སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་འཕར་མའི་སྟེང་། བཙན་བྱོལ་བོད་མིའི་བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་རིགས་བསྐྱར་བཅོས་བྱས་ཡོད་པ་དེ་དག་གཏན་འབེབས་བྱ་རྒྱུ་ཡིན་འདུག
དེ་རིང་ཕྱི་ཚེས་ ༢༦ ཉིན་གྱི་ཞོགས་པར་སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་འཕར་མ་དངོས་སུ་དབུ་འཛུགས་གནང་ཡོད་ཅིང་། ཚོགས་འདུའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་ནས་ཚོགས་འདུ་དབུ་འཛུགས་གསལ་བསྒྲགས་གནང་རྗེས། བོད་རྒྱལ་ཁབ་ཆེན་མོའི་རྒྱལ་གླུ་གྱེར་འདོན་གནང་ཡོད་ལ། ཚོགས་གཙོའི་ལས་ཚབ་དང་ལས་རིམ་ཚོགས་ཆུང་གི་ཚོགས་མི་བསྐོ་བཞག་གནང་གྲུབ་རྗེས། གཞུང་འབྲེལ་ཐོག་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་འདས་གྲོངས་སུ་ཕྱིན་པར་མྱ་ངན་དང་བཅས་སྐུ་གཤེགས་ཁོང་གི་མཛད་རྗེས་ལ་ཡི་རངས་བསྔགས་བརྗོད་དང་། དམ་མ་དེ་ཉིད་ཀྱི་བཀའ་དྲིན་བརྗེད་མེད་སྙིང་བཅངས་ངང་རྣམ་མཁྱེན་རྒྱལ་བའི་གོ་འཕང་མྱུར་དུ་རེག་པའི་སྨོན་འདུན་ཞུས་ཤིང་། ཤུལ་ལུས་ནང་མི་དང་འབྲེལ་ཡོད་ཡོངས་ལ་གདུང་སེམས་མཉམ་སྐྱེད་དང་ཐུགས་གསོའི་འཚམས་འདྲི་གནང་སོང་།
ཚོགས་འདུ་དབུ་འཛུགས་ཀྱི་གཏམ་བཤད་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་གིས་གསུང་དོན། ཐེངས་འདིའི་གྲོས་ཚོགས་ཚོགས་དུས་འཕར་མ་འདི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་བཅུ་གཅིག་པའི་སྟེང་༸གོང་ས་མཆོག་གིས་གྲོས་ཚོགས་ལ་ཕེབས་པའི་གསུང་འཕྲིན་ཐད་བཞག་པའི་གྲོས་ཆོད་ཀྱི་དགོངས་དོན་ལྟར། ཟླ་འདིའི་ཚེས་ ༢༡ ནས་ ༢༤ བར་གྱི་ཉིན་བཞིའི་རིང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས་ཏེ་ཁ་སང་ཚོགས་བཅར་བ་ཡོངས་ལ་༸གོང་ས་མཆོག་གིས་བཀའ་སློབ་ཕེབས་པ་སོགས་ཀྱི་ལས་རིམ་མཇུག་སྒྲིལ་ཟིན་པ་རེད།
ད་ལྟའི་གནས་སྐབས་སུ་༸གོང་ས་མཆོག་གི་དགོངས་གཞི་དང་མཐུན་པའི་བཅའ་ཁྲིམས་བསྐྱར་བཅོས་ཀྱི་ལས་རིམ་དང་འབྲེལ་ཡོད་སྟབས། དེ་དང་མཐུན་པའི་ལས་རིམ་དེ་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ལ་བསྐུར་བའི་ལས་འགན་ཁག་ཅིག་བོད་གཞུང་མང་རྒྱལ་ཡོངས་ཚོགས་ཆེན་ཚོགས་པའི་ཐོག་ནས་ཚང་མའི་འདོད་པ་ཁེངས་པ་ཞིག་དང་། གྲུབ་འབྲས་ཡང་གཟི་བརྗིད་དང་ལོ་རྒྱུས་རང་བཞིན་ལྡན་པ་ཞིག་བྱུང་ཡོད་པ་ཚང་མས་ཤེས་གསལ་ལྟར་རེད། དེ་ནི་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ལས་འགན་གྱི་ཆ་ཤས་ཤིག་འགྲུབ་ཟིན་པ་ཞིག་ལ་ངོས་འཛིན་བྱེད་ཀྱིན་ཡོད། སྐབས་བཅུ་བཞི་པའི་སྤྱི་འཐུས་གྲོས་ཚོགས་ལ་དེ་རིང་བརྩིས་པའི་ཉིན་བཞི་མ་གཏོགས་ལྷག་མེད། ཉིན་བཞིའི་རིང་ལས་དོན་གང་འགྲུབ་ཐུབ་མིན་གྱི་གནས་སྟངས་དེ་རིང་ཕྱི་དྲོ་གསལ་བོ་ཆགས་ཀྱི་རེད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། གལ་སྲིད། སྐབས་བཅུ་བཞི་པའི་གྲོས་ཚོགས་རང་དུ་གྲོས་ཆོད་ཀྱི་དགོངས་དོན་གཞིར་བཟུང་གཏན་འབེབས་བྱ་དགོས་པའི་གནས་སྟངས་ཡོད་ཚེ། གཞུང་མང་རྒྱལ་ཡོངས་ཚོགས་ཆེན་སྟེང་མང་ཚོགས་ཀྱི་བསམ་ཚུལ་བསྡུས་ཡོད་པ་ལྟར། ཕྱོགས་གཅིག་ནས་མང་ཚོགས་ཀྱི་མངོན་འདོད་དང་རེ་བ་གཞིར་བཟུང་ལྟར་འགྲོ་རྒྱུ་དང་། ཕྱོགས་གཞན་ཞིག་ནས་༸གོང་ས་མཆོག་གི་དགོངས་གཞི་གཞིར་བཟུང་བསྒྲུབ་ཐུབ་པའི་རེ་བ་ཞུ་རྒྱུ་ཡིན། གལ་སྲིད། སྐབས་བཅུ་བཞི་པའི་ཐོག་གཏན་འབེབས་བྱ་མི་ཐུབ་པའི་གནས་སྟངས་ཤིག་ཆགས་པ་ཡིན་ན། སྐབས་བཅོ་ལྔ་བས་གཏན་འབེབས་བྱ་དགོས་སྟབས། སྐབས་བཅོ་ལྔ་བའི་སྤྱི་འཐུས་རྣམ་པའི་གྲོས་ཆོད་གཞིར་བཟུང་འགན་འཁུར་རྒྱུ་དང་ད་ལྟ་བར་དུ་འགྲོ་བཞིན་པའི་ལས་རིམ་ནང་བཞིན་འགྲོ་ཐུབ་པའི་རེ་བ་ཞུ་བཞིན་ཡོད།
ཁ་སང་༸གོང་ས་མཆོག་གི་བཀའ་སློབ་ནང་ཚོགས་ཆེན་ཀྱིས་བཞག་པའི་གྲོས་ཆོད་དང་པོ་༸གོང་ས་མཆོག་གིས་རྒྱལ་ཁབ་དབུ་ཁྲིད་ཀྱི་མཛད་འགན་མུ་མཐུད་བཞེས་དགོས་པའི་སྤྱི་མོས་གཏན་འབེབས་དེ་སྙན་སེང་ཞུས་སྐབས། ༸གོང་ས་མཆོག་གིས་དེ་རྩ་བ་ཉིད་ནས་ཡོང་ཡ་མེད་པའི་ཞལ་བཞེས་གནང་ཚར་བ་རེད། ༸གོང་ས་མཆོག་ལ་སྔོན་མ་ནས་དགོངས་གཞི་གང་ཡོད་པ་དེ་ང་ཚོས་ཤེས་ཀྱི་ཡོད་པ་རེད། ཡིན་ནའང་། ཞུས་པ་དེ་ཡང་བོད་གཞིས་བྱེས་གཉིས་ཀྱི་མི་མང་གི་མངོན་འདོད་ནང་ཡོད་པ་ལྟར་ཞུས་པ་ཞིག་ལ་ངོས་འཛིན་བྱ་དགོས་པ་རེད། དེ་མིན་གྱི་བཅའ་ཁྲིམས་ཀྱི་སྔོན་གླེང་དང་དོན་ཚན་དང་པོ་གསར་དུ་བཅུག་པའི་ཐོག་ནས་སྔོན་གླེང་ཞལ་བཞེས་གནང་བ་རང་ལ་ངོས་འཛིན་དང་། སྔོན་གླེང་ནང་ཐ་སྙད་བེད་སྤྱོད་བྱེད་སྟངས་ཀྱི་ཐོག་ལ་བཀའ་གསལ་བོ་ཞིག་ཕེབས་ཡོད་སྟབས། ཚང་མས་དགོངས་པར་འཇགས་དགོས་པའི་གནས་སྟངས་ཆགས་ཡོད། དོན་ཚན་དང་པོའི་ནང་གསེས་དང་པོ་དང་གཉིས་པ་༸གོང་ས་མཆོག་གིས་ཞལ་བཞེས་གནང་ཚར་བ་རེད། ནང་གསེས་གསུམ་པའི་ཐོག་༸གོང་ས་མཆོག་གིས་འགྲེལ་བཤད་བསྐྱོན་ཡོད་པ་ལྟར། ད་རེས་ང་ཚོའི་ངོས་ནས་ཀྱང་གསལ་བོ་བཟོ་དགོས་པའི་གནས་སྟངས་ཆགས་ཡོད། ཅེས་གསུང་བྱུང་།
ཡང་ཚོགས་གཙོ་སྤེན་པ་ཚེ་རིང་མཆོག་གིས་བོད་ནང་གི་བོད་མི་ཚོར་གསུངས་དོན། ད་ལྟའི་ཆར་ཡང་བོད་ནང་གི་གནས་སྟངས་མུ་མཐུད་ཛ་དྲག་འོག་ལྷག་ཡོད་པ་དང་། ལྷག་པར་དུ་རྔ་པ་ཀིརྟི་དགོན་པའི་ནང་ད་ལྟའི་ཆར་ཡང་སྔར་བཞིན་ཛ་དྲག་གནས་མུས་རེད། ཡིན་ནའང་། བོད་ནང་གི་བོད་མི་ཚོས་སེམས་ཁྲལ་བྱ་མི་དགོས་པར། ༸གོང་ས་མཆོག་གིས་དེ་སྔོན་བཀའ་སློབ་གནང་བ་ལྟར། ཁོང་ཉིད་བོད་མི་ཞིག་ཡིན་པའི་ཆ་ནས་བོད་སྤྱི་བའི་ལས་འགན་མུ་མཐུད་བཞེས་རྒྱུ་ཡིན་ཞེས་གསུངས་བསྡད་ཡོད་པ་དང་། ང་ཚོ་རང་དབང་ལུང་པའི་ནང་དམངས་གཙོའི་འགྲོ་ལུགས་དང་མཐུན་པའི་འོས་འདེམས་ཀྱི་ལམ་ནས་མི་མང་གི་དབུ་ཁྲིད་བསླེབས་བསྡད་པ་དག་གིས་བོད་གཞིས་བྱེས་གཉིས་ཀྱི་རེ་བ་བསྐང་ཐུབ་པའི་ཐད་ལ་འབད་བརྩོན་བྱ་རྒྱུའི་ཆོད་སེམས་ཡོད་པ་དེར་བོད་ནང་གི་བོད་མི་ཚང་མས་ཤེས་པར་བྱ་དགོས། ང་ཚོས་༸གོང་ས་མཆོག་གི་ཆབ་སྲིད་ཀྱི་ཐུགས་འགན་མ་བཞེས་པ་ལ་བརྟེན་ཏེ། ང་ཚོའི་ནུས་པ་ཉམ་པ་དང་། གཅིག་སྒྲིལ་གྱི་ནུས་པ་འཐོར་བའི་རྣམ་པ་མེད་པའི་ཐོག་ནས་ད་ལྟའི་དུས་ཚོད་འདིར་ང་ཚོའི་ནུས་པ་གཅིག་ཏུ་སྤུངས་ཡོད་པ་ལྟར། མ་འོངས་པར་ཡང་མུ་མཐུད་གཅིག་སྒྲིལ་གྱི་ནུས་པ་གོང་མཐོར་དང་འཕེལ་རྒྱས་གཏོང་དགོས་པ་རེད། དེའི་ཐད་བོད་ཕྱི་ནང་གཉིས་སུ་གནས་པའི་བོད་མི་ཚང་མས་འགན་འཁུར་རྒྱུ་གལ་ཆེན་པོ་ཆགས་ཡོད། ཅེས་གསུངས་བྱུང་།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་འཕར་མ་དེ་དེ་རིང་ཕྱི་ཚེས་ ༢༦ ནས་ ༢༨ བར་གྱི་ཉིན་གྲངས་གསུམ་རིང་ཚོགས་ཚོགས་གཏན་འཁེལ་ཡོད་པ་ལྟར། དེ་རིང་ཚོགས་གཙོ་མཆོག་ནས་སྤྱི་འཐུས་ཀ་རྨ་ཆོས་འཕེལ་དང་རྒྱ་རོང་ཟླ་བ་ཚེ་རིང་། སྤྱི་འཐུས་ཀིརྟི་སྒྲོལ་དཀར་ལྷ་མོ་བཅས་གསུམ་ཚོགས་གཙོའི་ལས་ཚབ་དང་། སྤྱི་འཐུས་བསོད་ནམས་དགྲ་འདུལ་དང་སྤྱི་འཐུས་ཆབ་བྲག་ལྷ་མོ་སྐྱབས། སྤྱི་འཐུས་ཚེ་བརྟན་ནོར་བུ་བཅས་ལས་རིམ་ཚོགས་ཆུང་གི་ཚོགས་མིར་བསྐོ་བཞག་གནང་སོང་ལ། ཐེངས་འདིའི་གྲོས་ཚོགས་ཚོགས་དུས་འཕར་མའི་སྟེང་དགོངས་པ་ཞུ་མཁན་མདོ་སྟོད་སྤྱི་འཐུས་བསོད་ནམས་སྟོབས་རྒྱལ་དང་སྡེ་བ་ཚང་རྡོ་རྗེ་དབང་འདུས། དགེ་ལུགས་སྤྱི་འཐུས་དགེ་བཤེས་བེ་རི་འཇིགས་མེད་དབང་རྒྱལ། མདོ་སྨད་སྤྱི་འཐུས་སྲས་བསྟན་འཛིན་མཁས་གྲུབ་བཅས་བཞི་ཕུད་པའི་སྤྱི་འཐུས་ ༣༩ ཚོགས་ཞུགས་གནང་ཡོད་འདུག
གསར་འགོད་པ། དོན་གོ
ཀརྨ་རྡོ་རྗེ་ལགས།
དེ་རིང་སྐུ་སྒེར་ཡིག་ཚང་ནས་སྤྱི་འཐུས་ལ་གནང་བའི་ཡིག་ཆ་དེའི་ནང་བཙན་བྱོལ་བོད་མིའི་སྒྲིག་འཛུགས་ཞེས་བཀོད་ཡོད་པ་ཁྱེད་ཀྱི་མིག་ཆུང་ཙང་མཐོང་ཐུབ་མི་འདུག
༧གོང་ས་མཆོག་གིས”གངས་ལྗོངས་རང་དབང་མང་གཙོའི་ལྷན་ཁང་ངམ་སྒྲིག་འཛུགས”ཞེས་བསྒྱུར་ན་ལེགས་པའི་ལམ་སྟོན་བཀའ་སློབ་གནང་འདུག་པ་འདི་ད་ཡོད་སྤྱི་འཐུས་པ་ཚོས་མི་བརྗེད་པ་གནོངས་རོགས། དགེའོ། །
༸གོང་ས་མཆོག་གིས་གཞུངཟེར་བ་བཅོས་བསྒྱུར་བྱེད་པ་ནི་མ་འོངས་རྒྱང་གཟིགས་མཛད་པའི་བྱ་བ་རླབས་ཆེན་ཞིག་རེད། དེ་ནི་རང་དབང་ཞེས་པ་འདི་རྩོད་ལེན་བྱེད་པར་ང་ཚོ་ད་དུང་གཞན་གྱི་ས་ཁ་ས་ཐོག་ན་སྡོད་དགོས་ན། དེ་དག་གིས་ངོས་ལེན་ཡོད་པ་ཞིག་བྱེད་རྒྱུ་ནི་ཁ་ཚ་དགོས་གཏུགས་ཤིག་ཡིན་པ་ནི་སྨྲོས་མེད་རེད། བོད་གཞུང་ཟེར་བ་འདི་ང་ཚོའི་སེམས་ངོས་ནས་འགྱུར་མི་སྲིད་ལ། ལོ་རྒྱུས་ཀྱི་དེབ་ཐེར་ནས་ཀྱང་འགྱུར་ག་ལ་སྲིད། ཡིན་ནའང་ཡིན་བཞིན་ནོར་བུས་མུན་ནག་གི་རྒྱ་ལས་སྒྲོལ་བར་འདི་ལྟར་བྱས་ན་དགེ་མཚན་ཆེ་བར་དགོངས་པས་རེད་སྙམ། སྤྱི་འཐུས་ལྷན་ཚོགས་ཀྱིས་མ་མང་གི་མངོན་འདོད་བཞིན་དུ་མ་འོང་ནའང། ༸རྒྱལ་བའི་ལམ་སྟོན་ཇི་བཞིན་ཤར་བསྐྱོད་བྱ་ཐུབ་རེ་བ་ཞུ་བཞིན་ཡོད།
ཇི་ལྟར་ཡང་དུས་རབས་ཉེར་ཅིག་ནང་ལ་བོད་རྒྱལ་ཁབ་ཆེན་པོའི་མིང་དེ་མངའ་སྡེ་དང་ལུང་ཆུང་གཅིག་གི་་མིང་དུ་གྱུར་ཉེན་འདུག་དེ་ནི་བོད་ཀྱི་ལོ་རྒྱུས་ལ་སྐྱོན་ཆག་ཤིག་ལ་ངོས་འཛིན་ཆོག་་ད་བར་བོད་ནང་དང་བཙན་བྱོལ་ནང་ལ་རྒྱལ་ཁབ་དོན་དུ་ཚེ་སྲོག་ཤོར་བ་རྣམས་དང་ད་ཆ་ཤོར་བཞིན་པ་རྣམས་ལ་ང་ཚོས་ཇི་ལྟར་འབྲེལ་བརྗོད་བྱ་དགོས་བོད་མི་ཚོས་དགོངས་པ་ཆེ་ཙམ་ཞེས་དགོས་༸གོང་ས་མཆོག་ནི་རྒྱལ་ཁབ་གཞན་གྱི་སྲིད་དབང་འགན་འཛིན་དང་དགོངས་པ་ཞེས་དངས་དང་ཀུན་སློང་འཁྱེར་ཕྱོགས་ཐ་ཐད་ཡིན་པས་ཁོང་ནི་ནང་པ་སངས་རྒྱས་པའི་རབ་བྱུང་ཡ་རབ་ཤིག་ཡིན་པ་ང་ཚོ་ཚང་མ་ཤེས་དགོས་
ཐོགས་མར་ཚང་མ་ལ་འཚམས་འདྲི་ཞུ་བཞིན་ཡོད་ཚོགས་ཆེན་གྱི་མིང་ནི་ཧང་སང་ཡད་འཛིགས་པོ་དང་རྒྱལ་ཁབ་གཅིག་གི་ངོ་བོ་མཚོན་ཐུབ་ཀྱི་འདུག་འོན་ཀྱང་ཚོགས་མི་མང་ཆེ་བའི་མངོན་འདོད་དམ་བསམ་བློའི་འཁྱེར་སོ་ནི་ཚོགས་ཆེན་གྱི་མིང་དང་མཐུན་བཞིན་འདུག་ཁ་ཤས་ཤིག་ནི་དྲན་པ་མཐོར་ནས་བསྡད་འདུག་ ངས་ལྟས་ན་ཚོགས་མི་ཕལ་ཆེ་བས་བོད་རྒྱལ་ཁབ་ཀྱི་འགན་ཡག་པོ་ཞེས་སོང་འོན་ཀྱང་༸གོང་ས་མཆོག་གི་དགོངས་གཞི་འདི་མིན་ཁོང་གི་དགོངས་གཞི་ནི་བོད་འདི་རྒྱ་ནག་རྒྱལ་ཁབ་ནང་གི་ཞིང་ཆེན་ནམ་ཧོང་ཀོང་བལྟ་བུར་ཡོང་བའི་དགོངས་པ་ཞེས་བཞིན་ཡོད་པས་ཚོགས་ཆེན་གྱི་གྲོས་ཆོད་དང་ནང་འགལ་ཡིན་གང་ལ་ཞེས་ན་ཚོགས་ཆེན་གྱི་ཚོགས་མི་བརྒྱ་ཅ་དགུ་བཅུ་གོ་དགུས་རྒྱལ་ཁབ་གཅིག་གི་ངོ་བོར་སེམས་ནས་བསམ་ཚུལ་སྟོན་ཡོད་དེ་ནི་༸གོང་ས་མཆོག་གི་དགོངས་གཞི་དང་ཐ་ཐད་ཡིན་པས་༸གོང་ས་མཆོན་ནས་དེ་ལ་ངོས་ལེན་ནམ་ཡང་གནང་གི་མ་རེད་
“༸གོང་ས་མཆོག་གིས་རྒྱལ་ཁབ་དབུ་ཁྲིད་ཀྱི་མཛད་འགན་མུ་མཐུད་བཞེས་དགོས་པའི་སྤྱི་མོས་གཏན་འབེབས་དེ་སྙན་སེང་ཞུས་སྐབས། ༸གོང་ས་མཆོག་གིས་དེ་རྩ་བ་ཉིད་ནས་ཡོང་ཡ་མེད་པའི་ཞལ་བཞེས་གནང་ཚར་བ་རེད།”འདི་གསར་འགོད་པས་ནོར་བ་མིན་ན་ཚོགས་གཙོའི་སྐད་ཆ་བཤད་སྟངས་འདི་ཁྱད་མཚར་རེད། གོང་གི་ཚིག་དེ་ལ་བལྟས་ན་རྒྱལ་ཁབ་ཀྱི་དབུ་ཁྲིད་གནང་དགོས་པའི་གསོལ་འདེབ་ཞུས་པ་ལྟ་བུ་དང་། འོག་གི་ཚིག་དེ་ལ་བལྟས་ན་རྒྱལ་ཁབ་ཀྱི་དབུ་ཁྲིད་མ་གནང་རོགས་ཞེས་གསོལ་འདེབ་ཞུས་པ་ལྟ་བུ་ཞིག་མི་འདུག་གམ།
གྲོས་ཚོགས་འཕར་མ་འདི་ནང་བཅའ་ཁྲིམས་བསྐྱར་བཅོས་སྐོར་ལ་དམིགས་བསལ་ཚོགས་འདུ་ཚོགས་ཞིག་རེད། དོན་དག་དེ་ཡག་སྡུག་ག་འདྲ་བཟོ་ན་སྤྱི་འཐུས་ཚོའི་ལག་པ་ཡོད་རེད། དེའི་ཐོག་ལ་གཟབ་གཟབ་བྱེད་རྒྱུ་ཧ་ཅ་གལ་ཆེན་པོ་ཞིག་རེད། ཡིན་ནའང་སྤྱི་འཐུས་ལྷན་ཚོགས་ངོས་ནས་བསམ་བློ་བཏང་དགོས་པ་ཞིག་ལ་ད་ཐེངས་བོད་རྒྱལ་ཡོངས་ཐོག་མི་དམངས་ཀྱི་བསམ་ཚུལ་དང་རེ་བ་གང་ཡོད་པ་རྣམས་བསྲེགས་བཆད་བདར་གསུམ་བྱས་ཞིག་རེད་དེ་ཚོ་ཆུད་ཟོས་སུ་་མི་གཏོང་བར་སྤྱི་འཐུས་མི་རེ་ངོ་རེ་ནས་སོ་སོའི་རྣམ་དཔྱོད་ཤེས་རྩལ་སྟོན་རྒྱུར་དྲང་མོ་དྲང་བཞག་བྱ་རྒྱུ་གལ་ཆེན་རེད་སྙམས།
བོད་མི་ཡོངས་ཀྱི་སྤྱི་མོས་ལྟར་བཙན་བྱོལ་བོད་གཞུང་ཞེས་རང་སོར་འཇོག་རྒྱུར་༧གོང་ས་མཆོག་གིས་བཀའ་ལན་གསལ་བོར་གནང་ཡོད་པ་རེད། ཉིན་འདིར་༧གོང་ས་མཆོག་གིས”གངས་ལྗོངས་རང་དབང་མང་གཙོའི་ལྷན་ཁང་ངམ་སྒྲིག་འཛུགས”ཞེས་བསྒྱུར་ན་ལེགས་པའི་ལམ་སྟོན་བཀའ་སློབ་གནང་འདུག ཕྲན་གྱིས་བལྟས་ན་མཚན་བྱང་འདིའི་ཐ་མའི་ལྷན་ཁང་དང་སྒྲིག་འཛུགས་ཞེས་བཏགས་ཚེ་ཁྱབ་ཆུང་བའི་ཚོགས་སྡེ་ག་གེ་མོའི་ལས་ཁུངས་ལྟ་བུ་ཞིག་ལས་རྒྱལ་ཁབ་ཅིག་གི་ངོ་མཚོན་མི་ཐུབ་པས་ན། ”གངས་ལྗོངས་མང་གཙོ་ཕྱོགས་ལས་རྣམ་རྒྱལ”་ཞེས་བསྒྱུར་དགོས་པར་མཐོང་། དེ་ལྟར་བྱས་ན་ད་ལྟར་བཀོད་འོས་པ་མ་ཟད་མ་འོངས་པའི་བོད་མིའི་རྒྱལ་ཁབ་སླར་གསོའི་སྐབས་ཀྱང་རང་སོར་བཞག་ཆོག་པའི་ཁྱད་པར་འདུག་སྙམ་སོང་། དེ་བཞིན་ཚང་མས་གླེང་སློང་གནང་རོགས།
གྲོས་ཚོགས་འཕར་མ་འདི་ནང་བཅའ་ཁྲིམས་བསྐྱར་བཅོས་སྐོར་ལ་དོན་དག་སྒྲུབ་རྒྱུར་དཀའ་ལས་ཁག་པོ་རེད་འདུག ཡིན་ནའང་སྤྱི་འཐུས་ལྷན་ཚོགས་ངོས་ནས་མི་དམངས་ཀྱི་རེ་བ་ཆུ་ཟད་དུ་མི་གཏོང་བ་སྤྱི་འཐུས་མི་རེ་ངོ་རེ་ནས་སོ་སོའི་རྣམ་དཔྱོད་ཤེས་རྩལ་སྟོན་རྒྱུར་གལ་ཆེན་ཡིན་པ་སྨོས་མི་དགོས།
འདི་ན་བོད་ནང་གི་བོད་མི་ཞིག་གི་ལྟ་ཚུལ་ཞིག་འདུག མང་ཆེ་བ་རྒྱ་མིའི་གཞུང་གི་ལྟ་ཚུལ་རེད་དེ། དེའི་ནང་དུ་གོ་རྒྱུ་ཅན་གྱི་གཏམ་ཁ་ཤས་ཀྱང་འདུག འདི་ནི་ཚང་མ་ལོས་ཀློག་འོས་པ་ཞིག་རེད།
http://new.21ccom.net/plus/view.php?aid=35663&pageno=3