྒར་ནས་ལྡི་ལི་བར་སེར་སྤྲེངས་སྙན་སྐུལ་ཞི་བའི་གོམ་བགྲོད་གནང་བའི་བརྒྱུད་རིམ་ངོ་སྤྲོད་ཅིག་གནང་རོགས།    

ལན། ཐེངས་འདིའི་ང་ཚོའི་གྲྭ་ཚང་གིས་ཞི་བའི་གོམ་བགྲོད་ལས་འགུལ་སྤེལ་བའི་དམིགས་ཡུལ་གཙོ་བོ། ཉེ་བའི་དུས་ནས་ཕ་ཡུལ་གྱི་གནས་སྟངས་ཛ་དྲག་ཏུ་གྱུར་ཏེ། དགོན་པའི་དགེ་འདུན་པ་དང་མི་སྐྱ་མང་པོ་རྒྱ་གཞུང་གིས་འཛིན་བཟུང་གིས་གར་ཡོད་ཅི་བྱུང་གི་གནས་ཚུལ་ཤེས་ཀྱི་མེད་པ་དང་། ཤུལ་དུ་ཡོད་པ་ཚོར་ཡང་གང་འདྲ་ཞིག་བྱས་ཡོང་ངམ་སྙམ་པའི་འཇིགས་སྣང་འོག་གནས་ཡོད་སྟབས། ང་ཚོས་རྒྱལ་སྤྱིའི་སྤྱི་ཚོགས་དང་བོད་པ་རང་གི་སྤྱི་ཚོགས་སུ་དོ་སྣང་དང་ཤེས་རྟོགས་ཡོང་ཆེད་གོམ་བགྲོད་དེ་གནང་བ་རེད། གོམ་བགྲོད་སྐབས་ས་གནས་གང་དུ་བསླེབས་ཀྱང་། དེ་གའི་དཔོན་རིགས་དང་གསར་འགོད་པ། མི་མང་བཅས་ལ་སྤྱིར་བོད་ནང་གི་གནས་སྟངས་དང་། བྱེ་བྲག་ད་ལྟའི་རྔ་པ་ཁུལ་གྱི་གནས་སྟངས་ངོ་སྤྲོད་དང་ཡིག་ཆ་འགྲེམས་སྤེལ་བྱས་པ་ཡིན། ཐོག་མར་དབུས་གཙང་སྤྱི་འཐུས་ཟླ་བ་ཚེ་རིང་དང་ཀརྨ་ཡེ་ཤེས། སྤྱི་ཟུར་ཡོན་ཏན་རྒྱ་མཚོ་བཅས་ལ་གོམ་བགྲོད་ལས་འགུལ་སྤེལ་ཕྱོགས་སྐོར་ལ་ལམ་སྟོན་ཞུས་ཀྱང་།  ཕྱིས་སུ་མདོ་སྨད་རྒྱུན་ཀྱིས་ནུས་པ་གང་ཡོད་འདོན་རྒྱུའི་ཁས་ལེན་བྱས་ཤིང་། དབུས་གཙང་སྤྱི་འཐུས་ཟླ་བ་ཚེ་རིང་དང་མདོ་སྨད་དབུས་རྒྱུན་བཅས་ནས་ས་གནས་གང་དུ་བསླེབས་ཀྱང་ས་གནས་དཔོན་རིགས་གདན་ཞུའི་ཐོག་གནས་ཚུལ་བརྒྱུད་སྒྲོག་དང་། ང་ཚོ་གོ་སྒྲིག་ཚོགས་ཆུང་གིས་གོམ་བགྲོད་པ་རྣམས་ཀྱི་ཞལ་ལག་དང་། གསར་འགོད་པར་སྐད་ཆ་བཤད་རྒྱུ་སོགས་ཀྱི་ལས་རིམ་བསྒྲིགས་པ་ཡིན།  

དྲི་བ། ཐེངས་འདིའི་སེར་སྤྲེངས་སྙན་ཞུའི་ཞི་བའི་གོམ་བགྲོད་ཀྱི་ལས་འགུལ་གྱི་གོ་སྒྲིག་གི་ཐད་ནས་གང་འདྲ་བྱུང་སོང་ངམ།

ལན། ལས་འགུལ་ཁྲོད་ཐོག་མར་གྲྭ་ཚང་གི་ངོས་ནས་གྲྭ་བ་ ༨༠ དང་ཕྱི་ཕྱོགས་ཀྱི་མི་ ༢༠  བཅས་མི་ ༡༠༠ ལ་གོམ་བགྲོད་ཀྱི་གོ་སྐབས་འབུལ་རྒྱུའི་འཆར་གཞི་ཡོད་ཀྱང་། ཕྱིས་སུ་གྲྭ་ཚང་རང་དུ་ཐོ་རྒྱག་མཁན་གྲྭ་བ་ ༩༠ ལྷག་བྱུང་སོང་ལ། ཕྱི་ཕྱོགས་ནས་རྨོག་རུ་བསྟན་པ་ལགས་དང་ཁམས་དཀར་མཛེས་ནས་ཡིན་པའི་གྲྭ་ཕུན་ཚོགས་ཚེ་རིང་ལགས། གཞན་ཕ་ཡུལ་གསེར་རྟ་ནས་ཡིན་པའི་གྲྭ་བ་གཅིག རྒྱུད་སྟོད་གྲྭ་ཚང་གི་གྲྭ་བ་ལྔ་བཅས་མི་ ༨ ཁྱོན་སྡོམ་མི་ ༡༠༠ གོམ་བགྲོད་དུ་ཕྱིན་པ་རེད། སྤྱིར་བཏང་ཐེངས་འདིའི་གོམ་བགྲོད་སྐབས་གྲྭ་ཚང་གི་ངོས་ནས་ཉིན་ ༡༥ ནས་ ༢༠ བར་རྐང་པ་བརྒྱབ་སྟེ་འགྲོ་རྒྱུ་བྱས་མོད། རྗེས་སུ་བོད་མི་མང་སྤྱི་འཐུས་ཚོགས་གཙོ་དང་རྒྱུན་ལས། མདོ་སྨད་དབུས་རྒྱུན་བཅས་ཀྱིས་ཉིན་གྲངས་ ༥ ལ་འཆར་གཞི་སྒྲིག་ཡོད་པ་ལྟར། ལྡི་ལི་བར་གྱི་མངའ་སྡེ་དང་གྲོང་ཁྱེར་ཆེ་ཁག་དང་མི་མང་འདུས་སྡོད་བྱེད་ཡུལ་ཁག་ཏུ་གོམ་པ་བརྒྱབ་སྟེ་སོང་བ་ཡིན། ང་ཚོ་ས་གནས་གང་དུ་བསླེབས་ཀྱང་ས་གནས་དེ་ཀའི་གནད་ཡོད་མི་སྣ་དག་གི་མཚན་ཐོག་ནས་མཛད་སྒོ་བསྡུས་པ་ཡིན། ཉིན་དང་པོར་མཚོན་ན། ཧི་མ་ཅལ་མངའ་སྡེའི་བློན་ཆེན་ཟུར་པ་སྐུ་ཞབས་བྷ་ལོར་མཆོག་དང་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་བཅས་ལྷན་ཞུགས་ཐོག་མཛད་སྒོ་ཚོགས་ཤིང་། ཕྱི་ཉིན་ངྷི་ལ་ཞེས་པའི་ས་གནས་སུ་ལས་འགུལ་གྱི་ངོ་བོ་དང་དམིགས་ཡུལ། རྒྱུ་མཚན་སོགས་གསལ་བསྒྲགས་བྱས་པ་ཡིན། ཨམ་བྷོ་ཟེར་བའི་ས་གནས་སུ་བོད་ནང་གི་པར་རིགས་འགྲེམས་སྟོན་དང་དབྱིན་བོད་གཉིས་ཐོག་ནས་འགྲེམས་སྤེལ་བྱས་པ་ཡིན། ཆ་སྙོམས་ཉིན་རེར་ཀེ་ལི་མུ་ཊར་ ༡༥ བར་གོམ་བགྲོད་བྱས་ཏེ་ཉིན་ལྔའི་ནང་མཇུག་བསྒྲིལ་བ་རེད།   

དྲི་བ། ཐེངས་འདིར་དགེ་འདུན་པ་ ༡༠༠ ལྷག་གིས་སེར་སྤྲེངས་སྙན་སྐུལ་ཞི་བའི་གོམ་བགྲོད་ཁྲོད་ཀྱི་དགེ་འདུན་པ་ཚོར་དཀའ་ངལ་ཆེ་ཤོས་ག་རེ་འཕྲད་ཀྱི་འདུག་གམ།

ལན། ང་རང་ལ་མཚོན་ན། ཐེངས་འདིའི་གོམ་བགྲོད་སྐབས་ཀྱི་དཀའ་ངལ་ཆེ་ཤོས་དེ་སྐད་མ་ཤེས་པ་དེ་ཆགས་སོང་། གང་ཡིན་ཞེ་ན། སྤྱིར་བཏང་ང་ཚོས་ལམ་བར་ནས་དབྱིན་ཡིག་དང་ཧིན་རྡུ་གཉིས་ཀྱི་ལམ་ནས་གོམ་བགྲོད་ཀྱི་དམིགས་ཡུལ་དང་བོད་ནང་གི་ད་ལྟའི་གནས་སྟངས་སྐོར་ཡིག་ཐོག་ནས་འགྲེམས་སྤེལ་བྱས་མོད། ང་ཚོའི་ཁྲོད་དུ་མི་ཉུང་ཤས་ཤིག་མ་གཏོགས་ཧིན་རྡུའི་སྐད་ཤེས་མཁན་མེད་སྟབས། མཚམས་ལ་རེར་རྒྱ་གར་ཡུལ་མི་འགའ་རེ་ཡིས་སྐད་ཆ་འདྲ་མིན་དྲིས་ཡོང་སྐབས། མི་རེ་གཉིས་ཤིག་གིས་འགྲེལ་བཤད་རྒྱག་རྒྱུ་མ་གཏོགས་མི་རེ་ངོ་རེ་ནས་བཤད་ཐུབ་ཀྱི་ཡོད་པ་མ་རེད། དེ་ལྟར་སྐད་མ་ཤེས་པའི་དཀའ་ངལ་ཆེན་པོ་འཕྲད་སོང་། དེ་མ་ཡིན་པའི་གཞན་གོམ་བགྲོད་སྐབས་ཟ་མ་དང་འདུག་གནས། འཕྲོད་བསྟེན་སོགས་ཕྱོགས་ཡོངས་ནས་དཀའ་ངལ་གང་ཡང་འཕྲད་མ་སོང་ལ། ས་གནས་ཁག་འདྲ་མིན་དུ་བསླེབས་སྐབས་ཀྱང་འབྲེལ་ཡོད་དཔོན་རིགས་དང་གསར་འགོད་པར་སྐད་ཆ་བཤད་རྒྱུ་བཅས་ཀྱང་ཡག་པོ་བྱུང་སོང་།

དྲི་བ། ཐེངས་འདིའི་གོམ་བགྲོད་ལས་འགུལ་ཐད་ས་གནས་ཁག་ཏུ་རྒྱ་གར་མི་མང་ཚོའི་ལྟ་སྟངས་གང་འདྲ་འདུག་གམ།

ལན། ཐེངས་འདིར་ང་ཚོའི་གོམ་བགྲོད་ཀྱི་སྔ་ཕྱི་བར་གསུམ་དུ་རྒྱ་གར་གྱི་མངའ་སྡེ་ཁག་གི་གནད་ཡོད་མི་སྣ་དང་མི་མང་གི་ངོས་ནས་རྣམ་འགྱུར་ཡག་པོ་བསྟན་སོང་། ལྷག་པར་དུ་མངའ་སྡེ་ཁག་གི་མི་སྣ་ཚོས་ང་ཚོ་འབྱོར་སྐབས། མེ་ཏོག་གི་ཕྲེང་བ་ཕུལ་ཏེ་བསུ་བ་བྱས་སོང་བར་མ་ཟད། ཆུ་གྲང་མོ་སོགས་སྤྲད་དེ་གདུང་སེམས་མཉམ་སྐྱེད་བྱེད་ཀྱི་འདུག ཧི་མ་ཅལ་མངའ་སྡེའི་དམག་མི་དང་ལྷག་པར་དུ་པཱན་ཇཱབ་མངའ་སྡེ་ནང་བསླེབས་སྐབས། ས་གནས་ཉེན་རྟོག་པས་གཞུང་ལམ་གྱི་རླངས་འཁོར་བཀག་འགོག་གིས་ང་ཚོར་དམིགས་བསལ་ལམ་ཁ་སྤྲད་བྱུང་ལ། དེ་དང་ཆབས་ཅིག་ལྡི་ལིར་མ་བསླེབ་བར་ཉེན་རྟོག་པ་གཅིག་གིས་གཅིག་ལ་རྩིས་སྤྲོད་ཀྱིས་སྲུང་སྐྱོབ་བྱས་སོང་། ང་ཚོ་གྲྭ་བའི་ལས་འགུལ་ཞིག་ཡིན་སྟབས་མི་མང་གིས་དམིགས་བསལ་དོ་སྣང་བྱེད་ཀྱི་འདུག ལྡི་ལིར་བསླེབས་སྐབས་ཀྱང་ཉིན་གཅིག་གི་རིང་ཆོས་ལུགས་མི་འདྲ་བ་ལྔའི་ལྷ་ཁང་དུ་ཕྱིན་ཏེ་སྨོན་ལམ་གསུངས་པ་དང་བོད་པ་སྤྱིའི་གནས་སྟངས་འགྲེལ་བཤད་ཀྱི་གོ་སྐབས་བྱུང་སོང་། ཐེངས་འདིའི་ལས་འགུལ་གྱི་སྔ་ཕྱི་བར་གསུམ་དུ་ས་གནས་གཞུང་དང་གཞུང་འབྲེལ་མིན་པའི་ཚོགས་སྡེ་ཁག  ཆོས་ལུགས་གནད་ཡོད་མི་སྣ་མང་པོས་རྒྱབ་སྐྱོར་གནང་སྟེ། མ་འོངས་པར་རྒྱ་གར་ནང་ཁུལ་ནས་བོད་ཀྱི་གནད་དོན་ལ་རྐང་ཡག་པོ་ཞིག་ཚུགས་རྒྱུར་གྲོས་ཚོགས་སུ་ཡར་ཞུ་དང་། བོད་དོན་ལ་སྔར་ལས་ལྷག་པའི་རྒྱབ་སྐྱོར་གནང་རྒྱུའི་བསམ་ཚུལ་བསྟན་སོང་།  

དྲི་བ། གོམ་བགྲོད་ཀྱི་བརྒྱུད་རིམ་ཁྲོད་བོད་ཀྱི་གནད་དོན་དང་། ལྷག་པར་དུ་ད་ལྟའི་ཀིརྟི་དགོན་གྲོང་གཉིས་ཀྱི་གནས་སྟངས་སོགས་ཕྱི་ཕྱོགས་ལ་ཁྱབ་སྤེལ་བྱེད་སྟངས་གང་འདྲ་བྱུང་སོང་ངམ།  

ལན། ང་ཚོས་ཉིན་རེར་དུས་གཅིག་ཏུ་བརྒྱུད་ལམ་འདྲ་མིན་གྱི་གསར་འགོད་པ་དང་ཉམས་ཞིབ་པ་མི་ ༡༠༠ ལྷག་ལ་གནས་ཚུལ་མཁོ་གཏོང་བྱས་ཡོད། ཁོང་ཚོ་བརྒྱུད་དེ་རྒྱལ་སྤྱིའི་སྟེང་ཁྱབ་བསྒྲགས་གང་འཚམ་བྱུང་ཡོད། ལྷག་པར་དུ་ལས་འགུལ་འདི་བརྒྱུད་དེ་རྒྱ་ནག་མི་མང་ལ་ཤུགས་རྐྱེན་གང་འཚམ་ཐེབས་ཡོད་པ་རེད་བསམ་ཡོད། ང་ཚོའི་ལས་འགུལ་འདིར་གཞུང་གཅིག་གཉིས་ཙམ་གྱིས་དོ་སྣང་བཀུག་སྟེ་རྒྱ་གཞུང་ལ་གནོན་ཤུགས་སྤྲོད་རྒྱུ་ཙམ་མིན་ལ། བོད་ནང་གི་མི་མང་ལ་ལམ་སེང་འགྱུར་བ་ཞིག་ཐེབས་སུ་འཇུག་རྒྱུའི་རེ་བ་ཡང་མིན། ང་ཚོའི་རེ་བ་རྒྱག་ས་གཙོ་བོ་དེ། རྒྱ་ནག་མི་མང་ནང་ཤུགས་རྐྱེན་ཐེབས་ཏེ་གཞུང་གིས་མི་མང་གི་ཁ་ལ་མ་ཉན་རང་ཉན་ཞིག་ཆགས་ཐུབ་ན་བསམས་ཏེ་རེ་བ་བྱེད་ཀྱི་ཡོད། ཉིན་རེའི་གནས་ཚུལ་ཚང་མ་རྒྱ་ཡིག་གི་བརྒྱུད་ལམ་ཁག་འདྲ་མིན་ལ་བཀྲམས་པ་ཡིན། སྤྱིར་རྒྱ་ནག་ནང་བརྒྱུད་ལམ་ཁག་ལ་དམ་དྲག་བྱེད་ཀྱི་ཡོད་ཀྱང་། བརྒྱུད་ལམ་མང་པོ་ཞིག་ལ་མཁོ་གཏོང་བྱས་ཐུབ་ཡོད་སྟབས། ནམ་རྒྱུན་བརྒྱུད་ལམ་ལ་དོ་སྣང་ཡོད་མཁན་གྱི་མི་མང་མང་པོ་ཞིག་ལ་ཤུགས་རྐྱེན་གང་འཚམ་ཐེབས་ཡོད་པ་རེད་བསམ་གྱི་འདུག

དྲི་བ། ཐེངས་འདིའི་གོམ་བགྲོད་ཀྱིས་བོད་ནང་གི་བོད་མི་ཚོ་དང་ལྷག་པར་དུ་རྔ་པ་ཀིརྟི་དགོན་གྲོང་གཉིས་ལ་ཤུགས་རྐྱེན་གང་འདྲ་ཞིག་ཐེབས་ཡོད་པར་དགོངས་ཀྱི་ཡོད་དམ།

ལན། བཞུགས་སྒར་ཀིརྟི་བྱེས་བ་གྲྭ་ཚང་དང་ཕ་ཡུལ་རྔ་པ་ཀིརྟི་དགོན་པ་གཉིས་བར་ཕྱོགས་མང་པོ་ཞིག་ནས་འབྲེལ་བ་ཤུགས་ཆེན་པོ་ཡོད་པའི་སྤུན་མཆེད་ལྟ་བུ་རེད། ང་ཚོའི་ངོས་ནས་ཀྱང་ཁོང་ཚོས་བསྒྲུབ་རྒྱུ་རེད་བསམ་པ་ཞིག་དང་། ཁོང་ཚོ་ཡིན་ནའང་ང་ཚོ་དུས་ནམ་ཡིན་ཡང་ཁོང་ཚོའི་རྒྱབ་རྩར་ཡོད་བསམ་པ་ཞིག་ཡོད་ཡོད་པ་རེད། ཐེངས་འདིར་བཞུགས་སྒར་གྱི་གྲྭ་ཚང་ཁོ་ན་མིན་པར་རྒྱལ་སྤྱིའི་ནང་ཡོད་པའི་བོད་མི་མང་པོ་ཞིག་གིས་ཁོང་ཚོར་གདུང་སེམས་མཉམ་སྐྱེད་མཚོན་ཕྱིར་ལས་འགུལ་ཤུགས་ཆེན་སྤེལ་བ་དེས་སེམས་ཤུགས་ཆེན་པོ་ཞིག་སྤར་འདུག་ལ། ད་ལྟའི་དུས་འདིར་ཡང་འཛམ་གླིང་ཡུལ་གྲུ་གང་སར་ཡོད་པའི་བོད་མི་ཚོས་ད་ལྟའི་རྔ་པ་ཁུལ་དང་རྔ་པ་ཀིརྟི་དགོན་པའི་ནང་བྱུང་བསྡད་པའི་དཀའ་ངལ་དེ་བོད་ཀྱི་རྩ་དོན་ཞིག་ལ་ངོས་འཛིན་བྱས་ཏེ། རྒྱ་ནག་གཞུང་ལ་ངོ་རྒོལ་དང་རྒྱལ་སྤྱིའི་ཚོགས་པ་ཁག་ལ་འབོད་སྐུལ་གྱི་ལས་འགུལ་འདྲ་མིན་སྤེལ་བ་དེས་བོད་ནང་གི་བོད་མི་ཚོས་བློས་གཏོང་བྱས་པ་དེ་ཕན་ཐོགས་པ་ཞིག་དང་གོ་ཆོད་པ་ཞིག མ་མཐར་ཡང་བོད་ཀྱི་ཆིག་སྒྲིལ་ལ་ཕན་ཐོགས་པ་ཞིག་ལ་ངོས་འཛིན་བྱེད་ཀྱི་འདུག  

དྲི་བ། ཁྱེད་རང་གིས་ད་ལྟའི་བར་གྱི་བོད་ནང་གི་བོད་མི་ཚོར་འབྲེལ་བ་བྱས་པའི་ཉམས་མྱོང་དང་ཐེངས་འདིའི་གོམ་བགྲོད་ཀྱི་ལས་འགུལ་དང་འབྲེལ་ཏེ་བཙན་བྱོལ་བོད་མི་ཚོར་རེ་བ་དང་འབོད་སྐུལ་ག་རེ་ཡོད་དམ།

ལན། ངས་ད་བར་བོད་ནང་གི་ས་ཁུལ་མང་པོ་ཞིག་ལ་འབྲེལ་བ་བྱས་བསྡད་པ་རེད། གཞིས་ལུས་བོད་མི་ཚོའི་བསམ་བློ་གཞིར་བཞག་ཏེ་ཕྱི་སྡོད་བོ་མི་ཚོར་ཞུ་རྒྱུ་ཞིག་ལ། ཨ་མདོ་རྔ་པ་ཁུལ་གྱི་བོད་མི་ཚོས་ད་ལྟའི་བར་རྒྱ་ནག་གཞུང་ལ་བསྟུན་མཁས་དང་མཐུན་པོ་མ་བྱས་པར་དཀའ་ངལ་གང་མང་ཞིག་འཕྲད་ཀྱི་ཡོད་ཀྱང་། ཁོང་ཚོའི་ངོས་ནས་དཀའ་ངལ་དེ་དག་ལ་གདོང་ལེན་དང་རྒྱ་ནག་གཞུང་ལ་ཁ་གཏད་བཅག་སྟེ། བོད་ཀྱི་རྩ་དོན་དང་ལ་རྒྱ་ཞིག་ཟིན་བསྡད་པའི་སྐབས་འདིར། ང་ཚོའི་ངོས་ནས་གོ་སྐབས་འཛིན་ཐུབ་རྒྱུ་གལ་ཆེན་པོ་རེད་བསམ་གྱི་ཡོད། དེ་དང་མཉམ་དུ་བོད་ནང་གི་བོད་མི་ཚོས་གང་བྱས་པ་དེ་རྒྱལ་སྤྱིའི་སྤྱི་ཚོགས་ལ་ཤེས་སུ་འཇུག་རྒྱུ་ང་ཚོའི་ལས་འགན་གལ་ཆེ་ཤོས་རེད། བོད་ནང་གི་བོད་མི་ཚོ་རྒྱ་ནག་གི་དམ་དྲག་འོག་ནང་ཁུལ་ནས་ནུས་པ་འདོན་རྒྱུ་ལས་ཐབས་གཞན་མེད་སྟབས། དེ་ལས་གྲོལ་བའི་གོ་སྐབས་གང་ཡོད་པ་དེ་དག་དམ་འཛིན་བྱ་རྒྱུ་ང་ཚོའི་ཕྲག་ཏུ་བབ་པའི་འོས་འགན་ཆགས་ཡོད། ད་ལྟའི་ཆར་རྔ་པ་ཁུལ་གཅིག་པུ་མིན་པར་བླ་བྲང་དང་ས་གནས་གཞན་ཁག་ཏུ་ཡང་དཀའ་ངལ་མི་ཉུང་བ་ཞིག་འཕྲད་མུས་རེད། ས་གནས་གང་དུ་དཀའ་ངལ་ཞིག་བྱུང་ན། དེ་ནི་ས་གནས་དེ་གཅིག་པུའི་དཀའ་ངལ་ཙམ་དུ་ངོས་འཛིན་མི་བྱེད་པར། བོད་སྤྱི་བའི་དཀའ་ངལ་ཞིག་ལ་ངོས་འཛིན་ཐོག་ལས་འགུལ་སྤེལ་རྒྱུ་གལ་ཆེན་པོ་རེད།

གསར་འགོད་པ། དོན་གོ