བོད་མི་ས་ཡ་དྲུག་གི་མངོན་འདོད་དང་མཐུན་པ་ཞིག་སྒྲུབས་རོཊ།

དུས་ཚོད་ཁྱད་པར་ཅན་ཞིག་གི་སྐབས་སུ་ཚོགས་འདུའི་གྲུབ་ཆ་ཁྱད་པར་ཅན་ཡོད་པའི་སྤྱི་འཐུས་སྐབས་བཅོ་ལྔ་པ་འདིས། ཕྱག་ལས་ཡང་ཁྱེད་པར་ཅན་དང་ནུས་པ་ཅན་ཞིག་གནང་ཐུབ་པའི་རེ་བ་ཡོད་ལ། ༸གོང་ས་མཆོག་གི་དགོངས་གཞི་དང་མཐུན་པ། བོད་མི་ས་ཡ་དྲུག་གི་མངོན་འདོད་དང་མཐུན་པ་ཞིག་བསྒྲུབ་པའི་རེ་འདུན་ཞུ་རྒྱུ་ཡིན། ཞེས་བཀའ་ཁྲི་མཆོག་གིས་གསུངས་ཡོད།

དེ་རིང་ཞོགས་པའི་ཆུ་ཚོད་ ༩ དང་ཕྱེད་ཀའི་སྟེང་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོ་དབུ་འཛུགས་གནང་ཡོད་ཅིང་། ཐེངས་འདིའི་གྲོས་ཚོགས་ནང་སྐབས་བཅོ་ལྔ་པའི་སྤྱི་འཐུས་གསར་པ་ཡོངས་ཚོགས་བཅར་གནང་འདུག གྲོས་ཚོགས་ཀྱི་ནང་དོན་གཙོ་བོ་ཆབ་སྲིད་ཀྱི་གནད་དོན་སྤྱི་དང་། བྱེ་བྲག་རྔ་པ་ཀིརྟི་དགོན་གྲོང་གཉིས་ཀྱིས་མཚོན་པའི་བོད་ནང་གི་ཛ་དྲག་གནས་སྟངས་ལ་བགྲོ་གླེང་དང་། གཞུང་འབྲེལ་ཁྲིམས་སྒྲིག་བསྐྱར་བཅོས་ཟིན་བྲིས་ཚོགས་ཆུང་ཟུར་འཛུགས། དེ་བཞིན། སྤྱི་འཐུས་རྣམ་པ་ཆ་བགོས་ཀྱིས་ས་གནས་ཁག་ཏུ་འཚམས་གཟིགས་སུ་ཕེབས་ཕྱོགས་བཅས་ལ་བགྲོ་གླེང་གཏན་འབེབས་གནང་རྒྱུ་རེད།  
 

གྲོས་ཚོགས་དབུ་འཛུགས་ཐོག་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཏམ་བཤད་གནང་དོན། སྐབས་བཅོ་ལྔ་བའི་སྤྱི་འཐུས་གྲོས་ཚོགས་དེ་ལོ་རྒྱུས་ཀྱི་དཀྱོགས་མཚམས་ཞིག་དང་ལེའུ་གསར་བ་ཞིག ལས་འགན་ཡང་སྔོན་དང་མི་འདྲ་བར་ཆེ་བ་ཡོད་པའི་དུས་ཚོད་ཅིག་ཆགས་ཡོད་ལ། ཚོགས་གཙོའི་ངོས་ནས་ཐེངས་འདིའི་སྤྱི་འཐུས་རྣམ་པ་ཤེས་ཡོན་དང་འཇོན་ཐང་། ཉམས་མྱོང་ཅན་མང་པོ་བསླེབས་བསྡད་ཡོད་པའི་དབང་གིས་གྲོས་ཚོགས་ཀྱི་གནས་ཚད་མཐོ་རུ་འགྲོ་བ་དང་འབད་བརྩོན་གནང་གི་རེད་བསམ་གྱི་ཡོད། གྲོས་ཚོགས་འདིའི་ནང་གི་ལས་དོན་གལ་ཆེ་ཤོས་བོད་པའི་ཆོས་དང་རིག་གཞུང་། ཤེས་ཡོན་དང་ཆབ་སྲིད་ཀྱི་སྐོར་དང་། དེ་བཞིན་རྒྱ་ནག་གི་ཆབ་སྲིད་འགྱུར་འགྲོས་དང་བོད་ནང་གི་གནས་སྟངས། རྒྱལ་སྤྱིའི་ཆབ་སྲིད་འགྱུར་འགྲོས་ལ་བརྟེན་ནས་བོད་ནང་གི་གནས་སྟངས་ལ་ཤུགས་རྐྱེན་གང་འདྲ་ཞིག་ཐེབས་ཀྱི་ཡོད་མེད་སོགས་ཡིན།

འཛིན་སྐྱོང་གི་ཐད་ནས་ཀྱང་བོད་མིའི་སྒྲིག་འཛུགས་ཀྱི་གཞིས་ཆགས་སྲ་བརྟན་དང་དམངས་གཙོའི་འཕེལ་རིམ། ཆབ་སྲིད་ཀྱི་གོ་རྟོགས། ཤེས་ཡོན་ཡར་རྒྱས་སོགས་ལས་དོན་མང་པོ་ཞིག་ཆགས་ཡོད་ལ། དཔལ་འབྱོར་གྱི་ཐད་ནས་གྲོས་ཚོགས་འདིས་དཔལ་འབྱོར་དང་ལས་དོན་སྟངས་འཛིན་བརྒྱུད་ལས་དོན་ཆ་ཚང་འགན་འཁུར་དགོས་ཀྱི་ཡོད་སྟབས། དངོས་ཡོད་གང་ཡིན་ཤེས་པའི་ཐོག་ནས་བཀའ་མོལ་གནང་རྒྱུ་གལ་ཆེན་པོ་ཆགས་ཡོད། ཅེས་གྲོས་ཚོགས་ཀྱི་ལས་དོན་བྱེད་ཕྱོགས་ངོ་སྤྲོད་དང་སྦྲགས། མ་འོངས་པར་ཁྲིམས་གཏན་འབེབས་གཙོས་པའི་ལས་དོན་མང་པོ་ཞིག་གི་ཐད། གྲོས་ཚོགས་ཀྱི་གྲུབ་ཆ་ཚང་བ་ཡོང་རྒྱུར་འབད་བརྩོན་བྱ་རྒྱུ་དང་། གནད་དོན་ཆུང་ཚགས་རིགས་ལ་རྐྱེན་བྱས་ཏེ་རང་ཉིད་ལ་རྒྱབ་སྐྱོར་གནང་མཁན་དང་ལྷག་པར་དུ་བོད་ནང་གི་བོད་མིའི་སེམས་ཤུགས་ཆག་པའི་ལས་ཀ་མི་བྱ་བར་སྔར་དང་མི་འདྲ་བའི་ལས་འགན་གསར་བ་ཞིག་ཕྲག་ཏུ་བབ་ཡོད་པ་ཤེས་པའི་ཐོག་བཅའ་ཁྲིམས་ནང་བཀོད་ཡོད་པའི་ལས་འགན་ཆ་ཚང་འགྲུབ་ཐུབ་པར་བྱ་རྒྱུ་དང་། གྲོས་ཚོགས་ཀྱི་ཕྱི་རུ་རྒྱ་གར་གཙོས་པའི་རྒྱལ་སྤྱིའི་ནང་བོད་དོན་ཐོག་རྒྱབ་སྐྱོར་ཐོབ་པའི་ལས་འགུལ་གང་མང་མང་ཞིག་དང་གང་ཐུབ་ཐུབ་ཅིག་གནང་རྒྱུ་གལ་ཆེན་ཡིན་ཚུལ་ནན་བརྗོད་གནང་སོང་།
 

དེའི་རྗེས་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་སྐབས་བཅོ་ལྔ་པའི་སྤྱི་འཐུས་གསར་པ་རྣམས་ལ་དགའ་བསུའི་འཚམས་འདྲི་དང་སྦྲགས་གཏམ་བཤད་གནང་དོན། ཕྱོགས་གཅིག་ནས་བལྟས་ན་སྐབས་བཅོ་ལྔ་པ་ཞེས་ལབ་ཡོང་དུས་སྐབས་བཅུ་བཞི་པའི་ཕྱག་ལས་གྲུབ་མཚམས་ཡིན་སྟབས། དམངས་གཙོའི་ལམ་སྲོལ་ནང་ནར་སོན་པའི་གྲོས་ཚོགས་ཤིག་ཡིན་པ་མཚོན་ཐུབ་ཀྱི་ཡོད། ཨང་གྲངས་ཀྱི་ངོས་ནས་བལྟས་ན་ཡང་། བོད་པ་དང་རྒྱ་གར། རྒྱ་མི་ཚང་མས་བཅོ་ལྔ་བ་དེ་རྟེན་འབྲེལ་ཡག་པོ་ཞིག་ལ་བརྩི་བཞིན་པ་ཞིག་རེད། ཅེས་དང་།

བཀའ་ཁྲི་མཆོག་གིས་སྐབས་བཅོ་ལྔ་པའི་སྤྱི་འཐུས་ཀྱི་གྲུབ་ཆའི་སྐོར་ལ། སྐབས་བཅོ་ལྔ་བའི་གྲོས་ཚོགས་ཀྱི་གྲུབ་ཆ་ལ་གཞན་དང་མི་འདྲ་བའི་ཁྱད་ཆོས་མང་པོ་འདུག ཁྱད་ཆོས་ག་རེ་འདུག་ཅེ་ན། རྒྱུན་འཛིན་དང་གསར་བརྗེའི་བརྗིད་ཉམས་ལྡན་པ་ཞིག་རྒྱུན་འཛིན་བྱས་ཏེ། བརྒྱ་ཆའི་ལྔ་བཅུ་སྤྱི་འཐུས་རྙིང་པ་དང་བརྒྱ་ཆའི་ལྔ་བཅུ་སྤྱི་འཐུས་གསར་བ་ཆགས་ཡོད་སྟབས། གསར་རྙིང་དེ་ཡང་དོ་མཉམ་པ་དང་སྲོལ་རྒྱུན་དང་གསར་གཏོད་གཉིས་ཀ་མཉམ་ཞུགས་ཐུབ་པ་ཡོང་བའི་གནས་སྟངས་ཆགས་འདུག  དེ་དང་ཆབས་ཅིག་ན་ཚོད་དང་ལོ་ནའི་ཆ་ནས་ཀྱང་། རྒན་གཞོན་གཉིས་ཀ་བརྒྱ་ཆ་ལྔ་བཅུ་འདྲ་བོ་ཆགས་འདུག དེ་དངོས་ནས་མི་རབས་དང་རྒན་གཞོན་མཚམས་སྦྱོར་ཆ་ནས་བལྟས་ནའང་འདྲ་བོ་ཆགས་འདུག  དེ་བཞིན་བོད་ལ་གནའ་སྔ་མོ་ཕོ་མོ་འདྲ་མཉམ་ཟེར་བ་དེ་ཡོད་པ་རེད། ནུབ་ཕྱོགས་པར་ད་ལྟའི་ཆར་ཡང་གང་རེད་ཅེས་བཤད་བསྡད་དགོས་པའི་གནས་སྟངས་རེད། ང་ཚོས་གང་རེད་ཅེས་བཤད་མི་དགོས་པའི་ཐོག་ནས་སྐུ་ལྕམ་མ་སྔར་ལས་མང་བ་ཞིག་གྲོས་ཚོགས་སུ་བསླེབས་བསྡད་ཡོད་སྟབས། དེའི་ཐོག་ནས་བོད་ཀྱི་ཡུལ་གོམས་གཤིས་ལུགས་དེ་རྗེས་ལུས་ཐེབས་མེད་པ་དང་། ནུབ་ཕྱོགས་པར་མ་བསྟུན་པར་ང་ཚོ་སྔོན་ཐོན་ཆགས་ཡོད། ཅེས་གསུངས་སོང་།

ཁོང་གིས་མུ་མཐུད་དུ་གསུངས་དོན། ད་རེས་དེ་ལས་ལྷག་པའི་དགའ་བསུ་ཞུ་དགོས་པ་ཞིག་ནི། གྲོས་ཚོགས་ཀྱི་གྲུབ་ཆ་འདིའི་ནང་མཁས་དབང་དང་དགེ་བཤེས། ཨཱ་ཅརྱ། རྩོམ་པ་པོ། ཞུ་དག་པ། དགེ་རྒན་བཅས་མང་པོ་ཞིག་ཕེབས་འདུག དེ་ཧ་ཅང་གནད་འགག་ཆེན་པོ་ཞིག་རེད་བསམ་གྱི་ཡོད། གྲོས་ཚོགས་སྔོན་མའི་ནང་དུ་ང་ཚོར་དགེ་བཤེས་དང་ཨཱ་ཅརྱ་མང་པོ་ཡོད་པ་རེད། གྲོས་ཚོགས་འདིའི་ནང་དེ་ལས་མང་བའི་མཁན་པོ་དང་སློབ་དཔོན། དེ་བཞིན་རྒྱུན་ཏུ་ཤེས་ཡོན་སློབ་གསོ་དང་ཉམས་ཞིབ་ཀྱི་ཕྱག་ལས་གནང་མཁན་མང་པོ་ཡོད་པ་དང་ཆབས་ཅིག  སྤྱི་ཚོགས་ལས་འགུལ་བའི་ཁྲོད་ནས་ཀྱང་མང་པོ་ཞིག་ཕེབས་བསྡད་ཡོད་པ་རེད། ང་ཚོ་གྲངས་ཀ་བཞི་བཅུ་ཞེ་གྲངས་ཤིག་ལས་མེད་ཀྱང་། གྲངས་ཀ་དེའི་ནང་སྤྱི་ཚོགས་ཀྱི་གནས་བབ་ཡོངས་སུ་རྫོགས་པ་མཚོན་ཐུབ་པ་ཞིག་དང་ཆ་ཤས་ཡོངས་སུ་རྫོགས་པའི་སྐུ་ཚབ་ཕེབས་ཐུབ་པའི་གནས་སྟངས་ཤིག་ཆགས་ཡོད། ལྷག་པར་དུ་ཚད་མ་རིག་པ་ལ་སྦྱངས་པའི་ཚོགས་མི་མང་པོ་ཡོད་སྟབས། མ་འོངས་པའི་བགྲོ་གླེང་དེ་རིག་པའི་རྣམ་བཞག་དང་མཐུན་པ་ཞིག་ཡོང་བའི་ཐུགས་རེ་ཆེན་པོ་ཡོད། ཅེས་གསུང་བྱུང་།

ཡང་ཁོང་གིས་གྲོས་ཚོགས་སྐབས་སྔོན་མ་དག་ལས་ཀྱང་སྐབས་བཅོ་ལྔ་པར་དབང་ཚད་ཆེ་སྐོར་གསུངས་དོན། སྐབས་དེ་དུས་ཀྱི་གནས་བབ་ལས་ཀྱང་སྐབས་བཅོ་ལྔ་བའི་གྲོས་ཚོགས་ཀྱི་གནས་བབ་དེ་མཐོ་རུ་ཕྱིན་ཡོད། གང་ཡིན་ཞེ་ན། ཁྲིམས་ལུགས་གང་འདྲ་ཞིག་ཁྲིམས་སུ་བཅོས་ཀྱང་གྲོས་ཚོགས་ཀྱིས་ཁྲིམས་སུ་བཅོས་པ་དེ་མཐའ་མ་རེད་མ་གཏོགས། དེ་ལ་བསྐྱར་དུ་ཕྱིར་སློག་གནང་བའི་སྐུ་དབང་སུ་ལའང་གནང་ཡོད་པ་མ་རེད། དེར་བརྟེན། གྲོས་ཚོགས་ཀྱི་དབང་ཚད་ཚད་འཛིན་བྱེད་མཁན་གྱི་ཆ་རྐྱེན་ཞིག་ཉུང་དུ་ཕྱིན་པ་རེད། ད་དུང་གནད་འགག་ཆེ་བ་ཞིག་ནི། བཅའ་ཁྲིམས་དོན་ཚན་ང་ལྔའི་ནང་གི་གྲོས་ཚོགས་ཕྱི་འགྱངས་བྱེད་པའི་ཆ་རྐྱེན་དང་ང་དྲུག་ནང་གི་ཁྲིམས་དང་སྒྲིག་གཞི་མང་མོས་ཐག་གཅོད་བྱེད་པའི་ཆ་རྐྱེན་གཉིས་ཀ་ཕྱིར་བསྡུ་གནང་ཡོད་སྟབས། གྲོས་ཚོགས་ཚིག་དང་དོན་གཉིས་ཀའི་ཆ་ནས་བླ་ན་མེད་པ་ཆགས་ཡོད། ཅེས་གསུངས་བྱུང་།

མཐའ་མར་ཁོང་གིས། འཛིན་སྐྱོང་བཀའ་ཤག་དེ་ཕྱོགས་གཅིག་ནས་བཀའ་བློན་ཁྲི་པ་ཐད་ཀར་མང་ཚོགས་ཀྱི་འོས་འདེམས་བྱས་པའི་མི་རིགས་དང་ཆབ་སྲིད་ཀྱི་མགོ་ཁྲིད་མཚོན་ཐུབ་པ་ཞིག་ཆགས་ཡོད། ཡིན་ནའང་ཁོང་གི་དབུ་འཁྲིད་པའི་ཕྱག་ལས་གནང་སྟངས་གྲོས་ཚོགས་ལ་འགན་འཁུར་དང་ལན་འདེབས། གྲོས་ཚོགས་ཀྱི་ལམ་སྟོན་ལག་ལེན་བསྟར་བའི་ཐོག་ཕེབས་རྒྱུ་ལས་གྲོས་ཚོགས་ལ་འཛིན་སྐྱོང་གིས་ལམ་སྟོན་བྱེད་པའི་ཆ་རྐྱེན་དང་ལམ་ཁ་མེད། ཅེས་དང་། དུས་ཚོད་ཁྱད་པར་ཅན་ཞིག་གི་སྐབས་སུ་ཚོགས་འདུའི་གྲུབ་ཆ་ཁྱད་པར་ཅན་ཡོད་པའི་སྤྱི་འཐུས་སྐབས་བཅོ་ལྔ་པ་འདིས། ཕྱག་ལས་ཡང་ཁྱེད་པར་ཅན་དང་ནུས་པ་ཅན་ཞིག་གནང་ཐུབ་པའི་རེ་བ་ཡོད་ལ། དེ་དང་ཆབས་ཅིག་༸གོང་ས་མཆོག་གི་དགོངས་གཞི་དང་མཐུན་པ་ཞིག་དང་བོད་མི་ས་ཡ་དྲུག་གི་མངོན་འདོད་དང་མཐུན་པའི་ལས་དོན་བསྒྲུབ་པའི་རེ་འདུན་ཞུ་རྒྱུ་ཡིན། ཞེས་གསུངས་སོང་།

གསར་འགོད་པ། དོན་གོ