བྷེན་ལཱ་ཌན་གྱི་བུ་བཞི་བ་ཨོ་མར་བྷེན་ལཱ་ཌན་གྱིས་ཐེངས་འདིར་ཨ་རིའི་གཞུང་དང་སྲིད་འཛིན་ཨོ་བྷ་མས་ལག་ན་མཚོན་ཆ་མེད་པའི་བྷེན་ལཱ་ཌན་དམར་གསོད་བཏང་པ་དང་ནང་མིར་མེ་མདའ་བརྒྱབ་པ། ཁོང་གི་ཕུང་པོ་རྒྱ་མཚོར་གཡུགས་པ་བཅས་ནི། ཨ་རི་རང་གི་གཞི་རྩའི་ཁྲིམས་ལུགས་དང་འགལ་ཡོད་པ་མ་ཟད། རྒྱལ་སྤྱིའི་ཁྲིམས་ལུགས་རྩིས་མེད་བཏང་པ་ཞིག་རེད་ཅེས་སྐྱོན་འཛུགས་བྱས་འདུག
ཁ་སང་ཕྱི་ཚེས་ ༡༠ ཉིན་ཨོ་མར་བྷེན་ལཱ་ཌན་(Omar Bin Laden)གྱིས་ནའེ་ཡོག་དུས་བབ་གསར་ཁང་བརྒྱུད་བསྒྲགས་གཏམ་ཞིག་སྤེལ་པའི་ནང་། བྷེན་ལཱ་ཌན་བསད་ཡོད་པའི་ཕུང་པོ་དང་དཔར་སོགས་བདེན་དཔང་གསལ་བོ་གང་ཡང་མེད་སྟབས། བྷེན་ལཱ་ཌན་གྱི་ཉེ་འབྲེལ་ནང་མི་ཚོ་ཨ་རིའི་དྲིལ་བསྒྲགས་དེར་ཡིད་ཆེས་མེད། གལ་སྲིད་ཁོང་བསད་པའི་གནས་ཚུལ་དེ་དངོས་ཡོད་ཡིན་ན། ལག་ཏུ་མཚོན་ཆ་མེད་པའི་མི་ཞིག་འཛིན་བཟུང་བྱས་ཏེ་ཁྲིམས་ཁང་གི་ཞིབ་བཤེར་བརྒྱུད་འཛམ་གླིང་མི་མང་ལ་བདེན་པ་ར་སྤྲོད་མི་བྱེད་དོན་ཅི་ཡིན། བྱེད་སྟངས་འདི་ནི་རྒྱལ་སྤྱིའི་ཁྲིམས་དང་འགལ་པ་རེད། ཨི་རག་སྲིད་འཛིན་ཟུར་བ་ས་ཌམ་ཧུ་སེན་(Sadam Hussein) དང་སེར་བྷན་སྲིད་འཛིན་སི་ལོ་བྷོ་ཌན་ (Slobdan Milosevic) སོགས་ནི་མི་ཁྲི་ཕྲག་མང་པོའི་ཚེ་སྲོག་ལ་ཐུག་པའི་ཉེ་ཅན་ཡིན་རུང་ཁྲིམས་ཐོག་ནས་ཞིབ་བཤེར་ཐག་གཅོད་བྱས་པ་རེད། ཅེས་བརྗོད་འདུག
མུ་མཐུད་བསྒྲགས་གཏམ་དེར། བྷེན་ལཱ་ཌན་དམར་གསོད་བཏང་པ་དེ་ཆབ་སྲིད་ཀྱི་དཀའ་རྙོག་སེལ་ཐབས་ཤིག་མ་རེད་ལ། ནག་ཉེས་ནི་ཁྲིམས་ཐོག་ནས་དབྱེ་ཞིབ་བྱས་ཏེ་དྲང་བདེན་གྱིས་ཐག་གཅོད་བྱ་དགོས་པ་ཞིག་རེད། ངེད་ནང་མི་ཚོས་ཁོང་ལ་ཁྲིམས་བཤེར་མེད་པར་རྐྱེན་ལམ་དུ་བཏང་པར་ཞིབ་བཤེར་བྱ་དགོས་པ་དང་། བྷེན་ལཱ་ཌན་གྱི་སྐྱེས་དམན་གསུམ་དང་བྱིས་པ་འགའ་པ་ཀི་སི་ཐན་ནང་འཛིན་བཟུང་བཀག་ཉར་བྱས་ཡོད་པ་ཀློད་གྲོལ་གཏོང་དགོས་པའི་དགོས་འདུན་འདོན་གྱི་ཡོད། ཆོས་ཕྱོགས་ཀྱི་བྱེད་སྒོ་ལ་སྣང་མེད་ཀྱིས་ཁོང་གི་ཕུང་པོ་རྒྱ་མཚོར་གཡུགས་པ་དེ་ཁོང་གི་རྗེས་འབྲང་པ་དང་ནང་མི་ལ་མཐོང་ཆུང་བརྙས་བཅོས་བྱས་པ་ཞིག་རེད། ཅེས་བསྒྲགས་འདུག
ཨོ་མར་བྷེན་ལཱ་ཌན་ནི་ཨོལ་ཁ་ཊའི་མགོ་ཁྲིད་བྷེན་ལཱ་ཌན་གྱི་བུ་ཆེས་ཤོས་བཞི་བ་ཡིན་ཞིང་། ཁོང་ནི་ཨ་ཕའི་ལྟ་བ་ལངས་ཕྱོགས་དང་མི་མཐུན་པས་དེ་སྔ་བྷེན་ལཱ་ཌན་དང་རྒྱང་ཐག་རིང་དུ་བསྡད་ཡོད་ཅིང་། འཇིགས་སྐུལ་རིང་ལུགས་པ་ཚོར་འགྲོག་འབྲེལ་བྱེད་ཀྱི་མེད་པ་མ་ཟད། དེ་སྔ་འཛམ་གླིང་ཞི་བདེ་དང་མི་རིགས་འཆམ་མཐུན་ཐད་སྤེལ་པའི་ལས་འགུལ་འདྲ་མིན་ནང་ཆ་ཤས་ལངས་མྱོང་ཡོད་པ་ཞིག་ཡིན་འདུག་ལ། བྷེན་ལཱ་ཌན་གྱི་ཉེ་འབྲེལ་ནང་མིའི་ཁྲོད་ནས་ཁོང་ཨ་རི་སོགས་རྒྱལ་ཁབ་གང་སར་རང་དབང་ངང་འགྲོ་བྱས་མྱོང་མཁན་ཞིག་ཆགས་ཡོད། དེ་སྔ་ཁོ་ལ་བྷེན་ལཱ་ཌན་དང་འབྲེལ་པ་ཡོད་པའི་ཉེས་འཛུགས་ཀྱང་ཐེངས་ཁ་ཤས་ལ་བྱུང་ཡོད།
གསར་འགོད་པ། བནྡེ་སྐྱབས།
ཨོ་ས་མ་བྷན་ལ་ཌན་དམར་གསོད་བྱས་ཏེ་ཁྱབ་བསྒྲགས་བྱས་པ་དེ་ནི་ཨོ་བྷ་མ་སྐབས་རྗེས་མར་འོས་ཐུབ་ཆེད་འཁྲབ་པའི་ཆབ་སྲིད་ཀྱི་གཡོ་འཕྲུལ་ཞིག་རེད།། དེ་མ་གཏོགས་ཨ་རིས་ད་བར་ཁོ་མ་སོད་པ་མི་སྲིད་ལ།། དངོས་གནས་མ་སོད་ཡིན་པའི་དབང་དུ་བཏང་རུང་།།་དརེ་སོད་མ་ཐག་ཁྱབ་བསྒྲགས་བྱེད་དགོས་དོན་ག་ལ་ཡོད་དེ།། དེནི་འཛམ་གླིང་གི་ཁ་ཆེ་ཐེར་འབུམ་མང་པོར་ཕོགས་ཐུག་དང་།། ཉེད་མེད་མི་མང་དམར་གསོད་བྱེད་པའི་རྐྱེན་རྩ་ཉེན་ཁ་ཅན་གྱི་བྱ་བ་ཡིན་པའི་ཕྱིར་རོ།།
ནག་ཕྱོགས་དགྲ་བོ་ཚར་གཅོད་མ་བྱས་ན། དཀར་ཕྱོགས་འགྲོ་བའི་བདེ་སྐྱིད་ཇི་ལྟར་འཐོབ།
འཛམ་གླིང་དམག་འཁྲུག་མཚམས་འཇོག་ཞི་བདེ་སྟེ། མི་ངན་ཚེ་ཐར་གཏོང་རྒྱུ་ཞི་བདེ་མིན།
བུ་འདི་ཡི་སྐད་ཆ་ལ་གོ་རྒྱུ་འདུག
དམར་གསོད་མི་གཏོང་བར་ཁྲིམས་ལ་སྦྱོར་མི་དགོས་པའི་རྒྱུ་མཚན་མི་འདུག
བདེན་པ་ཡོད་ན་བདེན་པ་ཁྲིམས་ཀྱི་དབྱེ་ཞིབ་བྱེད་དགོས་མ་གཏོགས་ཕྱོགས་རྐྱང་པས་དྭོག་པ་ཡོད་པའི་རྒྱུ་མཚན་གྱིས་དམར་གསོད་བཏངས་བ་ནི་མ་འོས་པ་ཞིག་རེད།
དེ་ཡང་བྷིན་ལ་ཌིན་གྱི་ལག་ཏུ་མཚོན་ཆ་གང་ཡང་མེད་པར་གསོད་དགོས་དོན་གང་ཡིན་ནམ།
བུ་འདི་ཡིས་གཅིག་བྱེད་ས་རེད།