བོད་ཡིག་སྦྱོང་རྒྱུ་དེ་གཞུང་གི་ལས་ཀ་འཚོལ་ཆེད་ཙམ་མ་རེད།

རེ་བ་དང་ཡིད་ཆེས་ཀྱིས་ཁེངས་པའི་བོད་རིགས་མཐོ་རིམ་སློབ་མ་སྐོར་ཞིག་གིས་རང་ཉིད་ཀྱི་གུང་སེང་གི་དུས་ཚོད་ཆུད་ཟོས་སུ་མ་བཏང་བར། རིགས་ཞེན་དང་ལ་ཞེན་གྱིས་ཀུན་ནས་བསླངས་ཏེ། འདི་ན་བོད་སྐད་བོད་ཡིག་སློབ་གཉེར་ལ་རེམ་བཞིན་འདུག

ད་ལོའི་ཕྱི་ཟླ་ ༥ པའི་ཚེས་ ༩ ནས་དབུ་འཛུགས་ཀྱིས་ཟླ་གཅིག་རིང་རཱ་མཐོ་སློབ་ཁང་དུ་དབྱར་ཀའི་གུང་སེང་སྐབས་དང་བསྟུན་ཏེ། ཟླ་གཅིག་རིང་རྒྱ་གར་མཐོ་སློབ་ཁག་ཏུ་སློབ་གཉེར་གནང་བཞིན་པའི་བོད་རིགས་སློབ་མ་ཚོར་བོད་ཡིག་གཙོ་བོ་བྱས་པའི་བོད་ཀྱི་ལོ་རྒྱུས་དང་ནང་ཆོས་སོགས་ཀྱི་དམིགས་བསལ་འཛིན་གྲྭ་ཞིག་འཚོགས་བཞིན་ཡོད་པ་དང་། དམིགས་བསལ་འཛིན་གྲྭ་འདི་སྐུ་སྒེར་ཡིག་ཚང་གི་བཀའ་དགོངས་ལྟར་ ༢༠༠༣ ནས་མགོ་འཛུགས་བྱས་པ་ཞིག་ཡིན་འདུག ཉེ་ཆར་འདི་གའི་གསར་འགོད་པ་ཆེད་དུ་ས་རཱ་མཐོ་སློབ་ཏུ་ཕྱིན་ཏེ། ཐེངས་འདིའི་བོད་ཡིག་ཆེད་སྦྱོང་ལ་ཕེབས་པའི་རྒྱ་གར་མཐོ་སློབ་ཁག་གི་སློབ་ཕྲུག་སྐོར་ཞིག་ལ་བཅར་འདྲི་ཞུས་ཡོད།

ལྷོ་ཕྱོགས་མཱ་ངྷ་རཱ་སི་ལོ་ཡོ་ལཱ་མཐོ་སློབ་ཏུ་དབྱིན་ཇིའི་རྩོམ་རིག་ལོ་རིམ་གསུམ་པ་ཐོན་མཁན་སློབ་གཉེར་པ་ཚེ་རིང་དགྲ་འདུལ་ལགས་ལ། བོད་ཡིག་ཆེད་སྦྱོང་འཛིན་གྲྭ་འདིར་ཞུགས་དོན་གང་ཡིན་དྲིས་པར་ཁོང་གིས། ང་ཚོ་བོད་རིགས་སློབ་ཕྲུག་ཕལ་ཆེ་བར་འཛིན་རིམ་བཅུ་གཉིས་པར་དུ་བོད་ཡིག་སློབ་སྦྱོང་གི་གོ་སྐབས་རག་ཡོད་པ་རེད། འོན་ཀྱང་། བོད་པའི་སློབ་གྲྭ་ཁག་ནས་འཛིན་རིམ་བཅུ་གཉིས་ཐོན་རྗེས་རྒྱ་གར་མཐོ་སློབ་ཁག་ཏུ་འགྲོ་དགོས་ཀྱི་ཡོད་སྟབས། མཐོ་སློབ་སྐབས་ཀྱི་ལོ་གསུམ་བཞིའི་རིང་བོད་ཡིག་སློབ་ཚན་ཕར་གཞོག ཐ་ན་མཐོ་སློབ་འགའ་རེའི་ནང་བོད་པའི་སློབ་ཕྲུག་གཅིག་གཉིས་རེ་ལས་མེད་སྟབས། ང་ཚོར་བོད་ཡིག་སྦྱོང་ས་དང་བོད་སྐད་བཤད་སའི་ཁོར་ཡུག་མེད་པར་བརྟེན། དབྱར་ཀའི་གུང་སེང་འདི་དམ་འཛིན་ཐོག བོད་ཡིག་སྔར་སྦྱངས་བཞག་པ་དེ་མ་བརྗེད་པ་དང་ཡར་རྒྱུས་ཅུང་ཙམ་གཏོང་ཐུབ་ན། མ་འོངས་པར་བོད་གཞུང་གི་ལས་བྱེད་ཁུངས་ཁག་ཏུ་ཡིག་རྒྱུགས་གཏོང་རྒྱུར་ཕན་ཐོག་ཡོང་གི་རེད་བསམ་སྟེ་ཡོང་པ་ཡིན་ཟེར།

མཐར་མ་ངྷི་ར་སི་གྲོང་ཁྱེར་གྱི་ཨི་ཏི་རཱ་ཇཱི་བུད་མེད་མཐོ་སློབ་ཏུ་དཔལ་འབྱོར་རིག་པའི་སློབ་ཚན་ཐོག་ལོ་རིམ་གསུམ་པར་སློབ་སྦྱོང་བྱེད་བཞིན་པ་བཀྲ་ཤིས་དབང་མོ་ལགས་ལ། གུང་སེང་སྐབས་སྐྱིད་པོ་བྱས་ཏེ་མ་བསྡད་པར་བོད་ཡིག་སྦྱོང་རྒྱུའི་བསམ་བློ་ཇི་ལྟར་འཁོར་བྱུང་ཞེས་དྲིས་པར་ཁོ་མོས། ང་རང་འཛིན་རིམ་བཅུ་བའི་བར་ལ་དྭགས་བོད་ཁྱིམ་དང་། འཛིན་རིམ་བཅུ་གཅིག་བཅུ་གཉིས་གྷོ་པལ་པུར་བོད་ཁྱིམ་ནས་ཐོན་པ་ཡིན། བོད་ཡིག་ནི་སོ་སོའི་ཕ་སྐད་ཡིན་སྟབས་སློབ་གྲྭའི་སྐབས་སུ་དེ་ཙམ་སྐྱོ་བོ་མིན། ལྷག་པར་དུ་རང་ཉིད་རྒྱ་གར་གྱི་མཐོ་སློབ་ནང་སློབ་སྦྱོང་བྱེད་ཀྱིན་པའི་སྐབས་སུ་ཕ་མས་དུས་རྒྱུན་ནས། དེང་སང་བོད་པའི་སློབ་ཕྲུག་མང་པོ་མཐོ་སློབ་ཏུ་བསླེབས་ཡོད་ན་ཡང་བོད་ཡིག་ཐོག་སྙན་ཞུ་ཞིག་ཀྱང་འབྲི་མི་ཐུབ་མཁན་ཡོང་གི་འདུག་ཟེར། དེ་འདྲ་ཞིག་མ་ཆགས་པ་བྱ་རོགས་ཞེས་གསུངས་སོང་ལ། སོ་སོ་ཡིན་ནའང་མཐོ་སློབ་ནང་སློབ་ཚན་ཚང་མ་དབྱིན་སྐད་སྟེང་སྦྱང་དགོས་པ་དང་། སྔར་བོད་ཡིག་ག་ཚོད་ཤེས་པ་དེ་ཡང་དྲན་པ་བརྗེད་སོང་བ་ཡིན་ན། རྗེས་མ་བོད་ཡིག་མཐོང་ཡོང་སྐབས་གནའ་སྔ་མོའི་ཡི་གེ་འདྲ་བོ་ཞིག་ཆགས་ཡོང་རྒྱུའི་ཉེན་ཁ་འདུག་པས། གོ་སྐབས་གང་རག་པ་དེ་དམ་འཛིན་བྱས་པ་ཡིན། མཐོ་སློབ་ཐོན་རྗེས་ཨང་དང་པོ་བོད་པའི་སྤྱི་ཚོགས་ནང་ལས་ཀ་འཚོལ་རྒྱུ་ཡིན། གལ་སྲིད་བོད་པའི་སྤྱི་ཚོགས་ནང་རང་ཉིད་ལ་འཚམ་པའི་ལས་ཀ་ཞིག་མ་རག་ཚེ་སྤྱི་ཚོགས་གཞན་ནང་ལས་ཀ་འཚོལ་དགོས་བསམ་ཡོད། ཅེས་བརྗོད་བྱུང་།

རྒྱ་གར་ལྷོ་ཕྱོགས་ཝེ་ཇི་ཝ་རཱ་གྲོང་ཁྱེར་ནང་ཚོང་ལས་རིག་པའི་ཐོག་སློབ་གཉེར་བྱེད་བཞིན་པ་ཕུན་ཚོགས་ཉི་མ་ལགས་ལ། བོད་ཡིག་སྦྱང་དགོས་པའི་རྒྱུ་མཚན་གཙོ་གང་ཡིན་དྲིས་པར་ཁོང་གིས། ང་འཛིན་གྲྭ་བཅུ་གཉིས་པར་རྡོ་རྗེ་གླིང་བོད་གཞུང་སློབ་གྲྭ་རུ་སློབ་སྦྱོང་བྱས་པ་ཡིན་ལ། བོད་ཡིག་སློབ་སྦྱོང་བྱེད་སའི་ཁོར་ཡུག་ཡག་པོ་མེད་སྟབས། ང་རང་བོད་ཡིག་ཡག་པོ་དེ་ཙམ་མེད་པས་གོ་སྐབས་འདི་བཟུང་སྟེ་བོད་ཡིག་གི་ཤེས་ཚད་ཡར་རྒྱས་གཏོང་འདོད་བྱུང་། འོན་ཀྱང་ཐེངས་འདི་གཅིག་པུས་ཡར་རྒྱས་ཆེན་པོ་དཀའ་ཡང་། ཕྲད་དང་རྣམ་དབྱེ་སོགས་དོན་དག་རེ་ཟུང་ཐོག་ཕན་ཐོགས་ཕྲན་བུ་ཡོང་གི་འདུག འདིར་ཕེབས་མཁན་མང་ཆེ་བས་བོད་ཡིག་སྦྱོང་རྗེས་མ་གཞུང་གི་ལས་ཀ་རག་ཆེད་ཡིན་པ་ཞིག་ལ་མཐོང་སོང་། འོང་ཀྱང་ང་རང་གི་བསམ་པར། ང་ཚོའི་རྒྱུ་ནོར་རྩ་ཆེ་ཤོས་དེ་བོད་ཀྱི་སྐད་ཡིག་ཡིན་སྟབས། བོད་ཡིག་སྦྱོང་རྒྱུ་དེ་བོད་གཞུང་གི་ལས་ཀ་རག་མིན་ཙམ་མིན་པར། རྗེས་མ་ལས་ཀ་གང་འདྲ་ཞིག་བྱས་ཀྱང་སོ་སོའི་སྐད་ཡིག་སྲ་ཐག་ཐག་ཅིག་ཤེས་ན་རང་ཉིད་ལ་སྤོབས་པ་ཡོང་གི་རེད། རྒྱལ་ཁབ་གཞན་གྱི་ཡི་གེ་རིམ་བཞིན་ཤེས་འགྲོ་བ་ཞིག་རེད་ལ། ཕྲན་བུ་ཞིག་ལས་མ་ཤེས་ཀྱང་འགྲིག་འགྲོ་བ་རེད། ཅེས་བརྗོད་བྱུང་།

ཨ་མེ་ཌ་བྷ་ཌིའི་སན་ཊི་ཛ་ཝར་སི་མཐོ་སློབ་ནང་དབྱིན་ཇིའི་རྩོམ་རིག་སྟེང་སློབ་གཉེར་བྱེད་བཞིན་པ་བསྟན་འཛིན་ལྷ་སྒྲོན་ལགས་ལ། ས་རཱ་མཐོ་སློབ་ཏུ་བོད་ཡིག་ཆེད་སྦྱོང་འཛིན་གྲྭ་ཡོད་པ་ཇི་ལྟར་ཤེས་རྟོགས་བྱུང་བ་དྲིས་པར་ཁོ་མོས་བརྗོད་དོན། གནས་ཚུལ་འདི་དྲ་ཐོག་ནས་ཤེས་སོང་། ངའི་ནང་མི་ལ་དྭགས་ན་ཡོད་པ་རེད། ད་ལོའི་གུང་སེང་སྐབས་ནང་མི་ཚོར། ང་གུང་སེང་ལ་ཡོང་གི་མིན། ས་རཱ་ནས་ཟླ་གཅིག་རིང་བོད་ཡིག་སྦྱོང་གི་ཡིན་ལབ་སྐབས་ཁོང་ཚོས་དེ་ལ་མོས་མཐུན་ཆེན་པོ་གནང་གི་འདུག རང་ཉིད་ལ་རྗེས་མ་བོད་གཞུང་ནང་ལས་ཀ་བྱ་འདོད་ཡོད་པས་ད་ལྟ་ནས་བོད་ཡིག་ཡར་རྒྱས་གཏོང་དགོས་དྲན་གྱི་ཡོད་ཟེར། ཡང་ཁོ་མོར་འདི་འབྱོར་སྐབས་ཚོར་སྣང་གང་འདྲ་བྱུང་ཡོད་མེད་དྲིས་སྐབས། ང་ནང་ལ་གུང་སེང་དུ་འགྲོ་མ་ཐུབ་པར་འགྱོད་པ་མི་འདུག འདིར་བསླེབས་དུས་སྔོན་མའི་སློབ་གྲྭའི་ཁོར་ཡིག་འདྲ་བོ་ཞིག་འདུག་པས་སྐྱིད་པོ་བྱུང་ལ། སྔོན་མ་སློབ་གྲྭ་ནས་སྦྱངས་ཟིན་པ་དྲན་གསོ་དང་བསྐྱར་སྦྱོང་ཞིག་ཀྱང་ཆགས་ཡོང་གི་ཡོད་སྟབས། འདིར་ཡོང་པ་དེ་ང་རང་ལ་ཁེ་ཕན་ཆེན་པོ་རག་འདུག་དྲན་ཡོད། ཅེས་བརྗོད་བྱུང་།

བྷ་རོ་ཌ་མཐོ་སློབ་ཏུ་སྲིད་དོན་ཚན་རིག་ལོ་རིམ་གཉིས་པའི་ནང་སློབ་གཉེར་བྱེད་བཞིན་པ་སྐལ་བཟང་རྒྱལ་མཚོ་ལགས་ལ། མ་འོངས་པར་བོད་ཡིག་ལ་མུ་མཐུད་སྦྱང་བརྩོན་བྱ་རྒྱུའི་བསམ་བློ་ཡོད་མེད་དྲིས་པར་ཁོང་གིས། ང་རང་གཞི་རིམ་སློབ་གྲྭ་ཁག་ནང་ཡོད་སྐབས་ནས་བོད་ཡིག་ཐོག་དེ་ཙམ་སྐྱོ་བོ་མིན། མཐོ་སློབ་ཀྱི་ལོ་གཉིས་རིང་བོད་ཡིག་ལྟ་ཀློག་མ་ཐུབ་པའི་རྐྱེན་གྱིས་ཅུང་ཙམ་སྐྱོ་རུ་ཕྱིན་སོང་། ཐེངས་འདིར་ཡི་གེ་དག་ཆ་དང་ཡིག་གཟུགས་ཚུན་ཡར་རྒྱས་གཏོང་ཐབས་བྱེད་ཀྱི་ཡོད། མ་འོངས་པར་ཡང་མུ་མཐུད་དེ་བོད་ཡིག་ཐོག་སྦྱང་བརྩོན་བྱ་དགོས་བསམ་ཡོད། སྤྱིར་ང་ཚོ་བཙན་བྱོལ་དུ་གནས་ཡོད་སྟབས་དབྱིན་ཡིག་ཤེས་དགོས་ངེས་ཤིག་ཆགས་ཡོད་ཀྱང་། དབྱིན་ཡིག་གི་ཤེས་ཚད་ཡག་པོ་ཡོད་ཀྱང་བོད་ཡིག་ཡག་པོ་མེད་ན། དེ་ནི་ལག་པ་གཡས་པ་མེད་པ་དང་གཅིག་མཚུངས་རེད། བོད་ཀྱི་སྐད་ཡིག་ནི་སོ་སོའི་སྲོག་རྩ་ལྟ་བུ་ཞིག་ཡིན་པས་དབྱིན་ཡིག་ལས་བོད་ཡིག་གལ་ཆེན་པོ་རེད། མ་མཐར་ཡང་རང་ཉིད་གཞུང་ཞབས་སུ་ཞུགས་འདོད་ཡོད་མཁན་ཞིག་ཡིན་ན། བོད་ཡིག་མ་ཤེས་ན་དབྱིན་ཡིག་གཅིག་པུས་ཚུད་ཐབས་ཡོད་པ་མ་རེད། ཅེས་བརྗོད་སོང་།

གསར་འགོད་པ། བནྡེ་སྐྱབས།