སྲ་བརྟན་དུ་འགྱུར་ངེས་པའི་གཞོན་ལྷན།

བསྟན་འཛིན་དགའ་བ།

རྒྱ་གཞུང་གིས་དངོས་ཡོད་ལ་བརྟག་ཅིང་མ་དཔྱད་པར་མའོ་ཙེ་ཏུང་གིས་བཤད་པའི་རྫུན་གཅིག་ཐེངས་བརྒྱ་ལབ་ན་བདེན་པ་ཆགས་ཀྱི་རེད་ཅེས་པའི་བདེན་པ་རྫུན་འཕྲོག་དང་། རྫུན་པ་བདེན་བསྒྱུར་གྱི་གཏན་ཚིགས་ལྟར་སྣང་འདིར་ཡིད་ཆེས་ངེས་གཏན་ཀྱིས་བོད་བཙན་བཟུང་བྱས་པ་དེ་ཁྲིམས་མཐུན་རང་བཞིན་དང་། ལུགས་མཐུན་རང་བཞིན་གྱི་ངོ་བོར་བསྒྱུར་ཐབས་སུ་བོད་འདི་རྒྱ་ནག་གི་ཆ་ཤས་བསྙོན་མེད་ཡིན་ཚུལ་དང་།  རྒྱལ་སྤྱི་དང་རྒྱལ་ནག་ནང་ཁུལ་དུ་ལོ་རྒྱུས་ལ་འཁྱོག་བཤད་དང་མི་བདེན་རྫུན་བསྒྲིག་ལ་ཐབས་བརྒྱ་བྱུས་སྟོང་གིས་འབད་སྒྲུབ་བྱས་རུང་། བདེན་ཚབ་རྫུན་གཏམ་གྱིས་བྱེད་ནུས་བྲལ་བ་འདི། དེ་གཉིས་ཀྱི་བྱེད་ལས་རང་བཞིན་དང་ངོ་བོའི་རང་བཞིན་བར་འགལ་བ་ལྟག་སྤྲོད་དུ་གནས་ཡོད་པས་རེད། 

རྒྱུ་མཚན་དེ་བས་ན་བོད་ཀྱི་གཞོན་ལྷན་གྱིས་ལོ་རྒྱུས་རང་བཞིན་གྱི་ཕྱོགས་གཉིས་པོའི་མངའ་རིས་དང་བདག་ཐོབ་གཞིར་བཟུང་ཐོག་བཙན་རྒོལ་རྒྱལ་སྐྱོབ་ཀྱི་སྤོབས་སེམས་དང་། ཉེན་མཆོང་གི་སྙིང་སྟོབས་བཅས་ལ་མཐོང་ཆེན་དང་གུས་བརྩི་བྱ་དགོས་པ་ནི། མི་རིགས་ཤིག་གི་རྩ་དོན་གྱི་ངོས་ཐད་ནས་མ་གླེང་རུང་། བདེན་དོན་རང་བཞིན་གྱི་ངོ་བོའི་ཆ་ནས་ཀྱང་གོང་བཀུར་བྱ་དགོས་པ་ཞིག་རེད། དེའི་སྟབས་ཀྱིས་ང་གཞོན་ལྷན་གྱི་ལངས་ཕྱོགས་ལ་མོས་མཐུན་མེད་རུང་ཁོང་རྣམ་པའི་རང་རྒྱལ་དགྲ་སྐྱོབ་ཀྱི་ཆོད་སེམས་དང་ཉེན་མཆོང་གི་སྙིང་སྟོབས་བཅས་ལ་ནམ་ཡང་གོང་བཀུར་དང་བརྩི་མཐོང་བྱེད་བཞིན་ཡོད། 

འདས་པའི་ལོ་ངོ་དེ་དག་རིང་རྒྱ་གཞུང་གིས་སྣང་མེད་དུ་བསྐྱུར་མི་རུང་བའི་སྒྲིག་འཛུགས་དེའང་ཚོགས་མི་ཆིག་ཁྲི་ལྷག་ཡོད་པའི་བོད་ཀྱི་གཞོན་ནུ་ལྷན་ཚོགས་འདི་རེད་ལ། དོན་དངོས་ཀྱི་ཆ་ནས་ཀྱང་རྩ་དོན་ལ་གྲུབ་འབྲས་གང་ཙམ་ཐོན་ཡོད།  དེ་ལྟ་ནའང་ཆུང་དོར་ཆེ་སྐྱོབ་དང་། སྒེར་འཁོན་སྤྱི་སྤུངས། ཁོག་ཡངས་དཀྱེལ་ཆེ། རྒན་གཞོན་གོ་རིམ། བཀའ་བརྩི་དང་ལེན་སོགས་ཆིག་སྒྲིལ་གྱི་མ་ལག་ཁག་ལ་སྣང་འཇོག་བྱ་རྒྱུ་ལྷོད་གཡེང་དུ་གྱུར་བའི་སྟབས་ཀྱིས། སྤྱི་པའི་སྒྲིག་འཛུགས་ཀྱི་ནུས་སྟོབས་དང་གཟུགས་བརྙན་ལ་རྨ་ཁ་རིམ་པར་བཟོས་ཏེ། མང་ཚོགས་ཀྱིས་གཞོན་ལྷན་ལ་བཅངས་བའི་རེ་བ་དང་། ཡིད་ཆེས་ཀྱི་འདུ་ཤེས་བརྟན་པོ་དེ་དག་ལ། གཞོན་ལྷན་གྱིས་བློ་ཕམ་ཡིད་ཆད་དང་། རེ་བྲལ་ཐབས་ཟད། ཨ་ཆད་ཨུ་ཐུག་ཏུ་གཏད་པ་ཡང་ཉུང་ཉུང་ཞིག་ག་ལ་ཡིན། 

ཉེ་བའི་ཟླ་ཤས་གོང་ང་ལ་རེ་སྐུལ་གནང་བ་བཞིན་གཞོན་ནུའི་ཚོགས་འདུ་ཞིག་གི་ཚོགས་དྲུང་བྱེད་སྐབས། ང་ལ་མྱོང་ཚོར་ཆེན་པོ་ཞིག་བྱུང་བ་ནི་མིང་གྲགས་དང་ཆེ་མཐོང་ཡོད་པའི་གཞོན་ལྷན་འདི་ད་ཆ་འཐོར་ཞིག་ཏུ་འགྱུར་བཞིན་པའི་ཁང་རྙིང་གོག་ཧྲུལ་ཞིག་གི་སྣང་བ་འགོག་མེད་དུ་སྦྱིན་སོང་ལ། རང་ཉིད་ཀྱི་ལྟ་བར་རང་ཉིད་ཡིད་ཆེས་དང་གདེང་སྤོབས་བྲལ་བའི་སྐད་ཆ་འགའ་རེ་ཡིས་ང་ལ་དེ་བས་ཀྱང་སྲོག་བྲལ་བེམ་གཟུགས་ཀྱི་སྣང་བ་ཙམ་ལས་རང་རྒྱལ་དགྲ་སྐྱོབ་ཐུབ་ཀྱི་ནུས་ཤུགས་ལྡན་པའི་ཡིད་ཆེས་ཕྲན་བུ་ཡང་སྤྲད་མ་སོང་། དེ་ལྟ་ནའང་ད་ལྟའི་གཞོན་ལྷན་ཚོགས་གཙོ་དང་ཚོགས་གཞོན་བར་ང་ཆེ་ཁོ་བཙན་དང་། སྒེར་འཁོན་སྤྱི་སྤུངས་ལྟ་བའི་དམ་ཚིག་མི་གཙང་བའི་རྐྱེན་རྩ་མེད་པར་ཕན་ཚུན་གུས་བཀུར་དང་རྒན་གཞོན་གོ་རིམ། མཉམ་གྲོས་ཐག་གཅོད་གཞི་རྐང་དུ་བཟུང་བའི་བྱེད་བབ་དེས། ཁོང་གཉིས་བར་མཉམ་རུབ་མཉམ་ལས་ཀྱི་ནུས་པ་སྔར་ལས་ཇེ་མཐོར་འགྲོ་བཞིན་ཡོད། 

ལྷག་པར་དུ་ད་ལྟའི་གཞོན་ལྷན་ཚོགས་གཙོ་ནི་ཆབ་སྲིད་ལ་མཁས་པའི་མི་སྣ་ཞིག་རེད་ལ། ཁོང་གི་ཁོག་ཡངས་དཀྱེལ་ཆེའི་བློ་མིག་འོག རང་དང་ལངས་ཕྱོགས་མི་མཐུན་པའི་གནད་ཡོད་མི་སྣ་ཚོར་ཡང་གོང་བཀུར་བྱེད་སྟངས་དེས་ཁོང་གི་གཟུགས་བརྙན་དེ་བོད་མིའི་སེམས་ཁོང་ན་མཛེས་སྡུག་ཅིག་དང་། དགྲ་ཕྱོགས་ཀྱི་སེམས་ཁམས་ན་ཚེ་སྲོག་གི་གཤེད་མ་ལྟ་བུར་གྱུར་ཡོད་ལ། ནང་ཁུལ་དཀྲུགས་ཏེ་ཆིག་སྒྲིལ་རྩ་གཏོར་གྱི་རེ་ངན་དག་ཀྱང་ནུས་མེད་དུ་བཏང་ཡོད།  དོན་དངོས་ཀྱི་ཆ་ནས་ཀྱང་ཁོང་ཐེངས་གཉིས་བསྟུད་མར་གཞོན་ལྷན་གྱི་ཚོགས་གཙོར་བདམས་ཐོན་བྱུང་བ་དེས་ཁོང་གི་ནུས་པ་གསལ་སྟོན་བྱས་པ་རེད་ལ། ཁོང་གིས་སྣེ་འཁྲིད་པའི་ད་ལྟའི་དབུས་གཞོན་ནུའི་རྒྱུན་ལས་གསུམ་ནས་ངེས་མེད་བཟས་བཅད་ཀྱི་བློས་གཏོང་དང་ཆོད་སེམས་དེས་གཞོན་ལྷན་གྱི་སྒྲིག་འཛུགས་འདི་སླར་ཡང་མང་ཚོགས་ཀྱི་སེམས་ཁམས་སུ་རེ་བ་འཆང་ས་ཞིག་དང་། ཡིད་ཆེས་བྱ་ས་ཞིག་ཏུ་འགྱུར་བཞིན་པ་མ་ཟད། རང་ཉིད་ཀྱི་ལངས་ཕྱོགས་ལ་རང་ཉིད་སོམ་ཉིར་གྱུར་ཞིང་བློ་སྤོབས་དང་ཆོད་སེམས་ཉམས་རྒུད་དུ་འགྲོ་བཞིན་པའི་སྐྱེ་བོ་དག་ལའང་ཚེ་སྲོག་གསར་པ་ཞིག་སྦྱིན་ཡོད་པ་ནི་སྨོས་ཅི་ལ་དགོས། 

ཟས་བཅད་ངོ་རྒོལ་བ་གསུམ་གྱི་ཉེན་མཆོང་གི་སྙིང་སྟོབས་དང་བཙན་རྒོལ་རྒྱལ་སྐྱོབ་ཀྱི་ཆོད་སེམས་དེས། རང་ཉིད་ཀྱི་ལངས་ཕྱོགས་ལ་རང་ཡིད་རང་ཆེས་ཇི་ཙམ་ཡོད་མེད་གསལ་སྟོན་བྱས་ཡོད་ལ། འདི་བརྒྱུད་དེ་རྗེས་རབས་པ་ཚོ་ལ་བག་ཆགས་བཟང་པོ་ཞིག་བསྐྲུན་ཡོད་པ་མ་ཟད།  གཞོན་ལྷན་གྱི་སྒྲིག་འཛུགས་སྤྱིའི་ལངས་ཕྱོགས་སྲ་བརྟན་དང་། རང་རྒྱལ་རང་སྐྱོབ་ཀྱི་ལས་འགུལ་ལ་སྔར་ལས་ངར་ཤུགས་ཤིག་བསླངས་ཡོད། ཁ་བཤད་དང་ལག་ལེན་གཉིས་ཀྱི་ནང་ནས་རང་ཉིད་གཞན་ལ་ར་སྤྲོད་བྱ་བྱེད་ནི་ཕྱི་མ་ལས་སྔ་མ་མིན་པའི་གཏན་ཚིགས་དེས་གཞོན་ལྷན་གྱི་ཚོགས་གཞོན་དོན་གྲུབ་ལྷ་དར་འབྱུང་འགྱུར་གྱི་གཞོན་ནུའི་ཚོགས་གཙོར་གདམ་ཐོན་ཡོང་རྒྱུར་སྔར་ལས་རེ་བ་ཆེ་ཙམ་བསླེབས་ཏེ། གཞོན་ནུའི་སྒྲིག་འཛུགས་འདི་སྲ་བརྟན་རང་བཞིན་ངང་མདུན་བསྐྱོད་ཐུབ་རྒྱུར་ཕན་གྲོགས་སུ་འགྱུར་ཡོད། 

གང་ལགས་ཞེ་ན། ཁོང་གི་ཕྱིའི་སྐད་ཡིག་གི་ཆུ་ཚད་དེ་དེ་སྔོན་གྱི་ཚོགས་གཙོ་དག་ལས་ཧ་ཅང་དམའ་ཡང་། རྒྱལ་ཞེན་སྙིང་སྟོབས་དང་ཞེ་འཁོན་འཐབ་རྒོལ་གྱི་སེམས་ཚོར་དྲག་པ་དག་ནི། ཚོགས་གཙོ་སྔ་མ་དག་ལས་ཧ་ཅང་ཚད་མཐོན་པོར་སོན་ཡོད། དེའི་རྒྱུ་མཚན་ནི་གཅིག་ནས་རྒྱ་དམར་གྱིས་བོད་ཤར་ཕྱོགས་ཁུལ་དུ་གདུག་རྩུབ་རང་བཞིན་གྱི་ཡ་ང་བའི་བྱ་སྤྱོད་སྤེལ་བ་འགའ་རེ་ཁོང་གིས་དངོས་སུ་མིག་མཐོང་ལག་ཟིན་བྱུང་བ་ཙམ་དུ་མ་ཟད།  ཕ་ཡུལ་གྱི་གོམས་སྲོལ་ལྟར། ཉེ་དུ་མང་པོ་ཞིག་རྒྱ་དམར་གྱིས་རྐྱེན་ལམ་དུ་བཏང་བའི་ཞེ་འཁོན་དེས་ཁོང་ལ་གཞན་ལས་འཐབ་རྒོལ་ངར་ཤུགས་ལྡན་ཡོད་ལ། མི་གཤིས་གྲུབ་སྟངས་ཆ་ནས་ཀྱང་རུ་ངར་པོ་དང་ཚོར་ཤུགས་ལྡན་པ་ཞིག་ཡིན་པ་ནི་ཁོང་གི་རྩོམ་གཤིས་ལས་དཔོག་ནུས།  

རྒྱུ་མཚན་དེ་བས་ན་བཙན་རྒོལ་རྒྱལ་སྐྱོབ་ཀྱི་སྒྲིག་འཛུགས་སྣེ་ཁྲིད་པ་ཞིག་ལ་ངེས་པར་དུ་ལྡན་དགོས་པའི་ཆ་རྐྱེན་ནི། ལོ་རྒྱུས་རང་བཞིན་གྱི་བདེན་དོན་དག་དཔང་རྟགས་ཁུངས་གསལ་ཐོགས་རང་ཉིད་ལ་ངེས་ཤེས་བརྟན་པོ་ཐོབ་དགོས་པ་རྨང་གཞིའི་ཐོག དུས་སྐབས་གང་དུའང་དགྲ་ཕྱོགས་ལ་ལན་འདེབས་ཐུབ་ནུས་ཀྱིས་གདེང་ཚོད་དང་སྤོབས་སེམས་ལྡན་དགོས་པ་མ་ཟད།  དམངས་སེམས་ལ་གཡོ་འགུལ་དང་ཚོར་ཤུགས་ཀྱི་ངར་ཆ་བསླང་ནུས་ཀྱི་ཁྱད་རྟགས་དང་། ཁ་ལག་གཉིས་དོ་མཉམ་དུ་སྤྱོད་པའི་མི་སྣ་ཞིག་དགོས་པ་སོགས་ནི་ཚོགས་མི་ཡོངས་ཀྱི་རྒྱབ་སྐྱོར་དང་། ནུས་པ། སེམས་ཤུགས་རྒྱ་བསྐྱེད་ཐུབ་བྱེད་ཀྱི་ཆ་རྐྱེན་ཁག་ཡིན་པས་དེ་ལྟའི་ཁྱད་ཆོས་ལྡན་པའི་སྣེ་ཁྲིད་པ་ཞིག་གི་འོག་ནས། ད་གཟོད་སྒྲིག་འཛུགས་ཀྱི་ནུས་པ་སྔར་ལས་སྲ་བརྟན་དང་རྒྱ་སྐྱེད་ཡོང་བ་ཞིག་ཡིན་པས་ན། འབྱུང་འགྱུར་ཁོང་གིས་སྣེ་ཁྲིད་འོག་སྔར་ལས་སྒྲིག་འཛུགས་འདི་སྲ་བརྟན་དུ་འགྱུར་ངེས་རེད།