བོད་གཞུང་ཞེས་པའི་མིང་བསྒྱུར་ན་མི་འགྲིག་ཟེར་བ་འདི་འཕྱིས་དྲགས་པ་རེད།
ཀིརྟི་སྐྱབས་ཀྱིས།
༄༅།།བཙན་བྱོལ་བོད་མིའི་བཅའ་ཁྲིམས་ལ་འགྱུར་བ་གཏོང་བཞིན་པའི་ཁྲོད། ༸གོང་ས་མཆོག་གི་སྐུ་དབང་རྣམས་བཀའ་ཁྲི་སོགས་ཆེས་མཐོའི་དབུ་ཁྲིད་རྣམས་ལ་ཆ་བགོས་གནང་བས་དབུ་ཁྲིད་རྣམ་པའི་འགན་དབང་སྔར་ལས་ཇེ་ཆེར་འགྲོ་བཞིན་ཡོད་ནའང་། གཞུང་གི་མིང་དང་ལས་རྟགས་སོགས་ཀྱི་ངོ་བོ་དང་རྣམ་པ། ནུས་པ་གང་ཐད་ནས་ཇེ་ཆུང་དུ་འགྲོ་བཞིན་ཡོད། ཆེ་ཆུང་གི་འགལ་འདུ་འདིའི་ངོས་རེ་རེ་བཞིན་ཆབ་སྲིད་ཀྱི་འཕོ་འགྱུར་ཆེན་པོ་རེ་ཡིན་ཞིང་། རྒྱ་ནག་དང་བཅས་པའི་འཛམ་གླིང་ཡུལ་ཁག་ཚང་མས་དོ་སྣང་ཆེན་པོ་བྱེད་བཞིན་ཡོད། བོད་ཕྱི་ནང་གི་བོད་མི་ཚོས་དེ་བས་ཀྱང་དོ་སྣང་དང་བསམ་འཆར་འདྲ་མིན་འདོན་བཞིན་ཡོད།
བཙན་བྱོལ་བོད་གཞུང་འདི་ལ་ངོ་བོ་གཉིས་ལྡན་ཡོད། གཅིག་ནས་སྔ་མོའི་བོད་རང་བཙན་སྐབས་ཀྱི་སྲིད་གཞུང་དེའི་རྒྱུན་ཡིན་པས་བོད་རྒྱལ་ཁབ་ཀྱི་སྲིད་གཞུང་ཡིན། གཉིས་ནས་བཙན་བྱོལ་དུ་གྱར་བའི་བོད་མི་རྣམས་ཀྱི་འཛིན་སྐྱོང་གི་སྒྲིག་འཛུགས་ལྟེ་བ་དེ་ཡིན། སྔ་མ་ནི་བོད་མི་རང་ཉིད་མ་གཏོགས་འཛམ་གླིང་གི་རྒྱལ་ཁབ་སུས་ཀྱང་ཁས་ལེན་གྱི་མེད་ནའང་བོད་མི་ཚོས་དེར་ངོས་འཛིན་ཆ་ཚང་བྱེད་ཀྱི་ཡོད། ཕྱི་མ་ནི་རྒྱལ་ཁབ་མང་པོས་ཁས་ལེན་གྱི་ཡོད་ཅིང་། ལྷག་པར་གནས་ཡུལ་རྒྱ་གར་གཞུང་གིས་ཁས་ལེན་ཆ་ཚང་ཡོད་པའི་ཁྲིམས་མཐུན་གྱི་སྒྲིག་འཛུགས་ཤིག་ཡིན། ད་བར་དུ་བཙན་བྱོལ་བོད་གཞུང་གིས་ཕྱོགས་དེ་གཉིས་ཀའི་ལས་དོན་གནང་དང་གནང་བཞིན་ཡོད་ནའང་ད་ཆ་སྔ་མ་དེ་ལ་འགྱུར་བ་འགྲོ་བཞིན་ཡོད། དཔེར་ན་བོད་གཞུང་ཞེས་པའི་མིང་ཡང་མེད་པར་བཟོ་བཞིན་ཡོད། འདི་ལ་བོད་མི་མང་པོས་མི་འཐད་པའི་རྣམ་འགྱུར་ཤུགས་ཆེ་སྟོན་བཞིན་ཡོད་ནའང་། དོན་དངོས་ཐོག་བོད་ཡིག་བོད་སྐད་ནང་མ་གཏོགས་དབྱིན་ཡིག་ནང་མིང་འདི་སྔ་མོ་ནས་མེད་པར་གྱུར་ཏེ་བཙན་བྱོལ་བོད་མིའི་སྒྲིག་འཛུགས་ཞེས་འབོད་མུས་ཡིན། འོན་ཀྱང་སྤྱི་འཐུས་ཚོགས་གཙོས་ཁ་སང་ཨ་རིའི་ voa བརྙན་འཕྲིན་བརྒྱུད་གསུངས་པ་ལྟར་མིང་ཙམ་མ་གཏོགས་དོན་ལ་འགྱུར་བ་སོང་མེད་ཅེས་གནད་ཡོད་མི་སྣང་མང་པོས་གསུང་གི་ཡོད། ཡིན་ནའང་ངས་བལྟས་ན་མིང་ཙམ་མིན་པར་དོན་ལའང་འགྱུར་བ་སོང་ཡོད་ལ། གལ་ཏེ་ད་ཕན་འགྱུར་བ་སོང་མེད་ནའང་མ་འོངས་པར་འགྱུར་བ་འགྲོ་རྒྱུ་ཡིན་སྙམ། དེའི་རྒྱུ་མཚན་ནི།
གཅིག ང་ཚོས་དབུ་མའི་ལམ་ནས་རང་སྲིད་རང་སྐྱོང་རྩོད་པ་ལས་རང་བཙན་མི་རྩོད་རྒྱུ་སྤྱི་འཐུས་གྲོས་ཚོགས་ཀྱིས་ཐག་བཅད་ཚར་བ་ལྟར་ད་ཆ་གཞུང་གི་སྲིད་བྱུས་དེའི་ཐོག་འགྲོ་བཞིན་ཡོད། རྒྱ་ནག་གཞུང་གིས་འདི་ལ་ངོས་ལེན་བྱས་པའི་ཉིན་མོར་རྒྱ་མིའི་མངའ་འོག་གི་རང་སྲིད་རང་སྐྱོང་ཞིག་ཆགས་པ་ཡིན་པས་དེ་དུས་སྔ་མོའི་བོད་གཞུང་གི་མིང་དོན་གཉིས་ཆ་མེད་པར་ཆགས་ཚར་བ་རེད། འདི་འདྲ་ཞིག་ཆགས་རྒྱུར་ང་ཚོས་མོས་མཐུན་བྱས་ཚར་ཡོད་པས། ད་བོད་གཞུང་ཞེས་པའི་མིང་བསྒྱུར་ན་འགྲིག་གི་མི་འདུག་ཅེས་བསམ་འཆར་བཤད་པ་འདི་འཕྱིས་དྲགས་པ་མ་རེད་དམ།
གཉིས། བཙན་བྱོལ་བོད་གཞུང་ཞེས་པ་འདི་རྒྱལ་ཁབ་སུས་ཀྱང་ཁས་ལེན་གྱི་མེད་པར་མ་ཟད། རྒྱ་གར་གཞུང་གི་ཁྲིམས་ཁང་ནས་མིང་འདི་གཏན་འགོག་བྱེད་རྒྱུའི་ཉེན་ཁ་སླེབས་ཡོད། གཞན་གྱིས་མ་བཀག་གོང་ལ་རང་ངོས་ནས་ཐབས་ཤེས་བྱས་ཏེ་བསྒྱུར་ན་རྗེས་སོར་མ་མཐའ་ཡང་འཛམ་བུ་གླིང་གི་མདུན་དུ་ངོ་ཚ་ཉོ་མི་དགོས་པ་ཞིག་ཡོང་རྒྱུ་འདི་རྣམ་དཔྱོད་ཅན་གྱི་བྱེད་སྟངས་ཤིག་རེད། མ་གཞི་ནས་གོང་དུ་བཤད་པ་ལྟར་བོད་ཡིག་བོད་སྐད་ནང་མ་གཏོགས་དབྱིན་ཡིག་དབྱིན་སྐད་ནང་སྔ་མོ་ནས་བསྒྱུར་ཚར་ཡོད་པ་དེ་རེད།
གསུམ། ༸གོང་ས་མཆོག་གིས་གསུངས་པ་ལྟར་རེ་བ་ཡག་ས་དང་གྲ་སྒྲིག་སྡུག་ས་ལ་བྱེད་དགོས་པས། གལ་སྲིད་ད་དུང་ང་ཚོ་རྒྱ་གར་ནང་དུ་ཡུན་རིང་གནས་དགོས་བྱུང་ཚེ་རྒྱ་གར་གཞུང་གི་ཁྲིམས་དང་མཐུན་པར་བྱས་ཚེ་གནས་ཐུབ་པ་ལས་ཁྲིམས་འགལ་བྱས་ཚེ་གནས་ག་ལ་ཐུབ། ང་ཚོས་འདིར་རྒྱལ་ཁབ་ཅིག་གི་སྲིད་གཞུང་གི་མིང་དང་རྟགས་བཟུང་ན་དེ་རྒྱ་གར་གཞུང་གི་ཁྲིམས་དང་མི་མཐུན་པ་མཁྱེན་གསལ་རེད། ད་ལྟ་བར་དུ་རྒྱ་གར་གཞུང་གིས་མ་མཁྱེན་མདོག་མདོག་བྱས་ཏེ་བཞག་པ་འདི་༸གོང་ས་༸སྐྱབས་མགོན་ཆེན་པོའི་ཞལ་ལ་བལྟས་པ་ཁོ་ན་རེད། མ་འོངས་པར་སྡུག་ས་ལ་བསམ་བློ་་བཏང་ཚེ་རྒྱ་གར་གཞུང་གིས་མུ་མཐུད་འདི་ལྟར་གནང་རྒྱུ་ཁག་པོ་ཡིན་པས་ད་ལྟ་ནས་གྲ་སྒྲིག་གམ་བསྒྱུར་བཅོས་བཏང་ན་ལེགས་སྙམ།འ
བཞི། གཞུང་གི་མིང་བསྒྱུར་ནའང་ནང་དོན་རང་རེའི་རྩ་དོན་སྒྲུབ་པའི་བྱ་བ་རྣམས་སྔར་བཞིན་སྒྲུབ་ཐུབ་ཀྱི་རེད་གསུང་གི་ཡོད་པ་ལྟར་དེ་ཕལ་ཆེར་ཐུབ་རྒྱུ་རེད། དེ་བྱུང་ན་མིང་ཙམ་ལ་འགྱུར་བ་ཐེབས་ནའང་དེ་ལ་སྐྱོན་ཆེན་པོ་རང་མི་འདུག་སྙམ། སྤྱིར་བཙན་བྱོལ་བ་དང་སྐྱབས་བཅོལ་བ་ཞིག་ཡིན་ཕྱིན་གཞན་དབང་སྟབས་བསྟུན་བྱེད་རྒྱུ་ལ་ནང་ཡང་གཡོལ་ཐབས་མེད་པ་འདི་དངོས་ཡོད་གནས་ཚུལ་ཞིག་ཡིན་ནོ།།
Central Tibetan Administration༽ཞེས་པ་འདིའི་གོ་དོན་ཁག་ནི།
དབུས་བོད་མིའི་འཛིན་སྐྱོང་དང་།བོད་མིའི་འཛིན་སྐྱོང་ལྟེ་གནས།དེ་ག་ནང་བཞིན་དབུས་བོད་མིའི་ཆབ་སྲིད་འཛིན་སྐྱོང་དང་།བོད་མའི་ཆབ་སྲིད་ལས་འཛིན་སྡེ་ཚན།དབུས་བོད་མིའི་ཆབ་སྲིད་ལས་འཛིན།བོདམིའི་འཛིན་སྐྱོང་སྡེ་ཚན་ལའང་གོ་ཐུབ་ཀྱི་འདུག་པ་ལགས་ན་དྲ་གྲོགས་རྣམས་པ་ལྷན་རྒྱས་ནས་དོག་སྣང་དང་དཔྱད་པ་མང་ཙམ་གནང་བ་ཡིན་ན་དགེ་མཚན་ཆེ་བ་མཐོང་།
གཞན་སྲིད་གཞུང་དང་སྒྲིག་འཛུགས་ལ་སོགས་པར་གོ་ཐུབ་ཀྱི་ཡོད་པ་ཞིག་མཐོང་གིན་མི་འདུག
གནས་ཚང་ལ།
༼Centre Tibetan Administration༽ ཞེས་པ་འདིའི་དོན་༼བོད་མིའི་དབུས་འཛིན་སྐྱོང་སྲིད་གཞུང༽ཞེས་པ་ཆགས་ཀྱི་མེད། Administration ནི་སྲིད་གཞུང་གི་དོན་དུ་ནམ་ཡང་མི་གོ། དེ་ནི་དོ་དམ་མམ་འཛིན་སྐྱོང་གི་དོན་ཙམ་རེད། སྲིད་གཞུང་ལ Government ཟེར། ༼Centre Tibetan Administration༽ ཞེས་པ་འདི་རྒྱ་སྐད་དུ་བསྒྱུར་ན། 藏人管理中心 ཟེར། འདིའི་དོན་བོད་ནང་གི་བསྒྱུར་སྟངས་ལྟར་བྱས་ན་༼བོད་མིའི་དོ་དམ་ལྟེ་གནས་༽སམ་༼བོད་མིའི་འཛིན་སྐྱོང་ལྟེ་གནས་༽ཟེར། འདི་ཕྱོགས་ཀྱི་བསྒྱུར་སྟངས་ལྟར་བྱས་ན་༼དབུས་བོད་མིའི་སྒྲིག་འཛུགས་༽ཟེར། འདི་དག་ནང་༼བཙན་བྱོལ་༽ཞེས་པའི་དོན་མི་འདུག
གཞན་དབང་སྟབས་བསྟུན་ནི་དངོས་ནས་ཡག་པོ་ཡིན་ཡང་། བདེན་པའི་རྩ་དོན་ཆེད་དུ། ཚང་མ་གཞན་གྱི་བཤད་རྗེས་སུ་བགྲེང་བ་ཡིན་ན། བོད་ཟེར་བའི་རྒྱལ་ཁབ་ཞིག་འཛམ་གླིང་འདིར་བྱུང་མ་མྱོང་བར་རྒྱ་ནག་སྲིད་གཞུང་ཤུགས་ཆེན་པོའི་སྒོ་ནས་རྒྱུ་དངོས་སྤྱོར་གསུམ་བཏང་ནས། ད་ལྟའི་འཆར། བོད་ཟེར་བའི་རྒྱལ་ཁབ་ཞིག་རྒྱ་ནག་གི་ཕྱོགས་གཏོགས་རྒྱལ་ཁབ་ཀྱི་ས་ཁྲ་མང་ཤོས་ཤིག་གི་ནང་དུ་བོད་ཟེར་བའི་མིང་འདི་གཏན་ནས་མེད་པ་བཟོས་ཚར་བ་རེད། རྒྱའི་མངའ་ཁུངས་ཀྱི་ལྷ་ས་ཟེར་བ་སོགས་མ་གཏོགས། དེ་སྔ་མཐོང་རྒྱུ་ཡོད་པའི་བོད་ཟེར་བའི་རྒྱལ་ཁབ་དེ་ཡི་མིང་མེད་པ་བཟོས་ཡོད། དེ་ཡི་ཁྲོད་དུ་རྒྱ་གར་གཞུང་གི་ཆབ་སྲིད་པའི་དབུ་ཁྲིད་ཆེས་མི་ཉུང་བ་ཞིག་ཀྱང་འདུ་བ་ཡིན། རྒྱ་གར་གཞུང་གིས་དངོས་ནས་དེ་ལྟར་བོད་གཞུང་ཟེར་བའི་མིང་དེ་ཡང་ཕྱིར་བསྡུ་བྱེད་པའི་ཉིན་མ་ཞིག་ཤར་སོང་བ་ཡིན་ན། ད་གཟོད་བོད་མི་བྱེས་པ་དག་གཉིད་ལས་སད་ཁོ་ཐག་ཡིན་ངེས་རེད། དེ་འདྲ་ཞིག་དགོས་ཀྱི་ཡོད་པ་རེད། ལྷག་དུ་བོད་བྱེས་པ་དག་ལ་གཞན་གྱི་ས་ཐོག་ནས་སྐྱིད་ཉལ་བྱེད་རྒྱུར་གོམ་ཟིན་པའི་གཤིས་ཀ་འདི་འགྱུར་བ་ཞིག་སོང་ན་རེད།
ལེགས་བཤད་ལས། ༼ཙན་དན་གསེར་ལས་རིན་ཆེ་བ། བླུན་པོས་སོལ་བར་བཏང་ལ་ལྟོས༽ཞེས་པ་འདི་ཅིས་མ་བདེན། ད་ལྟ་བར་དབྱིན་ཡིག་ནང་བཀོལ་བཞིན་པ་ནི༼Centre Tibetan Administration༽རེད་ལ། འདི་དག་ཐད་ཀར་བསྒྱུར་བ་ཡིན་ན། ༼བོད་མིའི་དབུས་འཛིན་སྐྱོང་སྲིད་གཞུང༽ཞེས་པ་ཆགས་ཀྱི་ཡོད་པ་རེད་མ་གཏོགས་༼བཙན་བྱོལ་བོད་མིའི་གཞུང་གི་སྒྲིག་འཛུགས༽ཟེར་བ་ཞིག་གཏན་ནས་ཡོང་ཐབས་ཡོད་པ་མ་རེད།
གལ་སྲིད་༼བཙན་བྱོལ་བོད་མིའི་གཞུང་གི་སྒྲིག་འཛུགས༽མུ་མཐུད་དུ་བཀོལ་བ་ཡིན་ན། རྒྱ་ཡིག་ནང་བཙོག་བཤད་ལྟར་ན༼ཏཱ་ལའི་རུ་ཚོགས༽དང་། ཡག་བཤད་ལྟར་ན༼ཡུལ་གྱར་བོད་མིའི་སྒྲིག་འཛུགས༽ཆགས་ཡོད་པས། མིང་དོན་གང་གི་ཆ་ནས་ཀྱང་བཙན་བྱོལ་བོད་མི་ཙམ་མ་གཏོགས་ཐེ་གཏོགས་བྱེད་ས་ལྷག་མེད་ལ། བོད་ནང་གི་བོད་མི་རང་ངོས་ནས་ཐབས་ཤེས་གཞན་ཞིག་མི་བཙལ་རང་བཙལ་སྒང་སླེབས་ཡོད། དེ་དུས་བོད་འཐོར་རྒྱུ་རེད་ལ་ད་ལྟའི་མཐོ་རིམ་མི་སྣ་ཚོའང་ཕྱུག་པོ་ཆགས་ངེས་རེད། ཡིན་ནའི། བཙན་བྱོལ་བོད་མི་ཚོ་ད་དུང་འཕྱིས་ཡོད་པ་མ་རེད། ཤུགས་རྒྱག་མིན་བོད་འདི་ད་དུང་གནས་དགོས་མིན་ལ་ཐུག་ཡོད།